1. Јӧп кандый учуралдарда берилер аргалу? Јӧпти нениҥ учун алынып турар керек?

 КЕЗИКТЕ бистиҥ кажыбыска ла јӧп керек болот. Бис кандый бир айалгада јӧпти јакшы билер улузыстаҥ бойыс сурайдыс. Је кезикте кем-кем бисти јастыра алтам эдип ийбезин деп, јӧп берер аргалу (Гал. 6:1). А база качан јӧп берилип турган дезе, јаан јастыра эдип ийзеес. Је јӧпти бис бойыс сураганыс па эмезе биске оны кем-кем берген болзо, тӱҥей ле алынып турар керек. Анайып, тӱзединерис те, јӱрӱмис те аргадалар! (Укаа 6:23).

2. Укаа сӧстӧр 12:15-ле болзо, биске нениҥ учун јӧпти алынып турар керек?

² Бу јӧрмӧлдиҥ тӧс ӱлгери бисти «ойгор улустыҥ сӧзин лаптап ук» деп кӱӱнзедип јат (Укаа 22:17). Јердиҥ ӱстине кем де «мен ӱзе билерим» деп айдып болбос. Кандый бир кижи тӱҥей ле бистеҥ кӧпти билер эмезе ченемели бистеҥ кӧп. (Укаа сӧстӧр 12:15 кычырыгар.) Оныҥ учун слер јӧпти алынып турган болзоор, слерди јобош кижи деп айдарга јараар. Јобош кижи кезик немени тӱҥей ле билбес деп аайлап јат. Ол бойыныҥ амадуларына јединерге кемниҥ-кемниҥ болужын аларга јӧпсинет. Ойгор Соломон каан Кудайдыҥ агару тынына башкартып, мындый сӧстӧр айткан: «Јӧптӧжип тургузылган амаду бӱдӱп калат» (Укаа 15:22).

3. Иегова биске јӧпти кандый эки аргала берет?

³ Иегова биске јӧпти эки арганыҥ болужыла берет? Темдектезе, бис Агару Бичикти ле ого тӧзӧлӧнгӧн бичиктерди кычырып јатсаас, бойыстыҥ јастыраларысты кӧрӱп јадыс. Мындый јӧптӧр бастыра јуундарга берилген деп айдарга јараар (Евр. 4:12). Ол эмезе јӧпти биске аксагалдар эмезе кӧгӱзи тереҥ ӧскӧ дӧ акалар  айдып берет. Мындый јӧпти шак ла биске бойыска берилген деп айдарыс. Олор слерди сӱӱп јат, оныҥ учун слерге бу јӧпти айдарга кандый принцип болужар деп, канай айтсаас јакшы болор деп шӱӱп сананган болор. Айдарда, олордыҥ јӧбин алынып, быйанду болзоос јакшы болор эди.

4. Экклезиаст 7:9-ла болзо, биске јӧп берилзе нени этпес керек?

⁴ Кезикте биске јӧп берилзе, ичиске кирбей јат. Бис толо кемдӱ эмес деп бойысты оҥдоп то турган болзоос, је кем-кем јастырабысты кӧзиске ле айдып берзе, бис ачына бередис. (Экклезиаст 7:9 кычырыгар.) Керек дезе бис бойысты актап, ол кижиниҥ јӧби де, оны биске канайып бергени де јарабай јат. Ол эмезе: «Ол кем андый меге јӧп берерге?! Озо баштап бойын кӧрӱп алзын!» — деп санаалар келердеҥ айабас. Анайып, бис ол кижиниҥ айткан јакшы јӧбин де алынбазыс, анайда ок јӱк ле кулагыска јарагадый неме айдып турган улусты угар болорыс.

5. Бу јӧрмӧлдӧ нени кӧрӧрис?

⁵ Бис бу јӧрмӧлдӧ јӧпти алынган ла јӧпти алынбаган улустыҥ темдерин кӧрӧрис. Анайда ок јӧпти алынарга биске не болужар деген суракты шӱӱжерис.

6. Ровоам каанныҥ учуралынаҥ неге ӱренедис?

