1, 2. Сарын 25:14-лӧ болзо, Иеговага јуук најы болорго турган кижи нени эдер учурлу?

 СЛЕР сананзаар, јакшы најы болорго кандый кылык-јаҥдар керек? Байла мынайып айдар болороор, јакшы најылар бой-бойына болужып, бой-бойын сӱӱр учурлу деп. Јакшы најылар бой-бойынаҥ коркыыр учурлу деп, кемниҥ де санаазына келбес болбой. Је бу јӧрмӧлдиҥ тӧс ӱлгериле болзо, Иеговага јуук најы болорго турган кижи Кудайдаҥ коркып турар учурлу. (Сарын 25:14 кычырыгар.)

² Бис Иеговага канча да јыл иштеп турган болзоос, бистиҥ ончобыска Иегованаҥ чыннаҥ ла коркып турар керек. Је Кудайдаҥ коркыыры ол не дегени? Иегованаҥ коркып турарына канайып ӱренип алар? Анайда ок Ахав каанныҥ Авдий деп јамылу ишчизиниҥ, Иодай деп улу абыстыҥ ла Иоас деп каанныҥ темдерин биске нениҥ учун шӱӱп сананар керек?

3. Бис недеҥ коркып турганыс? Мынайып коркыганыстаҥ кандый туза бар?

³ Кандый бир јаман неме боло берердеҥ айабас деп билип турзаас, биске коркымчылу боло берет. Мынайып коркыганыстаҥ туза бар. Не дезе анайып, бис ойгор эмес керектер этпей јадыс. Темдектезе, кайанаҥ јыгыларыс деп коркып, кайаныҥ кырына ӧйинеҥ ӧткӱре јууктабай јадыс. Ол эмезе колы-будыс сындырып аларыс деп коркып, јеткерлӱ айалгаларга кирбей јадыс. Анайда ок јуук улузысла ачыныжып каларыс деп коркып турзаас, јаман сӧстӧр айтпай јадыс ла јаман керектер этпей јадыс.

4. Сатана бисти Иегованаҥ канайып коркып турзын деп кӱӱнзейт?

⁴ Сатана бисти Иегованаҥ коркыыры јанынаҥ јастыра  кӧрӱмдӱ болзын деп кӱӱнзейт. Ол, Элифаз ла чылап, бисти Иегова јаман ла калју Кудай, ого качан да јарап болбозыҥ деп санандырарга албаданат (Иов 4:18, 19). Ол бисти Иегованыҥ коркышту тыҥ коркып турала, ого иштеер кӱӱнис ӧчӧ берзин деп турган. Је биске Сатананыҥ бу тузагына тӱшпеске, Иегованаҥ коркыыры јанынаҥ чын кӧрӱмдӱ болор керек.

5. Кудайдаҥ коркыыры дегени нени темдектейт?

⁵ Иегованаҥ коркыыры јанынаҥ чын кӧрӱмдӱ кижи оны сӱӱп јат ла оныҥ Иеговала колбуларына не де каршузын јетирбезин деп кӱӱнзеп јат. Иисус Иегованаҥ шак ла мынайда коркыган. Агару Бичикте айдылганыла, Иисус Иегованаҥ айап јӱрген (Евр. 5:7). Је бу дезе Иисус Адазынаҥ ӧйинеҥ ӧткӱре сертилдеп, коркыган деп кӧргӱспей јат (Иса. 11:2, 3). Карын ол Адазын акту јӱрегинеҥ сӱӱген ле ого бастыра јанынаҥ сӧсуккур болгон (Иоанн 14:21, 31). Анайып ла бистер Иегова Кудайысты акту јӱрегистеҥ тооп јадыс. Нениҥ учун дезе ол ойгор, справедливый ла кӱчтӱ Кудай. Ол бисти тыҥ сӱӱп турган ла бис оныҥ јакаруларын канайып алынып турганыска јаан ајару эдип јат. Бис оны ачындырардаҥ айабазыс ол эмезе сӱӱндирердеҥ айабазыс (Сар. 78:41; Укаа 27:11).

