Апостол Павел Фессалоникадагы христиандарга: «Кем кижи бу самарадагы сӧзибисти укпаза, ол кижини ајаруга алыгар» — деп бичиген (2 Фес. 3:14). Алдында бис бу ӱлгерде бичилген башкарту аксагалдарга берилген деп сананганыс. Кандый бир кижиге канча катап јӧптӧр берилген, је ол тӱҥей ле библиялык принциптерди керекке албай турган болзо, аксагалдар јуунда куучын-эрмек айдар аргалу болгон. Мыныҥ кийнинде кезик јарчылар андый кижиле јуук куучындашпай баратан.

Је эмди бис 2 Фессалоникадагыларга 3:14-тӧги сӧстӧрди башка эдип оҥдойдыс. Павелдиҥ јӧби јуундагы кажы ла кижи кандый бир айалгада јӧпти бойы чыгарар керек деп кӧргӱзет. Оныҥ учун аксагалдарга јуунда куучын-эрмек айдары керек јок болот. Нениҥ учун мындый солынта эдилген? Павелдиҥ јӧбиниҥ контекстин кӧрӱп ийектер.

Павел јуунда кезик улус Кудайдыҥ нормаларына келишпес этире јӱрӱп турганын кӧрӱп ийген. Олор агару тынныҥ болужыла берилген башкартуларды укпай турган болгон. Оноҥ озо ӧйлӧрдӧ Павел олорго: «Иштеер кӱӱни јок кижи ажанбазын да» — деп јакарган (ЈТ). Је кезик улус аргазы бар да болзо, бойын јеткилдеерге тӱҥей ле иштебеген. Анайда ок олор ӧскӧ улустыҥ керектерине киришкен. Христиандарга бу улуска кандый кӧрӱмдӱ болор керек болгон? (2 Фес. 3:6, 10—12).

«Ол кижини ајаруга алыгар» — деп, Павел айткан. «Ајаруга алыгар» деп кӧчӱрилген грек сӧс, андый кижиле ајарыҥкай болор керек дегенин темдектейт. Павел бу башкартуны јӱк ле аксагалдарга эмес, је јуундагы ончо улуска берген (2 Фес. 1:1; 3:6). Оныҥ учун ака-эјелер јуунда кандый бир кижи Кудайдыҥ нормаларына келишпес этире јӱрӱп турганын кӧрӱп турган болзо, оныла куучындашпас деп бойлоры јӧп чыгарар аргалу.

Бу башкарту андый кижиге јууннаҥ туураладылган кижиге чилеп баштанар керек деп кӧргӱзет пе? Јок. Павел: «[Оны] карындажыгар ла чылап санандырыгар» — деп айткан. Оныҥ учун ака-эјелер ол кижиле јуунныҥ туштажуларында куучындажар, јарлаар ишке јӱрер, је оныла амырап, ӧй ӧткӱрбес. Нениҥ учун? Павелдиҥ айтканыла болзо, «оны уйалтарга». Качан андый кижиле јуук куучындашпай барза, ол уйалала, керектерин солыырдаҥ айабас (2 Фес. 3:14, 15).

Бӱгӱнги кӱнде христиандар бу башкартуны канайып тузаланар аргалу? Озо баштап биске кижи чын ла Кудайдыҥ нормаларына келишпес эдип јӱрӱп турган ба деп билип алар керек. Павел мында уйат јанынаҥ сурактарда бистиҥ кӧрӱмистеҥ башка кӧрӱмдӱ улус керегинде айтпаган. Анайда ок бисти ачындырган улус та керегинде айтпаган. Павел мында Агару Бичиктиҥ јӧптӧрин алынбай турган улус керегинде айткан.

Айдарда, кандый бир христиан кижи библиялык јӧптӧрлӧ јӱрбей турганын a кӧрӱп турзаас, андый кижиле база амырабазыс деп јӧп чыгарар аргалу. Ол бистиҥ чыгарган јӧбис болордо, бис оны билегистеҥ ӧскӧ улусла шӱӱшпезис. Је бис ол кижиле јуунныҥ туштажуларында куучындажарыс, анайда ок оныла јарлаар ишке кожо јӱрерис. А качан ол тӱзедилип калза, бис оныла ойто јуук куучындажып баштаарыс.