1. Иегова биске кандый кӱндӱ эткен?

ИЕГОВАНЫҤ јуунында болгоныс јаан кӱндӱ. Ака-эјелерле иштеп турганыстаҥ улам јаан сӱӱнчи ле токунал аладыс. Слерге јуунда кандый иш берилген?

2. Апостол Павел бойыныҥ самараларында кандый тем тузаланган?

² Бу суракка каруу берерге, апостол Павелдиҥ бичиген темин сананып ийектер. Бу темди Павел Кудайдыҥ тыныла бичилген кезик самараларында тузаланган. Ол бу самаралардыҥ кажызында ла јуунды кижиниҥ эди-каныла тӱҥейлеген, а јуунныҥ кажы ла кижизин эт-канныҥ ӱйелериле (Рим. 12:4—8; 1 Кор. 12:12—27; Еф. 4:16).

3. Бис бу јӧрмӧлдӧ нени шӱӱжерис?

³ Иегова бистиҥ угы-тӧзиске, арга-чагыска, кандый биледе чыдаганыска ла бисте ӱредӱ бар ба, јок по деп кӧрбӧй јат. Јуунда ого кажы ла кижи керектӱ. Оныҥ учун бистиҥ кажыбыс ла јуунды тыҥыдар аргалу. Бу јӧрмӧлдӧ бисти Павелдиҥ теми неге ӱредет деп шӱӱп сананарыс. Баштапкызында, јуунда бистиҥ кажыбыс ла нениҥ учун керектӱ деп билип аларыс. Экинчизинде, јуунга бис керектӱ бе, јок по деп оҥдоорго кӱч болуп турза, нени эдерин шӱӱжип ийерис. Ӱчинчизинде, јуунда бистиҥ кажыбыска ла тургуза ӧйдӧ Иегованаҥ берилген кандый бир јакаруны нениҥ учун бӱдӱрер керек деп сананып ийерис.

4. Римдегилерге 12:4, 5-теги сӧстӧр бисти неге ӱредет?

⁴ Павелдиҥ теми Иегованыҥ билезинде бистиҥ кажыбыс ла керектӱ деп оҥдоорго болужат. Павел темин мындый сӧстӧрлӧ баштайт: «Бистиҥ бир эт-каныбыста кӧп ӱйелер бар, је олор ончозы бир тӱҥей керек этпей јат. Анайып бис те: бис кӧп тӧ болзобыс, Христостыҥ Бойында — бир эт-кан, је бойы бойыбыска ӱйелер болуп јадыбыс» (Рим. 12:4, 5). Бу сӧстӧрлӧ Павел нени айдарга сананган? Јуунда бистер бир тӱҥей иш этпей де турган болзоос, Иегованыҥ кӧзинде кажыбыс ла баалу болодыс.

5. Иегова јуунга кандый сыйлар берген?

⁵ Јуунда башка-башка иш бӱдӱрип турган улус керегинде куучын болуп турза, бис тургуза ла кӧстӧлгӧн акалар керегинде сананар болорыс. Иегова Христос ажыра бойыныҥ јуунына сый эдип улус берген (Еф. 4:8). Мындый улустыҥ тоозына Башкару јӧптиҥ улузы ла олордыҥ болушчылары, филиалдардыҥ комитеттериниҥ улузы, аймак кӧрӧӧчилер, библиялык сургалдардыҥ ӱредӱчилери, аксагалдар ла болушчы ишчилер кирет. Бу ончо акалар јуунды тыҥыдарга ла Иегованыҥ баалу койлорын кичеерге, агару тынла кӧстӧлгӧн (1 Петр 5:2, 3).

6. 1 Фессалоникадагыларга 2:6—8 аайынча болзо, агару тынла кӧстӧлгӧн акалар нени эдерге албаданат?

⁶ Акалар башка-башка молјулар бӱдӱрерге, агару тынла кӧстӧлӧт. Канайып эт-канныҥ башка-башка ӱйелери темдектезе, колдор эмезе буттар бастыра эт-канга туза экелет, анайып ла агару тынла кӧстӧлгӧн акалар бастыра јуунга тузалу болзын деп, албаданып иштенет. (1 Фессалоникадагыларга 2:6—8 кычырыгар.) Олор мыны мак аларга болуп этпей јат, а ака-эјелерди тыҥыдарга эдет. Бис мындый бойын килебес, кӧгӱзи тереҥ ишчилер учун Иеговага быйанду болодыс.

7. Ӧйин толо берип иштеп турган кӧп ака-эјелерде кандый алкыштар бар?

