1. Иегованыҥ ончо јайаандарын кӧрӱп турзаас, бисте кандый сезимдер болот?

ИЕГОВАНЫҤ ончо јайаандарын кӧрӱп турзаас, бисте Давидте ошкош сезимдер болот. Ол Кудайга мӱргӱп, мынайып айткан: «Мен теҥериҥди, колыҥныҥ јайаандарын, сениҥ јайаган айды ла јылдыстарды кӧргӧмдӧ, сениҥ ундыбай турган ӧлӱмдӱ кижи кем андый? Сениҥ кичееп турган кижи уулы кем андый?» (Сар. 8:3, 4). Кижи Иегованыҥ јайап салган кал-камык јылдыстарына ла галактикаларына кӧрӧ кичинек те болзо, Иегова биске ајару эдет. Бу јӧрмӧлдӧҥ Иегова Адам ла Еваны јӱк ле јайаган эмес, је олорды кичееп, бойыныҥ билезине кожуп алган деп кӧрӧрис.

2. Иегова Адам ла Евага кандый јакылта берген?

² Адам ла Ева Иегованыҥ јердеги баштапкы балдары, а Иегова дезе олорды сӱӱп турган теҥеридеги Адазы болгон. Кудай Адам ла Евага мындый јакылта берген: «Ӧзигер, кӧптӧгӧр, јерди толтырып ээлегер» (Баш. 1:28). Бу сӧстӧрлӧ болзо, олорго бала-баркалу болуп, јерди бойыныҥ айылы чылап, кичеер керек болгон. Адам ла Ева Кудайга сӧсуккур болуп, оныҥ табын бӱдӱрген болзо, олор бойлоры да, олордыҥ бала-барказы да Кудайдыҥ билезинде јажын-чакка болор эди.

3. Иегова Адам ла Евага кӱндӱлӱ јер берген деп нениҥ учун айдарга јараар?

³ Кудай бойыныҥ билезинде Адам ла Евага кӱндӱлӱ јер берген. Еврейлерге 2:7-де айдылат: «Оны ангелдердеҥ  јабыс эттиҥ, ого мактыҥ ла кӱндӱниҥ кайралын бер[геҥ]» (Сар. 8:5, сн.). Бис ангелдердий ошкош ийде-кӱчтӱ, сагышту ла јайалталу эмезис (Сар. 103:20). Је андый да болзо, бис бу ийде-кӱчтӱ кӧскӧ кӧрӱнбес јайаандарга кӧрӧ, бир эмеш ле јабыс. Сананып ийзеер де, Адам ла Еваныҥ алдында сӱрекей јаан аргалар ачылган.

4. Адам ла Еваныҥ сӧс укпазынаҥ улам не болгон? Бу јӧрмӧлдӧ нени шӱӱжерис?

⁴ Адам ла Ева Кудайдыҥ сӧзин укпай, оныҥ билезиндеги јерин јылыйтып салган. Мынайып, олордыҥ бала-барказы, коркышту шыралгалу айалгада болуп калган. Је Иегованыҥ амадузы солынбаган. Иегова ого сӧсуккур улусты јажын-чакка оныҥ балдары болзын деп кӱӱнзейт. Бу јӧрмӧлдӧ Иегованыҥ бисти баалап турганы недеҥ кӧрӱнет ле оныҥ билезинде болорго турганысты канайып кӧргӱзеристи шӱӱжерис, анайда ок бисти кандый јӱрӱм сакып турганын билип аларыс.

5. Бисти бойына кеберлеш эдип јайаганы учун Иеговага быйанысты канайып кӧргӱзерис?

⁵ Иегова кижини бойына кеберлеш эдип јайаган (Баш. 1:26, 27). Мынаҥ улам бис оныҥ кылык-јаҥдарына, темдектезе, сӱӱжине, килеҥкейине, иженчилӱ ле чындык болорына ӱренер аргалу (Сар. 86:15; 145:17). Иегованаҥ тем алып турзаас, оны макка чыгарадыс ла ого быйанысты кӧргӱзедис (1 Петр 1:14—16). Бис Иеговага јарап турган керектер эдип турзаас, бойыс та сӱӱнчилӱ болодыс. Анайда ок ого кеберлеш эдип јайалганыстаҥ улам бис оныҥ билезине киргедий улус болуп калар аргалу.

6. Јерди јайаганынаҥ Иегованыҥ улусты баалап турганы канайып кӧрӱнген?