⁶ Соломонныҥ уулыла, Ровоам каанла, не болгонын кӧрӱп ийектер. Бир катап Израиль албаты каанга јаан суракту келген. Олор Ровоамнаҥ Соломонныҥ улуска илип берген јӱгин јеҥилтип берзин деп сураган. Оныҥ учун Ровоам каан Израильдиҥ аксагалдарынаҥ јӧп сураарда, олор Ровоамды албатыны уксын деп јат (1 Каан. 12:3—7). Анайып, каан албатыныҥ кӧзинде тоомјылу артар эди. Је Ровоамга олордыҥ јӧби јарабай каларда, ол бойына кураа 40 кире јашту улуска баштанып јат (2 Лет. 12:13). Бу улустыҥ јӧбиле болзо, албатыныҥ сурагын укпай, карын, олордыҥ јӱгин оноҥ кӱч эдип салар керек (1 Каан. 12:8—11). Мындый айалгада Ровоам Иегованаҥ кемдердиҥ сӧзин укса јакшы болор эди деп сураардыҥ ордына, бойына јарагадый јӧпти уккан. Ровоам најыларыныҥ јӧбин укканынаҥ улам ого бойына да, Израиль албатыга да јаан тӱбек болгон. Бис бу учуралдаҥ неге ӱренедис? Берилген јӧп кезикте ичиске кирбестеҥ айабас, је бу јӧп Кудайдыҥ Сӧзине тӧзӧлӧнгӧн болзо, оны угар керек.

7. Уззия каанныҥ теми бисти неге ӱредет?

⁷ Эмди Уззия каанныҥ темин кӧрӱп ийектер. Ол ӧргӧӧдӧ јӱк ле абыстар киретен кыпка кирип, фимиам ӧртӧӧргӧ сананган. Је абыстар оны токтодып айтты: «Уззия каан, сеге мында фимиам ӧртӧӧргӧ јарабас! Бу јӱк ле абыстардыҥ ижи». Олорды угала, Уззия капшай ла јобожодынып, ӧргӧӧдӧҥ чыккан болзо, Иегова оныҥ јастыразын ӧткӱрип койор эди. Је ол абыстарга коркышту тыҥ ачынган. Уззияда мындый кылык кайдаҥ келген? Ол «Мен каан! Меге кем де јӧп берер учуры јок!» деп сананган болор. Је Иегованыҥ кӧрӱмиле болзо, Уззия бойыныҥ јаҥынаҥ ажа берген. Оныҥ учун Иегова оны капкаш балула оорудып ийген. Бу оорула Уззия каан ӧлӧрдиҥ ӧлгӧнчӧ оорыган (2 Лет. 26:16—21). Бис мынаҥ неге ӱренедис? Биске јӧп Агару Бичиктеҥ берилген болзо, оны алынып, тӱзединер керек.  Оноҥ башка, Иегованыҥ јуунында кандый да молју бӱдӱрип турган болзоос, Иегованыҥ најызы болбозыс.

8. Иов тӱзедӱни канай алынган?

⁸ Эмди дезе јӧпти алынган улустыҥ темдерин кӧрӱп ийектер. Темдектезе, Иовтыҥ темин. Иов Иегованы сӱӱген, чын јӱрерге албаданган да болзо, тӱҥей ле јастырып туратан. Нениҥ учун дезе ол бистий ле толо кемдӱ эмес кижи болгон. Је качан ченелтелер кыстап келерде, ол Иеговага удура ачу сӧстӧр айдып баштаган. Је бу ла ӧйдӧ оны Елиуй најызы да, Иегова бойы да кӧзине ле тӱзедип ийген. Бу тӱзедӱни Иов канай алынган? Ол јобожыдынып, бойыныҥ бурузын оҥдоп, мындый сӧстӧр айткан: «Мен... јастыра неме айткан эмтирим. [...] Оныҥ учун сӧзимди кайра алып, тобыракка ла кӱлге отурып, јаманымды алынадым». Иегова Иовты мындый јобожы учун сӱреен тыҥ баалаган, оныҥ учун ого кӧп-кӧп алкыштар берген (Иов 42:3—6, 12—17).

9. Бис Моисейдиҥ теминеҥ неге ӱренедис?

