1—3. а) Чындыкка кандый кӧрӱмдӱ болор керек? Тем куучындап беригер. (Јӧрмӧлдиҥ бажындагы јурукты кӧрӱгер.) б) Бу јӧрмӧлдӧ кандый сурактар кӧрӱлер?

КЕЗИКТЕ улус кандый бир немени садып алала, ойто кайра табыштырып ийет. Кезик ороондордо андый товарлардыҥ 9 процентти кайра табыштырылат. А интернет ажыра 30 проценттеҥ ажа берет. Улус нениҥ учун алган немезин толып аларга эмезе акчазын кайра аларга кӱӱнзейт? Нениҥ учун дезе садып алган неме олорго јарабай калат эмезе ӱрелип калган болот.

² Садып алган немениҥ акчазын кайра аларга јараар болордо, је чындыкты кайра табыштырып берерге, сӱрлеп айтса, садып ийерге кӱӱнзебей јадыс (1 Тим. 2:4; Укаа сӧстӧр 23:23 кычырыгар *). Баштапкы јӧрмӧлдӧ айдылганыла, бис чындыкты садып аларга, ӧйисти бергенис. Анайда ок кемибис  те чындыкка болуп, карьера эдеринеҥ мойногон, најыларыла, тӧрӧӧндӧриле колбуларын јылыйткан, кӧрӱм-санаазын ла јӱрӱмин солыган эмезе Кудайга јарабай турган чӱм-јаҥдарды артыргыскан. Је чындыкты садып алганыс учун берилген алкыштар, мындый солынталарга кӧрӧ, јӱс катапка артык.

³ Јӱрӱмисти мынайып солыганысты Иисустыҥ којойым керегинде укаа сӧзине тӱҥейлеерге јараар. Бу којойым јакшы эрјине бедиреп, оны табып алала, «не барын садып ийип, байагы эрјинени садып алган» (Матф. 13:45, 46). Бис те библиялык чындыктарды, темдектезе Каандык керегинде чындыкты табып алала, олорды баалап, бир де алаҥзыбай јӱрӱмисти солыганыс. Бис чындыкты баалап турган болзоос, оны бир де сатпазыс. Је Кудайдыҥ кезик ишчилери чындыкты баалабай барган, кезиги оны садып та ийген. Бис андый улус ошкош болорго кӱӱнзебей јадыс. Оныҥ учун оноҥ ло ары чындыкта јӱрер керек, ӧскӧртӧ айтса, чындыкты баштапкы јерге тургузып, чындык аайынча јӱрер керек. (3 Иоанн 2—4 кычырыгар.) Је христиан кижи чындыкты канайып садып ийет ле нениҥ учун? Чындыкты садып ийбеске, нени эдер керек? Чындыкта јӱрерге биске не болужар?

4. Христостыҥ кезик ӱренчиктери чындыкты недеҥ улам садып ийген?

⁴ Баштапкы чакта чындыкты алынган улустыҥ кезиги, чындыкта јӱрбей барган. Бир тем кӧрӱп ийектер. Иисус, кайкал эдип, канча муҥ албатыны азырап ийерде, олор Иисустыҥ кийнинеҥ Галилей талайдыҥ ӧскӧ јанына барган. Ондо Иисус олорго мынайып айткан: «Кижи Уулыныҥ эди-канын јибезегер, Оныҥ канын ичпезегер, бойыгарда јӱрӱм јок болор». Олор Иисусты сӧстӧриниҥ учурын јартап берзин деп сураардыҥ ордына: «Кандый уур-кӱч сӧстӧр! Олорды кем угар аргалу?» — деп айдыжып, «кӧп ӱренчиктери Оноҥ јана тӱжӱп, Оныла кожо јӱрбес болды» (Иоанн 6:53—66).

5, 6. а) Бӱгӱнги кезик христиандар нениҥ учун чындыктаҥ тудунбай барган? б) Христиан кижи канайып чындыктаҥ араайынаҥ ырап калардаҥ айабас?

