1. Нениҥ учун биске ончобыска токунал керек болот?

ТОКУНАЛ биске ончобыска керек болот. Нениҥ учун дезе кем де санааркабай, чӧкӧбӧй, кыйын-шыра јогынаҥ јӱрбей јат. Эмезе кемге де јажы јаанай бергенинеҥ, оору-јоболынаҥ эмезе јуугын јылыйтканынаҥ улам кӱч болот. Кемибис те улуска јаман кӧрдӱрип јат. Улустыҥ бой-бойын базынып турганы там ла кӧптӧп барат. Бу «уур-кӱч ӧйлӧр» «калганчы кӱндерде» јадып турганысты ла јаҥы телекейдиҥ јууктап келгенин керелейт (2 Тим. 3:1). Је Кудайдыҥ берген сӧзиниҥ бӱдерин кӧп јылдардыҥ туркунына сакып та турган болзоос, кӱчтерис там ла кӧптӧп јат. Бис токуналды кайдаҥ таап аларыс?

2, 3. а) Бис Аввакум керегинде нени билерис? б) Аввакумныҥ бичиги кандый туза берет?

² Бу сурактыҥ каруузын Аввакумныҥ бичиги берет. Агару Бичикте бу судурчыныҥ јӱрӱми керегинде не де айдылбай турган да болзо, оныҥ бичигинде бистиҥ кӱӱнисти кӧдӱрер ас эмес шӱӱлтелер бар. Оныҥ ады «кучактап алары» дегенин темдектейт. Бу сӧстӧр Иегованыҥ бисти  токунадарга эрке кучактаганын кӧргӱзип јат эмезе оныҥ ишчилери Кудайдаҥ бек тудунып турганын кӧргӱзип јат. Аввакумныҥ Иеговага берген сурактары биске де јилбилӱ болот. Оныҥ учун Кудай Аввакумла куучындашканын бичиттирип койгон (Авв. 2:2).

³ Бу куучында кунугып калган судурчыныҥ Иеговала ачыгынча куучындашканы бичилген. Аввакум керегинде мынаҥ ӧскӧ јетирӱ јок. Аввакумныҥ бичиги «бисти ӱредерге бичилген. Бис олордоҥ чыду ла кӧкӱдӱ алып, ижемјибисти јылыйтпазыбыс» (Рим. 15:4). Аввакумныҥ бичиги кажы ла кижиге таҥынаҥ незиле тузалу болор аргалу? Бу бичик Иеговага канайып иженерин кӧргӱзет, анайда ок кӱчтер ле ченелтелер болуп турза, токуналу артарга болужат. Айдарда, Аввакумныҥ бичигиле јууктада таныжып алактар.

4. Аввакум недеҥ улам амырын јылыйткан?

⁴ Аввакум 1:2, 3 кычырыгар *. Аввакум јеҥил эмес ӧйдӧ калју, казыр улустыҥ ортозында јаткан. Бу улус бой-бойын тӧгӱндеп, базынып туратан. Мынаҥ улам тыҥ кунуккан Аввакумга мындый сурактар амыр бербеген: «Јаман качан јоголор? Иегова нениҥ учун тӱргедебей турган?» Ол мындый кӱч ӧйлӧрди чыдажып болбой, Иегованы киришсин деп јайнай берген. Аввакум Иегованы албатызын корулабай барган деп сананган болор. Слерде мындый сезимдер болгон бо?

5. Аввакумныҥ бичиги бисти неге ӱредет? (Јӧрмӧлдиҥ бажындагы јурукты кӧрӱгер.)

⁵ Аввакум Кудайга иженбей, оныҥ сӧзине бӱтпей барды эмеш пе? Јок! Мынызы дезе, Аввакум бойыныҥ санааркаштарын кандый бир кижиге эмес, је Иеговага куучындап бергенинеҥ кӧрӱнет. Аввакум, Иегованыҥ јаманды ла судурчызыныҥ шыралап турганын нениҥ учун токтотпой турганын оҥдобой, санааркаган болор. Кудай Аввакумды нениҥ учун бойыныҥ сезимдерин бичизин деп кӱӱнзеткен? Нениҥ учун дезе Иегова бисти санааркаштарысты ла алаҥзыштарысты коркыбай куучындап турзын деп ӱредерге сананган. Ол бисти сӱӱп, јӱрегисте не барын мӱргӱӱлдеристе куучындазын деп кӱӱнзейт (Сар. 50:15; 62:8). Укаа сӧстӧр 3:5-те мынайып бичилген: «Бойыҥныҥ оҥдомолыҥа иженбе, бастыра јӱрегиҥле Иеговага ижен». Бу сӧстӧрди Аввакум билген болор, оныҥ учун ол анайып эдип јӱрген.

