1. а) Иегова биске кандый ижемји берген? б) Иеговага иженери ол не дегени? («Јартамалды» кӧрӱгер.)

 ИЕГОВА оны сӱӱп тургандарга келер ӧйгӧ андый јараш ижемји сыйлаган. Удабас јердиҥ ӱстинеҥ оору-јобол, шыраа, ӧлӱм-јидим јоголып калар (Ачыл. 21:3, 4). Оныҥ башкарузыла, јобош улус јерди рай эдип салар (Сар. 37:9—11). Иегова биске оноҥ јуук најы болуп калар. Кудай бойыныҥ амадуларын ӱзе бӱдӱрип салар деп сананып ийзеес, чек кайкайдыс! Бис бого нениҥ учун бӱдӱп турганыс? Нениҥ учун дезе Иегова бойыныҥ сӧзин алдынаҥ бери бӱдӱрген, эмди де бӱдӱрип салар. Бистиҥ бӱдӱп турганыста * кӧп шылтактар бар (Сар. 27:14). Иегова бойыныҥ сӧзин бӱдӱрип салар деп сӱӱнип ле чыдажып, сакып јадыс (Иса. 55:10, 11).

2. Иегова бойыныҥ сӧзин бӱдӱрип турган деп канайып кӧргӱскен?

² Иегова берген сӧзин алдынаҥ ла бери бӱдӱрип келген. Темдектезе, Ачылта деп бичикте Иегова бӱгӱнги кӱнде «ончо уктардаҥ, ӱйелердеҥ, калыктардаҥ» ого бирлик бажыратан улус јуур деп бичилип калган. Бу улус «кара-бајырт» деп адалат (Ачыл. 7:9, 10). Олор бастыра јердиҥ толыктарынаҥ јуулган башка-башка албаты да болзо, бир јаан нак биледий болот (Сар. 133:1; Иоанн 10:16). Анайда ок олор Кудайдыҥ сӧзин эрчимдӱ јарлайдылар. Бого ло коштой олор чындыкты угарга турган улуска келер ӧй керегинде јараш ижемјини куучындаарга  белен (Матф. 28:19, 20; Ачыл. 14:6, 7; 22:17). Слер бу кара-бајырт улустыҥ тоозына кирип турган болзоор, бу сӱреен јакшы ижемјини алаҥзу јоктоҥ баалап турганаар.

3. Сатанада кандый амаду бар?

³ Сатана Кудайдыҥ ишчилеринеҥ келер ӧйгӧ баалу ижемјизин айрып аларга албаданат. Ол, Кудайдыҥ улузы Иеговага бис чек керек јок, ол качан да бойыныҥ сӧзин бӱдӱрбес деп санандырарга умзанат. Анайып бистиҥ ижемјибисти айрып салза, бис улустаҥ коркып, Кудайга иштебей барарыс. Мынайда ол Иов деп кижини јабарлаган. Ол Иовты Кудайга чындык артпазын деп, ижемјизин айрып саларга сананган.

4. Бу јӧрмӧлдӧ кандый сурактар шӱӱп кӧрӧрис? (Иов 1:9—12)

⁴ Бу јӧрмӧлдӧ Сатана Иовты Кудайдаҥ туура апарарга нени эткени керегинде айдылар. (Иов 1:9—12 кычырыгар.) Анайда ок бис Иовтыҥ теминеҥ неге ӱренер аргалу деген сурак кӧрӱлер, бого ло коштой Иегова бисти сӱӱп турган ла айткан сӧзин бӱдӱрип салар деп нениҥ учун ундыбас керек деген сурак кӧрӱлер.

5, 6. Кыска ла ӧйгӧ Иов неге табарткан?

⁵ Иовтыҥ јӱрӱми јакшы болгон. Ол Иегованыҥ кӧзинде ондый баалу кижи болгон. Ол сӱреен кӧп јӧӧжӧлӱ ле јаан, нак билелӱ јаткан (Иов 1:1—5). Је бир ле кӱн Иов ӱзе немени јылыйтып койды (Иов 1:13—17). Балазын јылыйткан ада-энелердиҥ ачу-коронын сӧслӧ дӧ айдып болбозыс. А Иов ло оныҥ ӱйи бир уунда он балазын јылыйткан! Айдарда, олордыҥ ачу-короны коркышту тыҥ болгон болор. Агару Бичикте айдылганыла, Иов «кийимин јырта тартып, тизезине отура тӱшти» (Иов 1:18—20).

