1. Иегованыҥ кӱнинде аргаданып аларга биске нени эдер керек?

 АГАРУ БИЧИКТЕ «Иегованыҥ кӱни» дегени Кӱчтӱдеҥ Кӱчтӱ Кудай ӧштӱлерин јаргылаар ла бойыныҥ ишчилерин аргадап алар ӧйди темдектейт. Алдындагы ӧйдӧ Иегова кезик албатыларды јаргылап туратан (Иса. 13:1, 6; Иез. 13:5; Соф. 1:8). Эмдиги ӧйдӧ «Иегованыҥ кӱни» Улу Вавилонго табару эткениле башталып, Армагеддон деп јуу-согушла божоор. Ол «кӱнде» аргаданып аларга, эмди ле белетенер керек. Бисти Иисус улу тӱбекке јаантайын белен болзын деп ӱреткен (Матф. 24:21; Лука 12:40).

2. Нениҥ учун 1 Фессалоникадагыларды шиҥдеер керек?

² Апостол Павел 1 Фессалоникадагыларга Иегованыҥ јаргылайтан улу кӱнине белетенип аларга болужатан бир канча јакшы темдер айткан. Кудайдыҥ кӱни эмеш оноҥ келер деп, Павел билген (2 Фес. 2:1—3). Је андый да болзо, апостол Павел ака-эјелерди ол кӱн эртен ле баштала берер чылап белетенип турзын деп ӱреткен. Бу јӧпти бистер де тузаланар аргалу. Оныҥ учун: 1) ол кӱн канайып келерин, 2) ол кӱнде кем аргаданып болбозын ла 3) ол кӱнге канайып белетенип аларын шӱӱжип ийектер.

3. Иегованыҥ кӱнин нениҥ учун уурчыга тӱҥейлеерге јараар? (Јурукты база кӧрӱгер.)

³ «Тӱнде уурчы чылап» (1 Фес. 5:2). Бу ӱч темниҥ баштапкызы. Павел олордыҥ болужыла Иегованыҥ кӱни канайып келерин јартаган. Кӧп сабада уурчылар айылдыҥ ээзи чек сакыбаган ӧйдӧ, тӱн аразында келип уурданат. Анайып ла кӧп саба улуска Кудайдыҥ кӱни сакыбаган јанынаҥ келер. Чындык та христиандарга Иегованыҥ кӱни кенетийин једип келген деп билдирердеҥ айабас.  Је Иегова калју улуска кӧрӧ, ол кӱнде бойыныҥ ишчилерин аргадап аларга келер.

4. Иегованыҥ кӱнин нениҥ учун бала табатан ооруга тӱҥейлеп јат?

⁴ «Барлу ӱй кижини толголткон оорудый болор» (1 Фес. 5:3). Эне болотон ӱй кижи балазыныҥ кандый кӱнде чыгарын билбей јат. Је ол оныҥ чыгарына бир де алаҥзыбайт. Ол ӧй кенейте башталат. Оныҥ оорузы коркышту тыҥ. Оны кем де токтодып болбос. Бис Иегованыҥ јаргызы кандый кӱнде келерин ле канча саатта болотонын база билбезис. Је калју улусты јоголтотон Иегованыҥ јаргызы кыйалта јогынаҥ болорына бӱдӱп јадыс.

5. Нениҥ учун улу тӱбекти јер јарыганыла тӱҥейлеерге јараар?

⁵ Јер јарыганы чылап. Павел ӱчинчи теминде ойто ло тӱндеги уурданып јаткан уурчы керегинде айдат. Је ол бу учуралда Иегованыҥ кӱнин јер јарыганыла тӱҥдештирет (1 Фес. 5:4). Уурчы тӱнде уурданып јадала, јердиҥ јарыганын билбей де калат. Јер јарый берзе, уурчыныҥ јаман керектери ӱзе улуска кӧрӱне берет. Анайып ла улу тӱбек уурчылар чылап јаман керектер эдип турган улусты јарыдып ийер. Бистер ол улуска кӧрӧ, Кудайга чындык артып, јаман керектеристеҥ айрылып, Иегованыҥ кӱнине белетенип алар аргалу (Эф. 5:8—12). Оноҥ ары Павел эки темниҥ болужыла Иегованыҥ кӱнинде кем аргаданып болбос деп кӧргӱзет.

6. Нениҥ учун кӧп саба улусты кӧгӱс јанынаҥ уйуктап јаткан деп айдарга јараар? (1 Фессалоникадагыларга 5:6, 7).

