1. Иегова улуска нени кӱӱнзейт?

 ИЕГОВА бисти не ле немени бойыс талдаар эдип јайаган. Бу сӱреен баалу сыйдаҥ улам бис кажы ла кӱн нени, канай эдетенин шӱӱп сананар аргалу. Талдайтан сурактардыҥ кезиги јаан учурлу болот, а кезиктери андый ла јаан эмес. Је эҥ јаан учурлу неме дезе — ол качан кижи бойыныҥ јӱрӱмин Иеговага учурлап, оныҥ билезине кожулганы. Иегова улуска нениҥ учун андый арга берген? Нениҥ учун дезе ол улусты сӱӱп турган, олорго эҥ јакшызын кӱӱнзейт, анайда ок оныла јуук колбуларлу болгонына сӱӱнип, јажын-чакка јӱрзин деп кӱӱнзейт (Јаҥ. т. 30:19, 20; Гал. 6:7, 8).

2. Кинчегин алынбай турган кижиге Иегованыҥ кӧрӱми кандый? (1 Иоанн 2:1).

² Је Иегова ого иштезин деп, кемди де албадабай јат. Мындый шӱӱлтеге кажы ла кижи бойы келер учурлу. Је чӧҥӱрилип калган кижи Иегованыҥ јасагын бузуп, уур кинчек эткен болзо, канайдар? Андый кижи кинчегин алынбаза, оны јууннаҥ туураладып салар керек (1 Кор. 5:13). Је мындый да учуралда кижи кинчегин алынып, кайра келер деп, Иегова иженет. Оныҥ да учун кинчегин алынып турган улустыҥ јаманы ташталзын деп, Иегова толынты тайылга берген. (1 Иоанн 2:1 кычырыгар.) Бистиҥ  сӱӱштӱ Адабыс уур кинчек эткен улусты кинчегин алынзын деп кӱӱнзедип јат (Зах. 1:3; Рим. 2:4; Иак. 4:8).

3. Бу јӧрмӧлдӧ бис нени шӱӱжерис?

³ Биске уур кинчекке ле кинчек эдип турган улуска Иегованыҥ кӧрӱмиле кӧрӧр керек. Оны канайып эдерин бу јӧрмӧлдӧҥ билип аларыс. 1) Баштапкы чакта Коринфтеги јуун уур кинчек эткен кижиге кандый кӧрӱмдӱ болгон, 2) апостол Павел ол кижи кинчегин алынарда, јуунга кандый башкарту берген, 3) уур кинчек эткен улуска Иегованыҥ кӧрӱми кандый?

БАШТАПКЫ ЧАКТЫҤ ЈУУНЫНДА КАНДЫЙ АЙАЛГА БОЛГОН?

4. Баштапкы чакта Коринфтеги јуунда кандый айалга болгон? (1 Коринфтегилерге 5:1, 2).

⁴ 1 Коринфтегилерге 5:1, 2, ЈТ кычырыгар. Павел ӱчинчи миссионер јол-јорыгыныҥ ӧйинде јаҥы тӧзӧлгӧн Коринфтеги јуун керегинде коркышту јаман неме уккан. Јуундагы бир ака адазыныҥ ӱйиле конып турган болгон. Мындый јескинчилӱ кинчекти «ӧскӧ албатылар» да этпейтен. Је Коринфтеги јуун мында бир де јаман неме кӧрбӧгӧн. Керек дезе ол кижини јуунда артар аргалу деп сананган. Олордыҥ кезиги, байла, Иегова кинчектӱ улусты оҥдоп турган ла килеп турган деп сананган болор. Је Иегова андый немени качан да јаратпаган. Нениҥ учун дезе мындый керекти кӧргӧн улус Кудайдыҥ адын јаман айдар эди. Анайда ок јуундагы чындык улус оныҥ кӧрӱмин алынар эди. Айдарда, Павел јуунга кандый башкартулар берген?

5. Павел јуунга кандый јӧп берген, бу нени темдектейт? (1 Коринфтегилерге 5:13) (Јурукты база кӧрӱгер.)

⁵ 1 Коринфтегилерге 5:13, ЈТ кычырыгар. Павел агару тынныҥ болужыла, кинчегин алынбай турган улус јууннаҥ туураладылар учурлу деп бичиген. Чындык христиандарга андый улуска кандый кӧрӱмдӱ болор керек болгон? Павел андый улусла «куучындашпазын» деп бичиген. Бу нени темдектейт? Куучындашпазын дегенине «андый кижиле кожо ажанбагар да» дегени кирет (1 Кор. 5:11, ЈТ). Нениҥ учун дезе ажанып јаткан тушта, андый кижиле кӧп куучындажа берердеҥ айабазыс. Айдарда, Павел мындый  јӧпти нениҥ учун бергени јарт болот. Мындый јӧп јаманнаҥ корулаар (1 Кор. 5:5—7). Бистиҥ ол кижиле куучындашпай турганы́с ого Кудайды кандый тыҥ ачындырганын оҥдоорго ло ойто Кудайга келерге болужар.

