32 ӰРЕНЕТЕН ЈӦРМӦЛ
44 КОЖОҤ Кунуккан кижиниҥ мӱргӱӱли
Иегова ончо улусты кинчегин алынзын деп кӱӱнзейт
«Ол кемди де ӧлӱп калбазын, карын ончо улусты кинчегин алынзын деп кӱӱнзейт» (2 ПЁТР 3:9, ЈТ).
НЕНИ ШӰӰЖЕРИС
Бу јӧрмӧлдӧ кинчегин алынары ол не дегени ле нениҥ учун кинчекти алынар керек деп сурактар шӱӱжерис. Анайда ок кинчекти алынарга Иегова канайып болужып турганын кӧрӧрис.
1. Кижи кинчегин алынып турган деп недеҥ кӧрӱнет?
ЈАСТЫРЫП ийзеес, кинчегисти алынар керек. Агару Бичикле болзо, кинчегин алынып турган кижи кӧрӱмин солып, база анай этпеске албаданат. («Сӧзликте» «Раскаяние» деген статьяны кӧрӱгер.)
2. Кинчекти алынары ол не дегенин нениҥ учун ончобыска билер керек? (Неемия 8:9—11).
2 Кинчегин алынары ол не дегенин кажы ла кижи билер учурлу. Нениҥ учун? Нениҥ учун дезе бистиҥ кажыбыс ла кажы ла кӱн јастырат. Бис ончобыс Адам ла Еваныҥ бала-барказы, оныҥ учун кажыбыс ла ӧлӱмди ле кинчекти энчиленип алганыс (Рим. 3:23; 5:12). Керек дезе Кудайга тыҥ бӱдӱп турган апостол Павелдий де улус кинчекле тартышкан (Рим. 7:21—24). Андый болзо, эм бис кинчектеҥ качан да айрылып болбозыс па? Јок, андый эмес. Нениҥ учун дезе Иегова килеҥкей Кудай. Ол бисти сӱӱнчилӱ јӱрзин деп кӱӱнзеп јат. Неемияныҥ ӧйиндеги еврейлердиҥ темин кӧрӱп ийектер. (Неемия 8:9—11 кычырыгар.) Иегова олорды эткен јастыралары учун кунугып јӱрзин деп кӱӱнзебеген, карын, Кудайына сӱӱнчилӱ иштеп јӱрзин деп кӱӱнзеген. Иегова јастыраны алынары сӱӱнчи экелет деп билер. Оныҥ учун бистерди кинчекти алынары ол не дегенин билип турзын деп ӱредип јат. Бис јастырабысты алынзаас, теҥеридеги килеҥкей Адабыс бистиҥ кинчегисти таштаар деп бӱдӱп јадыс.
3. Бу јӧрмӧлдӧ не керегинде шӱӱжерис?
3 Бу јӧрмӧлдӧҥ кинчекти алынары керегинде кӧптӧдӧ билип аларыс. Озо баштап Иегова израильтяндарды кинчекти алынары јанынаҥ неге ӱреткенин шӱӱжерис. Оноҥ кинчек эткен улуска кинчегин алынарга Иегова канайып болужып турганын билип аларыс. Учында, Иисус бойыныҥ ӱренчиктерин кинчекти алынары керегинде неге ӱреткенин шӱӱжерис.
ИЕГОВА АЛБАТЫЗЫН КИНЧЕКТИ АЛЫНАРЫ ЈАНЫНАҤ НЕГЕ ӰРЕТКЕН?
4. Иегова Израиль албатыны кинчекти алынары јанынаҥ неге ӱреткен?
4 Иегова Израиль албатыны тӧзӧп турарда, олорло јӧптӧжӱ тургускан. Израильтяндар Иегованыҥ јасагын бӱдӱрген болзо, Кудай олорды корулап, алкаар эди. Иегова албатызына мынайда айткан: «Мен бӱгӱн слерге јакылта берип јадым, бу јакылта кӱч ле ыраак эмес» (ЈТ) (Јаҥ. т. 30:11, 16). Је олор Иегованыҥ јасагын бӱдӱрбей — темдектезе, ӧскӧ Кудайларга бажырган болзо, — Кудай олорды алкабай барар эди. Мынаҥ улам олор шыралар. Је андый да болзо, олордо Кудайыҥ јарадузын алатан арга болгон (Јаҥ. т. 30:1—3, 17—20). Анайып, израильтяндар Кудайына кайра келип, оныҥ сӧзин угуп јӱрер эди. Ӧскӧртӧ айтса, олордо кинчегин алынатан арга болгон. Ол тушта Иегова олорго јууктап, олорды алкаар эди.
