1, 2. а) Иегова кинчегин алынбай турган кижиге кандый кӧрӱмдӱ? б) Иегова кинчек эдип турган кижинеҥ нени сакыйт?

 ИЕГОВА кандый ла јаман керекти кӧрӧр кӱӱни јок (Сар. 5:4—6). Ол бистеҥ оныҥ чындык нормаларыла јӱрзин деп некейт. А оныҥ нормалары Агару Бичикте бичилип калган. Иегова бистеҥ, толо кемдӱ эмес улустаҥ, толо кемдӱ болорын сакыбай јат (Сар. 130:3, 4). Је бу ла ок ӧйдӧ ол «Кудайга чындык эмес, Кудайыстыҥ јакшылыгын алып... уйады јок јӱрӱм јӱрген» улусты кӧрӧр кӱӱни јок (Иуда 4). Агару Бичикте айдылганыла, Иегова «Кудайы јок улусты» Армагеддон деп јуу-согушта јоголтып салар (2 Пётр 3:7; Ачыл. 16:16).

² Је Иегова кемге де ӧлӱм кӱӱнзебей јат. Мынаҥ озогы болгон јӧрмӧлдӧрди кӧргӧнисле, Иегова «ончо улусты кинчегин алынзын деп кӱӱнзейт» (2 Пётр 3:9, ЈТ). Оныҥ учун аксагалдар Иегованаҥ тем алып, кинчек эдип турган кижиге јастыразын алынарга ла Иеговага ойто јууктаарга болужып јат. Андый да болзо, кезик улус кинчегин алынбай турган (Иса. 6:9). Олорго аксагалдар болужып турган да болзо, олор јаман керектерин оноҥ ло ары эдет. Мындый айалгада нени эдер керек?

«КИНЧЕК ЭДИП ТУРГАН УЛУСТЫ БОЙЫГАРДАҤ ТУУРАЛАДЫГАР»

3. а) Агару Бичикле болзо, кинчегин алынбай турган кижини канайдар керек? б) Кинчегин алынбай турган кижи јууннаҥ туураладылып калганында бойы бурулу деп нениҥ учун айдарга јараар?

³ Кижи кинчегин алынбай турган болзо, аксагалдарга 1 Коринфтегилерге 5:13-те берилген башкартуны тузаланарга  келижет. Анда «кинчек эдип турган улусты бойыгардаҥ туураладыгар» деп айдылат. Оныҥ учун андый кижини јууннаҥ туураладып салза, ол нени ӱрендеген, оны ла јууп алган деп айдарга јараар. Андый јолды ол бойы талдаган (Гал. 6:7). Нениҥ учун дезе ол аксагалдардыҥ ого кинчегин алынарга канча катап болушканын јуутпаган (2 Каан. 17:12—15). Оныҥ керектеринеҥ Иегованыҥ нормаларыла јӱрбеске турганы кӧрӱнет (Јаҥ. т. 30:19, 20).

4. Кинчегин алынбай турган кижини јууннаҥ туураладып салганы керегинде јар нениҥ учун айдылат?

⁴ Качан кинчегин алынбай турган кижи јууннаҥ туураладылып калза, јуунда ол кижи эмди Иегованыҥ Керечизи болбой турган деп јар айдылат a. Бу јар ол кижини уйаттаарга эмес, карын ака-эјелерди Агару Бичиктеги ол кижиге бирикпезин, оныла «кожо ажанбагар да» деген сӧстӧрди бӱдӱрзин деп айдылат (1 Кор. 5:9—11). Мындый башкарту јуунды корулап јат. Нениҥ учун дезе Павел мынайда бичиген: «Бир кичинек ачыткы ончо тестени ачыдып турган» (1 Кор. 5:6, ЈТ). Кинчегин алынбай турган кижини јууннаҥ тууралатпаза, ака-эјелер «биске де мынайып јӱрерге јараар турбай» деп сананардаҥ айабас (Укаа 13:20; 1 Кор. 15:33).

5. Јууннаҥ туураладылган кижиге бис кандый кӧрӱмдӱ болор учурлу, нениҥ учун?

