1, 2. Сарын 34:8-ле болзо, Иегованыҥ јалакайын бис канайып билип алар аргалу?

СЛЕРГЕ та кем де качан да јип кӧрбӧгӧн курсак амзаарга берген болзын. Бу кандый курсак деп билерге, слер оны јазап кӧрӧрӧӧр, јыткарараар, ого нени кошконын ла улуска јараган ба деп, сурап угараар. Је оныҥ амтанын јӱк ле бойоор амзаган кийнинде билип алараар.

² Бис Иегованыҥ Сӧзин, бистиҥ бичиктерди кычырып, ака-эјелерге ол канайып болушканын угуп турзаас, оныҥ јалакайын бир эмеш ле билип аладыс. Је оноҥ јакшы билерге, Иегованыҥ болужын кажы ла кижиге бойына сезер керек. (Сарын 34:8 кычырыгар.) Темдектезе, слер ӧйӧӧрди толо берип иштеерге кӱӱнзейдеер. Је мыны эдерге, слерге јӱрӱмеерди јеҥилтер керек деп, оҥдоп јадаар. Иисустыҥ айтканыла болзо, Каандыктыҥ керектерин баштапкы јерге тургускан улусты Иегова ончо немеле јеткилдеер. Бу сӧстӧрди слер јӱк кычырганаар, је бойоордыҥ јӱрӱмеерде канайып бӱткенин кӧрбӧгӧн болороор (Матф. 6:33). Оноҥ, Иисустыҥ бу сӧстӧрине бӱделе, слер чыгымдараарды астадып, ижеердиҥ графигин солып, Иеговага кӧптӧдӧ иштеп баштайдаар. Анайып, Иегова слерди кичееп турганын бойоордыҥ кӧзӧӧрлӧ кӧрӧдигер. Ӧскӧртӧ айтса, амзап, Иегованыҥ јалакайын билип аладаар.

3. Сарын 31:19-ла болзо, Иегованыҥ аҥылу сыйларын кемдер алар аргалу?

³ «Иегова ончо улуска јалакай», керек дезе, оны билбес те улуска (Сар. 145:9; Матф. 5:45). Је оны сӱӱп, ого акту јӱрегинеҥ иштеп турган улуска ол аҥылу сыйлар эдет (Сарын 31:19 кычырыгар.) Бу сыйлардыҥ кезигин кӧрӱп ийектер.

4. Иегова ого јууктап баштагандарга канайып јалакайын кӧргӱзет?

 ⁴ Иегованыҥ јӧптӧрин тузаланып турзаас, јӱрӱмис јакшы јанына солынып турганын кӧрӱп јадыс. Кудайла таныжып, ого сӱӱжис јаанаган сайын, ол биске ого јарабай турган кылык-јаҥнаҥ ла санаалардаҥ айрыларга болужып јат (Кол. 1:21). А качан бис Иеговага бойысты учурлап чӧҥӱрилзеес, оныҥ биске јалакайын оноҥ тыҥ кӧрӱп јадыс, нениҥ учун дезе ол биске ару уйат ла оныла кожо јуук најылар болор арга берген (1 Петр 3:21).

5. Јарлап тургандарга Иегованыҥ јалакайы недеҥ кӧрӱнет?

⁵ Иегованыҥ биске јалакай баштанып турганын јарлаар иште туружып турзаас кӧрӧдис. Слер уйалчаҥ ба? Иегованыҥ Керечилериниҥ ортозында мындый улус кӧп. Сууга чӧҥӱрилердеҥ озо слер чек таныш эмес улустыҥ эжигин токулдадып, олорго Агару Бичик керегинде качан да куучындап болбозоор деп сананган болороор. Је эмди јарлаары слердиҥ јӱрӱмеерде јаан учурлу иш болуп калган. Иегованыҥ болужыла бу иш слерге јарап баштаган. Анайда ок јарлаар иште улус кату баштанза, Иегова слерге токунал берип јат. А та кем де сӱӱнчилӱ јарла јилбиркей берзе, келишкедий ӱлгерлерди эске алынарга болужат. Бого коштой улус сӱӱнчилӱ јарды угарга кӱӱнзебей де турган болзо, слер Иегованыҥ јаан ийде-кӱчиле оноҥ ло ары јарлайдыгар (Иер. 20:7—9).

