1, 2. а) Иисус Петрдыҥ јӧбине кандый каруу берген? (Јӧрмӧлдиҥ бажындагы јурукты кӧрӱгер.) б) Иисус нениҥ учун мындый каруу берген?

ИИСУС удабас кыйын-шыра ӧдӱп, ӧлӱп калар деп айткан. Ӱренчиктери мыны угуп, бӱтпей турдылар, не дезе, олор Иисусты Израиль Каандыкты орныктыратан кижи деп иженген. Мынаҥ улам элчи Петр: «Кудай Сеге буурзак, Кайракан! [Бойыҥды киле, Кайраканым, ЈТ] Сениле андый неме болбос» — деп айдарда, Иисус тургуза ла: «Менеҥ кеде тайыл, сатана! Сен — јолымдагы буудак. Кудайдыйын эмес, кижинийин сананып јадыҥ» — деп айткан (Матф. 16:21—23; Ап. ижи 1:6).

² Мынайып Иисус Кудайдыҥ кӧрӱм-санаазы Сатанага башкарткан телекейдиҥ кӧрӱм-санаазынаҥ чек башка деп кӧргӱскен (1 Иоанн 5:19). Петрдыҥ сӧстӧринеҥ бу телекейдиҥ јаҥыс бойын сананар кӧрӱми кӧрӱнген. Је Иисус Адазыныҥ табы аайынча кыйын-шырага ла ӧлӱмге белетенип алар учурлу болгонын  билген. Оныҥ учун Иисустыҥ каруузынаҥ бу телекейдиҥ кӧрӱмин јектегени ле Иегованыҥ кӧрӱмиле јӱрерге турганы кӧрӱнет.

3. Бу телекейдиҥ кӧрӱмине удурлажарга нениҥ учун кӱч болот?

³ Бис кемниҥ кӧрӱмиле јӱрӱп јадыс — Кудайдыҥ ба эмезе бу телекейдиҥ бе? Эм тургуза бис Кудайдыҥ некелтелерин бӱдӱрип турган болорыс. Је бис Иегованыҥ кӧрӱм-санаазыла јӱредис пе? Иегованыҥ кӧрӱмиле јӱрерге, тыҥ албаданар керек. Је бу телекейдиҥ кӧрӱмиле јӱрерге јеп-јеҥил, не дезе, бу кӧрӱм кей чилеп, кайда ла таркап калган (Еф. 2:2). Мындый кӧрӱм-санаага удурлажарга кӱч, не дезе, ол бисти бойыстыҥ кӱӱнисти бӱдӱрерге кӱӱнзедет.

4. а) Бу телекейдиҥ кӧрӱмине башкартсабыс, не болордоҥ айабас? б) Бу јӧрмӧлдӧ не керегинде шӱӱжерис?

⁴ Бис телекейдиҥ кӧрӱмине башкартсабыс, бойыстыҥ кӱӱнисти бӱдӱрип, јакшыныҥ ла јаманныҥ нормаларын бойыс тургузып баштаарыс (Марк 7:21, 22). Оныҥ учун улустыҥ кӧрӱмиле эмес, је Кудайдыҥ кӧрӱмиле јӱрерге ӱренер керек. Бу јӧрмӧлдӧ ончо немеге Иегованыҥ кӧзиле кӧрӧргӧ, нени эдер керек ле Иегованыҥ кӧрӱмиле јӱрери нениҥ учун тузалу болуп, јайымыска јаан чаптык јетирбей јат, анайда ок нени этсеес, бу телекейдиҥ кӧрӱмине кирбезис деген сурактар јарталар. Келер јӧрмӧлдӧ кандый бир сурактарга Кудайдыҥ кӧрӱмин билип аларга ла оныла јӱрерге ӱренип аларга нени эдер керек деген сурактар шӱӱжилер.

5. Нениҥ учун кезик улус јӱк бойыныҥ кӧрӱмиле јӱрерге кӱӱнзеп јат?