⁵ Јууннаҥ туураладылып калган кижиге бис кандый кӧрӱмдӱ болор учурлу? Эмди бис оныла куучындашпай да турган болзоос, ол «јылыйып калган кой» бир тушта тӱҥей ле кайра јанып келер деп сананадыс. Бис оноҥ чӧкӧбӧй јадыс. Нениҥ учун дезе ол Иеговага јӱрӱмин учурлап салган кижи. Эм тургуза ол учурланганы аайынча јӱрбей турган, оныҥ учун бойын јеткерлӱ айалгага тургузат (Иез. 18:31). Је андый да болзо, Иегова ого јалакайынаҥ улам солынатан ӧй берет. Оныҥ учун бис оны кайра келер деп иженип јадыс. Аксагалдар јууннаҥ туураладылып калган кижиге канайып болужар аргалу?

АКСАГАЛДАР ТУУРАЛАДЫЛЫП КАЛГАН КИЖИГЕ КАНАЙЫП БОЛУЖАР АРГАЛУ?

6. Јууннаҥ туураладылган кижиге аксагалдар канайып болужат?

⁶ Јууннаҥ туураладылган кижиге аксагалдар Иеговага кайра келерге болушпас учурлу ба? Јок, андый эмес. Олор кижини јууннаҥ туураладып јаткан тушта, ого јуунга кайра келерге нени эдер керек деп айдып берет. Анайда ок оныла бир канча айдаҥ јолыгыжып ийерге куучындажып алат. А нениҥ учун? Анайып олор кижи тӱзединип, кинчектеринеҥ айрылган ба деп кӧрӱп ийер. Бир канча айдаҥ ол кижи аксагалдарла куучындажарга јӧпсинип ийзе, олор ого јалакай баштанып, оны кинчегин алынзын деп, ойто катап кӱӱнзедер. Је бу ӧйгӧ јетире ол кижи солынбаган болзо, олор оныла база да јолыгыжарга албаданар.

7. Аксагалдар јууннаҥ туураладылган улусты Иегова чылап канайып килеер аргалу? (Иеремия 3:12).

⁷ Аксагалдар улусты килеп, олорго јалакай баштанарга, Иегованаҥ тем алып јадылар. Темдектезе, Иегова израильтяндарды кинчегин качан алынарын сакып отурбаган. Керек дезе  олордыҥ тӱзединип турганы кӧрӱнбей де турган болордо, баштапкы алтамды Иегова бойы эткен. Бис Иегованыҥ јалакайын бу чыгарманыҥ экинчи јӧрмӧлинеҥ кӧргӧнис. Анда Кудай Осияны кинчегинеҥ айрылгалак ӱйин ойто кайра алзын деп айткан (Ос. 3:1; Мал. 3:7). Оныҥ учун аксагалдар Иегова ла чылап јууннаҥ туураладылган улусты кайра јанып келзин деп, акту јӱрегинеҥ кӱӱнзеп јадылар. Олор андый улуска кайра келерге јеҥил болзын деп албадангылап јат. (Иеремия 3:12 кычырыгар.)

8. Иисустыҥ тенибер уул керегинде укаа сӧзинеҥ Иегованыҥ јалакайы ла килемкейи база канайып кӧрӱнет? (Лука 15:7).

⁸ Анайда ок бу чыгарманыҥ экинчи јӧрмӧлинде бис тенибер уул керегинде Иисустыҥ укаа сӧзин кӧргӧнис. Адазы оны ыраактаҥ кӧрӱп ийеле, ого «удура јӱгӱрип келеле», оны «кабыра кучактап, окшой берген» (Лука 15:20). Ајардаар ба, адазы уулыныҥ «мениҥ јаманымды ташта» деп сураарын сакыбай, карын оны уткыырга, ого удура јӱгӱрип јат. Нениҥ учун ол анайып эткен? Нениҥ учун дезе ол оны тыҥ сӱӱп турган. Јууннаҥ туураладылып калган улуска аксагалдар андый ла кӧрӱмдӱ болорго албаданат. Олор јылыйып калган койды айлына јанып келзин деп кӱӱнзейт (Лука 15:22—24, 32). Андый кижи јанып келзе, теҥериде Иегова, Иисус, ангелдер, ончозы сӱӱнип јат. А јерде дезе бӱдӱн јуун сӱӱнет. (Лука 15:7, ЈТ кычырыгар.)

9. Иегова кинчек эткен улуска нени айдат?