5. Иегова бойыныҥ кедер албатызынаҥ чӧкӧбӧгӧнин канайып кӧргӱскен? (2 Каандар 17:13, 14).
5 Иегованыҥ талдап алган албатызы ого канча катап удурлашкан. Израильтяндар јӱк ле чалуларга бажырган эмес, је ӧскӧ дӧ коркышту јаман керектер эткен. Мынаҥ улам олор тыҥ шыралаган. Је Иегова бойыныҥ кедер албатызын таштабаган. Ол, албатызын кинчегин алынып, ого кайра келзин деп, канча катап бойыныҥ судурчыларын ийген. (2 Каандар 17:13, 14 кычырыгар.)
6. Кинчекти алынар керек деп, Иегова албатызын судурчылары ажыра канайып ӱреткен? (Јурукты база кӧрӱгер.)
6 Иегова бойыныҥ кедер албатызын тӱзедерге судурчыларын ийип туратан. Темдектезе, Иеремия бичиген: «„Кайра кел, садынчак Израиль“, — деп, Иегова айдат. „Мен слерди јаман кӧрбӧзим, нениҥ учун дезе мен чындык“, — деп, Иегова айдат. „Мен ӱргӱлјиге чугулданбазым. Јӱк ле бойыҥныҥ бурууҥды алын, не дезе, сен Иегова Кудайыҥа удура баргаҥ“» (Иер. 3:12, 13). Иегова Иоиль ажыра айткан: «Меге акту јӱрегердеҥ кайра келигер» (Иоиль 2:12, 13). Исайя ажыра айдат: «Арутаныгар, кӧзим алдынаҥ јаман керектереерди јоголтыгар, јаманды база этпегер» (Иса. 1:16—19). Иезекиильге мындый сӧстӧр бичизин деген: «„Кинчектӱ кижиниҥ ӧлӱмине мен сӱӱнерим бе?“ — деп, Эҥ Бийик Иегова Кайракан айдат. — „Јок, мен оны јаман јолын артыргызып, јӱрӱм јӱрзин деп кӱӱнзеп јадым!“ „Мен кемниҥ де ӧлӱмине сӱӱнбей јадым, — Оныҥ учун кинчек база этпей, јӱрӱм јӱрӱгер“» (Иез. 18:23, 32). Кижи кинчегин алынза, Иегова сӱреен тыҥ сӱӱнип јат! Не дезе ол кажы ла кижини јажын-чакка ӱргӱлјиге јӱрзин деп кӱӱнзейт. Је Кудай кижини кинчегин качан алынып, кыймыктанарын сакып отурбай јат.
Иегова кедер албатызын кинчегин алынзын деп, судурчыларын ийип туратан. (6, 7 абзацтарды кӧрӱгер.)
7. Иегова бойыныҥ албатызын судурчы Осияныҥ ла оныҥ ӱйиниҥ, Гомерьдиҥ, темиле неге ӱреткен?
