1. Иегова бистиҥ кажыбыска ла нени эткен?

ИЕГОВА бистиҥ кажыбысты ла бойына јууктадып алган (Иоанн 6:44). Бу сӧстӧр нени темдектеп турганын сананып ийзеер де. Иегова јердеги миллиардтар тоолу улустыҥ ортозынаҥ шак ла слерге ајару эдип, оны сӱӱр аргалу ачык јӱрегерди кӧрӱп ийген (1 Лет. 28:9). Кудай бистиҥ кажыбысты ла јакшы билер, анайда ок ол бисти оҥдоп јат ла бисти тыҥ сӱӱп јат. Мыны билерге кандый јакшы!

2. Иисус Иегованыҥ бистиҥ кажыбыска ла карузып турганын кӧргӱзерге кандый тем куучындаган?

² Иегова биске канайып карузып турган, ака-эјелерге ол анайып ла карузып јат. Мыны оҥдоорго Иисус Иегованы кӱдӱчиге тӱҥдештирип турган тем куучындаган. Јӱс койлу ӱӱрдеҥ бирӱзи јылыйып калза, кӱдӱчи нени эдер? Ол тогузон тогус койды кырда таштап ийеле, јылыйып калганын бедиреп барбас беди? Кӱдӱчи койын табып алза, ого калјуурып ачынбас, карын сӱӱнер. Бу тем бисти неге ӱредет? Иегова кажы ла койын анайып ла баалап јат. Иисус бу темди мындый сӧстӧрлӧ божоткон: «Теҥеридеги Адагар андый ок: бу кичӱлердиҥ бирӱзи де ӧлбӧзин деп јат» (Матф. 18:12—14).

3. Бу јӧрмӧлдӧ нени шӱӱжерис?

³ Бистиҥ кемибис те ака-эјелерди ачындырарга кӱӱнзебей турган эмей. Је ачындырып ийген болзоос канайдарыс? Эмезе бисти кем-кем ачындырып ийген болзо нени эдерис? Бу сурактарды шӱӱжип ийектер. Шӱӱжердеҥ озо Матфейдиҥ 18-чи бажалыгында «бу кичӱлер» ол кемдер дегенин кӧрӱп ийектер.

4. «Бу кичӱлер» деп, Иисус кемдерди айткан?

⁴ «Бу кичӱлер» — Иисустыҥ ончо ӱренчиктери. Олор јаан да, јаш та болзын, Иисуска кичинек балдардый болот.  Нениҥ учун дезе олордыҥ ончозы Иисустаҥ ӱренерге кӱӱнзеп јат (Матф. 18:3). Олордыҥ культуразы да, чыккан-ӧскӧн јери де, кылык-јаҥы да башка болзо, олор Иисуска бӱдӱп јадылар. Иисус дезе олордыҥ ончозын тыҥ сӱӱп јат (Матф. 18:6; Иоанн 1:12).

5. Оныҥ ишчилерин јаман кӧрӱп турза, Иегова нени сезет?

⁵ Иеговага «бу кичӱлердиҥ» кажызы ла сӱреен баалу. Иегованыҥ мындый сезимдерин оҥдоорго бис кичинек балдарга нени сезип турганысты сананып ийектер. Балдар биске эрјинедий баалу болуп јат. Бис олорды корулап јадыс, нениҥ учун дезе олор кичинек, ченемел јок ло бӱдӱҥкей. Качан јаан кижиге кем-кем јаман баштанза, биске јаман болот. Је кичинек балага кем-кем јаман баштанза, биске оноҥ јаман болот. Иегова бисти анайып ла корулаарга кӱӱнзеп јат. Оныҥ ишчилери јаман кӧрдӱртип турза, ого коркышту ачу болуп јат. Керек дезе, ол чугулданып та јат (Иса. 63:9; Марк 9:42).

6. 1 Коринфтегилерге 1:26—29-ла болзо, Иисустыҥ ӱренчиктерине бу телекейдиҥ улузыныҥ кӧрӱми кандый?

⁶ Иисустыҥ ӱренчиктерин балдарга тӱҥей деп база нениҥ учун айдарга јараар? Шӱӱп сананып ийектер. Бу телекейде кандый улус тоомјыда болуп турган? Арга-чакту, јарлу ла јамылу. Је Кудайдыҥ ишчилери кӧп сабада тегин ле улус. Оныҥ учун бу телекейдиҥ улузы олорды уйан кӧрӧт. (1 Коринфтегилерге 1:26—29 кычырыгар.) Је Иегованыҥ олорго кӧрӱми чек башка.

