1. Иисус Иегованы нениҥ учун бойыныҥ ӱренчиктерин корулазын деп сураган?

 ИИСУС божоор алдында, тӱнде Иеговага мӱргӱп, бойыныҥ ӱренчиктерин корулап турзын деп болуш сураган (Иоанн 17:15, 20). Иегова бойыныҥ ишчилерин качан да артыргыспай турган эмей. Ол олорго болужып јат, олорды корулап јат. Је Иисус оныҥ ӱренчиктерине Сатана коркышту тыҥ табарулар эдер деп ле олор кӱчтерди Иегова јогынаҥ ӧдӱп болбос деп билген.

2. Нениҥ учун биске уур-кӱчтердеҥ коркыбас керек? (Сарын 33:18—20).

² Сатананыҥ бу телекейи чындык христиандарга коркышту тыҥ табарулар эдет. Кажы ла кижиниҥ јӱрӱминде кӧдӱрип болбос кӱчтер болот ло бӱткенис ченелет. Је бу јӧрмӧлдӧ биске недеҥ де коркыбас керек деп кӧрӧрис. Нениҥ учун дезе Иегова бистиҥ кӱчтеристи кӧрӱп јат ла болужарга јаантайын белен. А эмди Агару Бичиктеҥ «Иегова оноҥ айап тургандарды кӧрӧт» деген эки тем кӧрӱп ийектер. (Сарын 33:18—20 кычырыгар.)

3. Бис качан јаҥысканзырай берер аргалу?

³ Бисти айландыра кӧгӱс ака-эјелер кӧп тӧ болзо, кезикте бис јаҥысканзырай бередис. Темдектезе, мындый сезимдер школдо ӱренип турган балдарда болот. Олор бойыныҥ Кудайга бӱткенин корулап тура, јанында јӧмӧжӧтӧн кижи јок болзо, јаҥысканзырай берет. Анайда ок ӧскӧ јуунга кӧчкӧн јииттерде мындый сезимдер база болот. Бистиҥ кемигис те јаман санааларла тартыжып тура, бу санаалардыҥ аайы-бажына бойы чыгар учурлу деп сананат. А кемигис те санааркаштарын ӧскӧ улуска куучындабай јат, нениҥ учун дезе олор оны оҥдобос деп сананат.  А кезикте бис кемге де керек јок деп билдирер. Јаҥысканзыраштаҥ улам, бис бойысты эш-кереги јок, уйан деп сезерис. Кару ака-эјелер, бис слерди сурап турус, ундыбай јӱрер, Иегова слерде мындый сезимдер болбозын деп кӱӱнзейт. Бис мыны кайдаҥ билерис?

4. Судурчы Илья: «Мен јаҥыскан арттым» — деп, нениҥ учун айткан?

⁴ Је эмди судурчы Ильяныҥ учуралын эске алып ийектер. Ол дезе Иезавель абакайдыҥ оны ӧлтӱрерге чертенгенин угала, 40 кӱннеҥ ажыра јажынып јӱрген (1 Каан. 19:1—9). Куй ташка јажынып турала, учы-учында Иеговага бастыра санааркаштарын мынайып ачкан: «Мен јаҥыскан арттым» (1 Каан. 19:10). Је чынынча болзо, ороондо ӧскӧ дӧ судурчылар кӧп болгон, темдектезе, Авдий, канзыраган Иезавельдиҥ колынаҥ 100 судурчыны корулап алган (1 Каан. 18:7, 13). Нениҥ учун Илья андый тыҥ ӧскӱзиреген? Нениҥ учун дезе Авдийдиҥ јажырган судурчыларын божоп калган деп сананган болор бо? Ол эмезе Кармилде болгон учуралдыҥ кийнинеҥ кем де Иеговага бажырбай турган деп билдиргенинеҥ улам бойын јаҥыскан, кемге де керек јок деп сескен болор бо? Эмезе улус оны ундып койгон ло оны кандый јеткер сакып турганын билбес деп сананган болор. Ильяда нениҥ учун мындый сезимдер болгонын Агару Бичикте оок-теегинеҥ бери јарталбаган. Је Иегова Ильяны нениҥ учун јаҥысканзырап турганын оҥдогон ло ого канайып болужарын билген деп јарт билерис.