6. Иегованаҥ айап турарга биске не болужар? (Сарын 34:11).

⁶ Бис јаштаҥ ла ала Иегованаҥ коркыыр болуп чыкпай јадыс. Мындый немеге биске ӱренер керек. (Сарын 34:11 кычырыгар.) Канайып? Темдектезе, Иегованыҥ јайаандарын ајыктап турзаас, ӱренедис. Нениҥ учун дезе Иегованыҥ јайаандарынаҥ Кудайыстыҥ ойгорын, ийде-кӱчин ле јаан сӱӱжин кӧрӧдис. Оныҥ јайаандарын канча ла кире кӧп кӧрӱп турзаас, ого тоомјыбыс ла сӱӱжис ончо ло кире тыҥыыр (Рим. 1:20). Э́йдриен деп эје мындый сӧстӧр айдат: «Иегованыҥ јайаандарын кӧрзӧм, коркыш кайкайдым. Бистиҥ Кудайыс кандый ойгор! Иегованаҥ артык мени кем сӱӱр эди». Мынайып шӱӱп сананып тура, Эйдриен эје мындый тӱп-шӱӱлтеге келген: «Иегова меге јӱрӱм берген. Оныҥ учун биле тура оныла колбуларымды ӱрегедий керектер мен не эдетем?» А слер бу ла неделеде Иегованыҥ јайаандарын ајыктап, шӱӱп сананатан ӧй табып болороор бо? Анайып этсеер, Иегова Кудайысты тооп, оноҥ тыҥ сӱӱп баштараар (Сар. 111:2, 3).

7. Иегованаҥ айап турарга мӱргӱӱл канайып болужар?

⁷ Анайда ок Иегованаҥ коркып, ӧскӧртӧ айтса, айап турарга, биске мӱргӱӱл болужар. Канча ла кире кӧп мӱргӱп турзаас, Иегова биске ончо ло кире јуук деп билдирер. Кандый бир ченелтени чыдажарга Иегованаҥ ийде-кӱч суразаас, оныҥ коркышту јаан ийде-кӱчин эске аладыс. А Кудайыска Иисустыҥ тайылгазы учун быйанысты айтсаас, оныҥ сӱӱжин такып эске аладыс. Ол эмезе кандый бир башкарту сурап, Иеговага мӱргӱзеес, оныҥ ойгорын эске алынадыс. Айдарда, мӱргӱп турзаас, Иегованы оноҥ тыҥ тооп јадыс. Анайда ок мӱргӱӱл Иегованыҥ нормаларын буспаска болужар.

8. Иегованаҥ оноҥ ло ары айап јӱрерге биске не болужар?

⁸ Иегованаҥ оноҥ ло ары айап јӱрерге биске не болужар? Агару Бичикти шиҥдеери. Бу бичикте Иеговага чындык та, чындык эмес те улустыҥ темдери бичилген. Озо баштап Иегованыҥ чындык эки ишчизиниҥ темин кӧрӱп ийектер:  Ахав каанныҥ Авдий деп јамылу ишчизиниҥ ле Иодай деп улу абыстыҥ. А оноҥ, Иеговага озо чындык болгон, је кийнинде ого чындык артпаган Иоас деп иудей каанныҥ теми бисти неге ӱредип турганын шӱӱжип ийерис.

9. Авдийге Иегованаҥ айаганы кандый туза берди? (1 Каандар 18:3, 12).