⁹ Эмди дезе Моисей деп кижиниҥ јобожын кӧрӱп ийектер. Бир катап Моисей јаан јастыра эткен. Ол улуска ачынала, макты Иеговага јетирердиҥ ордына бойына алган. Мынаҥ улам Иегова оны кату каруузына тургузып, Ханаан јерге кирбезиҥ деген (Тоол. 20:1—13). Оныҥ учун Моисей коркышту тыҥ кунугып, Иегованы чыгарган јӧбин солызын деп сураарда, Иегова ого: «Менеҥ андый неме база сураба» — деп айткан (Јаҥ. т. 3:23—27). Је бу учуралда Моисей бойын јобош тудунарда, Иегова оны Израильдиҥ албатызын оноҥ ло ары апарзын деп јараткан (Јаҥ. т. 4:1). Бис Иовтыҥ ла Моисейдиҥ теминеҥ бойыска јаан ӱредӱ алып јадыс. Иовко јӧп берилерде, ол јобожыдынып тӱзединген. А Моисей Ханаан јерге кирерге коркышту тыҥ кӱӱнзеген де болзо, Иегованыҥ айткан сӧзинеҥ чыкпай, учына јетире чындык арткан.

10. а) Укаа сӧстӧр 4:10—13-ле болзо, јӧпти нениҥ учун угар керек? б) Абзацтагы ака-эјелер јӧпти канайып алынган?

¹⁰ Бис Иовтоҥ ло Моисейдеҥ тем алып, јӧпти алынып турзаас, бойыска ла туза болуп јат. (Укаа сӧстӧр 4:10—13 кычырыгар.) Темдектезе, Конгодо јадып турган Эммануэл * деп акага аксагалдар јаан јастыралар этпеске болушкан. Ол бойы мынайып куучындаган: «Аксагалдар мениҥ кӧгӱс јанымды уйадап јатканын кӧрӱп ийеле, тӱрген ле јӧп берген. Мен олордыҥ јӧбин алынбаган болзом, тӱбекке тӱжӱп калар эдим». А Канадада пионер болуп турган Меган эје айткан: «Бисти тӱзедип ийзе, кезикте јарабай калат. Је мен аайлап јадым, тӱзедӱ керектӱ неме. Ол јогынаҥ неме болбос». Анайда ок Хорватиядагы Марко деп ака мынайда куучындаган: «Јастыраларымнаҥ улам јуундагы молјуларымды айрытырып ийгем, је акалар мени тӱзетпеген болзо, Иегованаҥ чек ырап калар эдим».

11. Карл Клейн акага јӧп берилерде, ол оны канайып алынган?

¹¹ Башкару јӧптӧ иштеген Карл Клейн аканыҥ темин кӧрӱп ийектер. Бир катап ого Рутерфорд ака јӧп берген. Клейн акага бу јӧп чек јарабаган. Оныҥ учун ол Рутерфордко ачынып калган  јӱрген. Ака куучындайт: «Бир эмеш ӧйдӧҥ Рутерфорд меге туштай береле: „Јакшы, Карл!“ — деген. А мен ачынып калганымнаҥ улам соок этире: „Јакшы“ — дегем. Је ол меге: „Карл, калак, ајарыҥкай бол! Дьявол сени истежип јӱрӱ!“ — деген. Эби-јоксынала: „Јок, јок! Ӱзе кем јок“ — деп айткам. Је Рутерфорд ака билип турган, мениҥ ачынып турганымды. Оныҥ учун ойто катап айткан: „Карл, ајарыҥкай бол. Дьявол сени истежип јӱрӱ“. Рутерфорд ака чын айткан. Сеге кандый бир ака, анчада ла ӱредип айдар јаҥду ака јӧп берзе, а сен ого ачынып турган болзоҥ, Сатана Дьяволго сени кинчекке тартып алар арга берип јадыҥ» * (Эф. 4:25—27). Карын Карл Клейн јӧпти алынган. Анайып, Рутерфорд акала јакшы колбуларлу арткан.

12. Јобош болзоос, јӧпти канай алынарыс? (Сарын 141:5).

¹² Биске кем-кем јӧп айтса, оны алынып турарга не болужар? Озо ло баштап, јобош болор керек. Ӧрӧги абзацтарда кӧргӧнисле, Иов јастыра кӧрӱмдӱ болгон. Иовты канча киреге кичинек Елиуй тӱзедерде, ол јобош болуп, јӧпти алынган (Иов 32:6, 7). Бу учун Иегова ого сӱреен јаан алкыжын берген. Биске де бистеҥ кичинек кижи кандый бир јӧп берзе, ичиске кирбестеҥ айабас. Оныҥ учун јобош болзоос, биске кем де болзын, кандый да јӧп берзин оны алынарга јеҥил болор. Канададагы бир ака мынайып айткан: «Кижиге тууразынаҥ кем-кем јӧп берип турза, кижи тӱзединип, тӱрген ӧзӱп јат». Је чын ла, бис ончобыс толо кеминде эмезис. Оныҥ учун бистиҥ кемигис те: «Мен ченемелдӱ ӱредӱчи, менде агару тынныҥ тӱжӱминиҥ ончо кылык-јаҥдары бар» — деп, айдып болбозыс. (Сарын 141:5 кычырыгар.)