7. Иегова бисти ака-эјелериске кандый кӧрӱмдӱ болзын деп кӱӱнзейт?

⁷ Иегова бойыныҥ кажы ла ишчизин, чӧҥӱрилгени удап та калган, удабаган да болзын — ончозын сӱӱп јат. Иегова ончо ишчилерин баалап турарда, биске де баалаар керек. Агару Бичикте мындый кычырту бар: «Ончо... карындаштарды сӱӱгер», јӱк ле кезик ака-эјелерди эмес (1 Петр 2:17). Бис ака-эјелерди кичеер ле корулаар учурлу. Кемди-кемди ачындырып ийген болзоос, биске ол кижи бойы андый ачынчак, ол бистиҥ јаманысты таштаар учурлу деп сананып, не де болбогондый чылап јӱрбес керек. Је кижи нениҥ учун ачынып калардаҥ айабас? Кезик улус бойын уйан деп сананып турган болор. А кезиги Иегованыҥ Керечилери болгоны јаан удабаган, оныҥ учун олор улустыҥ јаманын таштаарына эм тура ӱренбеген болор. Мындый айалгада кем бурулу болгоны, ачыныш недеҥ улам болгоны андый ла јаан учурлу эмес. Эҥ ле озо, ачыныжып калган улуска бой-бойыла јаражып алар керек! Је оноҥ, ӧткӱре ачынчак кижи, ого андый једикпезиле тартыжар керек деп оҥдоор учурлу. Кижи ачынбаска ӱренип алза, бойы да сӱӱнчилӱ болор, анайда ок айландыра да улуска јеҥил болор.

8. Иисустыҥ ӱренчиктерине кандый кӧрӱм салтарын јетирген?

⁸ Иисус ӱренчиктерин нениҥ учун «кичӱлер» деп айткан? Нениҥ учун дезе ӱренчиктери оноҥ мынайып сураган: «Теҥери Каандыгында кем улу-јаан?» (Матф. 18:1). Иисустыҥ ӧйинде јаткан кӧп иудейлер тоомјыда ла јамылу болоры сӱреен учурлу деп сананган. Бир учёный бу керегинде: «Улус тоомјыда ла јакшы ат-јолду болорго ло јарлу болорго болуп јӱрген» — деп айдат.

9. Иисустыҥ ӱренчиктерине нени эдер керек болгон?

⁹ Иисус кӧп иудейлердиҥ бой-бойынаҥ артык болорго албаданып турганын  билген, оныҥ учун оныҥ ӱренчиктерине кӧрӱмин солыырга јеҥил эмес болор деп оҥдогон. Ол ӱренчиктерине мынайып айткан: «Кемигер улу-јаан, кичӱдий болзын, кемигер јамылу, јалчыдый болзын» (Лука 22:26). «Кичӱдий» болоры дегени улусты бойыстаҥ бийик деп бодоорын кӧргӱзет (Флп. 2:3). Улусты бойыстаҥ бийик деп сананарга канча ла кире тыҥ албаданып турзаас, олорды ачындырбас болорыс.

10. Биске Павелдиҥ кандый сӧстӧрин јазап шӱӱп сананар керек?

¹⁰ Ака-эјелер та незиле де бистеҥ артык болуп јат. Мыны оҥдоорго, биске олордыҥ јакшы кылык-јаҥдарын кӧрӱп турар керек. Биске апостол Павелдиҥ сӧстӧрин јазап шӱӱп сананар керек. Ол мынайда айткан: «Чындап та, сени кем аҥылады? Сенде Кудайдаҥ албаган не бар? Алган болзоҥ, албаган чылап, не мактанадыҥ?» (1 Кор. 4:7). Оныҥ учун биске бойыска јаан ајару эдерге албаданбас керек эмезе бойысты улустаҥ артык деп сананбас керек. Темдектезе, ака кӧдӱриҥилӱ куучын-эрмектер айдып турган эмезе эјеге Агару Бичикле ӱредӱлер баштаарга јакшы келижип турган болзын. Мындый једимдери учун олор ончо макты Иеговага јетирер учурлу.