7 Иегова бойыныҥ албатызын судурчы Осия ла оныҥ ӱйиниҥ, Гомерьдиҥ, темиле неге ӱредерге сананганына ајару эдигер. Гомерь бойыныҥ ӧбӧӧнин таштап, ӧскӧ эр улусла конып база берген. Мындый ӱй кижини канайдар? Кижиниҥ јӱрегин кӧрӱп турган Иегова Осияга мынайда айткан: «Ӧскӧ эр кижиле конып турган ӱйиҥди, оны ӧскӧ кижи сӱӱп турган да болзо, ойто сӱӱ. Анайып ла Иегова бойыныҥ албатызын, олор ӧскӧ кудайларга бажырып турган... да болзо, сӱӱп јат» (Ос. 3:1; Укаа 16:2). Ајардаар ба, бу ӱй кижи кинчегин таштагалак болгон. Андый да болзо, Иегова Осияны ӱйиниҥ кинчегин таштап, айылына ойто кийдирип алзын деген a. Анайып ла Иегова бойыныҥ кедер албатызын јектебеген. Иегова албатызын, коркышту јаман кинчектерге кӧмӱлип те калган болзо, сӱӱген. Кудай олорды кинчегин алынып, солынзын деп болужарга, бойыныҥ судурчыларын ийип туратан. Айдарда, јӱректерди кӧрӱп турган Иегова Кудай уур кинчек эдип турган улуска кинчегин алынарга болужар ба? (Укаа 17:3). Бу сурактыҥ каруузын кӧрӱп ийектер.
ИЕГОВА УЛУСКА КИНЧЕГИН АЛЫНАРГА КАНАЙЫП БОЛУЖАТ?
8. Иегова Каинге јастыразын алынарга канайып болушкан? (Башталганы 4:3—7). (Јурукты база кӧрӱгер.)
8 Каин Адам ла Еваныҥ баштапкы уулы болгон. Оныҥ јастыра неме эдер кӱӱни ада-энезинеҥ келген. Је ол мындый кӱӱнди токтотпогон. Мыны бис Агару Бичиктеҥ кӧрӱп јадыс: «Оныҥ керектери јаман... болгон» (1 Иоанн 3:12). Шак ла мынаҥ улам Иегова Каинниҥ сыйын јаратпаган болор. Је Каин солынардыҥ ордына «чугулданып, чырайы бӱркӱле берген». Иегова нени эткен? Ол Каинле куучындашкан. (Башталганы 4:3—7 кычырыгар.) Ајардаар ба, Иегова оныла јалакай куучындажып, ол јакшыны этсе, алкыш алар деп айткан. Је ол Иегованыҥ сӧзин укпаган. Каин Иеговага јастыразын алынарга болужатан арга бербеген. Эмди Иегова јастыразын алынарга база кемге де болушпас па? Јок, болужар!
Иегова Каинле јалакай этире куучындажып, ол кинчек этпезе, оны алкап саларым деп айткан. Анайда ок Кудай Каинге кинчек неге экелерин айдып салган. (8 абзацты кӧрӱгер.)
9. Иегова Давидке кинчегин алынарга канайып болушкан?
9 Иегова Давид каанды сӱреен тыҥ сӱӱген. Керек дезе оны «јӱрегиме кирген кижи» деп адаган (Ап. ижи 13:22, сноска). Је Давид коркышту јаман кинчектер эткен: ол ӧскӧ кижиниҥ ӱйиле конгон, анайда ок кижи ӧлтӱрген. Оны Моисейдиҥ јасагыла болзо, ӧлтӱрип салар керек болгон (Лев. 20:10; Тоол. 35:31). Је Иегова Давидти килеп, оныҥ айалгазына кирижип јат b. Иегова, Давид кинчегин алынгалакта, судурчы Нафанды ийет. Нафан оныҥ јӱрегин томултарга, укаа сӧс куучындарда, Давид Иеговага кандый ачу јетиргенин оҥдоп ийеле, јастыразын алынган (2 Сам. 12:1—14). Оныҥ сезимдери јайналганду сарында бичилип калган (51-чи Сарынныҥ ӱстиндеги сӧстӧри). Бу сарын кинчек эткен кӧп улуска токунал берген ле кинчегин алынарга болушкан. Иегова бойыныҥ сӱӱген ишчизин, Давидти, килеп, кинчегин алынарга болушканы кандый јакшы дезеер?!
10. Иегованыҥ чыдамкайын ла јаманысты таштап турганын сананзаар, нени сезедеер?