⁶ Оныҥ кийнинде Сатана Иовты јаан оорула оорыдып, неге де турбас кижи эдип салган (Иов 2:6—8; 7:5). Качан да оны улус тооп, оноҥ јӧп сурап келгилеп туратан (Иов 31:18). Је эмди дезе ол чек јаҥыскан арткан. Оныҥ ака-карындаштары да, најылары да, јалчылары да оноҥ јескинип, тууралап баштаган (Иов 19:13, 14, 16).

7. а) Иов бойыныҥ кыйын-шыразында кемди бурулаар аргалу болгон? б) Јурукты кӧрӱгер. Иегованыҥ ишчизиниҥ јӱрӱминде не болордоҥ айабас?

⁷ Иов Сатананыҥ эдип турган ченелтелерин оны Иегова ченеп туру деп бодогон. Темдектезе, Сатана салкын экелип, Иовтыҥ балдары јуулыжып калган тураны аҥтарып ийген (Иов 1:18, 19). Анайда ок ол теҥеридеҥ от тӱжӱрип, Иовтыҥ мал-ажын ла јалчыларын ӧлтӱрип салган (Иов 1:16). Иов мынайып сананган болор: «Салкынды ла отты Кудай јайаган, а олорды Кудай јайаган болордо, айса мен Кудайды та неле де ачындырып ийген болорым ба?» Је Иовто кандый да санаалар болгон болзо, ол Кудайды бир де јамандабаган. Иегова ого сӱреен кӧп алкыштар бергенин ол ундыбаган, оныҥ учун ол мындый санаага келген: «Кудайдаҥ јакшыны да, јаманды да алар керек». Керек дезе ол мынайып айткан: «Иегованыҥ ады макталзын» (Иов 1:20, 21; 2:10). Иов кандый да кӱч ченелтелер ӧткӧн болзо, Кудайга чындык арткан. Је Сатана оноҥ до ӧскӧ ченелтелер белетеген.

8. Сатана Иовты оноҥ ары канайып ченеген?

⁸ Сатана сӱмелӱ эп-арга тузаланып јат: ол оныҥ тӧгӱнчи ӱч најызы ажыра  Иовты неге де турбас кижи деп санандырарга албаданган. Олор ӱчӱ Иовты бойыныҥ ла кинчектери учун мынайып шыралап турган деп бурулагандар (Иов 22:5—9). Иов Кудайга сӱреен јакшы иштеген де болзо, Кудай оны бир де баалабай турган деп айдышкан (Иов 4:18; 22:2, 3; 25:4). Олордыҥ сӧстӧриле болзо, Иов Иеговага керек те јок, ол ого болушпас та, ого иштеери — тегине ле калас ӧй ӧткӱрери. Иов бу ӱч кижиниҥ коронду сӧстӧринеҥ улам арай ла болзо ижемјизин јылыйтпады.

9. Иов јалтанбас болорго ийде-кӱчти кайдаҥ алган?

⁹ Сананып ийзеер де, Иовко кандый кӱч болды не. Кӧӧркий Иов кӱлдиҥ ӱстине отурып, оору-јоболдоҥ шыралап јат (Иов 2:8). Бир ле уунда оныҥ ӱстине канча ченелте урулган. Бастыра бала-барказын јылыйтып, ол кирер-тудар јерин таппай турды. Ачу-коронноҥ улам ол канча кӱнге бир сӧс тӧ айдып болбой турды. Мыныҥ ӱстине Иовтыҥ тӧгӱнчик «најылары» оны јамандагылап турды (Иов 2:13—3:1). Иов олорго удура бир де сӧс унчукпай отурарда, олор оны Кудайынаҥ јана болды деп сананган болор. Олордыҥ санаазы јастыра болды! Иов бажын ӧрӧ кӧдӱрип, чике ле олордыҥ кӧзине кӧрӧлӧ: «Ӧлӧрдиҥ ӧлгӧнчӧ јек јок (чындык) болуп артарым!» — деди (Иов 27:5). Иов мындый јалтанбас болорго ийде-кӱчти кайдаҥ алган? Ол ижемјизин ундыбаган болгон. Кудай тӱҥей ле оныҥ кыйын-шыразын бир тушта јоголтып салар, керек дезе Иов божоп то калза, ол оны тирилтип ийер деп бӱткен (Иов 14:13—15).

10. Иовтыҥ учуралы бисти неге ӱредет?

¹⁰ Иовтыҥ учуралынаҥ Сатана бисти албан-кӱчле Иегованаҥ туура апарып  болбос деп јарт кӧрӱнип јат. Анайда ок бисте кажыбыста ла кандый уур-кӱчтер болуп турганын Иегова јакшы билер деп кӧрӱнет. Бу јӧрмӧлдӧ Иовтыҥ учуралынаҥ бойыска база кандый ӱредӱ аларын кӧрӱп ийерис.