5. Иегова Ильяны јаҥыскан эмес деп кӧргӱзерге нени эткен?

⁵ Иегова Ильяга нени эткен? Ол оныла куучындажарга албаданган. Оныҥ учун: «Илья, сен мында нени эдип тургаҥ?» — деп, эки катап сураган (1 Каан. 19:9, 13). Илья дезе кажы ла катап Иеговага јӱрегиндеги ачузын куучындап турды. А Иегова оны лаптап уккан. Оноҥ Иегова Ильяга сен јаҥыскан эмес деп кӧргӱзерге, улу ийде-кӱчин кӧргӱскен. Анайда ок оноҥ до ӧскӧ кӧп чындык израильтяндар бар деп айткан (1 Каан. 19:11, 12, 18).  Бу сӧстӧрди угала, Ильяныҥ јӱрегине кандый јеҥил боло берди не?! Учында Иегова Ильяга јаан учурлу иш берген. Ого дезе Хазаэлди Сирияныҥ кааны эдип кӧстӧӧр керек болгон, Ииуйды — Израильдиҥ кааны эдип, а Елисейди — судурчы эдип (1 Каан. 19:15, 16). Анайып, Иегова Ильяныҥ кӱӱнин кӧдӱрип, оныҥ санаазын јакшы јанындӧӧн ууландырган. Керек дезе Ильяга кожо иштенетен јуук најы эдип, Елисейди берген. А бис јаҥысканзырап турзаас, Иегова биске нени эдип турган?

6. Бойыҥды јаҥыскан деп сезип турзаҥ, не керегинде мӱргӱӱрге јараар? (Сарын 62:8).

⁶ Иегова јӱрегиҥде не барын мӱргӱӱлде ачсын деп кӱӱнзеп јат. Иегова бастыра кӱчтериҥди кӧрӧт лӧ сени кандый ла ӧйдӧ угарга белен (1 Фес. 5:17). Иеговага бойыныҥ ишчилериниҥ мӱргӱӱли јарап јат (Укаа 15:8). Јаҥысканзырап турзаҥ, сен не керегинде мӱргӱӱр аргалу? Илья чылап јӱрегиҥди Иеговага ачып тур. (Сарын 62:8 кычырыгар.) Бастыра кӱчтериҥди айдып, оноҥ улам кандый сезимдер болуп турганын Иеговага куучындап тур. Јаман эмоцияларла тартыжарга болуш сура. Сеге школдо јарлаарга коркынчылу болуп турза ла сениҥ јаныҥда болужар кижи јок болзо, јалтанбас болорго Иеговага мӱргӱп тур. Эптӱ сӧстӧр табып, улусла јымжак куучындажарга болуш сура (Лука 21:14, 15). Сен јаман санааларга алдыртып турган болзоҥ, кӧгӱзи бек акала эмезе эјеле куучындажарга болуш сура. Ол кижи сени чын оҥдозын, лаптап уксын деп, мӱргӱӱрге јараар. Иеговага мӱргӱӱрге уйалбай тур. Ол сениҥ мӱргӱӱлдериҥе карууларын канайып берип турганын кӧрӧргӧ албадан. Улус сеге болужарга турза, эпјоксынбай јӧпсинип тур. Ол тушта сен тыҥ јаҥысканзырабазыҥ.

7. Сен Маурисионыҥ теминеҥ неге ӱренип јадыҥ?