6. Биске нениҥ учун Иеговага мӱргӱӱр керек?

⁶ Аввакум Иеговага бӱткен, оныҥ учун бойыныҥ чындык Најызына ла Адазына оноҥ јуук болорго кӱӱнзеген. Кӱчтер болуп турза, ол бойына иженбеген, карын сезимдерин Иеговага куучындаган. Анайып биске сӱреен јакшы тем артыргызып салган. Агару Бичикте мӱргӱӱлдердиҥ Угаачызы деп адалган Иегова Кудай бисти ого иженип, санааркаштарысты куучындазын деп кӱӱнзеп јат (Сар. 65:2). Мынайып, Иегова бистиҥ мӱргӱӱлдериске кандый каруу бергенин кӧрӱп ийерис: Иегова бисти, сӱрлеп айтса, эрке кучактап токунадат  ла јӧп берет деп сезип ийерис (Сар. 73:23, 24). Иегова, бисте кандый да санааркаштар болзо, кӱчтерге оныҥ кӧрӱмиле кӧрӧргӧ болужар. Иеговага бӱдӱп турганысты кӧргӱзетен эҥ јакшы аргалардыҥ бирӱзи — ого акту јӱректеҥ мӱргӱӱри.

7. Иегова Аввакумныҥ сезимдерин чыгара айдынганына кандый каруу берген?

⁷ Аввакум 1:5—7 кычырыгар *. Аввакум ӱзе немени Иегованыҥ колына берип койоло, Кудай кандый каруу бергей не деп сананган болор. Бистиҥ сезимдеристи сӱреен јакшы оҥдоп турган Иегова Адабыс, Аввакумды сезимдерин чыгара айдынганы учун бир де бурулабаган. Нениҥ учун дезе ол оныҥ тыҥ шыралап турганын билер болгон. Келер ӧйдӧ тӱймеен кӧдӱрген еврейлерле не болорын Иегова судурчызына ачып берген. Мынайып удабас базыныш јоголып калар деп, Иегова эҥ ле озо Аввакумга айткан болор.

8. Иегованыҥ каруузы Аввакумды нениҥ учун кайкаткан?

⁸ Иегова удабас калју ла казыр улусты кыйалта јогынаҥ кату каруузына тургузар деп Аввакумга айткан. «Слердиҥ кӱндереерде» деген сӧстӧр Кудайдыҥ јаргызы Аввакумныҥ ӧйинде эмезе оныҥ ӧйинде јӱрген улустыҥ кӱндеринде бӱдер деп кӧргӱскен. Иегованыҥ мындый каруузы Аввакумды тыҥ кайкаткан. Не дезе, Кудайдыҥ айткан судурынаҥ Иуданыҥ улузы оноҥ тыҥ шыралар деп кӧрӱнген. Халдейлер, ол эмезе Вавилонныҥ улузы, Иегованыҥ јасактарын билген калју еврейлерге кӧрӧ, оноҥ калју болгон. Андый болордо Иегова бойыныҥ албатызын нениҥ учун ӧскӧ кудайларга бажырган калју албатыныҥ болужыла каруузына тургузарга сананган? Иегованыҥ мындый каруузын угуп, слер нени сезер эдеер?

9. Аввакумга кандый сурактар амыр бербей турган болор?

⁹ Аввакум 1:12—14, 17 кычырыгар *. Аввакум Иегованыҥ калју улусты канайып каруузына тургузарын оҥдоп алган да болзо, је кӧп неме ого тӱҥей ле јарт эмес болгон. Андый да болзо, Кудай ого «Кайадый» болуп арткан (Јаҥ. т. 32:4; Иса. 26:4). Аввакум чыдамкай судурчы болгон ло Иегованы јалакай ла сӱӱштӱ Кудай деп билер болгон. Иегова јаманды јаратпай турган агару Кудай болордо, Аввакум Иегованаҥ јалтанбай мындый сурактар сураган: «Кудай Иуданыҥ айалгазын оноҥ кӱч болуп каларын ла албатызыныҥ оноҥ тыҥ шыралаарын нениҥ учун токтотпос? Кудай бу айалгага тургуза ла не киришпес? Кӱчтӱдеҥ Кӱчтӱ Кудай кӧптӧп турган јаманды кӧрӱп, нениҥ учун унчукпас?»

10. Нениҥ учун кезикте бисте де Аввакумдый сезимдер болордоҥ айабас?