10 Иегова кандый ла кинчекти кӧрӧр кӱӱни јок (Сар. 5:4, 5). Је ол бисти кинчектӱ улус деп билер. Оныҥ учун кинчекле тартыжарга болужат. Керек дезе кинчек эдерге темигип те калган улуска оныҥ најызы болорго болужат. Мыны билерге кандый јакшы дезеер! Бис Иегованыҥ чыдамкайы керегинде ле улустыҥ јастыразын канайып таштап турганы керегинде шӱӱп сананзаас, ого чындык артарга оноҥ тыҥ кӱӱнзейдис. Анайып ла ок кинчек эдип турзаас, јастырагысты капшай ла алынарга албаданадыс. А эмди дезе, Иисус кинчекти алынары јанынаҥ ӱренчиктерин неге ӱреткенин кӧрӱп ийектер.
ИИСУС ӰРЕНЧИКТЕРИН КИНЧЕКТИ АЛЫНАРЫ ЈАНЫНАҤ НЕГЕ ӰРЕТКЕН?
11, 12. Иегова Адабыска улустыҥ јаманын таштаарга јарап турган деп кӧргӱзерге, Иисус кандый укаа сӧс куучындаган? (Кадарындагы јурукты кӧрӱгер.)
11 Бистиҥ эраныҥ баштапкы чагында Мессияныҥ келетен ӧйи јууктап келеткен болгон. Ӧткӧн јӧрмӧллӧ болзо, Иегова Крестеечи Иоаннды ла Иисусты улусты кинчегин алынарга ӱретсин деп ийген (Матф. 3:1, 2; 4:17).
12 Иисус јерде јӱрерде, Адазына улустыҥ јастыразын таштаарга јарап турган деп куучындаган. Оныҥ сӱӱжи, анчадала, тенибер уул керегинде укаа сӧстӧҥ јарт кӧрӱнип јат. Ол јиит уул кирлӱ, јаман јӱрӱм јӱрген, је јастыразын алынып, кайра јанып барган. Адазы оны канай уткыган? Иисус айткан: «Оны адазы ыраагынаҥ кӧрӱп ийеле, ичи ачыган, удура јӱгӱрип келеле, кабыра кучактап, окшой берген». Уулы дезе адазы оныҥ јаманын таштаар деп иженбеген. Оныҥ учун оныҥ айылында кул болуп иштенерге суранган, је адазы оны «уулым... јылыйган бойы табылды» деп айдып, айылына кийдирип алган (Лука 15:11—32). Иисус јерге келердеҥ озо Иегова кинчегин алынган улусты килеп турганын кӧп катап кӧргӧн! Айдарда, бу укаа сӧс бисти токунадып јат ла Иегова Адабыс коркышту јалакай Кудай деп кӧргӱзет.
Иисустыҥ укаа сӧзинде айдылган адазы «јылыйган», је «табылган» уулын кучактаарга јӱгӱрет. (11, 12 абзацтарды кӧрӱгер.)
13, 14. Апостол Пётр кинчекти алынары керегинде нени билип алган ла улусты неге ӱреткен? (Јурукты база кӧрӱгер.)
13 Иисус апостол Пётрга кинчекти алынары ла јаманды таштаары керегинде оҥдоп аларга болушкан. Пётр кӧп јастырып туратан, је Иисус оныҥ јастыраларын акту кӱӱнинеҥ таштап салатан. Темдектезе, Пётр бойыныҥ Кайраканынаҥ ӱч катап јана тӱшкен. Оноҥ улам ого бойына коркышту ачу болгон (Матф. 26:34, 35, 69—75). Је Иисус тирилген кийнинде, Пётр јаҥыскан болордо, ого кӧрӱнген болгон (Лука 24:33, 34; 1 Кор. 15:3—5). Ол тушта Иисус кинчегин алынган апостолыныҥ јаманын акту кӱӱнинеҥ таштап, сӱӱжин кӧргӱскен. (Марк 16:7 ле «Агару Бичиктиҥ ӱренетен чыгармазында» «Пётрга» деген јартамалды кӧрӱгер.)