⁵ Бӱгӱнги кӱнде кезик христиандар база чындыктаҥ тудунбай барган. Кезиги Агару Бичиктеги чындыктыҥ оҥдомолыныҥ чокумдалганыла бӱдӱрилген, ӧскӧзи кандый бир јарлу аканыҥ сӧзине эмезе эткен керегине бӱдӱрилген. Кем де библиялык јӧп берилгенине ачынган, кем де ака эмезе эјеле ачыныжып, чындыкты артыргызып салган. Анайда ок Иегованыҥ Керечилериниҥ ӱредӱзин јамандап  турган Кудайдаҥ јана баскан улуска эмезе бистиҥ удурлажаачыларга бириккен де улус бар. Мындый улус Иегованаҥ ла јууннаҥ биле тура ырап калган (Евр. 3:12—14). Олор Петр чилеп Иисуска тыҥ бӱткен болзо, анайып этпес эди. Иисус элчилеринеҥ: «Слер база Менеҥ јӱре берерге турган болороор бо?» — деп сураарда, Петр капшай ла: «Кайракан... Бис кемге баратан эдис? Сенде ӱргӱлји јӱрӱмниҥ сӧстӧри бар» — деп, каруу јандырды (Иоанн 6:67—69).

⁶ Кезик улус, јараттаҥ билдирбезинеҥ ырап бараткан кемедий, чындыктаҥ араайынаҥ ырап барат. Агару Бичик мындый улусты «туура апарылган» деп айдат (Евр. 2:1). Мындый улус чындыктаҥ «туура апарылганын» бойлоры да билбей калат. Мынаҥ улам олор Кудайла колбуларын јылыйтып салардаҥ айабас. Мындый айалга болбозын деп, нени эдер керек?

7. Чындыкты сатпаска биске кандый кӱӱн-санаа болужар?

⁷ Чындыкта јӱрерге Иегованыҥ ончо айтканыла јӧпсинип, ончо айткан сӧзин угар керек. Бис чындыкты баштапкы јерге тургузып, библиялык принциптерле јӱрер учурлу. Давид каан Иеговага мӱргӱп, мынайып айткан: «Мен сениҥ чындыгыҥда јӱрерим» (Сар. 86:11). Бис те андый кӱӱн-санаалу болор учурлу. Оноҥ ӧскӧ чындыкка болуп јӱрӱмисти солыганысты карамдап, кезик немеге кайра бурыларга сананып баштаардаҥ айабазыс. Бис чындыктарды талдабай, «ончо чындыкты» тузаланып јадыс (Иоанн 16:13). Артыргызып салган кандый бир немеге качан да ойто бурылбаска, чындыкка болуп нени эткенисти кӧрӱп ийектер (Матф. 6:19).

8. Ӧйин ойгор тузаланбай турган христиан кижи канайып чындыктаҥ туура јӱре берердеҥ айабас? Тем куучындап беригер.

⁸ Ӧй. Чындыктаҥ туура барбаска турган болзоос, ӧйди ойгор тузаланар керек. Јайымжый берзеес, бистиҥ кӧп ӧйис амырашка, интернетке эмезе телевизорго барар. Мында јаман неме јок, је олордоҥ улам Агару Бичикти таҥынаҥ ӱренерге ле ӧскӧ дӧ кӧгӱс керектерге ӧй артпай калардаҥ айабас. Эмма * деген эјениҥ темин кӧрӱп ийектер. Ол јаштаҥ ала аттарды тыҥ сӱӱген. Бош ӧй лӧ болзо, атка маҥтадарга тазыктырынар болгон. Је тазыктырынышка кӧп ӧй берип турганына уйады амыр бербей барарда, ӧйин неге берип турганын шӱӱп сананып, амыраар ӧйин чын тузаланып баштаган. Анайда ок ого родеодо маргаандарга турушкан Кори Уэллс деген эјениҥ теми  болушкан *. Эмди Эмма кӧп ӧйин кӧгӱс керектерге ле Иеговага иштеп турган тӧрӧӧндӧрине ле најыларына берип јат. Анайда ок Кудайла колбуларын тыҥытканынаҥ уйады ару болуп калган, не дезе, ол ӧйди ойгор тузаланарга ӱренип алган.

9. Акча-јӧӧжӧгӧ тартылары јӱрӱмисте канайып баштапкы јерде болуп калардаҥ айабас?