11. Бис јаантайын Иеговага иженип турган болзоос, неде алаҥзыбас аргалу? (Иаков 4:7).

¹¹ Иовтыҥ јӱрӱминеҥ бис Иеговага јаантайын иженип турзаас, Сатананыҥ кандый ла ченелтелерин ӧдӱп чыгарыс деп јарт кӧрӱнип јат. Ол тушта, Агару Бичиктиҥ сӧстӧриле болзо, Дьявол бистеҥ кача берер. (Иаков 4:7 кычырыгар.)

12. Иовтыҥ тирилишке иженгени кандый туза берди?

¹² Божогон улус тирилер деп, биске бир де алаҥзыбай бӱдер керек. Ӧткӧн јӧрмӧлдӧ кӧргӧнисле, Сатана ӧлӱмнеҥ коркып турганысты тузаланып, Иегованаҥ туура тартып аларга албаданардаҥ айабас. Иовтыҥ учуралында ол мынайып сананган болор: «Иов јӱрӱмин аргадап аларга болуп нени ле эдип ийер, керек дезе Кудайды да садып ийер». Је Сатана чек јастыра сананган. Нениҥ учун дезе Иов эмди мен божоп калатан эмтирим деп сананган да болзо, Кудайга тӱҥей ле учына јетире чындык арткан. Иегова Кудай јалакай Кудай. Ол мениҥ кӱчтеримди ӱзе јоголтып салар деп бир де кичинек алаҥзыбай бӱткен. Бу ижемји Иовко јаан ийде-кӱч берген. Керек дезе Иов мынайда сананган болор: «Мен тирӱ тужымда Иегова меге болушпаза да, келер ӧйдӧ ол мени тӱҥей ле тиргизип алар». Бисте де Иовтый бек бӱдӱмји болзо, ӧлӱмнеҥ коркыйла Кудайыстаҥ туура баспазыс.

13. Сатана улусты канайып тӧгӱндеп турганын бис нениҥ учун билер учурлу?

¹³ Сатана бӱгӱнги кӱнде бисти де анайып ла бурулап јат. Оныҥ учун оныҥ канайып тӧгӱндеп турганын биске сӱреен јакшы билер керек. Темдектезе, ол мынайда бурулаган: «Кижи [јӱк ле Иов эмес] бойыныҥ јӱрӱми учун ончо бар немезин берип ийер» (Иов 2:4, 5). Ӧскӧртӧ айтса, бис Кудайды чыннаҥ сӱӱбей турганыс ла кӱч ӧй боло берзе, Кудайдаҥ јана болорыс деп айдат. Анайда ок Кудай бисти бир де сӱӱбей турган, бис оны качан да сӱӱндирип болбозыс деп тӧгӱндеп јат. Је бис оныҥ тӧгӱнин јакшы билерис, оныҥ учун Сатананыҥ андый тӧгӱнине качан да бӱтпезис.

14. Ченелтелер нени кӧргӱзер аргалу? Тем куучындап беригер.

¹⁴ Ченелтелерди бойысты јакшы билип алатан арга деп кӧрӧр керек. Иов база ченелтелердеҥ улам бойыныҥ јастыра јандарын кӧрӱп ийеле тӱзедилген. Темдектезе, Иовко јобош болоры јетпей турган болгон (Иов 42:3). Бис база ченелтенеҥ улам уйан јандарысты кӧрӱп ийер аргалу. Бир јаан оору Николай * деп аканыҥ темин кӧрӱп ийектер. Ол бойы куучындаган: «Мени тӱрмеге отургызып салган. Тӱрме дезе чек ле рентген ошкош, бастыра кижиниҥ ичинде христиан кылык јан бар ба, јок по деп ӱзе кӧргӱзип берер». Айдарда бис уйан јандарысты кӧрӱп ийзеес, база тӱзединер аргалу.

15. Биске кемди угар керек, нениҥ учун?