⁵ Кезик улус кемниҥ-кемниҥ кӧрӱмиле јӱрерин јаратпай јат. Андый улус: «Менде бойымныҥ бажым бар» — деп айдыжат. Олор: «Нени эдерин бойым билерим» — деп айдарга турган болор. Бу улус кемге де багынарга кӱӱнзебей јат ла бойыныҥ кӧрӱм-санаазын јылыйтпаска јат *.

6. а) Иегова биске кандый јайым берген? б) Бу јайымда токтодулар бар ба?

⁶ Кудайдыҥ кӧрӱмиле јӱрӱп баштазаас, бойыстыҥ кӧрӱм-санаабыс јоголып калар деп санааркабас керек. Нениҥ учун дезе 2 Коринфтегилерге 3:17-де мынайып айдылып турган: «Кайраканныҥ Тыны јӱрген јерде — јайым». Кандый кижи болорго турганысты бис бойыс талдаар аргалу. Бистиҥ кажыбыстыҥ ла санаабыс, кӱӱнис, јарап турган немегис башка. Андый јайымды биске Иегова Кудай бойы берген. Је бу јайымда токтодулар бар. (1 Петр 2:16 кычырыгар.) Бис јакшыны ла јаманды оҥдоп аларга турган болзоос, Иегованыҥ  Агару Бичикте бичилген кӧрӱмин ајаруга алар учурлу. Бу бистиҥ јайымыска чаптык эдет пе эмезе туза берет пе?

7, 8. Кудайдыҥ кӧрӱм-санаазыла јӱргенис јайымыска нениҥ учун јаан чаптык этпей јат? Тем куучындап беригер.

⁷ Тем кӧрӱп ийектер. Ада-энелер балдарын ак-чек болорго ӱредип јат. Анайып олор балдарын тӧгӱндебеске, јалкуурбаска ла улуска тоомјылу баштанарына ӱредип салат. Мынайып ӱредип турганы балдардыҥ јайымын айрыйт па? Јок. Карын мынайып ӱредилгени балдарды алдынаҥ бойы јадып баштаза, ырысту јӱрерине белетеп јат. Соондо олор јаанап, айылынаҥ јӱре берзе, канайып јӱрерин бойы кӧрӧр. Је эткен шӱӱлтези ада-энезиниҥ ӱреткени аайынча болзо, олор јаан кӱчтерге ле санааркаштарга алдыртпай јӱрер.

⁸ Иегова сӱӱштӱ Ададый балдарын ырысту, ойгор јӱрзин деп кӱӱнзейт (Иса. 48:17, 18). Оныҥ учун ак-чек јӱретен ле улуска тоомјылу баштанарга болужатан принциптер берген. Бу принциптерле јӱрерге ӱренип алганыс јайымыска чаптык јетирбей јат, карын немени тереҥжиде кӧрӱп турарга болужат (Сар. 92:5; Укаа 2:1—5; Иса. 55:9). Анайып эткен тӱп-шӱӱлтелеристеҥ сӱӱнчи аларыс, анайда ок бисте бойыстыҥ кӧрӱм-санаабыс болор (Сар. 1:2, 3). Чын, Иегованыҥ кӧрӱм-санаазыла јӱрери сӱреен јаан туза экелет.

9, 10. Кудайдыҥ кӧрӱм-санаазы бу телекейдиҥ кӧрӱм-санаазынаҥ артык деп, нениҥ учун айдарга јараар?

⁹ Кудайдыҥ ишчилериниҥ ончо немеге Иегованыҥ кӧрӱмиле кӧрӧргӧ турганыныҥ база бир шылтагы — Кудайдыҥ кӧрӱм-санаазы телекейдеги улустыҥ кӧрӱм-санаазынаҥ артык болгоны. Бӱгӱнги кӱнде ак-чек јӱрери јанынаҥ, биле тӧзӧп јадары јанынаҥ, иш-тош ло оноҥ до ӧскӧ јанынаҥ берилип турган јӧптӧр Кудайдыҥ кӧрӱм-санаазына келишпей јат. Темдектезе, бу телекейдеги улус бойыныҥ амадузына кемди де килебей јединерине ле балыр јӱрӱм јӱрерине кӱӱнзедилет. Эш-нӧкӧрлӧр эптӱ-јӧптӱ јадып болбой турган болзо, эки башка јатсын эмезе тӧзӧлгӧ јогынаҥ айрылып калзын деп јӧп бергилейт. Оныҥ учун кем-кем: «Бу јӧптӧрдиҥ кезиги бӱгӱнги кӱндерге келижип турган ошкош» — деп, сананар болор. Је Агару Бичик мындый јӧптӧрди јаратпай јат.

