1, 2. а) Кинчек ол не, бис оны канайып јеҥип чыгарыс? («Јартамалды» база кӧрӱгер.) б) Бу јӧрмӧлдӧ лӧ келер тӧрт јӧрмӧлдӧ нени шӱӱжерис? (Бу чыгармадагы «Кару кычыраачы» деген статьяны база кӧрӱгер.)

 ИЕГОВА сени канча кире тыҥ сӱӱп турган? Каруузын билип аларга, Кудай сени кинчектеҥ ле ӧлӱмнеҥ айрып аларга нени эткенин шиҥдеп ийерге јараар. Кинчек a — коркышту јаман ӧштӱ. Бис бу ӧштӱни бойыстыҥ кӱчисле јеҥип болбозыс. Бистиҥ кажыбыс ла кинчектӱ. Оныҥ учун кажы ла кӱн јастырып јадыс, учы-тӱбинде божоп каладыс (Рим. 5:12). Је бис туйук айалгада эмезис. Бу ӧштӱни јеҥип аларга, биске Иегова болужар. Ол кинчекти ле ӧлӱмди јоголтып салар!

² Кижиликтиҥ тӱӱкизиниҥ ӧйи 6 000 јыл кире болуп калган. Бу бастыра ӧйдиҥ туркунына Иегова улусты оныҥ најызы болзын деп болужат. Нениҥ учун? Нениҥ учун дезе Иегова улусты сӱӱп јат. Ол улусты јайаганынаҥ бери сӱӱп баштаган. Олорго кинчекле тартыжарга јеҥил болзын деп, кӧп немени эдип салган. Кинчек ӧлӱмге экелет. Је Кудай бисти, ол тоодо сени де, јажын-чакка јӱрзин деп кӱӱнзейт (Рим. 6:23). Бу јӧрмӧлдӧ ӱч сурак кӧрӧрис: 1) Иегова кинчектӱ улуска кандый ижемји берген? 2) Библиялык ӧйлӧрдӧ улус Иегованы сӱӱндирерге ле ого јууктаарга нени эткен? 3) Иисус  бисти ӧлӱмнеҥ ле кинчектеҥ аргадаарга нени эткен?

ИЕГОВА КИНЧЕКТӰ УЛУСКА КАНДЫЙ ИЖЕМЈИ БЕРГЕН?

3. Адам ла Ева канайып кинчектӱ болуп калган? (Јурукты база кӧрӱгер.)

³ Иегова баштапкы эр ле ӱй кижини ырысту болзын деп јайаган. Кудай олорго кӧп сыйлар берген: јадатан сӱреен јараш јер, билелик јӱрӱмге сӱӱнетен арга, кайкамчылу јакылта. Олор јерди бала-баркала толтырып, Эдем сад чылап рай эдип салар учурлу болгон. Анайда ок Кудай олорго бӱдӱрерге кӱч эмес јасак берген. Адам ла Ева бу јасакты бӱдӱрбезе, божоп калар деп, озодоҥ айдып салган. Мынаҥ оныҥ сӱӱжи кӧрӱнет. Је олорды да, Кудайды да сӱӱбеген калју ангел Адам ла Еваны Кудайдыҥ јасагын бузып ийзин деп кӱӱнзеткен. Баштапкы улус Сатананыҥ сӧзине кире берген. Мынаҥ улам не болгонын бис јакшы билерис. Адам ла Ева божоордыҥ божогончо шыралап, оору-јоболго бастыртып, карыйла, учы-тӱбинде божоп калган. Агару Бичикте айдылганыла, олор ойто тоозын болуп калган. Анайып, Иегованыҥ сӧзи бӱткен (Баш. 1:28, 29; 2:8, 9, 16—18; 3:1—6, 17—19, 24; 5:5).

4. Нениҥ учун Иегова кинчекти кӧрӧр кӱӱни јок? (Римдегилерге 8:20, 21).