⁹ Акча-јӧӧжӧ. Бис чындыкта јӱрерге турган болзоос, акча-јӧӧжӧни баштапкы јерге тургуспас учурлу. Чындыкты баштап ла алынган тужыста, баштапкы јерге кӧгӱс амадуларды тургузып, акча-јӧӧжӧгӧ тартылбай барганыс. Је соондо, улус бойына кандый бир јаҥы чыккан баалу техника садып алат эмезе арга-чакту јадат деп, кӧрӱп баштаган болорыс. Оноҥ улам бойысты јокту деп сананып, бар немегисле болорзынбай, улустаҥ артпаска болуп, кӧгӱс амадуларысты экинчи јерге јылдырып ийердеҥ айабазыс. Мындый учурал Димасла болгон. Ол «эмдиги телекейди сӱӱп», элчи Павелдеҥ јӱре берген (2 Тим. 4:10). Агару Бичикте Димастыҥ нениҥ учун мынайып эткени бичилбеген де болзо, је ол акча-јӧӧжӧни баштапкы јерге тургузып баштаган болор эмезе јарлаар иште Павелге болужарга, бойыныҥ јанынаҥ кандый бир чыгым эдерге кӱӱнзебей барган болор. Качан да бис те акча-јӧӧжӧгӧ тартылган болорыс. Оныҥ учун ајарыҥкай болбозоос, акча-јӧӧжӧгӧ тартылып, чындыкты сӱӱбей барардаҥ айабазыс.

10. Чындыкта оноҥ ло ары јӱрерге, нени этпес керек?

¹⁰ Најылар ла тӧрӧӧндӧр. Оноҥ ло ары чындыкта јӱрерге, айландыра улустыҥ сӧзине кирбес керек. Чындыкта јӱрӱп баштаарыста кӧрӱмисти јаратпай турган најыларысла, тӧрӧӧндӧрисле колбуларыс солына берген. Олордыҥ кемизи де бистиҥ јаҥы кӧрӱмисти јараткан, је кемизи де чек јаратпаган (1 Петр 4:4). Бис тӧрӧӧндӧрисле куучындажып, олорго тоомјылу ла јалакай баштанарга албаданып та турзаас, олорго јараарга болуп, Иегованыҥ нормаларын буспай јадыс. 1 Коринфтегилерге 15:33-те бичилген сӧстӧрди ундыбай турзаас, бис јӱк ле Иегованы сӱӱп турган улусла јуук куучындажарыс.

11. Иегованыҥ кӧзине ару болорго нени эдер керек?

¹¹ Кудайга јарабай турган кӧрӱм-санаа ла јӱрӱм. Чындыкта јӱрген улустыҥ ончозы агару, ол эмезе, ару болор учурлу (Иса. 35:8; 1 Петр 1:14—16 кычырыгар). Бис чындыкты билип алган тушта библиялык чындык нормалар аайынча јӱрерге, јӱрӱмисте солынталар  эткенис. Је кемибиске де коркышту јаан солынталар эдерге келишкен. Кандый да солынталар эдерге келишкен болзо, чындыктыҥ болужыла аруталып калган јӱрӱмисти јайрадылып јаткан телекейдиҥ кирине качан да толыбас эдис. Балыр керектердеҥ кыйарга, нени эдер керек? Иегованыҥ бисти агарулап аларга јаан баа тӧлӧгӧнин — бис учун Иисус Христостыҥ каны тӧгӱлгенин — шӱӱп сананар керек (1 Петр 1:18, 19). Иегованыҥ кӧзине ару болорго, Христостыҥ толынты тайылгазыныҥ баазын качан да ундыбас керек.

12, 13. а) Байрамдарды нениҥ учун Иегованыҥ кӧрӱмиле кӧрӧр керек? б) Бис нени шӱӱп кӧрӧрис?

¹² Кудайга јарабай турган чӱм-јаҥдар. Бистиҥ тӧрӧӧндӧрис, кожо иштеп тургандарыс, школдо кожо ӱренип турган балдарыс бисти олорло кожо байрамдазын эмезе Иеговага јарабай турган чӱм-јаҥдарга турушсын деп албадаар болор. Олордыҥ сӧзине кирбеске нени эдер керек? Иеговага улустыҥ чӱм-јаҥдары нениҥ учун јарабай турганын јакшы билер керек. Бистиҥ бичиктердеҥ бу телекейдиҥ јарлу байрамдарыныҥ кайдаҥ келгенин шиҥдеп кӧрӱгер. Бу байрамдарды Агару Бичик нениҥ учун јаратпай турганын шӱӱп сананып турзаас, Кудайдыҥ айтканынча јӱредис деп бӱдӱмјилӱ болорыс (Еф. 5:10). Иеговага ла оныҥ Сӧзине бӱдӱп турзаас, улустаҥ коркыбазыс (Укаа 29:25).

¹³ Бис јаантайын чындыкта јӱредис. Бу јолло чактыҥ-чакка јӱрерге кӱӱнзейдис. Бу јолдоҥ туура барбаска нени эдер керек? Ӱч алтам кӧрӱп ийектер.

