1. Иегова кайра јанып келген ишчизин кӧрӱп, нени сезет?

ӦТКӦН јӧрмӧлдӧ кӧргӧнисле, Иегова бойын кажы ла койын кичееп турган кӱдӱчиге тӱҥдештирет. Койлорыныҥ бирӱзи јылыйып калза, ол оны бедиреп барар. Иегова оноҥ ырап калган израильтяндарга: «Меге кайра келигер, ол тушта мен де слерге јууктаарым» — деп айткан. Иегова эмди де анайып кӱӱнзеп јат. Ол: «Мен солынбай јадым» — деп айдат (Мал. 3:6, 7). Иисустыҥ сӧстӧриле болзо, Иегова ангелдериле кожо ишчилериниҥ бирӱзи де јанып келзе сӱӱнип јат (Лука 15:10, 32).

2. Бу јӧрмӧлдӧ нени шӱӱжерис?

² Иисустыҥ ӱч укаа сӧзин кӧрӱп ийектер. Бу укаа сӧстӧр, Иегованаҥ тууралап калган улуска канайып болужарын кӧргӱзет. Анайда ок биске, јылыйып калган койлорго Кудайга кайра јанарга болужатан кандый кылык-јаҥдар керек деп кӧрӱп ийерис. Бого ло коштой, кӧгӱс јанынаҥ уйадап калган ака-эјелерге болушканыс, биске кандый алкыштар экелерин кӧрӱп ийерис.

3, 4. Лука 15:8—10-до айдылган ӱй кижи, јылыйган мӧҥӱн акчаны таап аларга, нениҥ учун тыҥ албаданган?

³ Биске Иеговага кайра јанып келерге турган улусты албаданып бедиреер керек. Луканыҥ Сӱӱнчилӱ јарында Иисус, јылыйган акчаны (драхманы) бедиреген ӱй кижи керегинде укаа сӧс айткан. Бу укаа сӧстӧҥ, јылыйган акчаны бедиреерге јеҥил эмес деп кӧрӱнет. (Лука 15:8—10 кычырыгар.)

⁴ Иисус јылыйган акчазын таап алган ӱй кижиниҥ сезимдерин бичийт. Бу акча ого сӱреен баалу болгон. Иисустыҥ ӧйинде, Израильдеги кезик энелер кызыныҥ тойына он мӧҥӱн акча сыйлап туратан. Јылыйган акча бу сыйдыҥ акчазы болгон болор. Ӱй кижи акча јерге тӱшкен болбой деп сананат,  оныҥ учун ол лампазын кӱйдӱрип, акчаны бастыра јердеҥ бедирейт. Је не де табылбаган. Кичинек мӧҥӱн акчаны кӧрӱп ийерге, оныҥ лампазы арай ла караҥуй болгон болор. Мынаҥ улам ол айылдыҥ ичин јазаптыра јалмап јат. Јалмап турала, тоозынныҥ ортозынаҥ јылыйган мӧҥӱн акчаны кӧрӱп ийет. Ол сӱреен тыҥ сӱӱнет. Сӱӱнгенине, ӱреелерин, айылдаштарын айылына кычырган.

5. Нениҥ учун јарлабай ла туштажуларга јӱрбей барган ака-эјелерди табарга кӱч болот?

⁵ Иисустыҥ укаа сӧзин кӧрзӧ, јылыйган немени таап аларга ийде-кӱч салар керек болот. Анайып ла биске, јууннаҥ ырап калган ака-эјелерди таап аларга, кӧп ийде-кӱч салар керек. Андый ака-эјелер бисле кӧп јылдардыҥ туркунына куучындашпаган эмезе ӧскӧ јерге кӧчӧ берген болор. А андагы ака-эјелер олорды билбес болордоҥ айабас. Је андый да болзо, шак ла эмди олордыҥ кемизи-кемизи Иеговага кайра јанып келерге тыҥ кӱӱнзеп турган. Олор јуундагы ака-эјелерле кожо Кудайга ойто иштеерге кӱӱнзеп јат. Биске олорго болужар керек.

6. Бастыра јуун јууннаҥ ырап калган ака-эјелерди канайып бедиреер аргалу?

