1. Уур кинчек эткен кижиде кандый арга бар?

 ӦТКӦН јӧрмӧлдӧ Павел Коринфтеги јуунга уур кинчек эткен кижи аайынча кандый башкартулар бергенин кӧргӧнис. Ол кижи кинчегин алынбай турарда, оны јууннаҥ туураладып салган. Је бу јӧрмӧлдиҥ тӧс ӱлгерин кӧрзӧӧс, ондо орныктырылатан арга бар. Кудай ого кинчегин алынарга болужар (Рим. 2:4). А аксагалдар андый кижиге канайып болужар аргалу?

2, 3. Јуунда кемниҥ-кемниҥ кинчеги керегинде билип ийген болзоос, нени эдер керек, нениҥ учун?

² Аксагалдарга кинчек эткен кижиге болужардаҥ озо, оныҥ айалгазын јакшы билип алар керек. Бис кемниҥ-кемниҥ јууннаҥ туураладылгадый уур кинчек эткенин билип ийген болзоос, канайдарыс? Биске оны аксагалдарга баштанзын деп кӱӱнзедер керек (Иса. 1:18; Ап. ижи 20:28; 1 Пётр 5:2).

³ Је кинчек эткен кижи аксагалдардаҥ болуш сураарга кӱӱнзебей турган болзо, нени эдер керек? Ол тушта бис аксагалдарга бойыс барала, бу кижиниҥ кинчеги керегинде куучындап берерис. Анайып эткенис сӱӱжисти кӧргӱзер, нениҥ учун дезе бу аканы ба эмезе эјени бе бистиҥ јылыйтар кӱӱнис јок. Кинчек эткен кижи кинчегин алынбай турза, Иеговала колбуларын ӱреп јат. Анайда ок ол јуунныҥ јаман адын чыгарардаҥ  айабас. Оныҥ учун бис јалтанбай, оныҥ кинчегин аксагалдарга куучындап берзеес, Иеговага ла кинчек эткен кижиге сӱӱжисти кӧргӱзерис (Сар. 27:14).

УУР КИНЧЕК ЭТКЕН КИЖИГЕ АКСАГАЛДАР КАНАЙЫП БОЛУЖАТ?

4. Аксагалдар уур кинчек эткен кижиле кандый амадулу туштажат?

⁴ Јуунда кем-кем уур кинчек эткен болзо, аксагалдардыҥ јӧби комитет a тӧзӧйт. Ого јобош ло бийиркенбес ӱч аксагал кирет. Бу аксагалдар кижиге јастыразын алынарга болужып јат. Је бу ла ок ӧйдӧ, кижини кинчегин алынзын деп, олор албадабас учурлу (Јаҥ. т. 30:19). Анайда ок олор бастыра улус Давид каан чылап, кинчегин тӱрген алынып ийер деп сакыбай јат (2 Сам. 12:13). Кезик улус Иегованыҥ јӧбин баштап тарый алынбастаҥ айабас (Баш. 4:6—8). Је аксагалдардыҥ амадузы — кижиге кинчегин алынарга болужары. Аксагалдарга кинчек эткен кижиле јолыккан тушта нени ундыбас керек?

5. Аксагалдарга кинчек эткен кижиле тушташкан тушта нени ундыбас керек? (2 Тимофейге 2:24—26). (Јурукты база кӧрӱгер.)

⁵ Аксагалдар, кинчек эткен кижини јылыйып калган баалу кой деп кӧрӱгер (Лука 15:4, 6). Андый кижиле тушташсаар, бойоорды соок, кату тудунбагар. Слер кижиге јӱк ле сурактар берерге ле айалганы јакшы билип аларга келген эмезеер, карын 2 Тимофейге 2:24—26-да (кычырыгар) айдылганыла, јымжак, јалакай болугар. Кижиниҥ јӱрегин томултарга албаданыгар.

6. Аксагалдар кинчек эткен кижиле туштажардаҥ озо јӱрегин канайып белетеп алар аргалу? (Римдегилерге 2:4).