⁷ Иегова бистиҥ кажыбыска ла јаан учурлу иш берген. Ол јарлаар иште ле јуунда эдип турган ижисти баалап ла кӧрӱп турган деп, бир де алаҥзыба (Сар. 110:3). Јарлаар ишке эрчимдӱ турушканыс јаҥысканзырабаска канайып болужар? Эмди Маурисио b деп атту јиит карындаштыҥ темин кӧрӱп ийектер. Сууга чӧҥӱрилген кийнинеҥ јаан удабай, оныҥ јуук најызы Кудайдаҥ ыраап, сооп баштаган. Мыны кӧрӱп, Маурисио бойына алаҥзый берген: «„Мен Кудайга чындык артарым ба? Мендий кижи Кудайдыҥ билезиле иштеер аргалу ба?“ Мынаҥ улам мен јаҥыскан, мени кем де оҥдобой турган деп билдирген». Маурисио карындашка не болушкан? Ол мынайып айдат: «Мен кӧп јарлап баштаарымда, бойым керегинде кӧп сананбай баргам ла јаман санаалар  менеҥ ыраай берген. Ака-эјелерле кожо јарлап баштаарымда, тыҥ јаҥысканзырабай баргам. Мен мынаҥ јаан сӱӱнчи алгам. Је эмди айылдар сайын ака-эјелерле јарлабай да турган болзом, бис кожо самара бичип, телефон согуп, јаан ийде-кӱч аладыс». Маурисио карындашка база не болушкан? Ол айдат: «Јуунныҥ керектерине кӧптӧдӧ туружып баштагам. Меге акалар кандый бир јакылта берзе, мен ого јазап туруп белетенип аладым. Мынаҥ улам мени Иегова да, ака-эјелер де баалап турган деп сезип јадым».

8. Уур-кӱчтердиҥ ӧйинде кандый сезимдер болордоҥ айабас?

⁸ Бис билерис, калганчы кӱндерде бистерде уур-кӱчтер болор деп (2 Тим. 3:1). Кезикте олор сакыбаган јанынаҥ болот. Темдектезе, акча-манат јанынаҥ кӱчтер болот, јаман диагноз тургузылат, ол эмезе бистиҥ јуук кижибис божоп калат. Уур-кӱчтер бир уунда эмезе ээчий-деечий боло берзе, бисте тыҥ стресс болот. Биске ундыбас керек, Иегова бистиҥ јаныста. Оныҥ болужыла бис ӱзе уур-кӱчтерди ӧдӱп чыгарыс.

9. Иов кандый уур-кӱчтерге табарткан?

⁹ Је эмди Иегова бойыныҥ чындык ишчизине, Иовко, канай болушканын кӧрӱп ийектер. Иов кыска ла ӧйдиҥ туркунына андый кӧп кыйын-шыра кӧрди. Ол бир ле кӱн ал-камык мал-ажын ла јалчыларын јылыйтып койгон ло бойыныҥ сӱӱп турган балдарын база јылыйтып салган (Иов 1:13—19). Бу кыйын-шыраныҥ ӱстине коркышту јаман оору табарган. Мынаҥ улам оныҥ бастыра эди-канын кӧрӧр аайы јок болуп калган (Иов 2:7). Мындый ачу-коронго бастыртып, Иов ачу сӧстӧр айткан: «Бу јӱрӱмнеҥ чӧкӧдим, јӱрер де кӱӱним јок» (Иов 7:16).

10. Иегова Иовко ченелтелерди ӧдӱп чыгарга канайып болушкан? (Кадарындагы јурукты кӧрӱгер.)