6. Павелдиҥ самаразы јуунга ла уур кинчек эткен кижиге кандый тузазын јетирген?

⁶ Павел Коринфтеги јуунга самара аткарып ийеле, олор оны алынды ба, јок по деп билерге кӱӱнзеген. Карын Тит ого јакшы солундар јетирген (2 Кор. 7:6, 7). Коринфтеги јуун Павелдиҥ берген башкартулары аайынча, уур кинчек эдип турган ол эр кижини јууннаҥ туураладып салган. Павелдиҥ баштапкы самаразын аткарганынаҥ бери јаан удабай, ол эр кижи тоолу ла айга бойыныҥ јаман керектерин артыргызып, кинчегин  алынган. Ол дезе бойыныҥ кӧрӱм-санаазын, керектерин солып, Иегованыҥ бийик нормаларыла јӱрӱп баштаган (2 Кор. 7:8—11). Је Павел јуунга оноҥ ары кандый јӧп берген?

ЈУУН КИНЧЕГИН АЛЫНГАН КИЖИГЕ КАНАЙЫП БАШТАНАТ?

7. Кижини јууннаҥ тууралатканы кандый туза берет? (2 Коринфтегилерге 2:5—8).

⁷ 2 Коринфтегилерге 2:5—8, ЈТ кычырыгар. Павел мындый сӧстӧр айткан: «Андый кижиге кӧп саба улустыҥ чугулы ла једер». Бу сӧстӧрлӧ болзо, кижини јууннаҥ тууралатканы амадузына јеткен. Кандый амадуга? Ол кижи бойыныҥ јастыразын алынып ийген (Евр. 12:11).

8. Павел јуунга база кандый башкарту берген?

⁸ Павел јуунга мындый башкарту берген: оныҥ «јаманын акту јӱрегердеҥ таштап, оны токунадып салар керек», анайда ок ого «сӱӱжигерди кӧргӱзигер». Ајарзаар да, Павелдиҥ айтканыла болзо, аксагалдар кижини јуунга орныктырып ийзе, јуунга олорло јӱк ле јӧпсинер керек эмес, је ол кижиниҥ јаманын таштап, сӱӱжин сӧстӧриле, керектериле кӧргӱзер керек. Анайып олор бу кижиниҥ јуунга кайра јанып келгенине чын ла сӱӱнип турганын кӧргӱзер эди.

9. Нениҥ учун та кемге де кинчегин алынып турган кижиниҥ јаманын таштаарга кӱч болгон болор?

⁹ Та кемге де, кинчегин алынып, јуунга кайра јанып келген байагы эр кижини килеерге кӱч болгон болор. Нениҥ учун андый болуп турган? Нениҥ учун дезе ол кижи јӱк ле бӱдӱн јуунга эмес, је јуунныҥ кажы бир кижизине де каршузын јетирген болордоҥ айабас. Олор бастыра ийде-кӱчинеҥ Иегованыҥ бийик нормаларыла јӱрерге албаданган, а бу кижи сӧс укпай, коркыш јаман кинчектер эдип јӱрген. Оныҥ учун ол јуунга кайра једип келерде, ака-эјелер оны канай уткыйтан деп сананган болор. (Лука 15:28—30 тӱҥдештиригер.) Андый да болзо, кайра јанып келген кижини јуун нениҥ учун акту јӱрегинеҥ уткыыр учурлу болгон?

10, 11. Кинчегин алынып, кайра келген кижини аксагалдар јуутпай турза, не болордоҥ айабас?

¹⁰ Темдектезе, кинчегин алынып турган кижини аксагалдар јуунга орныктырбай турган болзын ол эмезе андый кижини аксагалдар јуунга орныктырып салган, је јуунныҥ улузы оны јуутпай јат. Мындый учуралда кижи «ӧйинеҥ ӧткӱре кунугып» баштаар. Мынаҥ улам ол бойынаҥ чӧкӧп, Кудайла колбуларын тыҥытпай барардаҥ айабас.

¹¹ База бир јаман немези дезе, ака-эјелер кинчегин алынган, кайра јанып келген кижини јуутпай турза, Иеговала колбуларын ӱреп јат. Нениҥ учун? Нениҥ учун дезе анайып олор калју ла килемји јок Сатанага тӱҥей болуп калат. А Иегова андый улусты килеп јат. Сатана кинчегин алынган кижиниҥ Иеговага ойто иштеер кӱӱнин олор ажыра јандырып салардаҥ айабас (2 Кор. 2:10, 11; Эф. 4:27).