⁹ Бистиҥ кӧргӧнисле, Иегова кинчегин алынбай турган кижини јууннаҥ туураладып салат. Андый да болзо, ол андый кижиге тӱҥей ле болужып турган. Ол оны кайра јанып келзин деп кӱӱнзейт. Иеговада кинчегин алынып турган улуска кандый сезимдер болуп турганы Осия 14:4-тӧ айдылып калган: «Мен олорды балыр јӱрӱминеҥ эмдеп саларым. Олорды акту јӱрегимнеҥ сӱӱрим, нениҥ учун дезе мен олорго база ачынбай јадым». Бу сӧстӧр аксагалдарды кижиниҥ бир де кичинек тӱзединип турганын ајаруга алып турарга кӱӱнзедип јат. А кинчек эткен улусты Иегова тӱҥей ле сӱӱп турган, ол олорды капшай јанып келзин деп кӱӱнзедет.

10, 11. Јууннаҥ туураладылганы удап калган ака-эјелерге аксагалдар канайып болужар?

¹⁰ Кӧп јылдар кайра јууннаҥ туураладылып калган улус керегинде нени айдарга јараар? Андый улус јууннаҥ туураладарына экелген кинчегин база этпей де турган болордоҥ айабас. Керек дезе недеҥ улам тууралатканын ундып та койгон болор. Кижиниҥ јууннаҥ тууралатканынаҥ бери канча да кире ӧй ӧткӧн болзо, аксагалдар оны табып алала, оныла јолыгыжарга албаданар. Ол кижиле јолыккан ӧйдӧ, аксагалдар оныла кожо мӱргӱп ийер аргалу. Анайда ок оны јылу сӧстӧриле јуунга кайра јанзын деп кӱӱнзедер. Је кижиниҥ јууннаҥ туураладылганы кӧп јылдар болуп калган болзо, ого Иегова керегинде ле Агару Бичиктиҥ тӧс чындыктарын ойто катап ӱренер керек. Оныҥ учун аксагалдар, кижи орныктырылбаган да болзо, је јуунга јанарга кӱӱнзеп турган болзо, оныла Агару Бичик ӱрензин деп, кемди-кемди кӧстӧп салар.

¹¹ Аксагалдар Иегованыҥ јалакайынаҥ  тем алып, јууннаҥ туураладылып калган ака-эјелерди бастыразын табып аларга ла Иеговага кайра келзин деп болужарга албаданар. Кижи чыннаҥ ла јастыразын алынып турган, анайда ок кинчектӱ јолын артыргызып салган деп кӧрӱнип турза, оны удатпастаҥ ла орныктырып салар керек (2 Кор. 2:6—8).

12. а) Аксагалдар анчада ла кандый айалгаларда ајарыҥкай болор учурлу? б) Кезик уур кинчектерди Иегова качан да таштабас деп нениҥ учун сананбас керек? (Сносканы база кӧрӱгер.)

¹² Кезик учуралдарда кемди-кемди орныктырардаҥ озо, анчада ла ајарыҥкай болор керек. Темдектезе, балдарга јаман баштанган улусла, Кудайдаҥ јана баскандарла, эш-нӧкӧринеҥ  ӧнӧтийин айрылган улусла (Мал. 2:14; 2 Тим. 3:6). Аксагалдарга бу улус чыннаҥ ла кинчегин алынып турган ба деп бӱдӱмјиленер керек. Нениҥ учун дезе олор Кудайдыҥ ӱӱрин корулаар учурлу. Је бу ла ок ӧйдӧ кижи кандый да уур кинчек эткен болзо, је јастыразын алынып, јаман керектерин этпей турган болзо, Иегова оны бойыныҥ билезине кайра кожуп аларга турган деп оҥдоп турар керек. Оныҥ учун аксагалдарга коркышту јаман, јескинчилӱ кинчектер эткен улусла ајарыҥкай болор керек те болзо, је андый улус Иегованыҥ килемјизин качан да албас деп сананбас керек b (1 Пётр 2:10).

ЈУУН КАНАЙЫП БОЛУЖАР АРГАЛУ?

13. Аксагалдардаҥ кезедӱ алган кижиге ле јууннаҥ туураладылып калган кижиге бис канайып баштанарыс?