⁹ Агару Бичикте Авдий b керегинде баштапкы ла катап айдылган јерде мындый сӧстӧр бичилет: «Авдий Иегованаҥ коркышту тыҥ айап туратан». (1 Каандар 18:3, 12 кычырыгар.) Мынаҥ ого кандый туза болды? Авдий дезе бир де тӧгӱндебес, бӱдӱмјилӱ кижи болгон. Оныҥ учун каан оны байзыҥды башкаратан кижи эдип кӧстӧгӧн. (Неемия 7:2 тӱҥдештиригер.) Анайда ок Авдий Иегованаҥ айап турганынаҥ улам, коркышту јалтанбас кижи болгон. А мындый кылык-јаҥ ого сӱреен керек болгон болор. Не дезе ол Ахав каанныҥ ӧйинде јаткан. Ахав керегинде Агару Бичикте мындый сӧстӧр айдылат: «Ахав Иегованыҥ кӧзинде јаман керектер эдип, оноҥ озо башкарган каандардаҥ ары болгон» (1 Каан. 16:30). Бого ло коштой оныҥ ӱйи, Иезавель, Ваалга бажырган. Бу ӱй кижи Иегованы кӧрӧр кӱӱни јок болгон. Оныҥ учун ол тӱндӱк каандыкта чындык бажырышты јоголторго албаданган. Керек дезе Иезавель Иегованыҥ кӧп чындык судурчыларын да ӧлтӱрген (1 Каан. 18:4). Чын ла, Авдий јеҥил эмес ӧйдӧ јаткан.

10. Авдийдиҥ јалтанбас болгонын недеҥ кӧрӧдис?

¹⁰ Авдийдиҥ јалтанбас болгоны недеҥ кӧрӱнет? Кудайдыҥ ишчилерин Иезавель ӧлтӱрип јадарда, Авдий «100 кижини куй таштарда 50 кижинеҥ јажырып, олорды калаш ла суула јеткилдеген» (1 Каан. 18:13, 14). Иезавель мыны билип ийген болзо, Авдийди ӧлтӱрип салар эди. Кем де ӧлӧргӧ кӱӱнзебей турган эмей. Авдий де кӱӱнзебеген. Андый да болзо, ол Иегованы ла оныҥ ишчилерин сӱӱгенинеҥ улам, бойыныҥ јӱрӱмин берерге белен болгон.

11. Бӱгӱнги кӱнде Иегованыҥ ишчилери Авдийдеҥ кандый тем алат? (Јурукты база кӧрӱгер.)

 ¹¹ Иегованыҥ кезик ишчилери бистиҥ ижис токтодылып калган јерлерде јададылар. Је андый да болзо, олор јаҥда отурган улусты тооп јат. Бу кару ака-эјелерис Авдийдеҥ тем алып, јӱк ле Иеговага чындык артадылар (Матф. 22:21). Олор Иегованаҥ айап јат, оныҥ учун улуска эмес, је Иеговага багынат (Ап. ижи 5:29). Мынаҥ улам олор јалтанбай јарлайдылар ла ајарыҥкай болуп јуулыжып јадылар (Матф. 10:16, 28). Анайда ок ака-эјелерди кӧгӱс курсакла јеткилдейт. Африкада јадып турган Анри́ аканыҥ темин кӧрӱп ийектер. Ондо Иегованыҥ Керечилериниҥ ижи алдында токтодуда болгон. Токтодуныҥ ӧйинде Анри ака-эјелерге кӧгӱс курсак јетирген. Ол мынай бичиген: «Мен бойым уйалчаҥ кижи. Је Иегованы акту јӱрегимнеҥ тооп турганымнаҥ улам јалтанбас боло бергем». Слер де Анри ака чылап јалтанбас болор аргалу ба? Иегованаҥ айап турган болзоор, болуп ийереер.

12. Иодай деп улу абыстыҥ ла оныҥ ӱйиниҥ Иеговага чындык болгоны недеҥ кӧрӱнет?

¹² Улу абыс Иодай Иегованаҥ айап јӱрген. Оныҥ учун ол бойы да Кудайга чындык болгон, улусты да Иеговага бажырзын деп кӱӱнзеткен. Мыны бис Иудей јеринде Иезавельдиҥ ордына оныҥ кызы, Аталия, каан болуп баштаарда, нени эткенинеҥ кӧрӱп јадыс. Бу ӱй кижи јаҥ блаажып, каанныҥ ӱйезин јоголторго, бойыныҥ ла баркаларын ӧлтӱрерге сананган! Ол кемди де килебейтен, оныҥ учун улус оноҥ коркышту коркыган (2 Лет. 22:10, 11). Бу ӧйдӧ Иодайдыҥ ӱйи Иехошева, ол балдардыҥ бирӱзин, Иоасты, јажырала, ӧбӧӧниле кожо чыдадып салган. Анайып, Давид каанныҥ ӱйези ӱзӱлбей јат. Иодай Иеговага чындык болгон, оныҥ учун ол Аталиянаҥ бир де коркыбаган (Укаа 29:25).