 ¹⁰ Кезикте бисте де Аввакумдый сезимдер болордоҥ айабас. Бис Иегованы оныҥ Сӧзин ӱренип јаткан тушта угадыс, анайып бистиҥ ижемјибис тыҥып јат. Анайда ок Иегованыҥ берерге турганын оныҥ организациязы ажыра берилип турган јакаруларынаҥ кӧптӧдӧ билип аладыс. Је тӱҥей ле: «Бистиҥ кыйын-шыра качан токтоор?» — деген сурак биске амыр бербей турган болор. Оныҥ учун Аввакумныҥ оноҥ ары нени эткенин кӧрӱп ийеле, бисти бу неге ӱредет деп сананып ийектер.

11. Аввакум Иеговала куучындашкан кийнинеҥ нени бек шӱӱп алган?

¹¹ Аввакум 2:1 кычырыгар *. Аввакум Иеговала куучындашкан кийнинеҥ токунай берген. Ол Иегованы сакыырга бек шӱӱп алган. Мынайып шӱӱп алганы бир ле кичинек ӧйгӧ болбогон, не дезе, ол канча катап: «Келетен тӱбекти шакпырабай сакыырым» — деп айткан (Авв. 3:16). Кудайдыҥ ӧскӧ дӧ чындык ишчилери Иеговага иженип, оны чыдамкай болуп сакыган. Бистерге олор чыдамкай артарыныҥ сӱрекей јакшы темин артыргыскан (Мих. 7:7; Иак. 5:7, 8).

12. Бис Аввакумныҥ теминеҥ неге ӱренер аргалу?

¹² Аввакумныҥ кӱӱн-санаазынаҥ бис неге ӱренер аргалу? Баштапкызында, бисте кандый да кӱчтер болзо, јаантайын мӱргӱп турар керек. Экинчизинде, Иегова бистерге Сӧзи ле организациязы ажыра нени айдып турганын ончозын угар керек. Ӱчинчизинде, Иегова бистерди кыйын-шыранаҥ јайымдаар деп, алаҥзу јогынаҥ чыдажып сакыыр керек. Бис Аввакумнаҥ тем алып, Иеговала јуук најыбыс чылап куучындажып, оныҥ сӧзин угуп, оны чыдамкай сакып турзаас, токунал аларыс ла ченелтелерди ӧдӱп чыгарыс. Ижемји биске чыдажарга ийде-кӱч берер, анайып бис кандый да айалгада болзоос, сӱӱнчилӱ артарыс. Анайда ок ижемји, бистиҥ теҥеридеги Адабыс ӱзе немени бойыныҥ јерине тургузар деп, алаҥзыбаска болужар (Рим. 12:12).

13. Аввакум 2:3-теги сӧстӧр бисти неде бӱдӱмјилейт?

¹³ Аввакум 2:3 кычырыгар *. Иегова Аввакумныҥ чыдажып сакыырга белен болгонын кӧрӱп, сӱӱнген болор. Кӱчтӱдеҥ Кӱчтӱ Кудай Аввакумга јеҥил эмес болгонын сӱрекей јакшы оҥдогон. Оныҥ учун Иегова бойыныҥ судурчызын сӱӱштӱ, јалакай токунадып, амыр бербей турган сурактарыныҥ карууларын алар деп бӱдӱмјилеп салган. Удабастаҥ оныҥ ончо санааркаштары јоголып калар учурлу болгон. Ӧскӧртӧ айтса, Кудай Аввакумга: «База ла эмеш чыдажып, меге ижен. Каруу узак келбей турган деп билдирип те турза, мен кыйалта јогынаҥ сеге каруу берерим» — деп айткан. Иегова берген сӧзин бӱдӱретен ӧйди тургузып салган деп, ого эске алындырган. Оныҥ учун Аввакумды  оноҥ ары сакызын деп кӱӱнзеткен. Соондо Аввакумныҥ сакыганы бӱдӱп калган.

14. Кӱч ӧйлӧр тужында бистиҥ кӧрӱм-санаабыс кандый болор учурлу?

¹⁴ Кӱчтердиҥ ӧйинде Иегованы сакып, оныҥ сӧзин лаптап угуп турган болзоос, бӱдӱмјилӱ ле амыр болорыс. Иисус бистерди, Кудайдыҥ ачкалак «ӧйди ле кӱндерди» ӧйинеҥ ӧткӱре сананбазын деп айткан (Ап. ижи 1:7). Биске Иеговага, ӧйдиҥ Башчызына, иженер керек. Ол нени качан эдетенин билер. Оныҥ учун Кудайга ийде-кӱчис јеткенче иштенип, јобош болуп, ӧйди ойгор тузаланып, чӧкӧбӧй, Иегованы сакып турактар (Марк 13:35—37; Гал. 6:9).

15, 16. а) Аввакумныҥ бичигинде Иегованыҥ кандый сӧстӧри бичилген? б) Бу сӧстӧр бисти неге ӱредет?