¹⁰ Иисус айткан: «Кижиниҥ ойгоры керектеринеҥ кӧрӱнет» (Матф. 11:19, ЈТ). Улус научно-технический једимдерге јеткен де болзо, олор эмдигенче ле ырысту болорго бербей турган эҥ јаан кӱчтерди — јуу-согушты, бой-бойын угы-тӧзиле ылгаарын ла каршулу керектер эдерин јоголтып болбогон. Анайда ок половой мораль јанынаҥ токтодулар тургуспай јат. Је мынаҥ улам билелер чачылат, балыр јӱрӱмниҥ  оорулары табылат ла ӧскӧ дӧ кӱчтер табылат деп, кӧп улус јӧпсинип јат. Је Кудайдыҥ кӧрӱмиле јӱрген улус балыр јӱрӱмниҥ ооруларыла оорубай јат, бастыра телекейде јадып турган ака-эјелериле амыр јадат, анайда ок олордыҥ билелери ырысту болот (Иса. 2:4; Ап. ижи 10:34, 35; 1 Кор. 6:9—11). Кудайдыҥ кӧрӱм-санаазы эҥ артык деп, оныҥ ишчилериниҥ јӱрӱминеҥ кӧрӱнет.

11. Моисей кемниҥ кӧрӱмиле јӱрерге албаданган? Бу ого кандый алкыштар экелген?

¹¹ Кудайдыҥ јебрен ӧйдӧги ишчилери Иегованыҥ кӧрӱм-санаазы кижиниҥ санаазынаҥ канча катапка артык деп билер болгон. Темдектезе, Моисей «Египеттиҥ калыгыныҥ ончо ойгорлыгына» ӱредилген де болзо, Кудайдаҥ «ойгор јӱрек» сураган (Ап. ижи 7:22; Сар. 90:12). Анайда ок Иегованы: «Јолдорыҥды ачып берзеҥ» — деп сураган (Чыг. 33:13). Моисей Иегованыҥ кӧрӱмиле јӱрерге албаданган, оныҥ учун Кудайдыҥ амадузында јаан учурлу иш бӱдӱрген ле бӱдери бек улустыҥ тоозына кирген (Евр. 11:24—27).

12. Павелдиҥ тӱп-шӱӱлтелери неге тӧзӧлӧнгӧн?

¹² Элчи Павел сагышту, бийик ӱредӱлӱ, еврей ле грек тилдерди билген кижи болгон (Ап. ижи 5:34; 21:37, 39; 22:2, 3). Је оныҥ тӱп-шӱӱлтелери бу телекейдиҥ ойгорына эмес, Бичимелдиҥ ойгорына тӧзӧлӧнгӧн. (Апостолдордыҥ ижи 17:2; 1 Коринфтегилерге 2:6, 7, 13 кычырыгар.) Анайып Павел Кудайга иштееринде јаан једимдерге јединип, ӱргӱлјиге јӱретен ижемји алган (2 Тим. 4:8).

13. Кудайдыҥ кӧрӱмиле јӱреринде, јӱрбезинде кем каруулу болот?

