Павел бичиген: «Кудайдыҥ кӧзинде тирӱ јӱрерге, јасак ажыра јасакка ӧлӱп калгам» (Гал. 2:19).

Бу сӧстӧрдиҥ учурын оҥдоорго Павел Римниҥ провинциязыныҥ Галатиядагы јуундарга нени айдарга сананганын билип алар керек. Андагы кезик христиандар тӧгӱн немеге ӱредип турган ӱредӱчилердиҥ ӱредӱлерине кирип калган болгон. Олордыҥ ӱреткениле болзо, аргаданарга Моисейдиҥ јасагын, ол тоодо томдошты, бӱдӱрер керек. Је эмди Кудай улустаҥ Моисейдиҥ јасагын бӱдӱрерин некебей турган деп, Павел билетен болгон. Оныҥ учун Апостол Павел бойыныҥ самаразында олордыҥ ӱредӱлериниҥ тӧгӱнин кӧргӱзерге, бӱдӱмјилӱ керелер бичиген. Анайып, ака-эјелердиҥ Христостыҥ толынты тайылгазына бӱткени тыҥыган (Гал. 2:4; 5:2).

Агару Бичиктиҥ ӱреткениле кижи божоп калза, ол нени де билбей јат, нени де сананбай јат (Эккл. 9:5). Айдарда, Павел «јасакка ӧлӱп калгам» деген сӧстӧриле Моисейдиҥ јасагы иштебей токтоп калганын кӧргӱскен. Је эмди ол Христостыҥ тайылгазы ажыра Кудайдыҥ кӧзинде тирӱ јӱрген.

Айса Павел «јасак ажыра» Кудайдыҥ кӧзинде тирӱ јӱрген деп нениҥ учун айткан? Бу ӱлгердиҥ контекстин кӧрзӧ, анда мындый сӧстӧр бар «кижи јасакты бӱдӱргениле эмес, јаҥыс ла Иисус Христоско бӱткениле акталат» (Гал. 2:16). Айдарда, Моисейдиҥ јасагы неге керектӱ берилген? Бу јасактыҥ тузазы сӱреен јаан болгон. Апостол Павелдиҥ јартаганыла болзо, бу јасак «јазыктардаҥ улам Кудай берер болгон калдык једип келер ӧйгӧ јетире» берилген (Гал. 3:19). Бу јасак болбогон болзо, улус Кудайдыҥ чындык нормаларын бир де јастырбай бӱдӱрип болбос деп оҥдогылабас эди, анайда ок кинчектер ташталзын деп толо кеминде тайылга эдилер учурлу болгонын билбес эди. Айдарда, бу јасак улусты «калдыкка» — Христоско, экелген. А Кудай јӱк ле Христоско бӱткен улусты акту деп кӧрӧт (Гал. 3:24). Павел актулардыҥ тоозына кирген. Павел дезе, карын бу јасакты билгени учун, Иисусты Мессия деп оҥдоп, ого бӱткен. Мынайып Павел «јасакка ӧлӱп калган», је «Кудайдыҥ кӧзинде тирӱ јӱрген». Бу ӧйдӧҥ ала Павелди јасак бийлебеген, оныҥ Бийи — Кудай болгон.

Апостол Павел бого ло тӱҥей шӱӱлтени Римдегилерге бичиген самаразында айткан: «Слер де, карындаштарым, Христостыҥ эди-каны ажыра Јасакка ӧлдигер. [...] Је эмди бис Јасактаҥ, бисти киженде туткан ончо немедеҥ јайымдалдыс» (Рим. 7:4, 6). Бу да ӱлгерлерде, Галаттарга 2:19-та да Павел Моисейдиҥ јасагын бӱдӱрбегенинеҥ божогоны керегинде айтпай јат, карын Павел бойы да, ӧскӧ дӧ христиандар бу јасактаҥ јайымдалып турганы керегинде айдат. Мындый јайымдалыш јӱк ле Иисус Христостыҥ толынты тайылгазына бӱтсе берилет.