Мен 1955 јылда чыккам ла ӱч уулчактыҥ эҥ ле кичинеги болгом. Бис Тӱштӱк Финляндияда чыдаганыс. Эмди ондо Ва́нтаа деп кала турат.

Мениҥ чыгарымнаҥ канча да јыл озо энем сууга чӧҥӱрилип, Иегованыҥ Керечизи болуп калган. Је адам, энемниҥ Кудайына удурлажып туратан. Ол бисти чындыкка ӱредерге ле јуунга апарарга болдыртпай туратан. Оныҥ учун адам јок болзо, энем бисти чындыкка ӱредетен.

Мен кичинек ле тужымда Иегованыҥ сӧзин угарым деп, бек шӱӱп алгам. Бир катап јети јашту болорымда, школдо финндердиҥ ве́рилятют (каннаҥ эдилген блиналар) деп курсагын јибеске мойноп ийгем. Мынаҥ улам ӱредӱчи аайы-бажы јок атыйланала, меге байагы курсакты албадап јидирерге сананган. Ол бир колыла блиналу вилка тудунып алала, экинчи колыла оозымды ачарга јадарда, оныҥ колындагы вилканы чарчада согуп ийгем.

Меге 12 јаш болордо, адам божоп калды. Оныҥ учун мен јуундарга јаантайын јӱрӱп баштадым. Јуундагы акалар меге ајару эдип турарда, кӧгӱс јанынаҥ ӧзӱп баштагам. Кажы ла кӱн Агару Бичикти кычырып, бистиҥ бичиктерди шиҥдеп туратам. Карын, мен бу немелерге ӱренип алгам. Мынаҥ улам сууга чӧҥӱрилер кӱӱним келген. Оноҥ бир ле кӱн 1969 јылда, куран айдыҥ  8-чи кӱнинде сууга чӧҥӱрилдим. Ол тушта меге 14 јаш болгон.

Школды божотконымныҥ кийнинеҥ удабай ла текши пионер болуп иштеп баштагам. Оноҥ канча да неделе ӧдӧ берерде, Финляндияныҥ Пи́елавеси деп јериндӧӧн кӧчӧ бергем. Анда јарчылар јетпей турган болгон.

Пиелавеси деп јерде Си́ркка деп сыйынга туштадым. Оныҥ јобожын ла Кудайды тыҥ сӱӱп турганын тӱрген ле ајарып ийдим. Ол акча-јӧӧжӧгӧ бир де тартылбайтан ла кемзинчек сыйын болгон. Бис экӱлегис ле кайда да болзоос, кандый да ишке кӧстӧлгӧн болзоос, Иеговага бастыра ийде-кӱчисти берип иштеерге кӱӱнзегенис. 1974 јылдыҥ тулаан айыныҥ 23-чи кӱнинде алыжып алганыс. Оноҥ дезе медовый айдыҥ ордына Ка́рттула деп кичинек каладӧӧн кӧчӱп ийдис. Нениҥ учун дезе анда кӧп јарчылар керек болгон.

Тойдыҥ кийнинеҥ ле Иегова, Кудайдыҥ Каандыгын баштапкы јерге тургусаас, јӱрӱмге керектӱ ончо неме бисте болор деп кӧргӱсти (Матф. 6:33). Темдектезе, Карттулада бисте машина јок болгон. Бис озо баштап велосипедтӱ маҥтатканыс. Је ондо кыштар соок болотон. Оныҥ учун биске машина коркыш керектӱ болгон. Нениҥ учун дезе јуунныҥ јарлайтан јери сӱреен јаан. Је бисте машина алатан акча јок болгон.

Је бир катап акам айылдап келеле, машиназын биске артыргызып койгон. Машинаныҥ страховказы да тӧлӧлип калган болтыр. А биске јӱк ле бензин алар керек болгон. Анайып, Иегова бисти машинала јеткилдеп салды.

Иегова биске акча-јӧӧжӧ јанынаҥ болужарга турганын кӧргӱзип берген. А биске дезе јӱк ле Каандыктыҥ ижин бӱдӱрери арткан.