13. Иоаска 7 јаш болордо, Иодай Иеговага чындык болгонын база катап канайып кӧргӱскен?

¹³ Иоас 7 јашту болордо, Иодайдыҥ Иеговага чындык болгоны база катап кӧрӱнген. Ол Иоасты каан эдип отургызарга план тургускан. Оныҥ планы бӱде берген болзо, Давидтиҥ ӱйезинеҥ келген уул каан болуп отурар эди. Је бӱтпеген болзо, Аталия Иодайды ӧлтӱрип салар эди. Иегованыҥ болужыла оныҥ планы бӱдӱп калган. Иодай дезе каанныҥ јӱрӱми учун каруулу улустыҥ, байзыҥныҥ каруулчыктарыныҥ ла левиттердиҥ болужыла Иоасты каан эдип отургызып, Аталияны ӧлтӱрзин деп јакарган (2 Лет. 23:1—5, 11, 12, 15; 24:1). «Оноҥ Иодай Иегованыҥ, каанныҥ ла албатыныҥ ортозында јӧптӧжӱ тургускан. Анайып олор оноҥ ло ары Иегованыҥ албатызы болуп артар эди» (2 Каан. 11:17). Бого ло коштой, Иодай «Иегованыҥ туразына кандый бир шылтактаҥ улам ару эмес болгон кижи кирбезин деп, тураныҥ эжиктерине каруулчыктар тургузып салган» (2 Лет. 23:19).

14. Иегова Иодайды канайып кайралдаган?

¹⁴ Бу учуралдаҥ озо Иегова мындый сӧстӧр айткан: «Меге чындык болгон кижиге, мен де чындык болорым» (1 Сам. 2:30). Чын ла, Иегова Иодайды кайралдаган. Темдектезе, оныҥ эткен јакшы керектери Агару Бичикте биске ӱредӱ этире бичилип калган (Рим. 15:4). А Иодай божоп каларда, Иегова ого јаан ајару эткен. Агару Бичикте айдылат: «Оны Давидтиҥ калазында каандарла кожо јууп койгон, нениҥ учун дезе ол Израильде чындык Кудайга ла оныҥ туразына јакшы керектер эткен» (2 Лет. 24:15, 16).

15. Бис Иодайдыҥ теминеҥ неге ӱренедис? (Јурукты база кӧрӱгер.)

 ¹⁵ Иодайдыҥ теминеҥ Иегованаҥ айап турарга ӱренедис. Темдектезе, аксагалдар Иодайдаҥ тем алып, Иегованыҥ јуундарындагы койлорын кичеейдилер (Ап. ижи 20:28). Анайда ок Иодайдыҥ теми јажы јаанаган ака-эјелердиҥ кӱӱнин кӧдӱрер аргалу. Олор Кудайдаҥ айап, ого чындык артып турган болзо, Иегова олорды карып калган дейле, туура јылдырбай јат, карын олордыҥ канча кире аргазы бар, агару ишке акту јӱрегинеҥ туружып турганына сӱӱнип јат. А јииттер дезе, Иегова Иодайга канай баштанганынаҥ тем алар аргалу. Олор јажы јаанаган ака-эјелерди, анчада ла Иеговага узак јылдардыҥ туркунына иштеген ака-эјелерди, тооп јадылар (Укаа 16:31). А бистиҥ ончобыс Иодайга болушкан улустаҥ тем алар аргалу. Айдарда, бистиҥ ортобыста «башкарар јаҥды алган улуска» сӧсуккур болуп, олорды тооп јӱректер (Евр. 13:17).