11. Иисустыҥ каан ла кул кижи керегинде укаа сӧзинеҥ бис неге ӱренедис?

¹¹ Иисус Христос ӱренчиктерине бой-бойын ачындырбазын деп айдып, каан ла кул керегинде тем куучындаган. Кул кижи каанга јаан тӧлӱлӱ болгон, ол оны качан да тӧлӧп болбос эди. Кул каанга келип, јайнап сураарда, каан оны килеп, тӧлӱзин тӧлӧтпӧгӧн. Је кийнинде бу ла кул ого кичинек тӧлӱлӱ болгон кул нӧкӧрин килебеген. Бу учун каан кижи оны тӱрмелеп койгон. Бу укаа сӧс бисти неге ӱредет? Иисус мынайып айткан: «Кажыгар ла карындажаардыҥ јаманын акту јӱрегеердеҥ таштабазагар, Теҥеридеги Адам да слерге андый ок болор» (Матф. 18:21—35).

12. Улустыҥ јаманын таштабай турзаас, кандый каршу болот?

¹² Кул кижиниҥ мынайып баштанганы ого бойына да, ӧскӧ улуска да каршу јетирген. Нениҥ учун? Баштапкызында, ол кул нӧкӧрин килебей, алымын тӧлӧбӧгӧнчӧ тӱрмелеп койгон. Экинчизинде, ол бу айалганы кӧргӧн улусты тыҥ кунуктырган: «Ӧскӧ кулдар мыны кӧрӧлӧ, сӱрекей куну[ккан]». Анайып бисле де болор аргалу. Темдектезе, бисти кем-кем ачындырып ийген болзо, је бис оныҥ јаманын таштабай турзаас, улуска каршу јетиредис. Канайып? Баштапкызында, бис кижиниҥ јаманын таштабай, ого соок баштанып турзаас, ол кижи ал-санаага тӱжет. Экинчизинде, бистиҥ јарашпай турганыстаҥ улам јуундагы ончо ака-эјелерге эби јок болордоҥ айабас.

13. Бир эјениҥ теми бисти неге ӱредет?

¹³ Улустыҥ јаманын таштап турзаас, биске бойыска да, улуска да јакшы болот. Пионер болуп турган Кристал деп эјениҥ темин кӧрӱп ийектер. Оны јуунда бир эје ачындырып туратан. Кристал эје мынайып куучындаган: «Кезикте ол эјениҥ айткан кату сӧстӧри јӱрегимди тыҥ шыркалап туратан. Мынаҥ улам мениҥ оныла кожо бир бӧлӱкте јарлаар кӱӱним ӧчӧ берген. Јарлаар иш те меге сӱӱнчи экелбей барган». Кристал эје ачынар да јолду болгон болзо, бойын килеп, ачынып отурбады. Ого не болушкан? 1999 јылдыҥ ӱлӱрген айыныҥ 15-чи кӱнинде чыккан «Каруулчы шибееде» «Прости от  сердца» деген јӧрмӧлдӧги библиялык јӧпти тузаланып, эјениҥ јаманын таштаган. Кристал эје оноҥ ары куучындайт: «Бистиҥ кажыбыс ла солынып, јаҥы кижи болорго албаданып јат, а Иегова бистиҥ јаманысты кажы ла кӱн таштап јат деп эмди оҥдоп јадым. Меге андый јеҥил боло берген. Јарлаар иштеҥ мен ойто сӱӱнчи алып баштагам».

14. а) Матфей 18:21, 22-ле болзо, Петрга нени эдерге кӱч болгон болор? б) Улустыҥ јаманын таштаарга биске не болужар?