1978 јылда бис Пионер иштиҥ сургалында ӱренип турарыста, ӱредӱчилердиҥ бирӱзи, Ра́ймо Куо́кканен a, бисти Галаадтыҥ сургалына ӱренерине заявление бичизин деп кӱӱнзеткен. Оныҥ учун бис экӱ английский тил ӱренип баштадыс. Је анкетаны бичигелегисте 1980 јылда бисти Финляндияныҥ  Бет-Элине кычырган. Ол ӧйдӧ Бет-Элдиҥ улузын Галаадтӧӧн кычырбайтан. Је бис экӱ кайда иштеерин Иегова ла кӧрзин деп сананала, Бет-Элдӧӧн јӱрӱп ийгенис. Андый да болзо, английский тилди оноҥ ло ары ӱренгенис. Кайдаҥ билер, кийнинде Галаадка ӱренетен арга келишсе, английский тил керектӱ болор.

Канча да јылдаҥ Башкару јӧп Бет-Элде иштеп турган улусты Галаад сургалда ӱренерин јарадып ийген. Бис капшай ла анкетаны бичип ийгенис. Је Бет-Элде иштеерге јарабай турганынаҥ эмес, биске ондо иштеерге сӱреен јараган, бис дезе болужыс Иеговага кайда эҥ керектӱ болор, ондо иштеерге кӱӱнзегенис. Оноҥ бир эмеш ӧйдӧҥ бисти Галаадтыҥ 79-чы клазына кычырган. А 1985 јылда, сыгын айда выпуск болгон кийнинеҥ, бисти Колумбиядӧӧн аткарып ийген.

Колумбияда бис озо баштап Бет-Элде иштеген болгоныс. Мен кӱчим јеткенче албадангам, је бир јылдаҥ бистиҥ ишти солып ийзин деп, акалардаҥ сурагам. Мындый суракту мен акаларга јӱрӱмимде бир ле катап баштанган болгом. Оноҥ бисти Уи́ла деп департаменттиҥ Не́йва деп јаан калазындӧӧн миссионерлер эдип аткарган.

Јарлаар иш меге јаантайын јараган. Финляндияда пионер болуп баштап турарымда кезикте эртен туранаҥ ла ала орой эҥир киргенче јарлап туратам. Сирккала алышкан кийнинде бис экӱ база кере тӱжине јарлап туратаныс. Ыраак јерлердӧӧн јарлап барзаас, машинада ла конып калатаныс. Анайып ӧй јылыйтпай ла эртен туранаҥ ала јарлайтан арга болотон.

Миссионердиҥ ижи пионер болгон тужыстагы отты ойтодоҥ кӱйдӱрген. Бистиҥ јууныс јаандап, ӧзӱп, ака-эјелер бой-бойлорына сӱӱштӱ, тоомјылу ла быйанду баштанган.

Нейваныҥ јанында калаларда бир де Керечи јок болгон. Мынаҥ улам мен ондо јадып турган улус сӱӱнчилӱ јарды канайып уккай не деп санааркагам. Ондогы партизандардаҥ улам ӧскӧ јердеҥ келген улуска ары барары јеткерлӱ болгон. Оныҥ учун мен ол калаларда јадып турган улустыҥ кемизи-кемизи чындыкты алынган болзо деп санангам. Ол кӧгӱс јанынаҥ ӧзӱп, чӧҥӱрилип, кийнинде тӧрӧл калазындӧӧн јанып, јарлаар эди. Бу керегинде Иеговага мӱргӱп туратам. Је кӧрӧр болзо, Иегованыҥ каруузы мениҥ сананганымнаҥ артык болгон.

Удабай ла мен Ферна́ндо Гонса́лес деп јиит кижиле Агару Бичикле ӱредӱ баштадым. Ол Нейваныҥ јанындагы Альхеси́рас деп калада јаткан. Анда Керечилер јок болгон. Фернандо дезе Нейвада иштеген. Ого јетире 50 километр барар керек. Ол ӱредӱге јакшы белетенип алатан ла јуундарга тургуза ла јӱрӱп баштаган. Оноҥ ол баштапкы ла неделенеҥ ала, каланыҥ улузын јууп алала, билип алганын олорго куучындап туратан.