6. Иегованыҥ бисти ӱредип турганынаҥ оныҥ јалакайы кӧрӱнет деп, нениҥ учун айдарга јараар?

⁶ Иегованыҥ биске јалакай баштанып турганы база недеҥ кӧрӱнет? Ол бисти јарлаарга ӱредет (Иоанн 6:45). Иштеер кӱндерде ӧдӱп турган јуунныҥ туштажузында бис куучын баштаар аргалардыҥ видеолорын кӧрӱп јадыс. Кийнинде ондогы шӱӱлтелерди ле эп-аргаларды јарлаар иште тузаланар аргалу. Баштап тарый јаҥы немени тузаланарга кӱч болордоҥ айабас. Је бис мыны тузаланып турзаас, улус бисти јакшы угар болор. Курултайларда ла јуунныҥ туштажуларында бисти јарлаар иштиҥ јаҥы бӱдӱмдеринде турушсын деп кӱӱнзедет. Јарлаар иштиҥ јаҥы бӱдӱмдерине туружарга ӱренер керек. Мынайып албаданзаас, Иегова биске алкыжын јетирер. Је эмди бойыныҥ айалгазында Иеговага эҥ артыгын берерге албаданып тургандарга кандый сыйлар берилер деп кӧрӱп ийектер. Оноҥ кӧгӱс амадуларга јединерге нени эдер керек деп кӧрӱп ийерис.

7. Иегова ого кӧптӧдӧ иштеерге тургандарды канайып кайралдаар?

⁷ Иеговала оноҥ бек колбулар. Колумбияда аксагал болуп иштеп турган Самуэль * аканыҥ темин кӧрӱп ийектер. Ого ло оныҥ ӱйине бойыныҥ јуунында пионер болуп иштеерге јарап туратан. Је олор Иеговага кӧптӧдӧ иштеерге, јарчылар јетпей турган јердӧӧн кӧчӧр деп сананган. Је бу амадузына јединерге олорго та нени де артыргызар керек болгон. Самуэль куучындаган: «Бис Матфей 6:33-ги јӧпти тузаланып, кереги јок немелер албай барганыс. Је сӱреен эптӱ турабысты артыргызарга коркышту кӱч болгон. Оныла бисте тӧлӱлер де болбогон». Јаҥы јерде Самуэль ле оныҥ ӱйи алдындагызына кӧрӧ алты катапка ас акчага јадып ийер аргалу деп оҥдоп ийгилеген. Самуэль оноҥ ары куучындайт: «Иегова мӱргӱӱлдеристи угуп, бистиҥ  алтамдарысты ууландырып турганын кӧргӧнис. Эмди Иегованыҥ јарадузын ла сӱӱжин оноҥ тыҥ сезедис». Слер де Иеговага кӧп иштеерге јӱрӱмеерди солып болороор бо? Эйе болзо, бир де алаҥзыбагар: солынталар этсеер, слер Иеговага оноҥ јуук болуп калараар. А ол слерди качан да артыргыспас (Сар. 18:25).

8. Иван ла Викторияныҥ сӧстӧринеҥ бис неге ӱренедис?

⁸ Кудайга иштегенинеҥ оноҥ јаан сӱӱнчи. Киргизияда пионерлер болуп иштеп турган эш-нӧкӧрлӧрдиҥ, Иван ла Викторияныҥ, сӧстӧрин сананып ийектер. Олор Иегованыҥ организациязынаҥ кандый ла јакылталар аларга белен болорго, чӱм јок јӱрӱм јӱрген, темдектезе, теократиялык туралар тударында туружарга. Иван куучындайт: «Кажы ла катап јакылта алзаас, бис бастыра бойысты ишке беретенис. Је эҥирде канайып та арып калган болзоос, јӱрегисте амыр болгон, нениҥ учун дезе бис Иеговага иштегенис. Анайда ок кӧп најыларлу болуп калганыстаҥ ла кожо иштегенистеҥ сананатан јакшы немелер бар болгонынаҥ јаан сӱӱнчи аладыс» (Марк 10:29, 30).

9. Кӱч айалгада эјеге эрчимдӱ јарлаарга не болужат ла бу кандый једимге экелип турганын куучындап беригер.

