Бу суракка Агару Бичик каруу бербей јат. Је андый да болзо, олордыҥ Вифлеемде нениҥ учун артып калганын кезик учуралдардаҥ билип аладыс.

Агару Бичикте айдылганыла, Марияга ангел уул бала табарыҥ деп айткан. Ол ӧйдӧ Иосиф ле Мария Галилей јеринде, Назарет калада, јаткан (Лука 1:26—31; 2:4). Је кийнинде, олор Египетте бир канча ӧй јадып ийген кийнинеҥ, ойто кайра Назаретке јанып келген. Иисус бу калада чыдап ӧскӧн, оныҥ учун оны Назареттиҥ кижизи дежетен (Матф. 2:19—23). Анайып, Иисус, Иосиф ле Мария керегинде куучындап јатсаас, Назарет деп кала санаабыска кирип келет.

Марияда Иудей јеринде јадып турган Елизавета деп тӧрӧӧни болгон. Ол Крестеечи Иоанныҥ энези, оныҥ ӧбӧӧни — Захария деп абыс (Лука 1:5, 9, 13, 36). Мария олордыҥ айылында 3 ай кире айылдап јӱреле, кайра Назареттӧӧн јанып келген (Лука 1:39, 40, 56). Айдарда, Мария Иудей јерди бир эмеш билетен болгон.

Јаан удабай тооалыш эдер керек деп јакару чыккан. Оныҥ учун Иосиф Марияла кожо Вифлеемдӧӧн баргылаган. А Вифлеем дезе «Давидтиҥ калазы» болгон, судурла болзо, Мессия ондо чыгар учурлу (Лука 2:3, 4; 1 Сам. 17:15; 20:6; Мих. 5:2). Айдарда, Мария Иисусты бу калада чыгарган. Је Иосиф јаҥы чыккан балалу Марияны ыраак јолго барзын деп кӱӱнзебеген. Оныҥ да учун олор Вифлеемде артып калгандар. А бу кала Иерусалимдеги ӧргӧӧнӧҥ 9 километр кире ыраагында турган. Мынаҥ улам Иосиф ле Марияга балазыла кожо Иерусалимге једип барала, јасак аайынча тайылгалар эдерге кӱч болбогон (Лев. 12:2, 6—8; Лука 2:22—24).

Иисус чыккалакта, ангел Марияга оноҥ чыгатан уул балага «Давидтиҥ ширеези берилер» ле ол каан болор деп, озодоҥ айдып салган. Иосиф ле Мария Иисустыҥ мынайып чыкканы тегиндӱ эмес деп сананган болор (Лука 1:32, 33; 2:11, 17). Оныҥ да учун олорго Вифлеемде оноҥ ло ары артып, Кудайдаҥ башкарту сакыыр керек деп санаа келген болордоҥ айабас.

Бис олордыҥ Вифлеемде канча кире јатканын билбезис. Нениҥ учун дезе астрологтор Иосиф ле Мариядӧӧн келерде, олор турада јаткан. Анайда ок јаш бала да чыдап калган (Матф. 2:11). Айдарда, олор тооалыштыҥ кийнинеҥ Назареттӧӧн јанбаган. Иосиф ле Марияныҥ Вифлеемди айылзынып койгонынаҥ ондо узак јатканы кӧрӱнет.

Ирод «Вифлеемде... эки јашту ла оноҥ кичӱ балдарды ончозын» ӧлтӱрзин деп јакарган (Матф. 2:16). Оныҥ учун Иегова Иосифти Мария ла Иисусты алып, Египеттӧӧн качсын деген. Олор анда Ирод божогончо јаткандар. Ирод божоп каларда, Иосиф билезин алганча Назареттӧӧн кӧчӱп ийген. Олор Вифлеемдӧӧн нениҥ учун кайра јанбаган? Байла, Иудей јеринде Иродтыҥ Архелай деп калју уулы башкарып турганын билген. Анайда ок Иосифке Кудай бойы јакару берген. А Назарет калада Иосифке Иисусты Кудайдыҥ јасагыла чыдадарга кем де каршузын јетирип болбос эди (Матф. 2:19—22; 13:55; Лука 2:39, 52).

Иосиф, Иисус ӧскӧ койлорго теҥеридӧӧн баратан јолды ачкалакта, божогон болор. Андый болзо, Иосиф јерде тирилер. Ол тирилип келзе, кӧп улус оныла јолыгыжар. Ол тушта Иосиф Иисус чыгарда нениҥ учун Марияла кожо Вифлеемде артып калганын кӧптӧдӧ куучындап берер.