⁴ Бу учурал Агару Бичикте тегиндӱ бичилбеген. Оныҥ болужыла Иегова бисти јаан учурлу шӱӱлте оҥдоп алзын деп јат — кинчек бисти Адабыстаҥ ыраадып, ӧлӱмге экелет. Оныҥ учун Иегова кинчекти кӧрӧр кӱӱни јок (Иса. 59:2). Је Сатана кинчекти сӱӱп турган, а улусты ла Кудайды кӧрӧр кӱӱни јок. Оныҥ учун ол Адам ла Еваны кинчекке ийде салган. Оноҥ олордыҥ бала-барказын да бӱгӱнги ӧйгӧ јетире ченеп, база кинчекке ийде салат. Баштапкы улусты кинчекке кийдиреле, Сатана јеҥип алдым деп сананган болор. Је Иегованыҥ сӱӱжи сӱреен јаан деп, оныҥ санаазында да јок болгон. Кудай амадузын солыбаган. Иегова улусты тыҥ сӱӱп турган, оныҥ учун Адам ла Еваныҥ кинчек эткениниҥ ле кийнинеҥ биске ижемји берген. (Римдегилерге 8:20, 21 кычырыгар.) Улустаҥ тӱҥей ле кем-кем оны сӱӱй берер, ого сӧсуккур болорго кӱӱнзеер деп, Иегова билген. Оныҥ учун ол Јайаачы ла Ада болуп, кару балдарына ого јууктайтан ла кинчектеҥ ле ӧлӱмнеҥ айрылатан арга ачкан. Андый арга берерге ол нени эткен?

5. Кинчектӱ улуста ижемји бар деп качан кӧрӱнип келген? Јартап беригер (Башталганы 3:15).

⁵ Башталганы 3:15 кычырыгар. Иегова Сатананы јоголтор деп айтканыла ижемји берген. Судурла болзо, Сатананы ла оныҥ каршузын јоголтор «калдык» чыгар керек болгон (1 Иоанн 3:8). Је озо Сатана калдыкты «чагып» ийзе, ол ӧлӱп калар. Иегова бу ого јаан ачу экелер деп билген де болзо, улусты кинчектеҥ ле ӧлӱмнеҥ айрыырга белен болгон.

БИБЛИЯЛЫК ӦЙЛӦРДӦ УЛУС ИЕГОВАНЫ КАНАЙЫП СӰӰНДИРГЕН?

6. Авель, Ной, анайда ок ӧскӧ дӧ чындык ишчилер Иеговага јууктаарга нени эткен?

⁶ Кийнинде Иегова кинчектӱ улус ого канайып јууктаар аргалу деп, канча чактардыҥ туркунына араайынаҥ кӧргӱзип баштаган. Эдемдеги тӱймеенниҥ кийнинеҥ Иеговага бӱдӱмјизин кӧргӱскен баштапкы кижи, Адам ла Еваныҥ экинчи уулы, Авель, болгон. Авель Иегованы тыҥ сӱӱген, оныҥ учун оны  сӱӱндирерге кӱӱнзеген. Ол койлорыныҥ тоозынаҥ тоолу кураанды Иеговага тайылга эдип экелген. Бу Иеговага јараган ба? Эйе. Ол «Авельди јакшы кӧрӱп, оныҥ тайылгазын алган» (Баш. 4:4, ЈТ). Кийнинде, Иегова оны сӱӱп, ого бӱдӱп турган улустыҥ тайылгаларын база алып туратан. Бу улустыҥ тоозында, темдектезе, Ной болгон (Баш. 8:20, 21). Андый тайылгаларды алганыла, Иегова кинчектӱ улусты ого јууктаар аргалу, оны сӱӱндирер аргалу деп кӧргӱскен b.

7. Авраамла болгон учурал бисти неге ӱредет?

⁷ Бир канча ӧйдӧҥ Иегова бек бӱдӱмјилӱ Авраам деп кижини бойыныҥ уулын, Исаакты, тайылгага экелзин деп сураган. Бу јакылтаны бӱдӱрерге Авраамга не аайлу кӱч болгон. Андый да болзо, ол оны бӱдӱрерге белен болды. Је Иегова Авраамды, Исаакты тайылгага берерге ле јадарда, токтодып ийген. Бу учурал Кудай келер ӧйдӧ база андый неме эдер деп — бойыныҥ сӱӱген Уулын тайылгага берер деп — кӧргӱскен. Иегова улусты кандый тыҥ сӱӱп турган! (Баш. 22:1—18).