¹⁰ Иегова Иовты теҥеридеҥ кӧрӱп турган болгон. Ол оны сӱӱген ле ченелтени турумкай ӧдӧргӧ болушкан. Озо баштап ол Иовло куучындажып јат. Оноҥ бойыныҥ улу ойгорын ла бойыныҥ јайаандарын кичееп турган деп эске алындырган. Оныҥ учун бойыныҥ кайкамчылу тындулары керегинде кӧп сурактар берген (Иов 38:1, 2; 39:9, 13, 19, 27; 40:15; 41:1, 2). Оныҥ кийнинеҥ Иегова Иовты токунадарга ла бӱдӱмјизин тыҥыдарга, Елиуй деп јиит кижини ийип јат. Елиуй дезе, Иовко Иегова ишчилериниҥ турумкайы учун олорды кайралдап турган деп айткан. Је бого ло коштой Иегова Елиуйды Иовко јымжак, јалакай јӧп берзин деп кӱӱнзедип ийген. Мынайып Иов, кижи — Јер-телекейдиҥ Јайаачызынаҥ, Иегованаҥ, канча катапка јабыс деп оҥдоп ийген (Иов 37:14). Оныҥ кийнинде Иегова Иовко јакылта берип јат. Иовко дезе, Иеговага удура кинчек эткен ӱч најызы учун мӱргӱӱр керек болгон (Иов 42:8—10). Је ченелтелерди ӧдӧргӧ, Иегова биске канайып болужып турган?

11. Келер ченелтелердиҥ ӧйинде Агару Бичик канайып болужар?

¹¹ Иегова бисле бӱгӱнги кӱнде Иовло куучындашкандый куучындашпай јат (Рим. 15:4). Је бис Иегованыҥ ӱнин Агару Бичикти кычырып турзаас, угуп јадыс. Бу бичик келер ӧйгӧ ижемји берет. Кӱч ӧйлӧрдӧ болужатан Агару Бичиктиҥ кезик шӱӱлтелерин кӧрӱп ийектер. Иегова биске сӧзин берет: кандый да кӱч ченелте болзо, «бисти не де Кудайдыҥ сӱӱжинеҥ айрып болбос» (Рим. 8:38, 39). Анайда ок Иегова «болуш сурап турган улустыҥ ончозына јуук» (Сар. 145:18). Бис Иеговага иженип турзаас, кандый  ла ченелтелерди сӱӱнчилӱ ӧдӱп чыгарыс (1 Кор. 10:13; Иак. 1:2, 12). Агару Бичикле болзо, эмдиги кӱчтерис кыска ла ӧйгӧ, келер ӧйдӧ ӱргӱлјиге кыйын-шыра кӧрбӧзис (2 Кор. 4:16—18). Удабас Иегова јаманныҥ тазылын — Сатананы ла калју улусты бӱткӱлинче јоголтып койор (Сар. 37:10). Оныҥ учун келер ӧйдӧ болотон уур ченелтелерди ӧдӧргӧ болужатан ла токунал беретен Агару Бичиктиҥ кезик ӱлгерлерин не ӱренип албас?

12. Иегова бистерди неге кӱӱнзедет?

¹² Иегова бистерди Агару Бичикти јаантайын кычырып, шӱӱп сананып турзын деп кӱӱнзедип јат. А сананып турганысты тузаланып турзаас, бистиҥ бӱдӱмјигис тыҥыыр, анайып Иеговага оноҥ јуук болорыс. Бу дезе кандый ла кӱчтерди ӧдӧргӧ ийде-кӱч берет. Иегова оныҥ Сӧзин баалап турган улуска агару тын берет. Агару тын бистерге кандый ла ченелтелерде турумкай артарга, «артыкташкан кӱч» берет (2 Кор. 4:7—10).

13. «Бӱдӱмјилӱ ле керсӱ кулдыҥ» белетеген курсагы биске ченелтелерди ӧдӧргӧ канай болужат?