16. Иоас улустыҥ кӧрӱмине јайылчаҥ кижи болгон деп недеҥ кӧрӱнет?

¹⁶ Иодай тирӱ јӱрерде, Иоас јакшы керектер эткен (2 Каан. 12:2). Иодайдаҥ кӧгӱс таскаду алган јиит каан Иегова Кудайды сӱӱндирерге кӱӱнзеген. Је качан Иодай божоп каларда, Иоас Иеговага чындык артпаган ла јайзаҥдардыҥ сӧзине кирип баштаган. Мынаҥ улам, Иоас ла оныҥ улустары «агару столмолорго ло чалуларга бажырып баштагандар» (2 Лет. 24:4, 17, 18). Иеговага мыны кӧрӧргӧ коркышту ачу болгон. Оныҥ учун  Кудай «олорды бойына кайра экелерге, канча катап судурчыларын ийген, је олор судурчыларды укпаган». Олор керек дезе, Иодайдыҥ уулын, Захарияны c, да укпаган. Захария дезе судурчы ла абыс болгон. Анайда ок ол Иоаска энези јанынаҥ тӧрӧӧн кижи болгон. Иоас оны аргадаган билеге быйанду болордыҥ ордына, Захарияны ӧлтӱртип койгон (2 Лет. 22:11; 24:19—22).

17. Иоасла учы-тӱбинде не болгон?

¹⁷ Иоас каан Иегованаҥ коркыбай барган. Оныҥ да учун тоомјызын јылыйтып койгон. Нениҥ учун дезе Иегова мындый сӧстӧр айткан: «Мени јаман кӧргӧн улус бойлоры да јаман кӧрдирер» (1 Сам. 2:30). Качан Сирияныҥ јаан эмес черӱзи Иудей јериниҥ коркышту јаан черӱзин одо согуп койордо, Сирияныҥ улузы «каанды шыркалу таштап, јӱре бергендер». А кийнинде, Иоастыҥ јалчылары оны ӧлтӱрер деп куучындажала, Захарияныҥ канын тӧккӧни учун, оны ӧлтӱрип койгон. Керек дезе оныҥ сӧӧгин де, «каандардыҥ сӧӧк салып турган јерине» јуубаган (2 Лет. 24:23—25).

18. Иеремия 17:7, 8-ле болзо, биске Иоастый болуп калбаска не болужар?

¹⁸ Бис Иоастыҥ теминеҥ неге ӱренедис? Иоас тӱрткӱшле тӱркӱштеп салган тазылы тереҥ эмес агашка тӱҥей болгон. Тӱрткӱш болгон Иодай јок болуп каларда ла, Кудайдаҥ јана баскандардаҥ «салкын» келерде, Иоас аҥтарылып калган. Бу темди кӧргӧнисле, Кудайдаҥ айап јӱрери јӱк ле ака-эјелердиҥ ол эмезе билениҥ болужынаҥ камаанду болбос учурлу. Оныҥ учун кӧгӱс јанынаҥ бек болорго, кажы ла кижи бойы Кудайга чындык болор ло оноҥ айап јӱрер учурлу. Анайда эдерге јаантайын Агару Бичикти шиҥдеп, шӱӱп сананып мӱргӱӱр керек (Иеремия 17:7, 8 кычырыгар; Кол. 2:6, 7).

19. Иегова бистеҥ нени некеп турган?

¹⁹ Иегова бистеҥ ӧткӱре кӧпти некебей јат. Оныҥ некелтелери Экклезиаст 12:13-те јарт айдылып калган: «Чындык Кудайдаҥ айап, оныҥ јакылталарын бӱдӱрип јӱр. Кижиниҥ јӱрӱминде бу эҥ ле керектӱзи». Кудайдаҥ айап јӱрзеес, келер ӧйдӧги ченелтелерди ӧдӱп чыгарыс ла Авдий ле Иодай чылап Кудайга чындык артарыс. Ол тушта Иеговала бистиҥ колбуларысты кем де, не де бузып болбос.