Апостол Павел ол ло чылап аксагал болуп турган Тимофейге мындый сӧстӧр бичиген: «Кудайдыҥ ла Иисус Христос Кайраканныҥ алдында, талдап алган ангелдердиҥ алдында айдып, кычырып турум: бу јакаруларды озолодо тӱп-шӱӱлте этпей бӱдӱр, нени де этсеҥ, улусты ылгабай эт» (1 Тим. 5:21).

Озо баштап, кемдерде андый ангелдер болотон аргазы јок деп кӧрӱп ийектер. 144 000 майлаткандар талдалган ангелдер болор аргазы јок. Не дезе, Павел Тимофейге самара бичип турарда, майлаткандар теҥериге тирилгелек болгон. Апостолдор до, ӧскӧ дӧ майлаткандар кӧгӱс јайаандар болголок болгон. Айдарда 144 000 — «талдап алган ангелдер» эмес (1 Кор. 15:50—54; 1 Фес. 4:13—17; 1 Иоанн 3:2).

Анайда ок «талдап алган ангелдер» ол чайыктыҥ алдында Кудайга удура барган ангелдер эмес. Нениҥ учун дезе олор Сатананы талдап, кӧрмӧстӧр болуп калган, ӧскӧртӧ айтса Иисустыҥ ӧштӱлери болуп калган (Баш. 6:2; Лука 8:30, 31; 2 Пётр 2:4). Келер ӧйдӧ олор 1 000 јылга тӱби јок јердӧӧн таштадып, кийнинде Дьяволло кожо јоголтылар (Иуда 6; Ачыл. 20:1—3, 10).

Айдарда, «талдап алган ангелдер» — ол ло ӱлгерде айдылган Кудайга ла Иисус Христоско јӧмӧжип турган теҥеридеги чындык ангелдер.

Кудайга чындык ангелдер коркышту кӧп — олор канча-канча муҥдар (Евр. 12:22, 23). Ангелдер башка-башка јакылталар бӱдӱрет (Ачыл. 14:17, 18). Темдектезе, Иегова бир ле ангелге ассирийецтердиҥ 185 000 јуучылдарын ӧлтӱрип салзын деп айткан (2 Каан. 19:35). А кезик ангелдерге «оныҥ [Иисустыҥ] Каандыгынаҥ кинчекке тартар кандый ла немелерди, јаман кылынып јӱргендерди» јууп, јоголтып салзын деп айдылган болгон (Матф. 13:39—41). Кезик ангелдер майлаткандарды јууп јат (Матф. 24:31). А кезиктери Кудайдыҥ јакарузыла бистерди корулап јат (Сар. 91:11; Матф. 18:10; Матфей 4:11 тӱҥдештиригер; Лука 22:43).

1 Тимофейге 5:21-де «талдап алган ангелдер» — ол христиан јуунла колбулу иштер бӱдӱрип турган ангелдер болор. Павел ол бажалыкта, ака-эјелер аксагалдарды тооп турзын деп, аксагалдарга молјуларын канайып бӱдӱрер керек деп бичиген. Олор улусты талдап, керектиҥ аайына јетире чыкпай јадып, тӱп-шӱӱлтелерди тӱрген-тӱкей чыгарбас учурлу. Аксагалдарда Павелдиҥ јакарузын бӱдӱрбес аргазы јок, не дезе, олор «Кудайдыҥ ла Иисус Христос Кайраканныҥ алдында, талдап алган ангелдердиҥ алдында» иштеп јадылар. Айдарда, кезик ангелдерге јуундарга болушсын деп јакарылган. Олор Кудайдыҥ ишчилерин корулап, олорго јарлаар иште болужып, кӧргӧн-укканын Иеговага јетирип јадылар (Матф. 18:10; Ачыл. 14:6).