¹³ Иегова «бӱдӱмјилӱ ле керсӱ кул» ажыра биске кӧгӱс курсак белетейт (Матф. 24:45). Мынаҥ улам бистиҥ бӱдӱмјигисти ле Иеговала колбуларысты тыҥыдып турган кӧп јӧрмӧлдӧр, видеолор ло кожоҥдор бар. Оныҥ учун бу бай кӧгӱс курсактаҥ тойо јибегенчес столдоҥ турбай турактар! США-да јадып турган бир эје кӧгӱс курсакты нениҥ учун баалап турганын куучындайт: «Иеговага иштеп турганым 40 јыл болуп калды, бу јылдардыҥ туркунына бӱдӱмјим кӧп лӧ ченелген. Озо баштап, карган адам эзирик маҥтадып барып јаткан кижинеҥ улам божоп калган, ада-энем дезе јаан оорудаҥ улам божогон, а бойым рактаҥ эки катап эмденгем». Эјеге мыны ӱзе чыдажарга не болушкан? Ол айдат: «Иегова јаантайын меге болужып турган. Бӱдӱмјилӱ ле керсӱ кул ажыра белетеген курсагы меге ийде-кӱч беретен. Оныҥ учун мен де Иов чылап: „Ӧлӧрдиҥ ӧлгӧнчӧ јек јок болуп артарым!“ — деп айдарга кӱӱнзейдим» (Иов 27:5).

14. Иегова биске ченелтелердиҥ ӧйинде ака-эјелер ажыра канайып болужат? (1 Фессалоникадагыларга 4:9).

¹⁴ Иегова бисти бу кӱч ӧйлӧрдӧ бой-бойысты сӱӱп ле токунадып јӱрзин деп ӱредип јат (2 Кор. 1:3, 4; 1 Фессалоникадагыларга 4:9 кычырыгар). Елиуй ла чылап ака-эјелер бисти «јаантайын чындык болзын деп» капшай ла болужарга  меҥдеп келгилейт (Ап. ижи 14:22). Диана деп эјениҥ темин кӧрӱп ийектер. Оныҥ ӧбӧӧни тыҥ ооруп каларда, јуун ого Кудайдаҥ ырабаска кӧп болушкан. Ол куучындайт: «Меге андый кӱч болгон. Бу шыралгалу айларда, Иегова бисти кучактап алала, сӱӱжиле курчап алган деп билдирген. Ака-эјелер јаантайын бистиҥ јаныста болгон. Олор биске телефон согуп, бистиҥ айылыска келип, бисти кучактап туратан. Бу ӱзе неме биске турумкай артарга болушкан. Мен машинала маҥтадып билбезим, је ака-эјелер бойыныҥ машиназына отургызып алала, јуунга апарып туратан, канча кире аргалары бар, јарлаар ишке апарып туратан. Бисте кӧгӱс килеҥкей биле бары кандый јакшы!»

15. Бис нениҥ учун ченелтелерди ӧдӱп чыгарыс деп алаҥзыбай јадыс?

¹⁵ Бистиҥ кажыбыс ла качан бирде ченелтелерге табартарыс. Бу јӧрмӧлдӧҥ кӧргӧнисле, ченелтелерде бис јаҥыскан артпазыс. Бистиҥ сӱӱштӱ Адабыс јаантайын бистиҥ јаныста. Ол бисти угуп јат ла болужарга белен (Иса. 43:2). Бис ончо ченелтелерди Иегованыҥ болужыла ӧдӧрис деп алаҥзыбай јадыс. Ол биске ончо керектӱ немени берип јат. Темдектезе, мӱргӱйтен арга, Агару Бичик ле ого тӧзӧлӧнгӧн бичиктер, анайда ок кӱч ӧйлӧрдӧ ака-эјелеристиҥ болужы.

16. Кудайдыҥ сӱӱжин ле болужын јаантайын алып турарга нени эдер керек?

¹⁶ Теҥериде бисти сӱӱп турган Адабыс бар деп билерге кандый јакшы! Агару Бичикте айдылганыла, «Бистиҥ јӱрегис Кудайдаҥ сӱӱнчи табат» (Сар. 33:21). Бис Иегованыҥ сӱӱжин ле болужын баалап турзаас, оныҥ берип турган ончо немелерине быйанду јӱрерис. Је Иегова Кудайыс оноҥ ло ары кичеезин деп, биске база нени эдер керек? Оныҥ айткан сӧзин јаантайын угуп, оны сӱӱндиретен керектер эдерис. Ол тушта Кудайыстыҥ сӱӱжин јажын-чакка кӧрӧрис! (1 Пётр 3:12).