⁷ Кезик јуундарда миссионерлер, специальный ла текши пионерлер бар. Иеговага ӧйин толо берип иштеери бу ака-эјелердиҥ эҥ учурлу ижи болуп калган. Мынаҥ улам олор кӧп улуска Иисус Христостыҥ ӱренчиктери болорго болушкан. Бу ака-эјелердиҥ јӱрӱми, акча-јӧӧжӧзи кӧп эмес те болзо, Иегованыҥ алкыштарыла толо (Марк 10:29, 30). Бис олорды сӱӱп јадыс ла олордыҥ ижин баалап јадыс.

8. Иегова јуунныҥ кажы ла јарчызын нениҥ учун баалап јат?

⁸ Айдарда, јуунга јӱк ле кӧстӧлгӧн акалар ла ӧйин толо берип иштеп турган ака-эјелер керектӱ болот по? Јок эмей! Кудайга ла јуунга сӱӱнчилӱ јардыҥ кажы ла јарчызы керектӱ (Рим. 10:15; 1 Кор. 3:6—9). Нениҥ учун дезе јуунныҥ тӧс амадуларыныҥ бирӱзи — Христостыҥ ӱренчиктерин белетеери (Матф. 28:19, 20; 1 Тим. 2:4). Јуунла кожо јарлап турган улустыҥ ончозы — сууга чӧҥӱрилгендери де, сууга чӧҥӱрилбегендери де — бу амадуны баштапкы јерге тургузарга албаданат (Матф. 24:14).

9. Бис јуундагы эје-сыйындарды нениҥ учун баалап јадыс?

⁹ Иегованыҥ јуунында эје-сыйындардыҥ де ижи керектӱ. Иегова билелӱ ӱй улустыҥ, тул арткан ӱй улустыҥ ла кижиге барбаган сыйындардыҥ чындык ижин баалап јат. Агару Бичикте Кудайга иштеген чындык ӱй улустыҥ кӧп јакшы темдери бар. Бу ӱй улус ойгор болгон ло Кудайга тыҥ бӱткениле, јарлаар иште эрчимдӱ турушканыла, јалтанбазыла, кысканбазыла, анайда  ок јакшы керектериле аҥыланган (Лука 8:2, 3; Ап. ижи 16:14, 15; Рим. 16:3, 6; Флп. 4:3; Евр. 11:11, 31, 35). Бистиҥ јуунда мындый ла јакшы кылык-јаҥдарлу эје-сыйындар бар учун бис Иеговага јаан быйанду болуп јадыс.

10. Бис јажы јаанап калган ака-эјелерди нениҥ учун баалап јадыс?

¹⁰ Анайда ок јуунда јажы јаанап калган кӧп ака-эјелер барына бис база сӱӱнедис. Олордыҥ кезиги Иеговага бастыра јӱрӱмине чындык иштеп јат. А кезиктериниҥ чындыкты билгени јаан удабаган. Је олордыҥ кажызыныҥ ла јажы јаанагынаҥ улам су-кадыгы уйадап јат. Оныҥ учун олор јуунныҥ керектеринде ле јарлаар ишке кӧп туружып болбой јадылар. Бу уур-кӱчтерге кӧрбӧй, бистиҥ јажы јаанап калган ака-эјелер јарлаар ишке ле улусты ӱредерге, олордыҥ кӱӱн-санаазын кӧдӱрерге, бастыра ийде-кӱчин бергилейт. Бис олордоҥ кӧп немеге ӱренедис. Олор Иегованыҥ да, бистиҥ де кӧзисте чыннаҥ ла јараш (Укаа 16:31).

11, 12. Слерди јииттердиҥ теми канайып оморкодот?

¹¹ Анайда ок бистиҥ јииттер керегинде сананып ийзеер. Сатанага башкарткан ла оныҥ кӧрӱм-санаазыла толуп калган телекейде олор јаан кӱчтерге туштайт (1 Иоанн 5:19). Је бу кӱчтерге кӧрбӧй, олор јуунныҥ туштажуларында туружат, јарлап јат, анайда ок бойыныҥ бӱдӱмјизин јалтанбай корулап јат. Бу бисти сӱреен сӱӱндирет. Слер јииттер, јуунда керектӱ болуп јадыгар! (Сар. 8:2).

¹² Је кезик ака-эјелерге олор јуунда керектӱ деп бӱдерге кӱч болот. Бистиҥ кажыбыс ла јуунда керектӱ деп канайып бӱдӱмјиленер? Шӱӱжип ийектер.

13, 14. Нениҥ учун кезик ака-эјелерге олор јуунга керек јок деп билдирет?