⁶ «Уйуктап јаткан улус». (1 Фессалоникадагыларга 5:6, 7, ЈТ кычырыгар.) Павел Иегованыҥ кӱнинде  аргадалбайтан улусты уйуктап јаткан улусла тӱҥдештирген. Андый улус айландыра не болуп турганын да, ӧйдиҥ ӧдӱжин де билбейдилер. Оныҥ учун чочыдылу не-не боло берзе де, олор керекке албайдылар. Анайып ла бӱгӱнги кӱнде кӧп саба улусты кӧгӱс јанынаҥ уйуктап јаткан деп айдарга јараар (Рим. 11:8). Олор бис калганчы кӱндерде јадып турганыс ла удабас ла улу тӱбек болор деп керелерди керекке албайдылар. Је телекейде чочыдылу не-неме боло берзе, олор кӧгӱс уйкунаҥ ойгонып келеле, Каандык керегинде јарла јилбиркей берет. Је андый да болзо, олор бир эмеш ӧйдӧҥ ойто ло уйуктап калат. Керек дезе јаргыныҥ кӱни келер деп бӱдӱп турган улустыҥ кезиги ол кӱнди эм тура келбес деп санангылайт (2 Пётр 3:3, 4). Је бистерге кӱннеҥ кӱнге, алдындагызына кӧрӧ, оноҥ тыҥ сергелеҥ болор керек деп оҥдоп јадыс.

7. Нениҥ учун ӧлӱмге бараткан улусты аракызак улуска тӱҥейлеерге јараар?

⁷ «Аракыдап турган улус». Апостол Павел Иегованыҥ кӱнинде јоголтылатан калју улусты аракызактарла тӱҥдештирет. Эзирик улустыҥ санаазы јазап иштебей јат ла олор чын тӱп-шӱӱлте эдип болбой јат. Анайып ла калју улус Иегованыҥ озолондыра айткан сӧзин бир де керекке албайдылар. Олор ӧлӱмге апарып јаткан јолдо. Агару Бичик бисти эрӱӱл болзын ла чын тӱп-шӱӱлте эдип турзын деп ӱредет (1 Фес. 5:6). Бир библеисттиҥ айтканыла болзо, эрӱӱл кижи токуналу болот, оныҥ санаазы јакшы иштейт ле бодоп ло чаксырабай јат. Биске нениҥ учун токуналу болор керек ле ӱзе немени шӱӱп сананар керек? Нениҥ учун дезе бу телекейдиҥ керектерине кирижерге бис кӱӱнзебей јадыс. Бу телекей бисти бойыныҥ керектерине кийдирерге албадаар болор эмезе политиканыҥ ла эл-јонныҥ сурактарына киришсин деп, јайа тартардаҥ да айабас. Иегованыҥ кӱни јууктаган сайын бисти там ла кыспактар. Је биске нени айдарына тыҥ санааркабас керек. Нениҥ учун дезе Кудайдыҥ агару тыны токуналу артарга ла ойгор болорго болужар (Лука 12:11, 12).

8. 1 Фессалоникадагыларга 5:8-теги сергелеҥ ле керсӱ болорго болужатан кылык-јаҥдар неле тӱҥдештирилет? (Јурукты база кӧрӱгер.)

⁸ «Кӧӧ-куйакты... јуучыл бӧрӱкти, кийип алалы». Павел бисти јуулажатан кийимин кийип алган јуучылга тӱҥейлештирет. (1 Фессалоникадагыларга 5:8, ЈТ кычырыгар.) Јуучыл јуулажарга јаантайын белен болор учурлу. Бисти олорго тӱҥейлеерге јараар. Нениҥ учун дезе бис сӱӱштиҥ ле бӱдӱмјиниҥ кӧӧ-куйагын, анайда ок ижемјиниҥ јуучыл бӧрӱгин кийип алзаас, Иегованыҥ кӱнине белен болорыс. Бу кылык-јаҥдардаҥ — сӱӱштеҥ, ижемјинеҥ, бӱдӱмјинеҥ — бистиҥ јӱрӱмис камаанду.

9. Бӱдӱмји бисти канайып корулайт?

⁹ Кӧӧ-куйак јуучылдыҥ јӱрегин корулайт. Анайып ла бӱдӱмји ле сӱӱш бистиҥ сӱрлеп айдылган јӱрегисти корулап јат. Бу кылык-јаҥдар биске Кудайыска чындык артарга ла Иисустыҥ кийнинеҥ барарга болужып јат (Евр. 11:6). Бисте бӱдӱмји бар болзо, Иегованы акту јӱрегистеҥ бедиреп турганы́с учун кайрал аларыс деп алаҥзыбай јадыс. Анайда ок бӱдӱмји кӱчтердиҥ ӧйинде бисти Башчыбыска, Иисуска, чындык артарга кӱӱнзедет. Бӱдӱмји кӱчтерди ӧдӧргӧ болужат. Истежӱлердиҥ де ӧйинде, акча-манатла да кӱчтер болуп турарда, Иеговага чындык арткан ака-эјелердиҥ темдери  бар. Бого коштой Кудайга бӱдӱп турзаас, кӧп акча-јӧӧжӧлӱ болотон тузакка тӱшпезис. Бу јанынаҥ биске Каандыктыҥ ижин баштапкы јерге тургузарга, јӱрӱмин јеҥилткен ака-эјелердеҥ тем алар керек b.