⁶ Иегова кижиге сӱрекей јараш јадатан јер берген. Ол улусты јайаардаҥ озо, јерди јадар эдип белетеп салган (Иов 38:4—6; Иер. 10:12). Нениҥ учун дезе ол сӱреен јалакай ла кысканбас Кудай болуп јат (Сар. 104:14, 15, 24). Кудай јерди јӱк ле јайап салган эмес, је улусты јӱрӱмле јакшызынып јӱрзин деп јайаган. Анайда ок олорго јӱзӱн-јӱӱр ӧзӱмдерле, тындуларла башкаратан јаҥ берген (Сар. 8:6). Бого коштой Иегова эткен ижин кӧрӱп, сӱӱнчи алган (Баш. 1:10, 12, 31). Кудай улусты јӱрӱмге сӱӱнип, оныҥ јайаандарын ӱргӱлјиге кичееп јӱрзин деп кӱӱнзейт. Слер ого мындый амадузы учун быйаныгарды айдадаар ба?

7. Биске јайым кӱӱн берилген деп, Иисус Навин 24:15-теҥ канайып кӧрӱнет?

⁷ Иегова кижиге јайым кӱӱн берген. Айдарда, јӱрӱмисти канайып јӱрерин бис бойыс кӧрӧр аргалу. (Иисус Навин 24:15 кычырыгар.) Бис Иеговага бойыстыҥ кӱӱнисле иштеп баштазаас, оны сӱӱндиредис (Сар. 84:11; Укаа 27:11). Анайда ок бис ӧскӧ дӧ сурактарда бойыстыҥ кӱӱнисле башкарынар аргалу. Бу јанынаҥ темди биске Иисус кӧргӱскен.

8. Иисус јайым кӱӱнле тузаланарында биске кандый тем кӧргӱскен?

⁸ Бис бойыстыҥ кӱӱнисти бе эмезе улустыҥ кӱӱнин бийик тургузар ба деп, Иисус чылап, бойыс кӧрӧр аргалу. Бир катап Иисус ла апостолдор бӱдӱн кӱн јарлаган кийнинде, тыҥ арып калала, улус јок јерде амыраар деп сананган, је улустыҥ кӱӱни ӧскӧ болгон. Олор Иисусты угарга болуп, оны табып алган. Је Иисус олорды кӧрӧлӧ ачынбаган да.  Карын бу улусты килеп, «олорды кӧпкӧ ӱредип баштады» (Марк 6:30—34). Иисустаҥ тем алып, ӧйисти, ийде-кӱчисти улуска берип турзаас, Иегованы макка чыгарадыс (Матф. 5:14—16). Анайда ок Иегованыҥ билезинде болорго кӱӱнзеп турганысты кӧргӱзедис.

9. Ада-энелер нени ундыбас учурлу?

⁹ Иегова кижиге балдарлу болотон арга берген. Оныҥ учун ада-энелер балдарына Иегованы сӱӱп, ого иштеерге кӱӱнзезин деп болужар учурлу. Ада-энелер, слер бу сыйды баалайдыгар ба? Ангелдер, улуска кӧрӧ, кӧп јайалталарлу да болзо, олорго балдарлу болотон арга берилбеген. Је ада-энелерге Иегова балдарлу болуп, олорды оныҥ јакарганы аайынча ӱредетен кӱндӱ эткен (Еф. 6:4; Јаҥ. т. 6:5—7; Сар. 127:3). Айдарда, Иегова ада-энелерди балдарын оныҥ јакарганыла ӱредип салар деп бӱдӱп јат. Оныҥ учун оныҥ организациязы ада-энелерге болуш эдип, Агару Бичикке тайанган бичиктер, кожоҥдор, интернет-статьялар ла видеолор чыгарат. Мынаҥ Иегова бистиҥ кичинек карындаштарысты ла сыйындарысты сӱӱп турган деп кӧрӧдис (Лука 18:15—17). Ада-энелер Иеговага иженип, балдарын сӱӱп ле кичееп турза, ол сӱӱнет. Кудайга сӧсуккур ада-энелер балдарына јажын-чакка оныҥ билезинде болотон арга берет.

10, 11. Толынтынаҥ улам кандый арга ачылган?