⁶ Јууннаҥ тууралап калган ака-эјелерди кемдер бедиреер аргалу? Бистер ончобыс: аксагалдар, пионерлер, јарлабай ла туштажуларга јӱрбей барган јарчылардыҥ тӧрӧӧн-туугандары ла ӧскӧ дӧ јарчылар. Слердиҥ најылараардыҥ эмезе јууктараардыҥ ортозында, јууннаҥ ырап калган улус бар ба? Ол эмезе слер андый јарчыга айылдар сайын јарлап јӱреле эмезе кӧп улусту јерлерде јарлап јӱреле туштаган болороор. Андый болзо, јарлабай барган јарчы аксагалдарла јолугарга кӱӱнзеп турган болзо, слер оныҥ данныйларын олорго берип ийер аргалу деп јартап беригер. Ол тушта аксагалдар олорго јолугып ийер.

7. Слер Томас деп аксагалдаҥ неге ӱренедигер?

⁷ Иеговага кайра јанып келерге турган улусты анчада ла аксагалдар бедиреер учурлу. Олор мыны канайып эдер аргалу? Испанияда јадып турган Томас * деп аксагалдыҥ темин кӧрӱп ийектер. Ол 40 ажыра ака-эјелерге јуунга кайра јанып келерге болушкан. Томас куучындайт: «Мен башка-башка ака-эјелердеҥ, эм тура јууннаҥ ырап калган јарчылардыҥ кайда јадып турганын билер бе деп сурап угадым. Эмезе јуунныҥ туштажуларына јӱрбей турган улустаҥ кем-кем сагыжына кирет пе деп сурап јадым. Олордыҥ кӧбизи андый ака-эјелерди бедиреерге кӱӱнзеп јадылар. Бу ака-эјелерди табып алган кийнинде олорго барып турзам, олордыҥ балдары ла ӧскӧ дӧ тӧрӧӧндӧри керегинде сурайдым. Алдында кезик мындый христиандар јуунныҥ туштажуларына бойыныҥ балдарыла кожо келип туратан. Ол балдар јарчылар болгон болор. Андый балдарга бис болужып ийзеес, олор до Иеговага кайра келердеҥ айабас».

8. Лука 15:17—24-лӧ болзо, адазы кинчегин алынган уулын канайып уткыган?

⁸ Иегова кайра јанып келерге турган улуска болужарга биске кандый кылык-јаҥдар керек? Адазыныҥ айылынаҥ јӱре берген кедер уул керегинде Иисустыҥ укаа сӧзин кӧрӱп ийектер. (Лука 15:17—24 кычырыгар.) Бис бу укаа сӧстӧҥ неге ӱренер аргалу? Иисустыҥ айтканыла, кедер уул санаа алынып, адазына кайра јанып келген. Уулы једип келерде, адазы ого удура јӱгӱрип, оны куучактап јат. Анайып адазы уулын тыҥ сӱӱп турганын кӧргӱскен. Је уулы бойын тыҥ јинип јат. Ол бойын адазыныҥ сӱӱжине турбас кижи деп сананган, оныҥ учун адазына јалчы болорго суранып јат. Уулы адазына бойыныҥ сезимдерин куучындап турарда, адазы ого бир де ачынбаган. Карын оны килеп, јанып келгенине сӱӱнген. Ол уулына јалчыга баштанган  чылап эмес, а сӱӱген уулына чылап баштанган. Кинчегин алынган уулына бойыныҥ сӱӱжин кӧргӱзерге, адазы јаан байрам ӧткӱрип, ого эҥ јакшы кийим кийдирген.

9. Јууннаҥ ырап калган ака-эјелерге Иеговага кайра јанып келерге болужарга, биске кандый кылык-јаҥдар керек? (« Кайра јанып келерге турган улуска болужарга нени эдер керек?» деген рамканы кӧрӱгер.)

⁹ Иегова бу укаа сӧстӧги адага тӱҥей. Ол бистиҥ јууннаҥ ырап калган ака-эјелеристи сӱӱп јат, оныҥ учун олорды кайра јанып келзин деп кӱӱнзейт. Бис Иегованаҥ тем алзаас, олорго болужар аргалу. А болужарга чыдамкай болор керек, олорды килеер ле сӱӱр керек. Нениҥ учун бу кылык-јаҥдар керектӱ болот ло бис олорды канайып кӧргӱзер аргалу?

10. Кемге-кемге Иеговага ойто јууктазын деп болужарга, биске нениҥ учун чыдамкай болор керек?