¹⁴ Ака-эјелердиҥ јаманын таштаары — бистиҥ молјубыс. Мынайып эдери чын деп оҥдоп јадыс. Је бу јеҥил эмес. Темдектезе, апостол Петрга да јеҥил эмес болгон болор. (Матфей 18:21, 22 кычырыгар.) Биске улустыҥ јаманын таштаарга не болужар? Баштапкызында, Иегованыҥ килеҥкейин ундыбай турактар (Матф. 18:32, 33). Бис оныҥ килемјизин аларга турбас та болзоос, ол бистиҥ јаманысты јаантайын таштап јат (Сар. 103:8—10). Анайда ок «бис те бой-бойыбысты сӱӱр учурлу» (1 Иоанн 4:11). Айдарда, бисте улустыҥ јаманын таштайтан ба, таштабайтан ба, бойыс билерис деп айдар јаҥыс јок. Бис ака-эјелердиҥ јаманын таштаар учурлу. Экинчизинде, улустыҥ јаманын таштап турганыстаҥ кандый туза болуп турганын шӱӱп сананыгар. Анайып бисти ачындырган кижиге болужадыс, јуун бирлик артат, Кудайла колбуларыс ӱрелбей јат ла јаман санаалардаҥ айрылып каладыс (2 Кор. 2:7; Кол. 3:14). Ӱчинчизинде, Кудайдаҥ болуш сурагар, нениҥ учун дезе улустыҥ јаманын таштазын деген јакаруны ол берген. Сатана бисти ака-эјелерле ачыныжып калзын деп албаданат. Је слер ого андый арга бербегер (Еф. 4:26, 27). Сатана јуунныҥ амырын ла бирлигин буспазын деп, Иегованыҥ болужы керек болуп јат.

15. Бисти кем-кем ачындырып ийген болзо, Колоссыдагыларга 3:13-те айдылганыла, нени эдер керек?

¹⁵ Јуундагы ака эмезе эје слерди тыҥ ачындырып ийерде, слерге бу амыр бербей барган болзын. Мындый айалгада нени эдер керек? Јаражып аларга тыҥ албаданыгар. Ӱзе немени Иеговага куучындап беригер. Анайда ок бу ака-эјениҥ јакшы кылык-јаҥын кӧрӧргӧ Иегованаҥ болуш сурагар (Лука 6:28). Ачынганаар ӧтпӧй турза, ол кижиле куучындажып кӧрӱгер. Је андый куучынга јакшы белетенип алар керек. Ол кижи слерди ӧнӧтийин ачындырган деп бир де сананбагар (Матф. 5:23, 24; 1 Кор. 13:7). Куучындажып јаткан ӧйдӧ ол кижи керегинде база јаман неме сананбагар. Је кижи јаражар кӱӱни јок болзо нени эдер? Ижемјигерди јылыйтпай јаражып аларга оноҥ ло ары албаданыгар. (Колоссыдагыларга 3:13 кычырыгар.) Је эҥ ле учурлузы, ачу тутпаска албаданыгар, оноҥ башка Кудайла колбулараар ӱрелип калардаҥ айабас. Ӧрӧги айдылган јӧптӧрди тузаланзаар, Иеговала колбулараарды баалап турганаарды кӧргӱзереер (Сар. 119:165).

16. Бистиҥ кажыбыс ла не учун каруулу болот?

¹⁶ Бис Иеговага ака-эјелерисле «јаҥыс ӱӱрдий» бирлик иштеп турганыс учун ла бисти «јаҥыс Кӱдӱчи» башкарып турганы учун јаан быйанду (Иоанн 10:16). «Организованы, чтобы исполнять волю Иеговы» деп бичиктиҥ 165-чи бӱгинде мынайып айдылган: «Эмди сен јуунныҥ бирлиги учун каруулу болодыҥ». Оныҥ учун «ака-эјелериске кижиниҥ кӧрӱмиле эмес, је Иегованыҥ кӧрӱмиле кӧрӧргӧ ӱренер керек». А Иеговага бис ончобыс кичинек балдардый болодыс. Ол бисти тыҥ сӱӱп јат. Слер ака-эјелерди Иегова ла чылап сӱӱйдигер бе? Олорго болужып, олорды кичееп турганаарды Иегова кӧрӱп јат ла баалап јат (Матф. 10:42).

17. Бу јӧрмӧл слерди неге кӱӱнзетти?

¹⁷ Бис ака-эјелерди сӱӱп јадыс, оныҥ учун олорды бир де ачындырбаска албаданарыс. Анайда ок олорды бойыстаҥ бийик деп бодоп, олордыҥ јаманын акту јӱректеҥ таштаарыс. Бой-бойыбыска ачу тутпактар, оноҥ башка Иеговала колбуларыс ӱрелип калардаҥ айабас. «Анайдарда, биске амырды экелип, бой-бойыбысты тыҥыдып турганга јӱткӱйли!» (Рим. 14:19).