13. Берилген јӧпкӧ кӧрӱмис кандый болор керек?

¹³ Јӧптӧрди Иегованыҥ сӱӱжи деп кӧрӱгер. Иегова биске эҥ јакшыны кӱӱнзеп јат (Укаа 4:20—22). Оныҥ бисти Агару Бичик ле ого тӧзӧлӧнгӧн бичиктер ажыра, анайда ок кӧгӱзи тереҥ ака-эјелер ажыра тӱзедип турганынаҥ бисти сӱӱп турганы кӧрӱнип јат. Еврейлерге 12:9, 10-до айдылганыла, Кудай «биске чын туза болзын... деп кезедет [тӱзедет]».

14. Берилген јӧп јарабай калган болзо, нени эдер керек?

¹⁴ Јӧп канай да берилген болзо, оныҥ тузазын кӧрӧр керек. Бистер, христиандар,  кемге-кемге јӧп берерге турган болзоос, эптӱ сӧстӧр табып, јымжак эдип айдар учурлу (Гал. 6:1) *. Је кезикте јӧпти анай берип болбой каладыс. Оныҥ учун биске јӧпти эби јок берген болзо, мындый сурактарды кӧрзӧӧс јакшы болор эди: «Мени кем-кем кату эдип тӱзедип ийген болзо, мен јӧпти канайып берилгенине эмес, а оныҥ тузазын кӧрӧргӧ албаданарым ба? Анайда ок мен оныҥ јастыраларын тоолоордыҥ ордына, ол меге кандый јӧп айдарга турганын кӧрӧрим бе?» Айдарда, јӧптиҥ берилгени биске јарабаган да болзо, јӧптиҥ тузазын кӧрӧргӧ албаданып турзаас, ойгор кижи болорыс (Укаа 15:31).

15. Нениҥ учун јӧпти биске бойыска сурап турар керек?

¹⁵ Агару Бичик јӧпти биске бойыска суразын деп кӱӱнзедет. Укаа сӧстӧр 13:10-до мынайып айдылган: «Јӧп бедиреген улуста — ойгор». Кандый чын сӧстӧр! Нениҥ учун дезе улус мени тӱзедип ийер, јӧп берип ийер деп сакыганча, јӧпти бойыҥ бедирезеҥ, кӧгӱс јанынаҥ капшай ӧзӧриҥ ле ойгор болорыҥ. Айдарда, јӧпти бойыс сурап турактар.

16. Кандый учуралдарда ака-эјелердеҥ јӧп сурап турар керек?

¹⁶ Биске кандый учуралдарда јӧп сурап турар керек? 1) Јарчы ченемелдӱ кижини ӱредӱзине кычырган болзын. Ӱредӱниҥ кийнинеҥ јарчы ченемелдӱ јарчынаҥ кандый бир тузалу јӧп берзин деп сураар аргалу. 2) Кижиге барбаган сыйындарга кийим талдаар тушта, кӧгӱзи тереҥ эјелердеҥ јӧп сурап турза, јакшы болор эди. 3) Акага баштапкы катап куучын-эрмек берилген болзын. Бу ака ченемелдӱ аканаҥ, белетеп алган куучын-эрмегин угуп ийеле, нени тӱзедетенин айдып берзин деп јӧп сураар аргалу. Бу мындый болушты ченемелдӱ де акалар сурап турза, јакшы болор эди.

17. Јӧпти нениҥ учун алынар керек?

¹⁷ Бу јӧрмӧлдӧ кӧргӧнисле, Иегова кезикте јӧпти бӱдӱн албатызына берип јат, кезикте дезе кажы ла кижиге таҥынаҥ берип јат. Оныҥ учун биске јӧп берилзе, оныҥ канай берилгенине ачынардыҥ ордына, алынып турактар. Бала энедеҥ чыкса, ойгор болбой јат. Оныҥ учун Агару Бичикте мындый јӧп бар: «Ойгор болорго, јӧпти угуп, тӱзедӱни алынып тур» (Укаа 19:20).