14 Кинчегин алынары ла улустыҥ јаманын таштаары ол не дегенин Пётр оҥдоп алала, бого ӧскӧ улусты ӱредер аргалу болгон. Беженинчи кӱнниҥ кийнинде, Пётр еврей албатыныҥ алдына куучын-эрмек айдып, олор Мессияны ӧлтӱрип салган деп јартап берген. Андый да болзо, ол јымжак этире мынайда айткан: «Иегова кинчектереерди таштап, слерге амыр берзин деп, кинчектереерди алынып, тӱзединигер» (Ап. ижи 3:14, 15, 17, 19, сноска, ЈТ). Бу сӧстӧрлӧ Пётр, кижи кинчегин алынып турза, солынарга кӱӱнзейт, ӧскӧртӧ айтса бойыныҥ јастыра санааларын ла керектерин артыргызып, Кудайды сӱӱндиретен керектер эдип баштайт деп кӧргӱскен. Анайда ок апостол Пётр, Иегова олордыҥ кинчектеринеҥ изи де артпас эдип, јоголтып салар деп айткан. А канча јылдар ӧткӧн кийнинеҥ, Пётр христиандарга мындый сӧстӧр айткан: «Ол [Иегова] биске узак чыдажат, нениҥ учун дезе кем де ӧлӱп калбазын, карын, ончо улус кинчегин алынып, Кудайга баштанзын деп кӱӱнзейт» (2 Пётр 3:9). Бу сӧстӧр кинчек эткен христиандарга, керек дезе, уур да кинчек эткендерге токунал берет!
Иисус кинчегин алынып турган апостолыныҥ јаманын таштап, сӱӱжин кӧргӱскен. (13, 14 абзацтарды кӧрӱгер.)
15, 16. а) Апостол Павел кинчекти таштаары керегинде нени билип алган? (1 Тимофейге 1:12—15). б) Бис келер јӧрмӧлдӧ нени шӱӱжерис?
15 Тарс деп калада јаткан Савл кӧп јаман керектер эткен. Ол Иисус Христостыҥ ӱренчиктерин коркышту тыҥ истешкен. Мынаҥ улам кӧп саба христиандар оны качан да солынбас ла кинчегин качан да алынбас деп бодогон. Је тирилип калган Иисустыҥ кӧрӱми улустыҥ санаазынаҥ чек башка болгон. Ол до, оныҥ Адазы да Савлдыҥ јакшы кылык-јаҥдарын кӧргӧн. Иисус Павел керегинде: «Мениҥ талдап алганым ол» — деп айткан (Ап. ижи 9:15). Иисус, керек дезе, Савлды тӱзединзин деп болужарга, кайкал эткен (Ап. ижи 7:58—8:3; 9:1—9, 17—20). Кийнинде, Савл апостол Павел деп адыла јарлу болгон. Христиан болуп калала, Иегованыҥ ла Иисустыҥ јалакайы ла килеҥкейи керегинде ол коркышту кӧп куучындаар болгон. (1 Тимофейге 1:12—15 кычырыгар.) Оныҥ учун акту јӱрегинеҥ быйанду болгон апостол Павел ака-эјелерди мынайып ӱреткен: «Ол [Кудай] јалакайынаҥ улам кинчегиҥди алынзын деп болужарга кӱӱнзейт» (Рим. 2:4, ЈТ).
16 Бир катап Павел, Коринфтеги јуун бир христианныҥ балыр јӱрӱм јӱрӱп турганын кӧрӱп те турган болзо, нени де айдышпай турганын угуп ийген. Ол нени этти? Ол Коринфтеги јуунга самара бичиген. Бу самаранаҥ Иегова керегинде кӧп неме билип аладыс. Иегова кижини кату-каруузына тургусса, оны сӱӱжинеҥ улам эдет ле кижи кинчегин алынып турза, оны килеп јат. Биске Адабыс ла чылап база килеҥкей болор керек. Келер јӧрмӧлдӧ Коринфтеги јуунда не болгонын тереҥжиде кӧрӱп ийерис.
33 КОЖОҤ Уур јӱгиҥди Иеговага берип сал
a Бу учурал бир ле катап болгон. Бӱгӱнги кӱнде христиан кижи ӧскӧ кижиле конгон эш-нӧкӧринеҥ айрылбас учурлу деп, Иегова некебей јат. Эмди Иисус ажыра ӧскӧ башкартулар берилген: эш-нӧкӧрлӧрдиҥ буру јогы ӧбӧӧнинеҥ эмезе ӱйинеҥ айрылып калар аргалу (Матф. 5:32; 19:9).