10. Кудайды ла улусты сӱӱри оноҥ ло ары јарлаарга канайып болужат?

¹⁰ Биске сергек ле керсӱ артарга, сӱӱш база керек болот (Матф. 22:37—39). Бис Кудайды сӱӱп турзаас, кандый ла кӱчтер болуп турза, турумкай артып, оноҥ ары јарлайдыс (2 Тим. 1:7, 8). Анайда ок бис Кудайга бӱтпей турган улусты база сӱӱп јадыс, оныҥ учун айылдар сайын базып јадыс, телефон ажыра јарлап јадыс ла самаралар бичийдис. Бу улусты качан бирде бисле кожо Кудайга иштеер деп иженип јадыс (Иез. 18:27, 28).

11. Ака-эјелеристи сӱӱп турганы́с биске канайып болужат? (1 Фессалоникадагыларга 5:11).

¹¹ Анайда ок јуунда ака-эјелерис бистиҥ јууктарыс болуп јат. Бис олорды сӱӱп турганысты Павелдиҥ: «Бой-бойыгарды кӧкӱдип, бой-бойыгарды тыҥыдыгар» — деген сӧстӧрди бӱдӱрип турганысла кӧргӱзедис. (1 Фессалоникадагыларга 5:11 кычырыгар.) Јуу-согушта јуучылдар теҥ-тай јуулажып, бой-бойына болужарга белен болгылайт. Анайып ла бис ака-эјелердиҥ кӱӱнин кӧдӱрип, бой-бойыска болужып јадыс. Кезикте јуу-согушта јуучылдар бой-бойын шыркалап ийердеҥ айабас. Је олор мыны ӧнӧтийин этпей јат эмей (1 Фес. 5:13, 15). Анайып ла бис јуунда бой-бойысты биле тура ачындырбайдыс, ол эмезе олорго удура ӧнӧтийин јаман баштанбайдыс. Анайда ок сӱӱжисти јуунда бисле башкарып турган акаларды тооп турганысла кӧргӱзедис (1 Фес. 5:12). Павел Фессалоникадагы јуунга самара бичип турарда, бу јуунныҥ тӧзӧлгӧни бир де јыл болголок болгон. Оныҥ учун андагы аксагалдар ченемели јетпей турганынаҥ улам, јастырган да болор. Андый да болзо, олорды тоор керек болгон. Улу тӱбек там ла јууктап јат. Оныҥ учун келер ӧйдӧ биске  јербойыныҥ аксагалдарыныҥ башкартулары бӱгӱнги кӱнге кӧрӧ, оноҥ тыҥ керек болордоҥ айабас. Ол ӧйдӧ бисте тӧс башкарула, эмезе филиалла колбожор арга јок болордоҥ айабас. Оныҥ да учун биске бӱгӱннеҥ ле ала кару аксагалдарысты сӱӱрге ле тоорго ӱренер керек. Айдарда, не де болотон болзо, аксагалдардыҥ јастыраларын чоттоп отурардыҥ ордына, карын олорло Иегова Иисус ажыра башкарып турган деп ундыбай јӱректер.

12. Ижемји бистиҥ санаасты канайып корулайт?

¹² Јуучылдыҥ бажын бӧрӱги канайып корулап турган, анайып ла келер ӧйгӧ ижемји бистиҥ санаабысты база корулап јат. Бек ижемјинеҥ улам, бу телекей биске бир де јакшы неме берип болбозын оҥдоп јадыс (Флп. 3:8). Бу ижемји биске кандый ла айалгада токуналу артарга болужат. Мыны Африкада иштеп турган Уо́ллис ле Лори́нда оҥдоп алган. Ӱч ле неделениҥ туркунына Уоллистиҥ адазы ла Лоринданыҥ энези божоп калган. Је ковидтеҥ улам олорго јанып, јуук улузыла кожо болорго келишпеген. Уоллис бичиген: «Ижемјинеҥ улам, олордыҥ божоор алдында калганчы ӧйлӧрин сананбай, карын, олордыҥ јаҥы телекейде су-кадык ла јиит болорын сананып јадыс. Качан тыҥ санааркап, олорды јоктоп турзаас, ижемји токунал берет».

13. Бис Кудайдаҥ агару тын аларга нени эдерис?