¹⁰ Биске чыдамкай болор керек, нениҥ учун дезе кӧгӱс јанынаҥ јазыларга ӧй керек болот. Јууннаҥ ырап калган болгон ака-эјелердиҥ айтканыла болзо, олорго Иеговага кайра келерге, аксагалдардыҥ ла ӧскӧ дӧ христиандардыҥ кӧп катап келгени болушкан. Тӱштӱк-Кӱнчыгыш Азияда јадып турган Нанси деген эје мынайып бичиген: «Јуунда бир эје меге јуук најы болгон. Ол меге сӱрекей кӧп болушкан ла мени јаан эјези чилеп сӱӱген. Качан да бис экӱ кӧп куучындажып туратаныс. Бу эје меге ол јакшы ӧйлӧрди эске алындырып туратан. Анайда ок сезимдеримди айдынып аларга турзам, ол мени јазап угуп, јакшы јӧптӧр айдып беретен. Бу эје меге кандый ла ӧйдӧ болужарга белен чын најы болгон».

11. Ачынып калган улуска болужарга, биске нениҥ учун олорды килеер керек?

¹¹ Улусты килеери сильнодействующий эмге тӱҥей, ӧскӧртӧ айтса, тыҥ ачынган сезимдеристи јымжадып салат. Кезик христиандар  јарлабай ла јуунныҥ туштажуларына јӱрбей барган, нениҥ учун дезе канча да јыл кайра јуунда олорды та кемде ачындырып ийген. Олордыҥ ачыныжы эмдигенче ӧтпӧй турган болор. Андый сезимдердеҥ улам олор Иеговага кайра келип болбой јат. Андый ака-эјелер, олорго несправедливо баштанган деп, сананып турган болор. Оныҥ учун олорго јалакай ла оҥдойтон најы керек болот (Иак. 1:19). Кандый да ӧйдиҥ туркунына јуунга јӱрбеген Мария эске алынат: «Меге мени угатан, токунадатан, јӧп беретен ле болужатан најы керек болгон».

12. Иегованыҥ сӱӱжи јууннаҥ ырап калган ака-эјелерге јуунга кайра јанып келерге канайып болужат? Тем куучындап беригер.

¹² Иегованыҥ ишчилерине сӱӱжин аргаданатан бууга тӱҥдештирерге јараар. Темдектезе, слер ачык талайда чӧҥӱп јатканаар деп сананып ийзеер. Слерди айландыра коркышту јаан толкулар кӧдӱрилип јат. Је кенетийин та кем де слерге спасательный круг таштап берет. Слер андый болуш учун быйанду болороор эмей, нениҥ учун дезе спасательный круг слерге чӧҥбӧскӧ болужат. Је јӱк ле кругтыҥ болужыла слер аргаданып болбозоор. Слер кемеге чыкпазаар, соок сууга божоп каларыгар. Оныҥ учун слерге аргаданып алатан буу таштап береле, суунаҥ чыгарып алатан кижи керек болот. Иегова оноҥ ырап калган израильтяндарга мынайып айткан: «Мен слерди бойымныҥ сӱӱжимле јууктадып алгам» (Ос. 11:4). Бӱгӱнги кӱнде Иегова ого иштебей барала, санааркаштардыҥ ла кӱчтердиҥ талайында чӧҥӱп јаткан улусты бойына анайып ла јууктадып јат. Иегова олорды сӱӱп јат ла олорды кайра јанып келзин деп кӱӱнзейт. Слердиҥ болужаарла ол олорго бойыныҥ сӱӱжин кӧргӱзер.

13. Христиан сӱӱштиҥ ийдезин кӧргӱзип турган учурал куучындап беригер.

 ¹³ Јууннаҥ ырап калган ака-эјелер бистиҥ сӱӱжисти кӧрӱп, Иегованыҥ сӱӱжинде алаҥзыбазын деп, биске албаданар керек. Ӧткӧн јӧрмӧлдӧ айдылган Пабло деген ака 30 јылдаҥ ажыра јууннаҥ ырап калган болгон. Ол куучындайт: «Бир катап эртен тура айылымнаҥ чыгып јадарымда, меге јажы јаанаган јалакай эје јууктап келген. Ол меге сӱрекей јылу сӧстӧр айткан. Мынаҥ улам чыдажып болбой, мен кичинек бала чылап ыйлай бергем. Мен эјеге сени Иегова меге ийген болбой деп айткам. Бу ла ӧйдӧ Иеговага кайра јанарым деп санангам».