¹³ Айдарда, Кудайдыҥ кӧрӱми бу телекейдиҥ кӧрӱминеҥ артык болгоны јарт кӧрӱнип јат. Иегованыҥ нормаларыла јӱрӱп, бис чыннаҥ ырысту ла једимдӱ улус болодыс. Је Иегова бисти оныҥ кӧрӱмиле јӱрзин деп албадабай јат. Анайып ла бисти «бӱдӱмјилӱ ле керсӱ кул» да, аксагалдар да албадабай јат (Матф. 24:45; 2 Кор. 1:24). Не дезе, Кудайдыҥ кӧрӱмин алынатан ба, јок по кажы ла кижи бойы кӧрӧр учурлу. Је Кудайдыҥ кӧрӱмиле јӱрерге нени эдер керек?

14, 15. а) Иегованыҥ кӧрӱмиле јӱрерге, биске нени шӱӱп сананар керек? б) Римдегилерге 12:2-ле болзо, биске бу телекейдиҥ кӧрӱмине кирбеске, нениҥ учун ајарыҥкай болор керек? Тем куучындап беригер.

¹⁴ Бистиҥ кӧрӱмис кезикте ада-энебистеҥ укталып келет эмезе јӱрген јӱрӱмистеҥ камаанду болот. Је андый да болзо, кӧрӱмисти солып алар арга бар. Оныҥ учун кӧп сабада нени сананып турганысты ајаруга алар керек. Римдегилерге 12:2-де мынайып айдылат: «Бу телекейге эптешпегер, је санаагарды јаҥыртып, бойыгарды солыгар. Анайып, Кудай слердеҥ нени кӱӱнзеп турганын, не Ого јакшы, не јарап турганын, Оныҥ толо кеми не болгонын билип аларыгар». Кудайдыҥ тыныла  бичилген бу сӧстӧр бисти, чындыкла таныжардаҥ озо болгон кӧрӱмисти солып, Кудайдыҥ кӧрӱмиле јӱрерге ӱренип алар аргалу деп кӧргӱзет. Темдектезе, кандый бир суракта Иегованыҥ кӧрӱмин шӱӱп сананып турзаас, оныҥ кӧрӱм-санаазы чын деп бӱдӱмјиленип, Иегованыҥ кӧрӱмиле јӱрерге кӱӱнзеп баштаарыс.

¹⁵ Је бу ла ок ӧйдӧ бу телекейдиҥ санаазына кирбеске, Иегованыҥ кӧрӱмине келишпей турган не ле немени кӧрбӧс, укпас ла кычырбас керек. Мыны оҥдоорго бир тем кӧрӱп ийектер. Кижи бойыныҥ су-кадыгын тыҥыдарга, тузалу курсак јип баштаган болзын. Је тузалу курсакла кожо ӱрелип калган курсак јип турза, туза болор бо? Анайып ла бис Кудайдыҥ кӧрӱмин алынып, је бу ла ӧйдӧ санаабысты телекейдиҥ кӧрӱм-санаазыла киртидип турзаас, кандый да туза болбос.

16. Бойысты недеҥ корулаар керек?

¹⁶ Бу телекейдиҥ кӧрӱмине чек кирбей јӱрер арга бар ба? Јок, бисте бу «телекейди таштап барар» аргабыс јок. Оныҥ кандый бир кӧрӱми тӱҥей ле бажыска кире берет (1 Кор. 5:9, 10). Керек дезе јарлап та јӱрзеес, јастыра кӧрӱмдӱ улуска туштайдыс. Је андый да болзо, јастыра кӧрӱмнеҥ кыйатан арга јок учуралдарда андый кӧрӱмле јилбиркебегер, оны алынбагар. Иисустаҥ тем алып, Сатананыҥ јайып турган кӧрӱмин тӱрген ле јектеп, арга болзо, бу телекейдиҥ кӧрӱминеҥ кыйып туругар. (Укаа сӧстӧр 4:23 кычырыгар *.)

17. Биске кандый учуралдарда телекейдиҥ кӧрӱминеҥ кыйар керек?