⁹ Кӱч те айалгаларда Иеговага кӧптӧдӧ иштеер арга бар. Оны бис Кӱнбадыш Африкада јадып турган јажы јаан, тул артып калган Мирей эјениҥ теминеҥ кӧрӧдис. Ол врач болгон. Пенсияга чыгып, пионердиҥ ижин баштаган. Мирей эје артритту, оныҥ учун ол айылдар сайын бир ле час јарлаар аргалу. Је стендле ол кӧптӧдӧ иштейт. Ондо кӧп такып барары ла Агару Бичикле ӱредӱлер бар. Олордыҥ кезигин ол телефонло ӧткӱрет. Ого јарлаар ишке эрчимдӱ туружарга не болужат? Мирей эје айдат: «Мен Иегова ла Иисусты тыҥ сӱӱп турганымнаҥ улам иштеп јадым. Анайда ок Иегованы меге кӧптӧдӧ иштеерге болушсын деп сурайдым» (Матф. 22:36, 37).

10. 1 Петр 5:10-ло болзо, Иеговага кӧптӧдӧ иштеерге тургандар нени алар?

¹⁰ Иегованаҥ ӱредӱ. Бу ӱредӱ Маврикийде пионер болуп иштеп турган Кенни карындашка чыннаҥ ла сый болгон. Ол чындыкты билип, университетте ӱредӱзин артыргыскан. Оноҥ сууга чӧҥӱрилеле, ӧйин толо берип, иштеп баштаган. Ол айдат: «Мениҥ кӱӱн-санаам судурчы Исаияныҥ кӱӱн-санаазындый болзын деп кӱӱнзейдим. Исаия айткан: Мен белен! Мени ий» (Иса. 6:8). Кенни карындаш башка-башка теократиялык туралар тударында турушкан ла бойыныҥ тилине бичиктер кӧчӱреринде болушкан. Ол айдат: «Акалар мени ӱреткенинеҥ улам, јакылталарымды јакшы бӱдӱргем». Је ол јӱк ле ижин јакшы бӱдӱрерге ӱренип алган эмес. Ол оноҥ ары куучындайт: «Мен нени эдип болбозымды ла Иегованы оноҥ тыҥ сӱӱндирерге кандый кылык-јаҥдарга ӱренер керек деп оҥдоп алгам». (1 Петр 5:10 кычырыгар.) Бистерге де бойыстыҥ айалгаларысты сананып ийерге јараар. Иеговага кӧптӧдӧ иштеерге, јӱрӱмисти солызаас, Иегованаҥ ӱредӱ аларыс.

11. Тӱштӱк Кореядагы ӱч эјеге оноҥ ары эрчимдӱ јарлаарга не болушкан? (Кадарындагы јурукты база кӧрӱгер.)

¹¹ Ченемелдӱ де јарчыларга јарлаар иштиҥ јаҥы бӱдӱмдерине туружарга ӱренер керек болуп јат. Тӱштӱк Кореяныҥ аксагалдары пандемия COVID-19-тыҥ ӧйинде олордыҥ јууны кандый једимдерге једингенин куучындаган: «Су-кадыгы уйан болгонынаҥ улам айылдар сайын кӧп јарлап болбой турган ака-эјелер  эмди видеосвязь ажыра јарлагылайт. Темдектезе, 80 јаштаҥ ажып калган ӱч эје компьютерле тузаланарга ӱренип алала, эмди арай ла кажы ла кӱн јарлабай јат» (Сар. 92:14, 15). Јарлаар иште эрчимдӱ туружып, Иегованыҥ јалакайына оноҥ тыҥ бӱдӱмјиленерге слер кӱӱнзейдеер бе? Бу амадуга јединерге нени эдер керек деп, кӧрӱп ийектер.

12. Иегова ого иженип тургандарга не деп сӧзин берет?