14. а) Агару Бичикти јаантайын ӱренип турзаас, нениҥ учун чындыкты садып ийетен кӱӱн качан да келбес? б) Биске нениҥ учун ойгор, таскаду ла оҥдомол керек?

¹⁴ Баштапкы алтам — Кудайдыҥ Сӧзиндеги баалу чындыктарды јаантайын шиҥдеп, шӱӱп сананарга ӧй табып туругар. Анайып слер чындыкты оноҥ тыҥ баалаарыгар ла оны садып ийетен кӱӱн слерге качан да келбес. Биске јӱк чындыкты эмес, је «ойгорды, таскадуны ла оҥдомолды» да садып алар керек деп, Укаа сӧстӧрдӧ 23:23-те бичилген. Оныҥ учун  јӱк билгирлерле болорзынбай, билип алган чындык аайынча јӱрер керек. Оҥдомол биске Иегованыҥ Сӧзиндеги ончо чындыктар бой-бойыла канайып колболгонын кӧрӱп турарга болужар. Ойгор дезе, билгирлерди јӱрӱмисте тузаланарга болужар. Анайда ок Кудайдыҥ Сӧзиндеги таскадулар биске солынарга болужар. Оныҥ учун андый таскадуны јаантайын угуп турактар, не дезе, ол мӧҥӱннеҥ канча катапка баалу (Укаа 8:10).

15. Чындык бисти канайып корулайт?

¹⁵ Экинчи алтам — чындыктаҥ кажы ла кӱн тудунарга бек сананып алыгар. Чындык Агару Бичикте јуучылдыҥ кийип јӱретен курыла тӱҥдештирилет (Еф. 6:14). Бу кур оныҥ белин ле ичиндеги органдарын корулазын деп, јуучыл курды тыҥ тартып алар учурлу болгон, оноҥ ӧскӧ, курдаҥ туза болбос эди. Бисти чындык канайып корулайт? Бис, сӱрлеп айтса, чындыкла курчанып алзаас, ол бисти тӧгӱн ӱредӱлердеҥ корулап, ойгор тӱп-шӱӱлтелер эдерге болужар. Ченелте боло берзе, Агару Бичиктиҥ чындыгы эткен тӱп-шӱӱлтелеристеҥ кыйбаска ийде-кӱч берер. Канайып јуучыл јууга качан да кур јок барбай јат, анайып ла биске чындыктыҥ курын тыҥыда тартынып, уштыбас керек. Јуучылдыҥ куры база бир јанынаҥ тузалу болгон — ого кылышты илип алатан. Кӧгӱс јанынаҥ база анайып ла болот.

16. Улусты чындыкка ӱредип турганыс, бойыска чындыкта јӱрерге канайып болужып јат?

¹⁶ Ӱчинчи алтам — кӧп ӧйди улусты Агару Бичиктиҥ чындыгына ӱредерге беригер. Бу слерге «Кудайдыҥ сӧзин», ӧскӧртӧ айтса кӧгӱс кылышты, јакшы тузаланып билерге болужар (Еф. 6:17). Биске ончобыска улусты чындыкка ӱредерге, темигӱлеристи тыҥыдып, «чындыктыҥ сӧзин» чын јартаарга ӱренер керек (2 Тим. 2:15). Улуска чындыкты садып аларга ла тӧгӱн ӱредӱлердеҥ айрыларга Агару Бичикти тузаланып турзаас, Кудайдыҥ сӧзи бистиҥ санаабыска ла јӱрегиске оноҥ тереҥ кирип калат. Бу биске оноҥ ло ары чындыктыҥ јолында бек турарга болужат.

17. Слер чындыкты нениҥ учун баалап јадыгар?

¹⁷ Чындык — Иегованыҥ баалу сыйы. Бу сый биске теҥеридеги Адабысла јуук колбуларлу болорго болужат. Иегова бисти кӧп немеге ӱредип салган, је оныҥ ӱредӱзи јаҥыла башталып јат. Ол бисти чактардыҥ-чакка ӱредер деп сӧзин берет. Оныҥ учун чындыкты баалу эрјинени чилеп баалагар. Оны качан да сатпагар. Ол тушта слер Иеговага, Давид чилеп: «Мен сениҥ чындыгыҥда јӱрерим» — деп, берген сӧзигерди бӱдӱрип саларыгар (Сар. 86:11).