¹³ «Кудайдыҥ тыныныҥ јалбыжын ӧчӱрбегер» (1 Фес. 5:19). Апостол Павел агару тынды бистиҥ ичистеги отко тӱҥейлеген. Агару тынныҥ болужыла бис чынды эдерге јӱткӱп јадыс. Анайда ок Иегова Кудайыска иштеер ийде-кӱч аладыс (Рим. 12:11). Је агару тынды аларга нени эдер керек? Иегованаҥ агару тын сураарыс, оныҥ тыныла бичилген Агару Бичикти тереҥ шиҥдеерис, анайда ок Кудайдыҥ тыны башкарган организацияга јӧмӧжӧрис. Ол тушта агару тынныҥ тӱжӱмине кирип турган кылык-јаҥдарыс тыҥыыр (Гал. 5:22, 23).

14. Кудайдыҥ тынын оноҥ ло ары аларга, бис недеҥ кыйар учурлу? (Јурукты база кӧрӱгер.)

 ¹⁴ Кудайдыҥ тынын алган кийнинде, бис оныҥ јалбыжын ӧчӱрбес учурлу. Кудай тынын јӱк ле санаалары ла керектери ару улуска берип јат. Је бис санаабысты ла керектеристи быјарсыдып койзоос, Иегова биске агару тынын бербей барар (1 Фес. 4:7, 8). Анайда ок биске «судурларды керекке албай јӱрбегер» деген сӧстӧр аайынча јӱрер керек (1 Фес. 5:20, ЈТ). «Судурлар» дегенин канайып оҥдоор? Ол Кудайдыҥ тыны ажыра айдылып турган јетирӱлер болот. Бу јетирӱлерге Иегованыҥ кӱни керегинде ле бистиҥ јадып турган аҥылу ӧй керегинде јетирӱлер кирет. Оныҥ да учун бис ол ӧйди Армагеддонго јетире јӱрӱп болбозыс деп сананып, ыратпай јадыс. Карын, санаабыста ол кӱнди тӱргедедип, Иегованыҥ кӱни јууктап келген деп, ундыбай јӱредис. Бу недеҥ кӧрӱнер? Иегованы сӱӱндирерге, ару јӱрӱп турзаас ла кӧгӱс керектерге эрчимдӱ туружып турзаас (2 Пётр 3:11, 12).

15. Биске кӧрмӧстӧрдиҥ тӧгӱнине ле тӧгӱн јетирӱлерге кирбеске нени эдер керек? (1 Фессалоникадагыларга 5:21).

¹⁵ Удабас ла Кудайдыҥ ӧштӱлери: «Амыр, кайдаҥ да јеткер јок» — деп јар айдар (1 Фес. 5:3). Кӧрмӧстӧрдиҥ јетирӱлери бастыра јердиҥ ӱстине таркай берзе, кӧп саба улус ого бӱде берер (Ачыл. 16:13, 14). Је бис апостол Павелдиҥ: «Ончозын ченеп кӧрӱгер» — деген сӧзиле јӱрзеес, бисти кем де тӧгӱндеп болбос. (1 Фессалоникадагыларга 5:21 кычырыгар.) «Ченеп кӧрӱгер» деп кӧчӱрилген грек сӧс ташты чын алтын ба деп шиҥдеген тушта тузаланылган. Анайдарда, биске нени кычырганысты ла нени укканысты ӱзе шиҥдеп турар керек. Мынайып эдери Фессалоникадагы ака-эјелерге сӱреен керектӱ болгон. А биске удабас, улу тӱбек јууктаган сайын, бу оноҥ керектӱ болор. Оныҥ учун кажы ла кижиниҥ айткан сӧзине бӱдердиҥ ордына, кычырган ла уккан немегисти Агару Бичикле, Иегованыҥ организациязы нени айдып турганыла тӱҥдештирер керек. Ол тушта бис кӧрмӧстӧрдиҥ тӧгӱнине кирбезис (Укаа 14:15; 1 Тим. 4:1).

16. Бисте кандый ижемји бар? Бу бисти неге кӱӱнзедет?

¹⁶ Иегованыҥ албатызы улу тӱбекти ӧдӱп чыгар. Је бистиҥ кажыбыс ла эртенги кӱнде не болорын билбей јадыс (Иак. 4:14). Андый да болзо, Армагеддонноҥ озо божоп калзаас, Иегова бисти тирилтип, ӱргӱлји јӱрӱм сыйлаар. Је мындый кайралды аларга, Кудайга чындык артар керек. Майлаткандар Иисусла кожо теҥериде јадар, ӧскӧ койлор дезе ӱргӱлјиге јерде райда јадар. Оныҥ учун сӱреен јараш ижемјибисти баалап турзаас, Иегованыҥ кӱнине белен болорыс!