8. Моисейдиҥ јасагыла некелген тайылгалар нени кӧргӱскен? (Левит 4:27—29; 17:11).

⁸ Канча чактардыҥ кийнинеҥ Иегова Израиль албатыга јасак берген. Бу јасакла болзо, албатыга кинчектери ташталзын деп, тайылгалар эдер керек болгон. (Левит 4:27—29; 17:11 кычырыгар.) Бу дезе келер ӧйдӧ улусты кинчектеҥ бӱдӱнге јайымдайтан тайылга эдилер деп кӧргӱскен. Судурчылар Кудайдыҥ тынына башкартып, судурлалган калдык — Кудайдыҥ аҥылу Уулы — шыралап ӧлӧр учурлу деп јартаган. Бу калдык тайылгага экелип јаткан кураан чылап ӧлтӱртер учурлу болгон (Иса. 53:1—12). Сананып ийзеер де, Иегова улусты, ол тоодо сени де, кинчектеҥ ле ӧлӱмнеҥ јайымдап аларга, бойыныҥ сӱӱген Уулын берерге белен болгон!

ИИСУС УЛУСТЫ ЈАЙЫМДААРГА НЕНИ ЭТКЕН?

9. Крестеечи Иоанн Иисус керегинде нени айткан? (Еврейлерге 9:22; 10:1—4, 12).

⁹ Бистиҥ эраныҥ баштапкы чагында Кудайдыҥ ишчизи, Крестеечи Иоанн, Иисусты кӧрӧлӧ, мынайып айткан: «Бу телекейдиҥ улузыныҥ кинчегин кедери алып јаткан Кудайдыҥ Курааны бу» (Иоанн 1:29). Бу сӧстӧрдӧҥ Иисус судурлалган калдык деп кӧрӱнген. Ол бойыныҥ јӱрӱмин тайылга эдип берер учурлу болгон. Эмди кинчектӱ улус кинчегинеҥ айрылар деп, оноҥ јарт кӧрӱне берген. (Еврейлерге 9:22; 10:1—4, 12 кычырыгар.)

10. Иисус кинчектӱлерди «кычырарга келген[ин]» канайып кӧргӱскен?

¹⁰ Иисус анчада ла бойыныҥ кинчектеринеҥ улам шыралап турган улуска ајару эдип туратан. Ол андый улусты оныҥ ӱренчиктери болзын деп кӱӱнзеткен. Улустыҥ кӱчтери кинчектеҥ улам болуп турганын ол билген. Оныҥ да учун ол кинчектеринеҥ улам кӱчтерге бастыртып койгон улуска болужып туратан. Бир катап ол: «Эмчини кадык улус эмес, оору улус керексиир... Мен актуларды эмес, кинчектӱлерди кычырарга келген инем» — деп айткан (Матф. 9:12, 13). Иисус бу сӧстӧр аайынча јӱрген. Темдектезе, бир катап ӱй кижи оныҥ буттарын кӧстиҥ јажыла  јунарда, ол ого јымжак баштанып, оныҥ кинчектерин таштап салган (Лука 7:37—50). База бир учуралда Иисус самаритян ӱй кижиге, оныҥ балыр јӱрӱми керегинде билген де болзо, јаан учурлу чындыктарды ачкан (Иоанн 4:7, 17—19, 25, 26). Анайда ок Иисус эр де, ӱй де улусты, балдарды да, јаан да улусты тиргизетен. Айдарда, Кудай Иисуска кинчекти ле ӧлӱмди јеҥетен ийде-кӱч берген (Матф. 11:5).

11. Нениҥ учун кинчектӱ улуска Иисустыҥ јанында јайым ла јеҥил болгон?

¹¹ Иисус кинчектӱ улусты оҥдоп, килеп туратан. Оныҥ да учун олорго Иисустыҥ јанында болорго јеҥил, јайым болгон (Лука 15:1, 2). Олор ого јууктаарга коркыбайтан. Анайда ок Иисус олорды ого бӱткени учун мактап, олорго јалакай баштанатан (Лука 19:1—10). Иисустыҥ сӧстӧринеҥ ле керектеринеҥ оныҥ килеҥкей ле буурзак Адазыныҥ улусты сӱӱп турганы ла олорго кинчектеҥ јайымдаларга болужарга турганы кӧрӱнген (Иоанн 14:9). Иисус кинчектӱ улуска јӱрӱмин солып, оныҥ кийнинеҥ ээчий барарга болушкан (Лука 5:27, 28).