¹² Иеговага иженерге ӱренигер. Кудайга иженип, эҥ артыгын ого берип турзаас, Иегова биске алкыштарын артыгынча берер деп сӧзин берет (Мал. 3:10). Бу сӧстӧрдиҥ чын болгонына Колумбияда јадып турган Фабиола деп эје бӱдӱмјиленген. Ол сууга чӧҥӱрилген кийнинде, текши пионер болорго кӱӱнзеген. Је ол иштебей барза, оныҥ ӧбӧӧни ле ӱч балазы јӱрӱмге керектӱ немеге јединбей барар эди. А пионердиҥ ле телекейдиҥ ижин бир уунда бӱдӱрип болбос эди. Качан пенсияга чыгар јажы једе берерде, ол Иеговага мӱргӱп, болуш сураган. Фабиола эје эске алынат: «Пенсияныҥ документтерин јазарга кӧп ӧй керек. Је мен бир ле айга јазадып алгам. Чек кайкамчылу!» Эки айдаҥ оныҥ амадузы бӱдӱп калган. Эмди ол 70 јаштаҥ ажып, 20 јылдаҥ кӧп пионер болуп иштейт. Бу ӧйдиҥ туркунына ол сегис ӱй кижиге Иегованыҥ Керечизи болорго болушкан. Ол оноҥ ары куучындайт: «Кезикте ийде-кӱчим јетпей де турган болзо, Иегова меге  јарлаар иштиҥ графигинеҥ тудунарга оноҥ ло ары болужып јат».

13, 14. Иеговага иженип, јаҥы кӧгӱс амадуларга јединерге биске кемниҥ темдери болужар?

¹³ Иеговага иженген улустаҥ тем алыгар. Агару Бичикте Иеговага болуп албаданып иштеген кӧп улустыҥ темдери бар. Кудай олорды кайралдаардаҥ озо, олор та нени де эдер учурлу болгон. Темдектезе, Авраам Иегованыҥ алкыжын јӱк ле айылын артыргызып, кайда барып јатканын билбей, јӱре берген кийнинде алган (Евр. 11:8). Иаковко алкыжын Иегова ангелле тӱниле кӱрешкен кийнинде берген (Баш. 32:24—30). А Израиль албаты абыстар сууга јӱк кирген кийнинде Иорданды кечип, Кудайдыҥ берер болгон јерине киргендер (Иис. Н. 3:14—16).

¹⁴ Бӱгӱнги кӱнде Иеговага иженип, јаҥы кӧгӱс амадуларга јединерге албаданган Кудайдыҥ ишчилери тем болор аргалу. Андый ака-эјелер керегинде, темдектезе «Они с готовностью предоставили себя для служения» деген јӧрмӧлдӧрдиҥ јуунтызында айдылат *. Бу јӧрмӧлдӧрди кычырарга јарап турган Пейтон ло оныҥ Дайана ӱйи куучындагылайт: «Бу темдерди кычырары биске амтанду та нени де јип турган улустыҥ јанында турганына тӱҥей. Олорды канча ла кире кӧптӧдӧ кычырып турзаҥ, Иегованыҥ јалакайын амзап кӧрӧргӧ ончо ло кире кӱӱнзей берериҥ». Канча да ӧйдиҥ бажынаҥ Пейтон ло Дайана јарчылардыҥ болужы керек болуп турган јерге кӧчӧ бергендер. А слер, бу јӧрмӧлдӧрди кычырганаар ба? Анайда ок jw.org сайттагы «Проповедь в отдаленных районах. Австралия» ла «Проповедь в отдаленных районах. Ирландия» деген видеолорды кӧрӧргӧ јараар. Бу мындый материалдар слерге Иеговага оноҥ кӧп иштеерге нени эдер керек деп билип аларга болужар.

15. Најыларды нениҥ учун ойгор талдаар керек?

¹⁵ Најыларды ойгор талдагар. Јаҥы курсакты амзап кӧрӧргӧ, ол курсак јарап турган улусла кожо болзогор, јеҥил болор. Анайып ла бис Каандыктыҥ керектерин баштапкы јерге тургузып турган улусла најылашсаас, Иеговага иштеерге кӱӱнзей берерис. Кент ле Вероника деп эш-нӧкӧрлӧр мынайып куучындаган: «Бисти најыларыс ла тӧрӧӧндӧрис јарлаар иштиҥ јаҥы бӱдӱмдеринде турушсын деп кӱӱнзедип туратан. Каандыктыҥ керектерин баштапкы јерге тургузып турган ака-эјелерле најылашсаҥ, јаҥы немелерге ӱренерге јеҥил болор деп оҥдогоныс». Эмди олор Сербияда специальный пионерлер болуп иштегилейт.

16. Иисустыҥ укаа сӧзиле болзо, Иеговага иштеерге нениҥ учун та нени де артыргызарга белен болор керек? (Лука 12:16—21).

