Слер бу јылдыҥ «Каруулчы шибеениҥ» чыгармаларын јазап кычырганаар ба? Бу сурактарга каруу берип кӧрӱгер.

Иегова ӱй улуска канайып баштанганынаҥ бис кандый тем аладыс?

Иегова ӱй улусты уйан кӧрбӧй јат, эр кижини ӱй кижиге кӧрӧ артык деп сананбай јат. Ол ӱй улусты лаптап угуп јат, олордыҥ сезимдерин ле санааркаштарын ајаруга алат. Анайда ок башка-башка јакылталар берет (w24.01, 15—16 бӱктер).

Эфестегилерге 5:7-деги «олордыҥ керектерине турушпагар» деген принципти бис канайып тузаланар аргалу?

Апостол Павел Иегованы сӱӱбей турган улусла куучындашканы јеткерлӱ деп айткан. Нениҥ учун дезе ол тушта христиан кижиге библиялык нормаларла јӱрерге кӱч болор. Бӱгӱнги кӱнде мындый каршулу куучындар јӱк ле кӧстӧҥ кӧскӧ эмес, је соцсетьтер ажыра болор аргалу (w24.03, 22—23 бӱктер).

Тӧгӱн јетирӱлерге бӱтпеске нени эдер керек?

Биске ајарыҥкай болор керек. Тӧгӱн јетирӱлер кайдаҥ ла угулардаҥ айабас. Темдектезе, ака-эјелер шиҥделбеген јетирӱ аткарар болор. Ол эмезе электронный почта ажыра самара келердеҥ айабас, эмезе јарлаар иште чындыкла јилбиркеп турган деп билдирген, је Кудайдаҥ јана баскан улуска туштаар болорыс (w24.04, 12 бӱк).

Иегова Соломонго, чайык тушта божогон улуска ла Содом ло Гоморрада божогон улуска кандый јаргы чыгарганы аайынча бис нени билерис ле нени билбезис?

Иегова олорды јажын-чакка јоголтып салган деп айдып болбозыс. Је оныҥ кажы ла кижиге чыгарган јаргызы справедливый болор деп алаҥзыбай јадыс (w24.05, 3—4 бӱктер).

Иегова нениҥ учун кайага тӱҥдештирилет? (Јаҥ. т. 32:4).

Иегова — бистиҥ коруланатан јерис. Ого бӱдерге јараар, нениҥ учун дезе ол берген сӧзин јаантайын бӱдӱрип јат. Иегова качан да солынбай јат, ол бойыныҥ нормаларын ла амадузын качан да буспас (w24.06, 26—28 бӱктер).

Јаҥы јуунга ӱренижерге не болужар?

Иеговага иженигер. Ол ӧткӧн ӧйдӧ бойыныҥ ишчилерине болушкан, слерге де болужар. Эмдиги јууныгарды алдындагы јууныгарла тӱҥдештирбегер. Јаҥы најылар бедирегер ле јаҥы јуунга тӱрген ӱренижерге бойоор алтамдар эдигер (w24.07, 26—28 бӱктер).

Матфейдиҥ 25-чи бажалыгында бичилген ӱч укаа сӧстӧ кандый ӱредӱлер бар?

Койлор ло эчкилер керегинде укаа сӧс чындык ла керсӱ болор керек деп кӧргӱзет. Керсӱ ле сагыжы јетпес кыстар керегинде укаа сӧс ойгу ла белен болор керек деп кӧргӱзет. А таланттар керегинде укаа сӧс албадаҥкай болзын деп кӱӱнзедет (w24.09, 20—24 бӱктер).

Соломонныҥ ӧргӧӧзине киретен кыптыҥ бийиги канча метр болгон?

Кезик јебрен манускрипттерде 2 Летопись 3:4-тӧ ол кыптыҥ бийиги «120 чаканак» (эмезе 53 метр) деп айдылган. Ӧскӧ бӱдӱмјилӱ колбичимелдерде «20 чаканак» ол эмезе 9 метр деп бичилген. Ӧргӧӧниҥ стенелериниҥ калыҥын кӧрзӧ, калганчы айдылган тоо чын деп кӧрӱнет (w24.10, 31 бӱк).

«Болушчы ишчи бир ӱйлӱ болор учурлу» дегенин канайып оҥдоор? (1 Тим. 3:12).

Ол бир ӱйлӱ болор учурлу ла бойыныҥ эш-нӧкӧри эмес ӱй улусла конбос керек. Ол бойыныҥ ӱйине чындык артып, ӧскӧ ӱй улуска керек јок ајару этпей јат (w24.11, 19 бӱк).

Иоанн 6:53-те Кайраканныҥ Эҥири керегинде айдылбаган деп нениҥ учун айдарга јараар?

Иоанн 6:53-те улус Иисустыҥ эди-канын ичер ле јиир учурлу деп айдылган. Иисус бу сӧстӧрди б. э. 32-чи јылында Галилеяда болордо, еврейлерге айткан. Олор ого бӱдер керек болгон. А Кайраканныҥ Эҥирин ол бир јыл кире ӧй ӧткӧн кийнинде, Иерусалимде, кийдирген. Анда оныла кожо теҥериде башкаратан апостолдор болгон (w24.12, 10—11 бӱктер).