Фернандо 1990 јылдыҥ чаган айында ӱренип баштаганынаҥ бери алты ай ӧдӧ берерде сууга чӧҥӱрилген. Оноҥ ол текши пионердиҥ ижин баштаган. Эмди Альхесирас деп калада Иегованыҥ Керечизи бар. Оныҥ учун филиал ары специальный пионерлер аткарган. Не дезе эмди ондо андый  тыҥ јеткерлӱ эмес болгон. 1992 јылдыҥ кочкор айында ол калада јуун тӧзӧлгӧн.

Фернандо јаҥыс ла бойыныҥ калазында јарлабаган. Ол Ольга деп сыйынла алыжала, Сан-Висе́нте-дель-Кагуа́н деп каладӧӧн кӧчкӧн. Анда Иегованыҥ Керечилери база јок болгон. Олор ондо јуун тӧзӧӧргӧ болушкан. 2002 јылда Фернандо аймак кӧрӧӧчиниҥ ижине кӧстӧлгӧн. Бу ишти ол ӱйиле кожо эмдигенче бӱдӱрет.

Фернандоло болгон учурал мени кӧп немеге ӱреткен. Мен Иегованаҥ јаантайын болуш сурап турар керек ле керектӱ немени чокум сурап турар керек деп оҥдоп алгам. Иегованыҥ эдип болбос немези јок. Нениҥ учун дезе кыраныҥ ээзи Иегова болуп јат (Матф. 9:38).

1990 јылда бисти аймак кӧрӧӧчиниҥ ижине кӧстӧгӧн. Баштапкы ла бистиҥ аймак Колумбияныҥ тӧс калазы — Богота болгон. Озо баштап бис экӱ бу јакылтаны бӱдӱрип болбозыс деп санааркай бергенис. Нениҥ учун дезе бис кандый да аҥылу јайалта јок тегин ле улус болгоныс. Анайда ок јаан мегаполисте бир де јатпаганыс. Је Филиппыдагыларга 2:13-те (JT) айдылган: «Кудай бойыныҥ табы аайынча слерди тыҥыдып, слерге оныҥ табын бӱдӱретен кӱӱн де, ийде-кӱч те берет». Бу сӧстӧрдиҥ биске канайып бӱткенин бойыстыҥ кӧзисле кӧрдис.

Кийнинде, бистиҥ аймак Медельин болгон. Бу керегинде мен куучынымныҥ бажында айткан болгом. Андагы улус јаман, каршулу керектерге ӱренижип, ого ајару да этпей туратан. Бир катап Агару Бичикле ӱредӱ ӧткӱрип јадарымда айылдыҥ ла јанында адыжа бергендер. Мен капшай ла јердӧӧн јада берерге санангам. Је Агару Бичик ӱренип турган кижи мыны керекке албай, оноҥ ло ары абзацты кычырган. Абзац божой берерде, ол: «Акыр, чӱрче ле» — деп айдала, тышкары чыга берген. Бир канча ӧйдӧҥ ол бойыныҥ уулчактарыла кирип келеле, токуналу айткан: «Јаманымды ташта, меге бу экӱни айылдӧӧн кийдирип ийер керек болгон».

Бисте оноҥ до ӧскӧ јеткерлӱ учуралдар болуп туратан. Бир катап бис экӱ айылдар сайын јарлаганыс. Оноҥ кенете бастыра бойы куугарып калган Сиркка јӱгӱрип келеле: «Мендӧӧн јаҥы ла аткылады!» — деерде, бастыра бойым јымырай бергем. Кийнинде, кӧрӧр болзо, Сиркканы аткан эмес, ӧскӧ кижини адарга сананган болуптыр. А Сиркка дезе, оныҥ јанында болуп калган.

Бир канча ӧйдӧҥ бис мындый јӱрӱмге ӱрениже бергенис. Мындагы Керечилер мынаҥ да јаман айалгаларга туштап јат. Олордыҥ јалтанбазын кӧрӱп, бистиҥ кӱӱн-санаас кӧдӱрилген. Иегова олорго болужып турганда́, биске де болужар деп сананганыс. Бис јаантайын јербойыныҥ аксагалдарыныҥ јӧптӧриле јӱрӱп, јеткерге кирбеске ајарыҥкай болгоныс. Артканын Иегованыҥ колына берип салатаныс.

