1. Слер Јайаачы керегинде нени билип алганаар?

СЛЕР Иегованыҥ Керечилериниҥ билезинде ӧскӧн болзогор, Кудай керегинде јаштаҥ ла ала билип баштаган болороор. Ада-энегер слерге бисти айландыра јараш телекейди Иегова јайаган деп, анайда ок оныҥ кылык-јаҥдары ла улуска сӱреен јакшы амадузы керегинде куучындаган (Баш. 1:1; Ап. ижи 17:24—27).

2. Кезик улус Кудайга бӱдӱп тургандарды кандый улус деп кӧрӧт?

² Је кӧп улус Кудайды Јайаачы да деп, ол бар да деп бӱтпейдилер. Олордыҥ санаазыла болзо, јӱрӱм бойы табылган, тегин ле клеткалар эволюцияныҥ болужыла араайынаҥ сӱрекей кӱч бӱдӱмдерге солынган. Мынайып сананып турган улустыҥ кезиги бийик ӱредӱлӱ. Олор Агару Бичикти наукага келишпей турган ла Јайаачыга бӱдӱп турган улусты бӱдӱҥкей ле тенексӱ деп айдыжат.

3. Биске бӱдӱмјибисти нениҥ учун тыҥыдар керек?

³ Бис тоомјылу улустыҥ кӧрӱм-санаазына јайылып, Иегованы Јайаачы деп бӱтпей барардаҥ айабазыс па? Бу дезе бис Иегованы нениҥ учун Јайаачы деп бӱдӱп турганыстаҥ камаанду болот. Бого бӱдер керек деп слерге та кем де айткан ба? Эмезе слер Иегова Јайаачы деп бойоор шиҥдеп, бӱдӱмјиленгенеер бе? (1 Кор. 3:12—15). Иеговага канча јылдардыҥ туркунына иштеп те турган болзоос, ого бӱдӱмјибисти биске тӱҥей ле тыҥыдар керек. Оноҥ башка Агару Бичикке бӱтпезин деп албаданып турган улустыҥ «ойгор айдыныштарына, куру тӧгӱнине» кирип калардаҥ айабазыс (Кол. 2:8; Евр. 11:6). Оныҥ учун бу јӧрмӧлдӧ мындый сурактар шӱӱжерис: 1) улус Јайаачыга нениҥ учун бӱтпей турган; 2) Иегова — Јайаачы деп бӱдӱмјини нениҥ учун тыҥыдар керек;  3) бӱдӱмјибис уйадабазын деп нени эдер керек?

4. Чын бӱдӱмји неге тӧзӧлӧнӧт?

⁴ Кӧп улустыҥ санаазыла болзо, та неге де керелер де јогынаҥ бӱдерге јараар. Је Агару Бичикле болзо, андый бӱдӱмјини чын бӱдӱмји деп айдып болбозыҥ. (Еврейлерге 11:1, ЈТ кычырыгар.) Ондо јарталганыла, чын бӱдӱмји јарт керелерге тӧзӧлӧнӧт. Иегованы, Иисусты, Кудайдыҥ Каандыгын кӧрбӧй дӧ турган болзоос, олор чын ла бар деп, кӧп керелердеҥ кӧрӱнет (Евр. 11:3). Биохимик болуп иштеп турган ака мындый сӧстӧр айткан: «Бистиҥ бӱдӱмји бек тӧзӧлгӧлӱ. Бис науканыҥ керелерин ајаруга алып јадыс».

5. Нениҥ учун кӧп саба улус јӱрӱм бойы ла табылган деп сананат?

⁵ Је мындый сурак чыгат: Јайаачы бар деп, бӱдӱмјилӱ керелер бар да болзо, нениҥ учун кӧп саба улус јӱрӱм бойы табылган деп сананат? Нениҥ учун дезе кезик улус бу керелерди бойлоры шиҥдебеген. Роберт ака мынайып куучындаган: «Биске школдо Јайаачы бар деп куучындабаган. Оныҥ учун мен оны улустыҥ сананып тапкан чӧрчӧги деп санангам. Мен јӱк 22 јаштуда Иегованыҥ Керечилерине јолугып, Агару Бичикте ӱзе немени Кудай јайаган деп кӧргӱзип турган јарт ла бӱдӱмјилӱ керелер бар деп билип алгам» *. (« Ада-энелерге јӧп» деген рамканы кӧрӱгер.)

6. Нениҥ учун кӧп саба улус Јайаачы бар деп бӱтпей јадылар?