¹³ Павелдиҥ теми бисти база неге ӱредет? Ол бӱгӱнги де кӱнде болуп турган учурлу суракка ајару эткен. Кӧп ака-эјелерге, олор јуунга керектӱ бе деп бӱдерге кӱч болот. Павел бичийт: «Бут: „Мен кол эмезим,  оныҥ учун эт-кандыйы эмезим“ — дезе, мынаҥ улам ол эт-кандыйы болбой барар ба? Кулак: „Мен кӧс эмезим, оныҥ учун эт-кандыйы эмезим“ — дезе, мынаҥ улам ол эт-кандыйы болбой барар ба?» (1 Кор. 12:15, 16). Бу сӧстӧр нени темдектейт?

¹⁴ Слер бойоорды ӧскӧ ака-эјелерле тӱҥдештирип турзагар, слердеҥ јуунга туза јок деп сананып баштар болороор. Јуунда ченемелдӱ јарчылар, јакшы башкараачылар ла улусты токунадып, олордыҥ кӱн-санаазын кӧдӱрип билер кӱдӱчилер бар. Слер олорды кӧрӱп, бойоорды олор чылап болуп албазаар деп сананып турган болороор. Бу дезе слерди јобош ло кемзинчек кижи деп кӧргӱзет (Флп. 2:3). Је ундыбагар: слер бойоорды аҥылу јайалталу улусла јаантайын тӱҥдештирип турзагар, бойоордоҥ чӧкӧй берердеҥ айабазыгар. Керек дезе слерге, Павелдиҥ айтканыла, слер јуунга керек јок деп билдирердеҥ айабас. Мындый сезимдерле тартыжарга биске не болужар?

15. 1 Коринфтегилерге 12:4—11-ле болзо, биске бойыстыҥ јайалталарыска кандый кӧрӱмдӱ болор керек?

¹⁵ Баштапкы чакта, Иегова кезик христиандарга агару тыныҥ кайкамчылу сыйларын берген. Је бу сыйлар ончозында бир тӱҥей болбогон. (1 Коринфтегилерге 12:4—11 кычырыгар.) Иегова олорго јӱзӱн-башка јайалталар берген де болзо, бу христиандардыҥ кажызы ла ого баалу болгон. Бис Кудайдыҥ агару тыныныҥ кайкамчылу сыйларын албай јадыс. Бистиҥ јайалталарыс башка да болзо, ончобыс Иегованыҥ кӧзинде баалу болуп јадыс.

16. Биске апостол Павелдиҥ кандый сӧстӧрин тузаланар керек?

¹⁶ Биске бойысты ака-эјелерле тӱҥдештирбей, Кудайдыҥ агару тыныла бичилген, апостол Павелдиҥ сӧстӧрин тузаланар керек: «Кажы ла кижи бойыныҥ керектерин ченезин [«бойын улусла тӱҥдештирбезин», ЈТ], ол тушта ӧскӧ улустаҥ эмес, бойы бойында јараду алар» (Гал. 6:4).

17. Павелдиҥ сӧстӧри биске незиле тузалу?

 ¹⁷ Павелдиҥ айткан сӧстӧри аайынча јӱрӱп, бойысты ӧскӧ улусла тӱҥдештирбей турзаас, бисте де јакшы јандарыс бар деп оҥдоп ийерис. Темдектезе, кандый бир аксагалдыҥ куучын-эрмектери кӧдӱриҥилӱ болбой јат, је ӱренчиктер белетеерге ого јакшы келижип јат. Эмезе, ол ӧскӧ аксагалдар чылап, јуунныҥ ижин ӧйи-ӧйинде этпей турган болор, је оны ончо ака-эјелер јалакай кӱдӱчи ле оноҥ јӧп сураарга јеҥил деп билер. Ол эмезе кӱндӱзек јанынаҥ ол сӱреен јакшы тем болуп јат (Евр. 13:2, 16). Бойыстыҥ јакшы јандарысты кӧрӱп турзаас, бис те јуунга туза экелер аргалу деп оҥдоп ийерис. Ол тушта бис ака-эјелердиҥ јакшы јандарын кӧрӱп, кӱйӱнбезис.

18. Ӱредетен эп-аргаларысты канайып тыҥыдарга јараар?

¹⁸ Биске кажыбыска ла јарлаар иштиҥ темигӱлерин ле ӱредетен эп-аргаларысты тыҥыдар керек. Иегова биске болужарга, бойыныҥ организациязы ажыра сӱреен јакшы ӱредӱ берет. Темдектезе, иштер кӱндердеги туштажуда бис јакшы јарлаарга ӱренип јадыс. Слер бу туштажуда, нени билип алганаарды јарлаар иште тузаланарга албаданадаар ба?