¹⁶ Иеговага иштеерге, та нени де артыргызарга белен болугар. Је бу биске јарап турган ончо немени артыргызарын темдектебей јат (Эккл. 5:19, 20). Кезик улус Иеговага кӧптӧдӧ иштеер аргалу да болзо, је бойына јарап турган немени артыргызып болбой јат. Мындый јастыраны Иисустыҥ укаа сӧзиндеги кижи эткен. (Лука 12:16—21 кычырыгар.) Ол Иегованыҥ сӧстӧрин укпай, бойына ла јакшы болзын деп сананган. Францияда јадып турган Кристьян ака Иеговага ла билезине ӧйин ле ийде-кӱчин бӱткӱлинче бербеген деп оҥдогон. Оныҥ учун ол ӱйиле кожо пионердиҥ ижин баштаган. Ол ижин солып, кичинек клининговый фирма ачкан. Мынайып олор ас немеге болорзынып ӱренген. Мынайып эткени калас болды ба? Кристьян ака куучындайт:  «Алдындагызына кӧрӧ бис эмди јарлаар иштеҥ јаан сӱӱнчи аладыс. Такып барып турган улузыс ла Агару Бичик ӱренип турган улузыс Иегова керегинде билип турганын кӧрӱп, тыҥ сӱӱнедис».

17. Шеронго јарлаар иштиҥ јаҥы бӱдӱмине ӱренип аларга не болушкан?

¹⁷ Јарлаар иштиҥ јаҥы бӱдӱмдерине ӱренигер (Ап. ижи 17:16, 17; 20:20, 21). США-да јадып турган Шерон деп пионер эјеге пандемия COVID-19-тыҥ ӧйинде јарлаар иштиҥ эп-аргалары солынганынаҥ улам јарлаарга кӱч болгон. Озо баштап, ол телефонло јарлап болбой туратан. Је оноҥ, аймак кӧрӧӧчи телефонло канай јарлаарын кӧргӱзип берген кийнинде, ол јарлаар иштиҥ бу бӱдӱминде јаантайын туружып баштаган. Шерон эје куучындайт: «Озо баштап меге коркымчылу болгон. Је эмди јарлаар иштиҥ бу бӱдӱмиле мен јакшызынып јадым. Айылдар сайын јарлаганыска кӧрӧ, телефонло јарлап, улусла кӧп куучындажып јадыс».

18. Кӱчтер де болуп турза, кӧптӧдӧ јарлаарга бистерге кандый јӧп болужар?

¹⁸ План тургузып, ол аайынча эдигер. Кӱч айалгада бис Иеговага мӱргӱп, нени эдерин јазап сананадыс (Укаа 3:21). Европаныҥ ороондорыныҥ бирӱзинде цыган бӧлӱкте иштеп турган Соня деп пионер сыйын бойыныҥ эп-аргазы керегинде куучындаган: «Мен эдерге турган немемниҥ планын бичип, кӧрӱнер јерге саладым. Анайда ок столымныҥ ӱстинде эки башка јол јурап салган јурук бар. Кандый бир јӧп чыгарардаҥ озо бу јолдордыҥ кажызын талдазам, јакшы болор деп сананадым». Соняныҥ јӱрӱминде кезикте кӱчтер де болуп турза, ол јакшыны кӧрӧргӧ албаданат. Ол айдат: «Бу кӱчтер ӧдӱп болбос буудак болуп калар ба эмезе ӧдӧ бергедий кӱр болор бо — мениҥ кӧрӱмимнеҥ камаанду».

19. Бу јӧрмӧл слерди неге кӱӱнзетти?

¹⁹ Бисте андый кӧп сыйлар! Айдарда, Кудайды макка чыгарарга, ончо аргаларды тузаланактар (Евр. 13:15). Анайып, ого быйанду болгонысты кӧргӱзерис. Јарлаар иштиҥ јаҥы бӱдӱмдерине ӱренигер. Ол тушта, Кудай слерге оноҥ кӧп алкыштар берер. Кажы ла кӱн Иегованыҥ јалакайын амзап, билип алатан аргалар табыгар. Анайып, слер Иисус чылап айдар аргалу болороор: «Мениҥ курсагым — Мени ийгениниҥ табын эдери ле Оныҥ керегин бӱдӱрери» (Иоанн 4:34).