БИБЛИЯЛЫК ӧйлӧрдӧ кыс ла уул алыжарга јатса, уулдыҥ ада-энези кыс баланыҥ ада-энезине калым тӧлӧгӧн. Калым этире акча-манат, кандый бир баалу не-неме эмезе уй-мал, маала-ажы берилген. Ол эмезе калымды тӧлӧӧргӧ, уул кыстыҥ адазына кул болуп иштеер аргалу болгон. Темдектезе, Иаков Рахиль учун оныҥ адазына јети јыл иштеген (Баш. 29:17, 18, 20). Бу мындый чӱм-јаҥ нениҥ учун эдилген?

Кэрол Мейерс деп библеист ӱй кижи калым керегинде мындый сӧстӧр бичиген: «Маала-ажыла, мал-ашла азыранып турган билеге, кызын келин эдип бергени, јаан чыгым болуп јат. Нениҥ учун дезе иштенетен кол астай берет». Оныҥ учун кысты алып келген уул кыстыҥ адазына билениҥ чыгымын калымла бӧктӧп јат. Калым тӧлӧлгӧн кийнинде, кыстыҥ ла уулдыҥ тӧрӧӧндӧри кудалар болуп калат. А кудалар болуп калган кийнинде, олор тӧрӧгӧнзижип, бой-бойына кӱч ӧйдӧ болужып јат. Бого коштой, калым тӧлӧгӧни эмди ол кыс учун адазы эмес, је ӧбӧӧни каруулу болгонын кӧргӱзет.

Еврей албатыныҥ калым тӧлӧӧр чӱм-јаҥы кысты не де кире бодобой, оны садып аларга эмезе садып ийерге јараар деп кӧргӱспей јат. Бир энциклопедияда айдылганыла: «Израильдиҥ эр улузы ӱйлерин садып алат деп бичилгени јастыра болот» *. Калым тӧлӧгӧни кижи кижинеҥ нени-нени садып алганына тӱҥей де болзо, Боб Атли деп библеисттиҥ айтканыла: «Кыс учун берилген калым кысты садып алганын эмес, је кыстыҥ ада-энезине болуш эдип берип јатканын темдектейт» * (курсив наш. — Ред.).

Калым тӧлӧӧр чӱм-јаҥ кезик ороондордо эмдигенче ле бар. Оныҥ учун христиан ада-энелер кызы учун калымды канай сураар? Мындый учуралда «Ончо улус слерди керсӱ кижи деп кӧрзин» деген принцип болужар (Флп. 4:5; 1 Кор. 10:32, 33). Агару Бичиктиҥ «акчага ӱстӱкпегер» деген сӧстӧрин база ајаруга алар керек (2 Тим. 3:2). Нениҥ учун дезе кызыгар учун јаан калым суразаар, кӱйӱ болотон уулга кӧп иштенерге келижер. Мынаҥ улам тойды кӧчӱрерге келижердеҥ айабас, ол эмезе уул кӧп иштеп турала, пионердиҥ де ижин артыргызардаҥ айабас.

Кезик ороондордо кыс учун калым тӧлӧӧри јанынаҥ јасак бар. Андый ороондордо јадып турган христиан ада-энелерге бу јасакты бӱдӱрер керек. Нениҥ учун дезе Агару Бичикте «јаҥдарга баксын» деген некелте бар. Бу некелтеле болзо, бис ороонныҥ јасагы Кудайдыҥ јасагын буспай турган болзо, оны бӱдӱрип јадыс (Рим. 13:1, ЈК 2003; Ап. ижи 5:29).