¹⁵ Биске ӧштӱлерди эмес, је Иегованы угар керек. Иегова Иовло куучындажып турарда ол оны лаптап уккан. Кудай Иовло мынайып куучындашкан болор: «Сен мениҥ јайаандарыма ајарып кӧрзӧҥ дӧ. Коркышту јаан ийде-кӱчтӱ болгонымды кӧрбӧй туруҥ ба? Уур-кӱчтериҥди мен ӱзе кӧрӱп тургам.  Мен сени ундып салгам деп сананып баштай бердиҥ бе?» Иовтыҥ јобош каруузынаҥ ол Иегованыҥ јалакайын ундыбаганы мындый сӧстӧрдӧҥ кӧрӱнет: «Мен сен керегинде уккам, а эмди кӧстӧрим сени кӧрӱп јат» (Иов 42:5). Иов бу сӧстӧрди качан айткан? Ол ло кӱлдиҥ ӱстине отурып, бастыра бойы балутып калган, бала-барказына карыгып, санааркап турган тужында айткан. Иегова Иовтыҥ айалгазын ол ло тушта солыбаган да болзо, је ого бойыныҥ сӱӱжин кӧргӱскен (Иов 42:7, 8).

16. Исайя 49:15, 16-ла болзо, ченелтелердиҥ ӧйинде нени ундыбас керек?

¹⁶ Бӱгӱнги кӱнде улус бисти база неге де турбас улус деп јабыс кӧрӧт. Олор бисти не ле деп тӧгӱндегилеп, бистиҥ организацияны јамандап јадылар (Матф. 5:11). Је Иовтыҥ учуралын кӧрзӧӧс, Иегова бисти ченелтелерди турумкай ӧдӧр деп алаҥзыбай турган. Теҥеридеги бистиҥ Иегова Адабыс бисти тыҥ сӱӱп турган ла ол бойыныҥ улузын качан да таштабас. (Исайя 49:15, 16 кычырыгар.) Кудайдыҥ ӧштӱлери Иегованыҥ албатызы керегинде кандый ла тӧгӱн коп-сап јайат. Оныҥ учун олор нени де айдып турза, канайып та айдып турза, олордыҥ тӧгӱнин бир де кичинек укпагар! Мындый ченелте Турцияда јадып турган Джеймс аканыҥ билезинде болгон. Ака куучындайт: «Бис мындый неме оҥдоп алганыс. Кудайдыҥ албатызы керегинде јӱзӱн-базын коп-сап уксаас, бистиҥ ийде-кӱчис јылыйар. Оныҥ учун Иегованыҥ берген ижемјизин бек сананып алала, оноҥ ло ары Иеговага  эрчимдӱ иштенгенис. Бу биске сӱӱнчисти јылыйтпаска болушкан». Айдарда, Иовтоҥ тем алып, Иегованы угактар, ӧштӱлердиҥ јӱзӱн-базын тӧгӱни бистиҥ ижемјибисти айрып болбозын.

17. Еврейлерге 11-чи бажалыкта бичилген Кудайга чындык эр ле ӱй улустыҥ темдеринеҥ бис неге ӱренедис?

¹⁷ Коркышту кӱч ченелтелерде Иеговага чындык арткан ӧскӧ дӧ улус бар. Темдектезе, апостол Павел «бисти эбире андый кӧп керечилер бар» деп бичиген (Евр. 12:1). Олор коркышту јаан кӱчтер ӧткӧн дӧ болзо, ончозы Иеговага чындык арткан (Евр. 11:36—40). Олордыҥ мынайып турумкай болгоны калас болгон бо? Јок, бир де калас эмес! Олор тирӱ јӱрерде, Иегованыҥ берген сӧстӧриниҥ бӱдерин кӧрбӧгӧн дӧ болзо, је Кудайга бир де алаҥзыбай иженген. Нениҥ учун дезе Иегова олорды сӱӱп турган ла келер ӧйдӧ берген сӧзин кыйалта јогынаҥ бӱдӱрип салар деп билген (Евр. 11:4, 5). Бис те бу христиандардаҥ тем алып, Иеговага бир де алаҥзыбай иженерис.

18. Слер нени эдерге бек шӱӱп алдаар? (Еврейлерге 11:6).

¹⁸ Бис кылыгы там ла там ӱрелип барып јаткан улустыҥ ортозында јададыс (2 Тим. 3:13). Сатана Иегованыҥ ишчилерине јаантайын табару эдип јат. Анайда ок бистиҥ јӱрӱмисте башка-башка уур-кӱчтер болордоҥ айабас, је бис «тирӱ Кудайга иженедис» (1 Тим. 4:10). Оныҥ учун канча кире ийде-кӱчис бар Иеговага иштенип јӱректер! Иовтыҥ алган кайралынаҥ «Иегова буурзак, јалакай, сӱӱштӱ Кудай» (ЈТ) деп кӧрӱп јадыс (Иак. 5:11). Айдарда, Иовтый чындык болыгар. Иегова «оны тыҥ бедиреген улусты» кайралы јок артыргыспас деп ундыбагар! (Еврейлерге 11:6 кычырыгар.)