⁶ Аксагалдар, Иегованыҥ кӧрӱмиле кӧрӱгер. Олор кинчек эткен кижиниҥ керегин кӧрӱп тура, ого Иегова чылап јалакай баштанып, Павелдиҥ сӧстӧрин ундыбаска албаданат. Ол мынайда айткан: «Кудай јалакай болгоны учун сеге кинчегиҥди алынарга болужарга турганын оҥдобой јадыҥ ба?» (Римдегилерге 2:4, ЈТ кычырыгар.) Аксагалдар Иисуска багынып турганын ундыбас учурлу (Иса. 11:3, 4; Матф. 18:18—20). Олор кинчек эткен кижиле јолыгардаҥ озо, ого кинчегин алынарга болужып берерге, Иегованаҥ болуш сурап јат. Анайда  ок Агару Бичикти ле ого тӧзӧлӧнгӧн бичиктерди шиҥдеп, кижини ле оныҥ айалгазын јакшы оҥдоп аларга, Иеговага мӱргӱп јат. Бого коштой аксагалдарга кижи недеҥ улам кинчек эткенин, нениҥ учун оныҥ кӧрӱм-санаазы ла эдип турган керектери солынып калганын сананып кӧрӧр керек (Укаа 20:5).

7, 8. Аксагалдар кинчек эткен кижиле куучындажып јаткан ӧйдӧ, Иегованаҥ кандый тем алар аргалу?

⁷ Аксагалдар, Иегованыҥ чыдамкайынаҥ ӱренигер. Слерге Иегова алдында ӧйдӧ кинчек эдип турган улуска канайып баштанып турганын эске алып ийер керек. Темдектезе, Каинниҥ учуралында Иегова ол тӱзединбезе не болорын, је тӱзединзе кандый алкыштар берерин айдып берген (Баш. 4:6, 7). А Давид каанныҥ учуралында Иегова судурчы Нафанды ийип, темниҥ болужыла оныҥ јӱрегин томултарга албаданган (2 Сам. 12:1—7). А кедер Израильди тӱзедерге, Иегова бойыныҥ судурчыларын такып-такып ийип туратан (Иер. 7:24, 25). Бу учуралдарда Иегова кижиге кинчегин алынган кийнинеҥ болушкан эмес, је кинчегин алынардаҥ озо болужып јат.

⁸ Аксагалдар кинчек эткен кижиге болужарга, Иегованаҥ тем алат. Олор 2 Тимофейге 4:2-де айдылганыла, чыдамкай болорго албаданат. Аксагалга бойын тудунар керек. Оныла јымжак, јалакай куучындажар керек. Анайып, кижи кинчегин алынарга бойы кӱӱнзей берер. Је аксагал кыјыраҥтып, кату тудунып турза, кижи тескерлеп, кинчегин алынбастаҥ айабас.

9, 10. Аксагалдар, кижи недеҥ улам кинчек эткенин оҥдоп ийзин деп, канайып болужат?

⁹ Аксагалдар, кижи недеҥ улам кинчек эткенин оҥдоп аларга албаданыгар. Темдектезе, оныҥ кӧгӱзи кычырынбай барганынаҥ ол эмезе јарлабай барганынаҥ улам уйадай берген болор бо? Иеговага акту јӱрегинеҥ мӱргӱбей барган болор бо? Јастыра кӱӱниле тартышпай барган болор бо? Ол кемле куучындажып турган болгон? Канайып амырап турган болгон? Бу оныҥ јӱрегине ле кӱӱн-санаазына кандый каршу јетирген? Оныҥ кинчегин Иегова канайып кӧрӱп турганын ол оҥдоп турган ба?

¹⁰ Бу сурактарла аксагалдар кижи недеҥ улам Иегованаҥ ырап калала, кинчек эткенин оҥдоп алзын деп болужат (Укаа 20:5). Је олор кижини эбијоксындырып ийбеске, ӧткӱре тереҥ казынбай јат. Анайда ок кижиге болужарга, олор канайып Нафан Давидке тем куучындаган, анайып ла кижиге кандый бир тем куучындаар аргалу. Мынайып баштапкы ла катап тушташкан ӧйдӧ, кижи бойыныҥ јастыразын оҥдоп ийер болор. Керек дезе кинчегин де алынардаҥ айабас.