12. Иисус бойыныҥ ӧлӱми керегинде айдып тура, ӱренчиктерин неге ӱредерге сананган?

¹² Иисус оны не сакып турганын билген. Ол ӱренчиктерине оны јуук кижизи садып ийер ле оны столмого кадап ӧлтӱрер деп, канча катап айткан (Матф. 17:22; 20:18, 19). Судурчылардыҥ айтканыла, Крестеечи Иоанныҥ  јарлаганыла, Иисус оныҥ берген тайылгазы ажыра бастыра улус кинчегинеҥ айрылар деп билген. Анайда ок Иисус јӱрӱмин тайылга эдип берген кийнинде бойына «башка-башка улусты» јуур деп ӱреткен (Иоанн 12:32, ЈТ). Айдарда, кинчектӱ улус Иисуска бӱдӱп, оныҥ темиле јӱрӱп турза, Иегованы сӱӱндирер аргалу болор. Ол тушта олор «кинчектеҥ јайымдал[ар]» (Рим. 6:14, 18, 22; Иоанн 8:32). Оныҥ учун Иисус андый кыйналганду ӧлӱмге белен болгон (Иоанн 10:17, 18).

13. Иисус канайып божогон? Мынаҥ Иегова керегинде нени билип аладыс? (Јурукты база кӧрӱгер.)

¹³ Иисусты јуук најызы садып ийген. Оноҥ оны арестке алып, актуга ла јамандап бурулагандар. Кийнинде ӧлӱмге јаргылап, кыйнагандар. Јуучылдар оны ӧлтӱретен јерге апарала, колы-будын столмого кадап салган. Бу ончо кыйын-шыраны Иисус чыдажып ӧткӧн. Је Иеговага дезе оноҥ ачу болгон. Ол ончо немени токтодып ийер аргалу да болгон болзо, токтотпогон. Нениҥ учун? Бир сӧслӧ айтса, сӱӱжинеҥ улам. Иисус айткан: «Кудай телекейди тыҥ сӱӱгенинеҥ улам, бойы јайаган Уулын берген, ого бӱткен кажы ла кижи ӧлбӧй, ӱргӱлји јӱрӱмдӱ болзын деп» (Иоанн 3:16, ЈТ).

14. Иисустыҥ тайылгазы слерди неге ӱредет?

¹⁴ Иисустыҥ тайылгазы Иегова Адам ла Еваныҥ кинчектӱ бала-барказын тыҥ сӱӱп турганын кӧргӱзет. Айдарда, Иегова сени де тыҥ сӱӱп турган. Ол сени кинчектеҥ ле ӧлӱмнеҥ јайымдаарга, бойыныҥ сӱӱген Уулын сен учун берген. Бу ого коркышту јаан ачу јетирер деп билген де болзо, ол сени аргадап аларга кӱӱнзеген (1 Иоанн 4:9, 10). Мынаҥ Иегова бистерге кажыбыска ла кинчекле тартыжып, јеҥӱ аларга болужар деп кӧрӱнет.

15. Иисустыҥ толынты тайылгазы кинчегисти бӧктӧзин деп, биске нени эдер керек?

¹⁵ Кудайдыҥ сыйы ажыра — Иисустыҥ толынты тайылгазы ажыра — бистиҥ кинчектерис ташталар аргалу. Је Кудай бистиҥ кинчектеристи таштазын деп, биске нени эдер керек? Каруузын Крестеечи Иоанн ла Иисус Христос мынайып бергендер: «Кинчегерди алыны[гар]... Теҥери Каандыгы јууктап келди!» (Матф. 3:1, 2; 4:17). Айдарда, кинчегисле тартыжарга турган болзоос, кару Адабыска јуук болорго турган болзоос, биске кинчегисти алынар керек. Је кинчекти алынары нени темдектейт? Бу, кинчектӱ де болзоос, Иегованы сӱӱндирерге канайып болужат? Бу сурактардыҥ каруузын келер јӧрмӧлдӧ кӧрӱп ийерис.