Кезикте јарлаар иште каткымчылу да учуралдар болуп туратан. Бир катап  тышкары кыйгы-кышкы угулган. Мен эки ӱй кижи тартыжып јат деп сананала, олордыҥ керишкенин кӧрӧргӧ кӱӱнзебегем. Је айылдыҥ ээзи мени чыгып, кӧрзин деп айтты. Кӧрӧр болзо, эки попугай ӱй улустыҥ «керижип» јаткан ӱндерин ӧткӧнип јаткан болтыр.

1997 јылда мени Агару иштиҥ чыҥдыйын бийиктедип турган сургалдыҥ b ӱредӱчизине кӧстӧгӧн. Меге теократиялык сургалдарда ӱренерге јарап туратан. Је мен сургалдардыҥ бирӱзин ӧткӱрерим деп, бир де сананбагам.

Соҥында мени областной кӧрӧӧчиниҥ ижине кӧстӧгӧн. Бу ишти јоголтып саларда мен ойто аймак кӧрӧӧчиниҥ ижин эдип баштагам. Айдарда, ӱредӱчиниҥ ле аймак кӧрӧӧчиниҥ ижин 30 јылдаҥ ажыра бӱдӱргем. Бу јылдардыҥ туркунына менде кӧп алкыштар болгон. Је бу јол јаантайын розаларла јайылып калган болбогон. Бу не дегени?

Мен бир эмеш кату кижи болгом. Мындый кылык-јаҥым кӱчтерди ӧдӧргӧ болужып туратан. Је кезикте мен ака-эјелердиҥ бир ле кичинек јастыразын тӱзедерге албаданып тура, ажа коно беретем. Бир катап акаларды сӱӱшке ле керсӱ болорына ӱредерге коркышту ла тыҥ албадангам. Је ол ло ӧйдӧ мен бойымды тууразынаҥ кӧргӧн болзом, карын сӱӱш меге јетпей турган болтыр (Рим. 7:21—23).

Кезикте бойымныҥ јастыраларымнаҥ улам тыҥ кунуга беретем (Рим. 7:24). Бир катап Иеговага мен миссионердиҥ ижин артыргызып, Финляндиядӧӧн кайра јанайын да деп айдынган тужым бар. Је ол ло кӱн эҥирде јуунныҥ туштажузы болгон. Анда Иегова мени оноҥ ло ары иштезин ле јастыраларымды тӱзетсин деп, јап-јарт кӧргӱзип берген. Мӱргӱӱлиме Иегованыҥ мындый каруу бергенин эмдиге јетире ундыбай јадым. Канча јылдардыҥ туркунына Иегова мени чыдажып, јастыраларымды тӱзедерге болушкан. Бу учун Иеговага сӱреен јаан быйаным айдадым.

Мен Сиркка ӱйимле кожо јӱрӱмистиҥ кӧп сабазын Иеговага толо берип, иштеп салганыс. Бис ого мындый арга бергенине сӱреен јаан быйанду болодыс. Анайда ок Иеговага бастыра јӱрӱмиме јаантайын јӧмӧжип јӱрген ӱйим учун быйаным айдадым.

Удабас 70 јажым једе берзе, мен сургалдар ӧткӱрбей барарым ла аймак кӧрӧӧчи болбой барарым. Је мен санааркабай јадым. Нениҥ учун дезе мындый немени јарт оҥдоп алгам: Иегова бисти ого јобош болуп, акту јӱрегинеҥ иштезин деп кӱӱнзейт. Анайып, Иегованыҥ јӱрегин сӱӱндиредис (Мих. 6:8; Марк 12:32—34). А бис Иегованы јаан молју да јогынаҥ мактаар аргалу.

Бастыра јӱрӱмимди сананзам, Иегова меге молјуларды улустаҥ артык та болгоным учун эмес, јайалталу да болгоным учун эмес, је јалакайынаҥ улам берген деп јарт оҥдоп јадым. Нениҥ учун дезе мен сӱреен кӧп јастыраларлу кижи. Молјуларымды јӱк ле Иегованыҥ болужыла бӱдӱрип јадым. Ӧскӧртӧ айтса, ийде-кӱчим јетпей турган тужымда, менде Иегованыҥ ийде-кӱчи иштеп јат (2 Кор. 12:9).