19. Каандыктыҥ јарчыларыныҥ сургалына ӱренерге слерге не болужар?

¹⁹ Анайда ок ӱредетен эп-аргаларысты тыҥыдарга Каандыктыҥ јарчыларыныҥ сургалы болужат. Бу сургалда, ӧйин толо берип иштеп турган ака-эјелер ӱренер аргалу. Олордыҥ јажы 23-теҥ ала 65 јашка јетире болор учурлу. Слер бу сургалга качан да ӱренип болбозоор деп сананып турган болороор. Је бу сургалда ӱренерге чаптыгын јетирип турган шылтактар бедиреердиҥ ордына, анда слер нениҥ учун ӱренерге кӱӱнзеп турганаарды сананып кӧрӱгер. Оноҥ бу амадуга јединерге план тургузып алыгар. Слер бойоордыҥ јаныгардаҥ албаданзаар, Иегова слерге эдип болбос деп сананган амадугарга јединерге болужар.

20. Римдегилерге 12:6—8-те бичилген сӧстӧр бисти неге ӱредет?

²⁰ Павелдиҥ айткан теминеҥ бис база бир ӱредӱ аладыс. Римдегилерге 12:6—8 (кычырыгар) оныҥ бичиген сӧстӧрин кӧрӱп ийектер. Мында Павел јуунда улустыҥ јайалталары башка-башка деп ойто катап айдат. Је эмди ол биске јайалталарысты јуунды тыҥыдарга тузаланар керек деп айдат.

21, 22. Роберт ле Феличе акалардыҥ теми бисти неге ӱредет?

²¹ Је эмди бир аканыҥ темин кӧрӱп ийектер. Оныҥ ады Роберт болзын. Ол гран ары јанында иштеген. Је оноҥ оны Бет-Элде иштезин деп тӧрӧл јерине кайра јанзын деп сураган. Роберт эске алынат: «Мен канча айлардыҥ туркунына кунукчылду јӱргем. Нениҥ учун дезе берилген ишти бӱдӱрип албагам деп санангам. Бу санаалар узак ӧйлӧрдиҥ туркунына меге амыр бербей туратан. Мынаҥ улам Бет-Элге де иштеерге кӱӱним келбей баратан». Бу акага ойто сӱӱнчилӱ болорго не болушкан? Бир аксагал ого Иегованыҥ биске алдында берген јакылталары, эмди эдип турган јакылталарыска белетеген деп эске алындырган. Бу сӧстӧрдӧҥ улам, Роберт ака ого ајаруны ӧткӧн ӧйлӧргӧ эмес, је эмди эдип ийетен ижине эдер керек деп оҥдоп алган.

²² Бого тӱҥей айалга Феличе Эпископо деген акада болгон. 1956 јылда ол ӱйиле  кожо Галаад сургалды божодып, Боливияда аймак кӧрӧӧчи болуп иштеп баштаган. 1964 јылда олордо уул бала чыккан. Феличе ака мынайып куучындаган: «Биске сӱӱген ижисти артыргызарга кӱч болгон. Бир јыл кире ӧйди калас ӧткӱргенимди оҥдоп јадым. Мен тын кунугып, бойымды килеп туратам. Је Иегованыҥ болужыла бу айалгага кӧрӱмим солынып баштаарда, ада болотон јаҥы молјуумды бӱдӱрип баштагам». Роберт ле Феличе акаларда болгон айалга слерде болгон бо? Алдында бӱдӱрген молјулараарды эмди бӱдӱрбей турганаарга санааркап јадар ба? Эйе болзо, кӧрӱмигерди солып, слер эмди ле Иеговага ла ака-эјелерге нени эдер аргалу деп шӱӱп сананыгар. Бойоордыҥ аргалараарды улуска јакшы болзын деп тузаланып турзаар, сӱӱнчилӱ болороор.

23. Биске нени эдер керек? Келер јӧрмӧлдӧ бис нени шӱӱжерис?

²³ Иегова бистиҥ кажыбысты ла баалап јат. Кудай бисти оныҥ билезинде болзын деп кӱӱнзейт. Бу керегинде ундыбай, јуундагы ака-эјелерди канайып тыҥыдарын шӱӱп сананып, алтамдар эдип баштагар. Ол тушта слер јуунга туза экелер аргалу деп, бир де алаҥзыбазыгар. Је јуундагы ака-эјелерге бистиҥ кӧрӱмис кандый? Бис олорды сӱӱп ле баалап турганысты канайып кӧргӱзерис? Бу сурактарды келер јӧрмӧлдӧ шӱӱжерис.