¹⁷ Темдектезе, јуук најылар талдаарында ајарыҥкай болор керек. Иеговага иштебей турган улусла јуук куучындажып баштазаас, олордыҥ  кӧрӱмин алынардаҥ айабазыс деп, Агару Бичик айдат (Укаа 13:20; 1 Кор. 15:12, 32, 33). Анайда ок соот-јыргалдар талдаарында ајарыҥкай болор керек. Андый соот-јыргалдар эволюцияга бӱдерине, базынышка ла балыр јӱрӱмге кӱӱнзедип турган болзо, олордоҥ кыйар керек. Ол тушта бистиҥ санаабыс «Кудайды билип аларга удурлажып турган тӱп-шӱӱлтелерле» корондолбос (2 Кор. 10:5).

18, 19. а) Кандый бир кӧрӱм-санаа баштап тарый јаман эмес деп билдирип те турза, нениҥ учун ајарыҥкай болор керек? б) Бойыска кандый сурактар берер керек, нениҥ учун?

¹⁸ Је кезикте бу телекейдиҥ кӧрӱми баштап тарый јарт кӧрӱнбей јат, оныҥ учун ајарыҥкай болор керек. Темдектезе, солундарда билдирбес јанынаҥ политикалык кандый бир сурактар кӧдӱрилет. Эмезе јарлу улустыҥ једимдери керегинде јетирӱлерде бу телекей нени баалап турганы кӧргӱзилердеҥ айабас. Ол эмезе кезик бичиктерде эмезе кинолордо «эҥ ле учурлу неме — мен ле мениҥ билем» деген кӧрӱм јакшы, јараш, чын эдип кӧргӱзилет. Андый кӧрӱм Агару Бичикке келишпей јат, не дезе, ондо айдылганыла болзо, бис ле бистиҥ билелерис эҥ ле тыҥ Иегованы сӱӱзе, чыннаҥ ырысту болор аргалу (Матф. 22:36—39). Балдардыҥ кезик бичиктеринде, кинолорында эмезе мультфильмдеринде јаман неме болбой јат, је олор ажыра билдирбезинеҥ балыр јӱрӱм јӱреринде јаман неме јок деп кӧргӱзилердеҥ айабас.

¹⁹ Андый болордо, кажы ла соот-јыргалдаҥ кыйар керек пе? Јок. Биске бойыстаҥ мынайып сураар керек: «Бу телекейдиҥ кӧрӱми јарт кӧрӱнбей турган да болзо, мен оны кӧрӱп ийедим бе? Балдарым нени кӧрӱп, нени кычырып турганын билерим бе? Мен бойым нени кычырып, нени кӧрӱп јадым? Балдарымга, телекейдиҥ кӧрӱмин јектеерге јеҥил болзын деп, ӱзе немени Иегованыҥ кӧзиле кӧрӧргӧ болужадым ба?» Бис Кудайдыҥ кӧрӱминиҥ ле телекейдиҥ кӧрӱминиҥ башказын јарт кӧрӱп турзаас, јаман кӧрӱм-санаага кирбезис.

20. Кемниҥ кӧрӱмиле јӱрӱп турганыс недеҥ кӧрӱнет?

²⁰ Ундыбагар, бис эмезе Иегованыҥ кӧрӱмиле јӱредис эмезе Сатананыҥ телекейиниҥ кӧрӱмиле јӱредис. Кӧп неме кемди угуп турганыстаҥ камаанду болот. Бу телекейдиҥ кӧрӱм-санаазын јарадып турзаас, телекейдиҥ улузы чылап бойыстыҥ кинчектӱ кӱӱнисти бӱдӱрип баштаарыс. Оныҥ учун нени шӱӱп сананып турганыска ајару эдип турар керек.

21. Келер јӧрмӧл не керегинде болор?

²¹ Ӧрӧги айдылганыла, Иегованыҥ кӧрӱм-санаазыла јӱрерге турган болзоос ло ӱзе немеге Кудайдыҥ кӧзиле кӧрӧргӧ турган болзоос, бу телекейдиҥ кӧрӱм-санаазынаҥ кыйып турарыла болорзынбай, Кудайдыҥ кӧрӱм-санаазын шӱӱп сананар керек. Бу керегинде келер јӧрмӧлдӧ шӱӱжерис.