⁶ Кезик улус јӱк кӧскӧ кӧрӱнип турган немеге бӱдедис деп Јайаачыга  бӱтпейдилер. Је андый да болзо, олор кӧскӧ кӧрӱнбес гравитацияга бӱдӱп јадылар. А гравитация ол шиҥделип калган кере болуп јат. Агару Бичикте айдылган бӱдӱмји база «кӧскӧ кӧрӱнбей де турган болзо, је чын ла бар немелердиҥ керелерине тӧзӧлӧнӧт» (Евр. 11:1). Мындый керелерди шиҥдеерге, ӧй лӧ ийде-кӱч керек. Је кӧп саба улус мыны эдерге кӱӱнзебейдилер. Оныҥ учун керелерди бойы јазап шиҥдебеген кижи Јайаачы јок деп шӱӱлтеге келет.

7. Ӱзе ӱредӱлӱ улус Јайаачы јок деп бӱдет пе? Јартап беригер.

⁷ Кезик ученыйлар бар керелерди шиҥдейле, ончо немени Кудай јайаган деп бӱдӱп баштаган *. Олор озо баштап,  Јайаачы бар деп бӱтпеген. Нениҥ учун дезе олорго ӧрӧги айдылган Роберт акага ла чылап, ӱредӱчилери Јайаачы керегинде качан да айтпаган болор. Је андый да болзо, ас эмес ученыйлар Кудайды билип алала, оны сӱӱп баштаган. Биске де ӱредӱлӱ де, ӱредӱлӱ эмес те болзоос, Кудайга бӱдӱмјибисти тыҥыдар керек. Оны бис учун кем де этпес.

8, 9. а) Бис кандый суракты кӧрӧрис? б) Јайаандарды шиҥдеп турзаас, кандый туза болор?

⁸ Јайаачыга бӱдӱмјини тыҥыдарга слерге нени эдер керек? Тӧрт јӧп кӧрӱп ийектер.

⁹ Јайаандарды шиҥдегер. Слер тындуларды, ӧзӱмдерди, јылдыстарды јазап шиҥдеп кӧрӱп турзагар, Јайаачыга бӱдӱмјигер тыҥыыр (Сар. 19:1; Иса. 40:26). Јайаандарды канча ла кире кӧп шиҥдеп турзаар, Иегова чыннаҥ Јайаачы деп, ончо ло кире бӱдӱмјилӱ болороор. Бистиҥ бичиктерде Кудайдыҥ ончо јайаандары керегинде оок-теек кайкамчылу јетирӱлер бар. Кезик јетирӱлерди слерге учына јетире оҥдоорго кӱч те болуп турган болзо, олорды канча кире аргагар бар кычырып, оҥдоорго албаданыгар. Анайда ок калганчы јылдарда регион курултайларда јайаандар керегинде чыккан јараш видеолорды бистиҥ сайттаҥ кӧрӧргӧ ундыбай туругар.

10. Јайаачы бар деп кӧргӱзип турган тем куучындап беригер (Римдегилерге 1:20).

¹⁰ Јайаандарды шиҥдеп тура, олор Кудай керегинде нени айдып турганын ајаруга алыгар. (Римдегилерге 1:20 кычырыгар.) Темдектезе, кӱнди алза. Ол јӱк ле јылу ла јарык берип турган эмес, је ультрафиолетовый чоктор чыгарат. Бу ультрафиолетовый чоктор кижиге каршу јетирбезин деп, јерди озоновый слой корулайт. Мындый каршулу чоктор канча ла кире тыҥ тийзе, озон ончо ло кире кӧп чыгат. Бу мындый кору бойы табылган ба эмезе улусты сӱӱп турган Јайаачы бар деп кӧргӱзет пе?

11. Јайаачыга бӱдерге болужатан керелерди кайдаҥ табарга јараар?

¹¹ Јайаачы бар деп кӧргӱзип турган кӧп бӱдӱмјилӱ керелерди табарга, «Индекс публикаций Сторожевой башни» деп шиҥдейтен материалды эмезе бистиҥ сайтта «бедрелте» деп функцияны тузаланыгар. «Случайность или замысел» деген рубриканыҥ јӧрмӧлдӧринеҥ ле видеолорынаҥ баштаарга јараар. Олор кыска, анайда ок ондо тындулар ла оноҥ до ӧскӧ јайаандар керегинде кайкамчылу керелер бар. Бого коштой, Кудайдыҥ јайаандарын кӧрӱп, ого тӱҥей неме эдип албаданып турган ученыйлардыҥ темдери бар.

12. Агару Бичикти шиҥдеп тура, нени ајаруга алып турар керек?