12. Јуун Иегованаҥ кандый тем алар учурлу болгон?

¹² Айдарда, Коринфтеги јуун Сатананаҥ эмес, је Иегованаҥ кандый тем  алар учурлу болгон? Олорго кинчек эткен кижиге Иегованыҥ кӧрӱмиле кӧрӧр керек болгон. Бу керегинде Агару Бичикте не бичилгенин ајарып ийзеер де. Давид Иегованы «јалакай ла јаманды таштаарга белен» Кудай деп бичиген (Сар. 86:5). А Михей мындый сӧстӧр бичиген: «Сен ошкош Кудай јок. Сен чилеп кем де јастыраны таштап, кинчекти ундыбай јат» (Мих. 7:18). А Исайя мындый сӧстӧр айткан: «Јаман кижи јастыра јолын артыргыссын, кинчектӱ кижи јаман санааларын токтотсын. Олор Иеговага, бистиҥ Кудайыска, кайра јанзын, нениҥ учун дезе Иегова Кудайыс олорго буурзап, кинчектерин таштаар» (Иса. 55:7).

13. Кинчегин алынып турган кижини нениҥ учун орныктырар керек болгон? ( «Коринфтеги эр кижи качан орныктырылган?» деген рамканы кӧрӱгер.)

¹³ Коринфтеги јуун Иегованаҥ тем аларга, кинчегин алынган кижини јуудып, ого сӱӱжин кӧргӱскен. Олор бу кижиниҥ кинчегин таштаганыла, Павелдиҥ «ончозында уккур» болыгар деген јӧбин бӱдӱргендер (2 Кор. 2:9). Анайып, јууннаҥ туураладылган кижи тоолу ла айдаҥ кинчегин алынып ийген. Оныҥ учун оны орныктырбайтан шылтак јок болгон.

 ИЕГОВАНЫҤ СӰӰЖИН ЛЕ ЈАЛАКАЙЫН КӦРГӰЗИГЕР

14, 15. Коринфте болгон учуралдаҥ бис неге ӱренедис? (2 Пётр 3:9) (Јурукты база кӧрӱгер.)

¹⁴ Коринфте болгон учурал «бисти ӱредерге бичилген» (Рим. 15:4). Иегованыҥ кӧрӱмиле болзо, оныҥ ару јуунында уур кинчек эдип турган улус болбос учурлу. Ол кинчегин алынбай турган улусты карамдап, олорго чындык ишчилериниҥ ортозында јӱрерге јаратпай јат. Чын, Иегова јалакай ла килеҥкей де болзо, бойыныҥ нормаларын бир де јабызатпай јат (Иуда 4). Оноҥ башка, Кудай кинчекти јоголтпой турза, мыны канайып килемји деп айдатан?! Карын јуунга јаан каршу болор эмес пе? (Укаа 13:20; 1 Кор. 15:33).

¹⁵ Иегова бир де кижини ӧлӱп калбазын, карын бастыразы тирӱ јӱрзин деп кӱӱнзейт. Акту јӱрегинеҥ кинчегин алынып, Иеговала колбуларын орныктырарга албаданып турган улусты Иегова килеп јат (Иез. 33:11; 2 Пётр 3:9 кычырыгар.) Оныҥ да учун Коринфтеги эр кижи кинчегин алынып, солынарга албаданарда, Иегова апостол Павел ажыра ол кижиниҥ јаманын таштап, јуудып алзын деп јакарган.

16. Коринфте болгон учурал керегинде нени сананадаар?

¹⁶ Коринфтеги јуунда болгон учуралдаҥ Иегованыҥ сӱӱжин, чындыгын ла ойгорын билип алдыс (Сар. 33:5) Бу слерди Иегованы оноҥ тыҥ мактаарга кӱӱнзедет пе? Бис ончобыс кинчектӱ, оныҥ учун кажыбыс ла кинчектеҥ айрыларга кӱӱнзеп турган эмейис. Биске кинчектеҥ јайымдалатан арганы толынты тайылга ачкан. Бис бу учун Иеговага јаан быйанду болодыс. Иегова бойыныҥ улузын сӱӱп турган деп ле олордыҥ кажызына ла эҥ јакшызын кӱӱнзеп турган деп билерге кандый јакшы!

17. Келер јӧрмӧлдӧрдӧ бис нени шӱӱжерис?

¹⁷ Бӱгӱнги кӱнде уур кинчек эдилген болзо, нени эдер керек? Аксагалдар кинчек эткен кижиге кинчегин алынарга, Иегова чылап канайып болужар аргалу? Јуундагы улус аксагалдар кижини јууннаҥ туураладып јатса эмезе орныктырып јатса, ого канайып кӧрӧр учурлу? Бу сурактарды келер јӧрмӧлдӧрдӧ шӱӱжерис.