11. Аксагалдар Иисустаҥ кандый тем алар аргалу?

¹¹ Аксагалдар, Иисустаҥ тем аларга албаданыгар. Иисус Тарс деп калада јаткан Савлга болужарга, коркышту чын сурак тузаланган: «Савл, Савл, сен Мени не истейдиҥ?» — деп сураган. Мынайып Иисус ого неде јастырып турганын оҥдоп аларга болушкан (Ап. ижи 9:3—6). А «Иезавель деп ӱй кижиниҥ» учуралында Иисус: «Мен ого... кинчегин алынар ӧй бергем» — деген (Ачыл. 2:20, 21).

12, 13. Кижиге кинчегин алынарга ӧй болзын деп, аксагалдар нени эдер аргалу? (Јурукты база кӧрӱгер.)

 ¹² Аксагалдар Иисустаҥ тем алып турза, капшай ла кижи кинчегин алынбас деп сананбай јат. Не дезе кезик улус аксагалдарла баштапкы ла катап тушташкан ӧйдӧ кинчегин алынып ийет, а кезиктери јок. Андый улусла аксагалдарга канча катап туштажар керек болор. Нениҥ учун дезе кезик улус аксагалдарла јӱк канча катап тушташкан кийнинде, нени куучындашканын тереҥжиде шӱӱп сананып баштап јат. Олор јӱк ол тушта јастыразын алынып, Иеговага мӱргӱп јат (Сар. 32:5; 38:18). Айдарда, баштап кинчегин алынбаган кижи аксагалдарла канча катап туштажып келзе, кӧрӱми чек солына берердеҥ айабас.

¹³ Аксагалдар кижиге кинчегин алынарга болужып тура, оны карамдап, ого јалакай ла јымжак баштанып јат. Олор Иегова олордыҥ албаданганын алказын деп мӱргӱп, аканы эмезе эјени кинчегин алынар деп иженет (2 Тим. 2:25, 26).

14. Кижиге кинчегин алынарга кем болужат? Нениҥ учун?

¹⁴ Кижи кинчегин алынза, бис тыҥ сӱӱнип јадыс (Лука 15:7, 10). Је бу аксагалдардыҥ шылтузы ба? Павелдиҥ айтканыла: «Кудай олорго кинчегин алынар арга берер» (2 Тим. 2:25). «Агару Бичиктиҥ ӱренетен чыгармазында» бу ӱлгерге мындый јартамал берилет: «Кижиниҥ санаазын ла керектерин оныла куучындашкан аксагалдар эмес, је Иегова солып турган. Анайда ок Павел кижи кинчегин алынза, кандый туза болуп турганы керегинде бичиген. Андый кижи чындыкты оноҥ јарт оҥдойло, санаа алынып, Сатананыҥ чакпызынаҥ јайымдалат (2 Тим. 2:26)».

15. Аксагалдар кинчегин алынган кижиге оноҥ ло ары канайып болужат?

¹⁵ Кижи кинчегин алынза, аксагалдар оныла оноҥ ло ары туштажып,  ого болужын јетирет. Олор ого бӱдӱмјизин тыҥыдарга, Сатананыҥ тузактарына кирбеске ле Иегованы сӱӱндирер керектер эдерге болужар (Евр. 12:12, 13). Бу ок ӧйдӧ аксагалдар кижиниҥ кинчеги керегинде јуунда улуска нени де ачпай јат. Је јуунга нени билер керек?

«ОНЧО УЛУС АЛДЫНДА ИЛЕЗИНЕ ЧЫГАР»

16. 1 Тимофейге 5:20-ле болзо, «ончо улус алдында» деп, Павел кемдерди айткан?