¹² Агару Бичикти шиҥдегер. Ӧрӧги айдылган биохимик ака Јайаачы бар деп бӱтпеген. Је бир канча ӧйдӧҥ бӱдӱп баштаган. Оныҥ сӧстӧри: «Мениҥ бӱдӱмјим јӱк ле научный шиҥжӱлерге эмес, је Агару Бичикти јазап шиҥдегениме тӧзӧлӧнгӧн». Слер библиялык ӱредӱлерди билер болороор. Је Јайаачыга бӱдӱмјигерди тыҥыдарга, Агару Бичикти оноҥ ло ары шиҥдеер керек (Иис. Н. 1:8; Сар. 119:97). Бу ла ок ӧйдӧ Агару Бичикте тӱӱкидеги учуралдар канайып чике айдылганын, ондогы судурлардыҥ канайып бӱткенин ле Агару Бичикти башка-башка улус та бичиген болзо, ондо бир де келишпестер јок деп, ајаруга алып туругар. Кудайдыҥ Сӧзин мынайып шиҥдеп турзагар, бисти  сӱӱп турган ойгор Јайаачы јайаган ла Агару Бичик оныҥ тыны ажыра бичилген деп бӱдӱмјигер там тыҥыыр * (2 Тим. 3:14; 2 Петр 1:21).

13. Агару Бичиктиҥ јӧптӧри сӱреен тузалу деп, тем куучындап беригер.

¹³ Анайда ок Агару Бичикти шиҥдеп, оныҥ тузалу јӧптӧрине ајару эдигер. Темдектезе, ондо канча муҥ јылдар кайра акча сӱӱгени кижини ӱреп, ого «кӧп кыйын-шыра» экелет деп айдылып калган (1 Тим. 6:9, 10; Укаа 28:20; Матф. 6:24). Бу јӧп бӱгӱнги кӱнде тузалу ба? «Эпидемия нарциссизма» деп бичикте мынайып айдылган: «Акча-јӧӧжӧгӧ ӧйинеҥ ӧткӱре тартылган улус ырысту эмес ле депрессияда болот. Керек дезе јӱк кӧп акчалу болорго турган улус психический эмезе оноҥ до ӧскӧ ооруларлу болуп калат». Оныҥ да учун Агару Бичикте акчаны сӱӱбезин деп тегиндӱ айдылбай јат. Анайда ок слердиҥ јӱрӱмеерди солыган библиялык ӧскӧ дӧ принциптерди сананып турзаар, бисти сӱӱп турган ойгор Јайаачыга оноҥ тыҥ иженеригер (Иак. 1:5). Оныҥ јӧптӧри дезе бир де эскирбей јат ла биске сӱӱнчи берет (Иса. 48:17, 18).

14. Агару Бичикти шиҥдеп, Иегова керегинде нени билип аладыс?

¹⁴ Иегованы јакшы билигер (Иоанн 17:3). Агару Бичикти шиҥдеп, Иегованыҥ бойын ла оныҥ кылык-јаҥдарын билип аларга кӱӱнзейдис. Нениҥ учун дезе анайып бисти айландыра јайаандардаҥ оныҥ кылык-јаҥдары јарт кӧрӱне берет. Анайда ок Иегованы бойын ла оныҥ кылык-јаҥдарын јакшы билип алзаас, Иегова улустыҥ сананып тапкан Кудайы эмес, је чын ла бар Кудай деп бӱдӱмјилӱ болорыс (Чыг. 34:6, 7; Сар. 145:8, 9). Иегованы канча ла кире јакшы билип алзаар, ого сӱӱжигер, бӱдӱмјигер ла оныла колбулараар ончо ло кире тыҥыыр.

15. Кудай керегинде куучындап турганаардаҥ кандый туза болот?

¹⁵ Кудай керегинде улуска куучындагар. Анайып слердиҥ бӱдӱмјигер тыҥыыр. Јайаачыга бӱтпей турган кижиге кандый каруу берерин билбей турзаар, нени эдерге јараар? Бу јанынаҥ бистиҥ бичиктерде кандый јетирӱлер барын ла Јайаачы бар деп керелеп турган библиялык ӱлгерлерди кӧрӱп, келер туштажуга белетенип алыгар (1 Петр 3:15). Анайда ок кандый бир ченемелдӱ аканы эмезе эјени айдып аларга јараар. Ол кижи слердиҥ таап алган керелереерле јӧпсинбезе де, мындый шиҥжӱ слердиҥ бӱдӱмјигерди тыҥыдат. Анайда ок Јайаачыга бӱтпей турган, ойгор ло сагышту деп билдирип турган улустыҥ тӧгӱнине кирбезигер.