¹⁰ Иегова бисте оныҥ билезинде болотон арга болзын деп, бойыныҥ Уулын тайылгага берген. Адам ла Ева биле тура, Кудайдыҥ сӧзин укпай, оныҥ билезинде болотон аргазын јылыйтып салган. Олордыҥ јастыразынаҥ улам бала-барказы да мындый арганы јылыйткан (Рим. 5:12). Айса олордо кандый да ижемји јок по? Јок, бар. Иегова олор учун Иисустыҥ јӱрӱмин тайылгага берерде, олорго оныҥ билезинде болотон арга ойто ачылган (Иоанн 3:16; Рим. 5:19). Бу тайылганаҥ улам Иегова 144 000 кижини бойыныҥ балдары эдип алган (Рим. 8:15—17; Ачыл. 14:1).

¹¹ Анайда ок Иегованыҥ табын миллиондор тоолу сӧсуккур улус бӱдӱрип јат. Олор Иегованыҥ билезинде болотон арганы Иисустыҥ бир муҥ јылга башкарган ӧйиниҥ учында калганчы ченелтени ӧткӧн кийнинде алар (Сар. 25:14; Рим. 8:20, 21). Је олор эмди де Иегова Јайаачыны Адабыс деп айдат (Матф. 6:9). Анайда ок Иегова тирилген де улуска оны ла оныҥ нормаларын јакшы билип алатан арга берер. Тирилген улустыҥ сӧсуккур болгондоры учы-тӱбинде база Иегованыҥ билезинде болор аргалу.

12. Бис кандый сурак шӱӱжерис?

¹² Иегова улуска јаан кӱндӱ эткенин кӧрдис. Ол майлаткан христиандарды бойыныҥ балдары эдип алган. А «кара-бајыртка» кирип турган улуска јаҥы јӱрӱмде, оныҥ уулдары ла кыстары болотон ижемји берген (Ачыл. 7:9). Оныҥ учун бис оныҥ билезинде болорго кӱӱнзеп турганысты канайып кӧргӱзерис?

13. Иегованыҥ билезине кирерге нени эдер керек? (Марк 12:30).

¹³ Иегованы сӱӱгер ле ого акту јӱректеҥ иштегер. (Марк 12:30 кычырыгар.) Иегованыҥ биске берген эҥ баалу сыйларыныҥ бирӱзи — ого бажыратан арга. Бис Иегованыҥ јакылталарын  бӱдӱрип турзаас, оны сӱӱп турганысты кӧргӱзедис (1 Иоанн 5:3). Иисус бистерге Иегованыҥ адынаҥ ӱренчиктер белетеер ле олорды сууга чӧҥӱрер иш берген (Матф. 28:19). Анайда ок бис бой-бойысты сӱӱр учурлу деп, Иисус айткан (Иоанн 13:35). Бу јакылталарды бӱдӱрип турзаас, Иегова бисти бойыныҥ телекейлик билезине кожуп алар (Сар. 15:1, 2).

14. Улуска сӱӱжисти бис канайып кӧргӱзер аргалу? (Матфей 9:36—38; Римдегилерге 12:10).

¹⁴ Улусты сӱӱгер. Сӱӱш — Иегованыҥ тӧс кылык-јаҥы (1 Иоанн 4:8). Ол бисти, бис оны билгелегисте сӱӱп баштаган (1 Иоанн 4:9, 10). Улусты сӱӱп турзаас, Иегованаҥ тем аладыс (Еф. 5:1). Улуска сӱӱжисти кӧргӱзетен эҥ јакшы аргалардыҥ бирӱзи — эм тура, ӧй бар тушта, олорго Иегованы билип аларга болужары. (Матфей 9:36—38 кычырыгар.) Анайып, олорго Иегованыҥ билезине кожулатан арга берип јадыс. Је бис кижини сууга чӧҥӱрилген де кийнинде сӱӱп ле тооп јӱрерис (1 Иоанн 4:20, 21). Темдектезе, оныҥ айалгазын билбей јадып, ол керегинде јаман сананбазыс. Карын оны бойыстаҥ бийик тургузып, тооп турганысты кӧргӱзерис (Флп. 2:3; Римдегилерге 12:10 кычырыгар).

15. Бис кемдерди килеп, јалакай болор учурлу?

¹⁵ Ончо улусты килеп, јалакай болыгар. Иегованыҥ билезинде болорго турган болзоос, биске кайда ла библиялык принциптерле башкарынар керек. Темдектезе, Иисустыҥ ӱреткениле, биске ончо улусты, керек дезе, ӧштӱлеристи де килеп, јалакай болор керек (Лука 6:32—36). Је бу јеҥил эмес, оныҥ учун бистиҥ санааларыс ла керектерис Иисустыҥ ошкош болзын. Бис ончо немеде Иеговага сӧсуккур болуп, Иисустаҥ тем алып турзаас, теҥеридеги Адабыска оныҥ билезинде болорго турганысты кӧргӱзерис.