14. Лука 15:4, 5-ле болзо, кӱдӱчи јылыйган койын табып алала, нени эдет?

¹⁴ Јууннаҥ ырап калган јарчыны табып алган кийнинде, биске ого оноҥ ло ары болужар керек. Иисустыҥ укаа сӧзиндеги јанып келген кедер уул чылап андый ака эмезе эје бойын јинип турган болордоҥ айабас. Ол Сатананыҥ телекейинде болгон, оныҥ учун кӧгӱс јанынаҥ уйадап калган болор. Биске ого Иеговага бӱткенин тыҥыдарга болужар керек. Иисустыҥ јылыйган кой керегинде укаа сӧзинде кӱдӱчи табып алган койын јардына салып алала, оны ӱӱрге кайра апарып јат. Кӱдӱчи койын табарга кӧп ӧйин ле ийде-кӱчин берген де болзо, је койын ӱӱрге кайра апарар керек деп оҥдоп јат. Нениҥ учун дезе койдо кайра баратан ийде-кӱч јок. (Лука 15:4, 5 кычырыгар.)

15. Јууннаҥ ырап калган, је Иеговага кайра јанып келерге турган ака-эјелерге канайып болужарга јараар? (« Сӱрекей тузалу бичик» деген рамканы кӧрӱгер.)

¹⁵ Биске јууннаҥ ырап калган јарчыга Иеговага келерге чаптыгын јетирип турган буудактарды ӧдӧргӧ болужарга кӧп ӧй лӧ ийде-кӱч керек болордоҥ айабас. Је агару тынныҥ, Кудайдыҥ  Сӧзиниҥ ле библиялык бичиктердиҥ болужыла бис јууннаҥ ырап калган улуска ойтодоҥ кӧгӱс ийде-кӱч алынарга болужар аргалу (Рим. 15:1). Ченемелдӱ бир аксагал айдат: «Иеговага кайра јанып келерге сананган ака-эјелердиҥ кӧбизиле Агару Бичикле ӱредӱ ӧткӱрер керек *. Јарлабай барган јарчыла ӱредӱ ӧткӱретен акага эмезе эјеге андый јарчыга чыгара айдынатан арга берип турган јуук најы болор керек». Слерди андый ӱредӱ ӧткӱрзин дезе, јӧпсинер бедеер? Сӱӱнип јӧпсинереер деп алаҥзыбай јадыс.

16. Биске ангелдер болужып турган деп, бис кайдаҥ билерис?

¹⁶ Иеговага кайра јанып келерге турган ака-эјелерди бедиреерге, биске ангелдер болужат деп, кӧп учуралдардаҥ кӧрӱнет (Ачыл. 14:6). Темдектезе, Эквадордо јадып турган Сильвио деп аканыҥ темин кӧрӱп ийектер. Ол јуунга кайра јанып келерге тыҥ кӱӱнзеген. Бир катап Иеговага јайнап мӱргӱп јадарда, эжик токулдаган. Эжикти ачып ийген болзо, анда болужарга келген эки аксагал турган.

17. Јууннаҥ ырап калган ака-эјелерге болушсаас, бисте кандый сезимдер болот?

¹⁷ Кӧгӱс јанынаҥ уйадап калган ака-эјелерге болушканы јаан сӱӱнчи экелет. Мындый јарчыларга болужарга кӧп иштенип турган Сальвадор деген пионер мынайып айдат: «Кезикте, сӱӱнгенимге арай ла ыйлабай турадым. Иегова Сатананыҥ телекейинеҥ база ла бир койын аргадап алганын ла меге оныла кожо бу ишке туружар арга бергенин сананзам сӱӱнип јадым!» (Ап. ижи 20:35).

18. Јууннаҥ ырап калган ака-эјелер неде алаҥзыбас аргалу?

¹⁸ Сен јарлабай ла јуунныҥ туштажуларына јӱрбей барган болорыҥ. Андый болзо, Иегова сени тӱҥей ле сӱӱп турган деп алаҥзыба. Ол сени кайра јанып келзин деп кӱӱнзейт. Је сеге бойыҥа албаданып ийер керек. Иегова Иисустыҥ укаа сӧзиндеги ада чылап, сениҥ кайра јанып келериҥди тыҥ сакып јат! Айлыҥа јанып келзеҥ, оны сӱӱндирериҥ.