¹³ Ӧткӧн јӧрмӧлдӧ кӧргӧнисле, кезикте јуунда кандый бир ака эмезе эје кезедӱ (порицание) алган деп јар айдылат. Бис андый улусла куучындажар аргалу, нениҥ учун дезе ол јастыразын алынып, кинчек этпей токтоп калган (1 Тим. 5:20). Андый кижи јуунда ла артып јат. Бис оныла оноҥ ло ары куучындажып, најылажып јадыс (Евр. 10:24, 25). Је кезик учуралдарда аканы эмезе эјени јууннаҥ туураладып салат. Биске андый улуска «бирикпе[с]» керек, керек дезе «кожо ажанба[с]» та керек (1 Кор. 5:11).

14. Кажы ла христиан кижи јууннаҥ туураладылып калган кижиге Агару Бичикле ӱредилген уйадыла канайып баштанар аргалу? (Јурукты база кӧрӱгер.)

¹⁴ Андый болордо, бис јууннаҥ туураладылып калган кижини бир де уткыбас учурлу ба? Јок, андый эмес. Бис андый кижиле куучындашпай јадыс ла кандый бир керектер эштер кожо этпей јадыс эмей. Је Агару Бичикле ӱредилген уйадысла бис ол кижини јуунныҥ туштажуларына кычырар аргалу — темдектезе бистиҥ тӧрӧӧнисти эмезе јуук најыбыс болгон кижини. А андый кижи јуунныҥ туштажузына  келзе, канайдарыс? Алдында јылдарда бис олорды уткыбай турган болгоныс. А эмди кажы ла христиан Агару Бичикле ӱредилген уйадыла башкарынып, андый кижини уткып, јакшылажып ийер аргалу. Андый да болзо, бис оныла узак куучындашпай јадыс ла кандый бир керектер эштер этпей јадыс.

15. 2 Иоанн 9—11-де кандый улус керегинде айдылган?  («Иоанн ла Павел бир тӱҥей кинчек керегинде бичиген бе?» деген рамканы база кӧрӱгер.)

¹⁵ Је кем де мынай сураар болор: «Уур кинчек эткен кижини уткыган кижи Агару Бичикте айдылганыла, оныҥ јаман керектеринде туружат эмес пе?» (2 Иоанн 9—11, ЈТ кычырыгар.) Бу ӱлгердиҥ контекстин кӧрзӧ, мында Кудайдаҥ јана баскандар керегинде ле улусты јаман керектерге тектерип тургандар керегинде айдылат (Ачыл. 2:20). Олор јана баскандардыҥ кӧрӱмин куучындап турза, ол эмезе Агару Бичикке келишпей турган ӧскӧ дӧ немелер айдып турза, аксагалдар андый улусла тушташпас. Је олор тӱҥей ле бир тушта кинчегин алынар деп иженедис. Је алынганча, бис олорды уткыбай да јадыс, јуунныҥ туштажуларына кычырбай да јадыс.

ИЕГОВАНЫҤ ЈАЛАКАЙЫНАҤ ЛА КИЛЕМКЕЙИНЕҤ ТЕМ АЛАДЫС

16, 17. а) Иегова кинчек эткен улусты нени этсин деп кӱӱнзейт? (Иезекииль 18:32). б) Аксагалдар кинчек эткен кижиге болужарга, Иегованаҥ кандый тем алар?

¹⁶ Бу чыгармада ӱренген беш јӧрмӧлдӧҥ бис неге ӱренедис? Иегова кемге де ӧлӱм кӱӱнзебей јат! (Иезекииль 18:32 кычырыгар.) Карын кинчек эткен кижини ойто јанып келзин деп кӱӱнзеп јат (2 Кор. 5:20). Оныҥ да учун Иегова кедер албатызына эмезе кинчек эткен кижиниҥ бойына канча катап баштанып, кинчегин алынып, кайра јанзын деп айдат. Јуунныҥ аксагалдары Иегованаҥ тем алып, кинчек эткен кижиге јастыразын алынарга болужып јат (Рим. 2:4; 1 Кор. 3:9).

¹⁷ Кижи кинчегин алынып ийзе, теҥериде сӱреен јаан сӱӱнчи болот. Бистиҥ теҥеридеги Адабыс Иегова јанып келген кажы ла койго сӱреен тыҥ сӱӱнип турган. Мындый јалакай ла килеҥкей Ада Кудайысты канайып сӱӱбезис?! (Лука 1:78).