¹⁶ 1 Тимофейге 5:20 кычырыгар. Павел бу сӧстӧрди база бир аксагалга, Тимофейге, бичиген. Апостол «кинчек эдеечилерле», ӧскӧртӧ айтса оноҥ ло ары кинчек эдип турган улусла, нени эдер керек деп айткан. Ол нени айдарга сананган? Павел кижиниҥ кинчеги керегинде јуунда «ончо улуска» билер керек деп айтпаган. Ол бу кинчек керегинде билген тоолу улус — кинчекти кӧргӧн улус эмезе кинчек керегинде кижинеҥ бойынаҥ уккан улус — керегинде айткан болор. Оныҥ учун аксагалдар бу керектиҥ аайы јарталып калганын ла кижиге тӱзединетен јӧп берилип калганын јӱк ле бу улуска айдып салар учурлу болгон.

17. Јуунда кӧп улус уур кинчек керегинде билип ийген эмезе билип ийетен болзо, кандый јар айдылат, нениҥ учун?

¹⁷ Кезикте кижиниҥ кинчеги керегинде јуунда кӧп улус билер болуп јат эмезе бир канча ӧйдӧҥ билип ийер болор. Ол тушта «ончо улус» дегенине бастыра јуун кирет. Оныҥ учун аксагал јуунда бу кижиге кезедӱ берилген  деп јар айдар. Нениҥ учун? Павелдиҥ айтканыла, кинчек эдеринеҥ «арткан улус айап јӱрзин» деп.

18. Сууга чӧҥӱрилип калган, је 18 јажы јетпеген бала уур кинчек эткен болзо, аксагалдар нени эдер? (Јурукты база кӧрӱгер.)

¹⁸ Чӧҥӱрилип калган, је 18 јажы јетпеген бала уур кинчек эткен болзо, канайдар? Ол тушта эки аксагал ол балала, анайда ок оныҥ христиан ада-энезиле туштажар b. Олор ол баланыҥ ада-энези ого кинчегин алынарга эм тура кандый болуш јетиргенин сурап угар. Ол бала јастыразын оҥдоп, солынарга кӱӱнзеп турган болзо, аксагалдар база кандый да болуш керек јок деп јӧп чыгарар болор, не дезе, Кудайдыҥ јакарганыла болзо, балазы учун ада-энези каруулу. Олор балазын бойлоры таскадар учурлу (Јаҥ. т. 6:6, 7; Укаа 6:20; 22:6; Эф. 6:2—4). Је бир кезик ӧйдӧҥ аксагалдар ол балага керектӱ болуш эдилип турган ба деп кӧрӱп турар аргалу. Је бала солынар кӱӱни јок болзо, кинчектӱ јолын артыргыспай турган болзо, аксагалдар комитет тӧзӧп јат. Аксагалдардыҥ комитеди ол балала, анайда ок оныҥ христиан ада-энезиле туштажар.

ИЕГОВА «КОРКЫШТУ ЈАЛАКАЙ ЛА КИЛЕҤКЕЙ» КУДАЙ

19. Аксагалдар уур кинчек эткен кижиле јолыккан тушта Иегованаҥ кандый тем алат?

¹⁹ Аксагалдарга јуунды кинчегин алынбай турган улустаҥ корулайтан молју берилген (1 Кор. 5:7). Олор кинчек эткен кажы ла кижини кинчегин алынзын деп кӱӱнзейт. Оныҥ учун олор кижи солынар деп иженет. Нениҥ учун дезе аксагалдар Иегованаҥ тем алат. А Иегова «коркышту јалакай ла килеҥкей» Кудай (Иак. 5:11, ЈТ). Ајарып ийзеер де, карып калган апостол Иоанн база килеҥкей ле јалакай болгон. Ол мынайып бичиген: «Балдарым! Слерди кинчек этпезин деп, мыны слерге бичип турум. Је кем кинчек эткен болзо, бисте Акту Иисус Христос бар» (1 Иоанн 2:1).

20. Бу јӧрмӧлдӧрдиҥ калганчызында бис нени шӱӱжерис?

²⁰ Је кезикте кижи кинчегин алынбай јат. Ол тушта оны јууннаҥ туураладып салар керек. Мындый айалгада аксагалдарга нени эдер керек? Мыны бу јӧрмӧлдӧрдиҥ калганчызында кӧрӱп ийерис.