16. Бис Иегованыҥ билезиниҥ ады-јолын уйатка канайып тӱжӱрбес аргалу?

¹⁶ Иегованыҥ билезиниҥ ады-јолын уйатка тӱжӱрбегер. Биледе кичинек балдар јаандарына тӱҥей болорго албаданат. Аказы библиялык принциптерле јӱрӱп турза, карындажына тем болот. Је бӱдӱрбей турза, кичинеги оны кӧрӱп, јаман керектер эдердеҥ айабас. Мынайып ла Иегованыҥ билезинде болор аргалу. Чындык христиан кижи Иегованаҥ јана болуп, балыр јӱрӱм јӱрӱп баштаза, ӧскӧ ака-эјелер оны кӧрӱп, база анайып ла эдип, Иегованыҥ билезиниҥ јакшы ады-јолын уйатка тӱжӱрердеҥ айабас (1 Фес. 4:3—8). Јаман керектер эдип баштаган ака-эјелердеҥ качан да тем албагар ла Иеговала колбулараарды ӱреп салгадый керектердеҥ тууралагар.

17. Биске кандый кӧрӱм-санааны алынбас керек ле нениҥ учун?

¹⁷ Акча-јӧӧжӧгӧ эмес, је Иеговага иженигер. Бис Кудайдыҥ Каандыгын ла оныҥ чындык нормаларын баштапкы јерге тургузып турзаас, Иегова бисте аш-курсагыс, кийим-тудумыс, јадатан јерис болор деп, сӧзин берет (Сар. 55:22; Матф. 6:33). Оныҥ учун бис бу телекейдиҥ кӧрӱм-санаазын, темдектезе, јӱк ле акча-јӧӧжӧ кору берип, кижини ырысту эдет деген кӧрӱм-санаазын алынбазыс. Чын амырды дезе јӱк Иегованыҥ табын бӱдӱрери берет (Флп. 4:6, 7). Бис кӧп немени садып алар аргалу да болзоос, бойыска мындый сурактар  берерге јараар: «Меге садып алган не-немемди кичеерге, ӧйим ле кӱчим једер бе? Мен јӧӧжӧмгӧ ӧйинеҥ ӧткӱре тартылбазым ба?» Иегова билезиниҥ улузына јакылта берип салган. Оныҥ учун биске ӧйисти кереги јок немеге бербей, бу јакылтаны јакшы бӱдӱрер керек. Оноҥ башка бис јиит бай эр кижи чилеп, Иеговага иштеер арганы ла оныҥ балазы болотон арганы јылыйтып саларыс! (Марк 10:17—22).

18. Кудайга сӧсуккур улуска кандый кӱндӱ эдилер ле олор кандый алкыштар алар?

¹⁸ Кудайга сӧсуккур улуска ӱргӱлјиге ого бажыратан ла јажын-чакка оныҥ јуук најылары болотон сӱрекей јаан кӱндӱ эдилер. Јерде јадатан ижемјилӱ улус Кудайдыҥ улуска берген сӱрекей јараш јерин кичееп јарандырар. Удабас Кудайдыҥ Каандыгы башкарза, јер ле јӱрӱм бӱткӱлинче солынар. Иисус дезе, Кудайдыҥ билезинеҥ Адам ла Еваныҥ јӱрӱп калганынаҥ улам болгон каршуны јоголтып салар. Анайда ок Кудай миллиондор тоолу улусты тирилтип, олорго толо кемдӱ су-кадык болотон ло јердеги райда ӱргӱлјиге јӱретен арга берер (Лука 23:42, 43). Иегованыҥ јердеги балдары толо кемдӱ болуп калза, олордыҥ кажызы ла Давидтиҥ айткан «макты ла кӱндӱни» толо эдип кӧргӱзер (Сар. 8:5).

19. Биске качан да нени ундыбай јӱрер керек?

¹⁹ Сен кара-бајырт улустыҥ тоозына кирип турган болзоҥ, сенде сӱрекей јараш ижемји бар. Иегова сени сӱӱп јат ла сени оныҥ билезинде болзын деп кӱӱнзейт. Оныҥ учун кажы ла кӱн Кудайды сӱӱндирип, оныҥ берген сӧзин бир де ундыбай, јӱрегиҥде алып јӱр. Теҥеридеги кару Иегова Адабыска бажырар ла оны ӱргӱлјиге мактаар арганы баалап јӱр.