¹⁵ Кудай «акту кижи бӱдӱп, тирӱ јӱрер» ле «јер Иегованыҥ магы керегинде билгирлерле толуп калар» деп сӧзин берет (Авв. 2:4, 14). Чын, Иеговага иженип, чыдажып турган улуска ӱргӱлјиге јӱретен кайрал берилер.

¹⁶ Аввакум 2:4-тӧ бичилген Иегованыҥ сӧстӧри јаан учурлу болгон, оныҥ учун Павел бу сӧстӧрди бойыныҥ самараларында ӱч катап бичиген (Рим. 1:17; Гал. 3:11; Евр. 10:38). Бис кӱч ӧйлӧрдӧ Кудайга бӱдӱп ле иженип турзаас, Кудайдыҥ берген сӧзиниҥ бӱдерин  бойыстыҥ кӧзисле кӧрӧрис. Иегова бисти кӱчтердиҥ ары јанындагы кайралды кӧрӱп турзын деп кӱӱнзейт.

17. Аввакумныҥ бичиги бисти неде бӱдӱмјилейт?

¹⁷ Аввакумныҥ бичигинде калганчы кӱндерде јадып турган улуска јаан учурлу ӱредӱ бар. Иегова ого бӱдӱп ле иженип турган ончо чындык улуска ӱргӱлји јӱрӱм берилер деп, сӧзин берет. Оныҥ учун, кандый да кӱчтер ле санааркаштар болзо, Иеговага бӱдеристи оноҥ ло ары тыҥыдып турактар. Иегова бойыныҥ ишчилерине болужар ла олорды аргадаар деп, судурчы Аввакум ажыра бӱдӱмјилейт. Иегова бисти ого бӱтсин ле Каандык башкарар тушта јӱк ле ырысту ла јобош улус јадатан ӧйди чыдажып сакызын деп сурайт (Матф. 5:5; Евр. 10:36—39).

18. Аввакумга Иегованыҥ сӧстӧри кандый тузазын јетирген?

¹⁸ Аввакум 3:16—19 кычырыгар *. Иегованыҥ сӧстӧри Аввакумга јаан тузазын јетирген. Ол Иегова бойыныҥ албатызына канайып кайкамчылу болушканы керегинде шӱӱп сананган. Мынайып оныҥ Иеговага бӱдӱмјизи тыҥыган. Иегова удабас айткан сӧзин бӱдӱрер деп ол бӱдӱмјилӱ болгон. Оныҥ учун Аввакум канча да ӧйдиҥ туркунына јаманды чыдажар керек деп оҥдогон до болзо, токуналу болгон. Мынаҥ улам, Иегова оны аргадап алар деп, Аввакум бир де алаҥзыбай барган. Кезик билимчилердиҥ айтканыла 18-чи ӱлгер сӧстӧҥ сӧскӧ мынайып кӧчӱрилет: «Мен Кайраканымга сӱӱнип калыырым, Кудайымга сӱӱнип бијелеерим». Мындый сӧстӧрлӧ Аввакум Иеговага тыҥ бӱдӱп турганын кӧргӱскен. Бу сӧстӧр бистиҥ кӱӱнисти кӧдӱрет! Је Иегова биске јӱк ле сӱреен јакшы ижемји берген эмес — айткан сӧзин келер ӧйдӧ бӱдӱрип салар деп, бисти бӱдӱмјилеп јат.

19. Иегова бисти Аввакумды чылап канайып токунадар аргалу?

¹⁹ Аввакумныҥ бичигиниҥ эҥ јаан тузазы — јаантайын Иеговага иженерине ӱредип турганы (Авв. 2:4). Оныҥ учун биске Иеговала колбуларысты тыҥыдар керек: 1) Иеговага јаантайын мӱргӱп, санааркаштарысты куучындаар керек; 2) Иегованыҥ биске бойыныҥ Сӧзи ле организациязы ажыра айдып турганын угуп турар керек; 3) Иегова ӱзе немени бойыныҥ јерине тургуспаганча, Кудайга бӱдӱп, чыдажып сакыыр керек. Аввакум шак ла мынайып јӱрген. Оныҥ бичиги кунукчылду айалганаҥ башталган да болзо, је бичиктиҥ учы Аввакумныҥ сӱӱнчизиле, анайда ок Иеговага бир де алаҥзыбай турган сӧстӧриле божойт. Оныҥ учун Аввакумнаҥ тем алзаас, теҥеридеги сӱӱштӱ Адабыстыҥ бисти эрке кучактап турганын сезерис! Мындый токуналды эмдиги коркымчылу телекейдеҥ табып болорыс па?