16. Бӱдӱмјибис уйадай берзе, не болуп калардаҥ айабас?

¹⁶ Иеговага иштеп турганыс удап та калган болзо, бӱдӱмјибис оноҥ ло ары тыҥып, уйадабазын деп албаданар керек. Ундыбагар: чын бӱдӱмји, «кӧскӧ кӧрӱнбей де турган болзо, је чын ла бар немелердиҥ» керелерине тӧзӧлӧнӧт, а улус кӧскӧ кӧрӱнбей турган немени ундып салат. Оныҥ да учун Павелдиҥ айткан сӧстӧри чын. Бӱдӱмјибис уйадай берзе, бисти кинчек тӱрген олјолоп алар (Евр. 12:1). Је мындый тузакка тӱшпеске нени эдер керек? (2 Фес. 1:3).

17. Бӱдӱмјибис бек болзын деп нени эдер керек?

 ¹⁷ Баштапкызында, Иегованаҥ агару тынды јаантайын сурагар. Нениҥ учун јаантайын сураар керек? Нениҥ учун дезе бӱдӱмји агару тынныҥ тӱжӱмине кирет (Гал. 5:22, 23). Агару тын јокко Јайаачыга бӱдӱмјибисти тыҥыдып та болбозыс, ого чындык артып та болбозыс. А Иегованаҥ агару тын суразаас, оны ол биске кыйалта јогынаҥ берер (Лука 11:13). Оныҥ учун бис ого «бӱдӱп турганысты тыҥытсаҥ — деп», мӱргӱӱр аргалу (Лука 17:5, Лука бичиген сӱӱнчилӱ јар, 2008).

18. Сарын 1:2, 3-те кандый сый керегинде айдылат?

¹⁸ Экинчизинде, Кудайдыҥ Сӧзин јаантайын кычырып шиҥдегер. (Сарын 1:2, 3 кычырыгар.) Баштапкы Сарын чӱмделген ӧйдӧ Кудайдыҥ Јасагыныҥ текстти тоолу ла израильтяндарда болгон. Је бу Јасакты кычырар ла бойында тудар арга јӱк ле каанда ла абыстарда болотон. А албаты дезе — эр улус, ӱй улус, балдар ла ӧскӧ јердиҥ улузы — Јасакты кычырганын угарга, јети јылдыҥ бажында бир катап јуулыжар болгон (Јаҥ. т. 31:10—12). Иисустыҥ ӧйинде Агару Бичимелдиҥ тӱрбектери база тоолу улуста ла синагогаларда болгон. Бӱгӱнги кӱнде Агару Бичик кӧп саба улуста бӧлӱктей эмезе бӱдӱнге бар. Бис Кудайдыҥ мындый сыйы учун быйанысты канайып кӧргӱзерис?

19. Бӱдӱмјибис бек болзын деп, база нени эдер керек?

¹⁹ Агару Бичикти јаантайын кычырып турзаас, бу сый учун Иеговага быйанысты кӧргӱзедис. Оныҥ учун Агару Бичикти кычырып, шиҥдейтен ӧй тургузып алар керек. Нениҥ учун дезе ӧй бойы качан да табылбас. Бу тургузып салган ӧйистеҥ тудунып, Агару Бичикти јаантайын кычырып, шиҥдеп турзаас, бӱдӱмјибис уйадабас.

20. Бис нени эдерге бек шӱӱп алдыс?

²⁰ Бу телекейде ойгор ло керсӱ деп бодолып турган улуска кӧрӧ, бистиҥ бӱдӱмјибис Кудайдыҥ Сӧзиниҥ бӱдӱмјилӱ керелерине тӧзӧлӧнӧт (Матф. 11:25, 26). Кудайдыҥ Агару Бичигин шиҥдеп, бу телекейдеги айалга нениҥ учун уйадап турганын ла Кудай удабас нени эдерге турганын оҥдоп алганыс. Оныҥ учун бӱдӱмјибисти тыҥыдып, канча ла кире кӧп улуска Јайаачы бар деп бӱдӱмјиленерге болужактар (1 Тим. 2:3, 4). Ол тушта бис јердеги ончо улустыҥ Иегованы мактап, Ачылта 4:11-деги сӧстӧрди айдып турган ӧйди бойыстыҥ кӧзисле кӧрӧрис. Ондо мынайып бичилген: «Сен, Кайракан, макты... аларга јарамык, нениҥ учун дезе Сен ончоны јайагаҥ».