1, 2. Бис кӧгӱс јанынаҥ ӧзӱп, неге ӱренип јадыс? Тем куучындап беригер.

КИЧИНЕК балага сый берилзе, ада-энези балазын: «Быйан айт» — деп айдат. Бала сӧсуккур болуп, сананбай ла быйанын айдып ийет. Је ол јаанап келзе, ада-энезиниҥ кӧрӱм-санаазын оҥдоп, быйанду болуп, олордыҥ кӧрӱмиле јӱрерге ӱренип јат. Анайып, акту јӱрегинеҥ быйанзак болор кылык-јаҥга ӱренип калат.

² Анайып ла бис чындыкты билип баштайла, Иегованыҥ тӧс некелтелерин нениҥ учун бӱдӱрер керек деп оҥдоп алганыс. Је кӧгӱс јанынаҥ ӧзӱп, Иеговага не јарап турганын, не јарабай турганын јакшы билип аладыс. Иегова чылап сананарга ӱренип турзаас, анайда ок кандый бир тӱп-шӱӱлтелеристе ле эткен керектеристе оныҥ кӧрӱмиле башкарынып турзаас, бис оныҥ кӧрӱм-санаазына ӱренип алганысты кӧргӱзедис.

3. Иегованыҥ кӧрӱм-санаазын алынарга нениҥ учун јеҥил эмес болот?

³ Кудайдыҥ кӧрӱм-санаазына ӱренерге јакшы да болзо, је јеҥил эмес. Кезикте бистиҥ толо кемдӱ  эмезис чаптыгын јетирет. Темдектезе, ак-чек болоры јанынаҥ, акча-јӧӧжӧ, јарлаар иш, канды јастыра тузаланары јанынаҥ ла оноҥ до ӧскӧ немелер јанынаҥ Иегованыҥ кӧрӱмин билер болодыс. Је оныҥ кӧрӱми нениҥ учун андый болуп турганын оҥдобой турган болорыс. Оныҥ кӧрӱм-санаазын алынарга биске не болужар? Мындый кӧрӱм-санаа бистиҥ керектериске бӱгӱнги де кӱнде, келер де ӧйдӧ кандый тузазын јетирер?

4. Биске Павелдиҥ јӧбиле санаабысты канайып јаҥыртар керек?

⁴ Римдегилерге 12:2 кычырыгар. Бу ӱлгерде элчи Павел биске Иегова чылап сананарга нени эдер керек деп јартап берген. Ӧткӧн јӧрмӧлдӧ айдылганыла болзо, бу телекейге эптежерге кӱӱнзебей турган болзоос, кӧрӱм-санаабысты телекейдиҥ кӧрӱминеҥ корулаар керек. Анайда ок Павел санаабысты јаҥыртар керек деп айткан. Мыны канайып эдер? Кудайдыҥ санаазын оҥдоп аларга Агару Бичикти шиҥдеп, шӱӱп сананып, Иегованыҥ кӧрӱм-санаазына ӱренер керек.

5. Агару Бичикти шиҥдеериниҥ ле кычырарыныҥ нези башка?

⁵ Шиҥдеери — тӱрген кычырары эмезе сурактыҥ каруузын темдектеп алары эмес. Агару Бичикти шиҥдеген ӧйдӧ бис Иегова керегинде, оныҥ эдип турган керектери ле кӧрӱм-санаазы керегинде шӱӱп сананадыс. Кудай бисти нениҥ учун кандый бир немени этсин эмезе этпезин деп турганын оҥдоп аларга албаданадыс. Анайда ок бойыстыҥ кӧрӱмисте ле јӱрӱмисте нени солыырын шӱӱп сананадыс. Бу ончо немени бир ле уунда оҥдоп болбос болорыс, оныҥ учун Агару Бичикти шиҥдейтен ӧйдиҥ јарымын да болзо, шӱӱп сананарына артыргызар керек (Сар. 119:97; 1 Тим. 4:15).

6. Кудайдыҥ Сӧзин шӱӱп сананып турганыс кандый туза экелет?

⁶ Кудайдыҥ Сӧзин јаантайын шӱӱп сананып турзаас, кайкамчылу неме болот. Бис Иегованыҥ кӧрӱм-санаазында бир де јик јок деп бӱдӱмјиленип јадыс. Бис ӱзе немеге оныҥ кӧзиле кӧрӱп баштайдыс, учы-учында оныҥ кӧрӱмиле јӧпсинип јадыс. Анайып бистиҥ кӧрӱм-санаабыс јаҥыртылып, солынып јат. Соондо кӧрӱмис Кудайдыҥ кӧрӱмиле тӱҥей болуп калат.

7, 8. а) Акча-јӧӧжӧгӧ Иегова кандый кӧрӱмдӱ? (Јӧрмӧлдиҥ бажындагы јуруктарды кӧрӱгер.) б) Бис Иегованыҥ кӧрӱмиле јӧпсинип турзаас, баштапкы јерге нени тургузарыс?

⁷ Бистиҥ керектерис санааларыстаҥ ла сезимдеристеҥ камаанду (Марк 7:21—23; Иак. 2:17). Бу сӧстӧрди јакшы оҥдоп аларга, темдер кӧрӱп ийектер. Иисустыҥ чыкканы керегинде јетирӱлерде, акча-јӧӧжӧгӧ Иегованыҥ кӧрӱмин билип аладыс. Иегованыҥ Уулы бай эмес биледе  чыдаган (Лев. 12:8; Лука 2:24). Иисус чыгарда, Мария оны «айылчы тӱжер ӱйде олорго јер табылбаган учун, Оны чуулайла, ӧлӧҥ салгышка салып койды» деп айдылат (Лука 2:7). Иегова кӱӱнзеген болзо, Уулын эмеш јакшы јерде чыксын деп эдер эди, је Кудайга Иисусты чычадып ӧскӱретен билениҥ кӧгӱс кӧрӱмдӱ болгоны учурлу болгон.

⁸ Иисустыҥ чыкканы керегинде куучынды шӱӱп сананып, акча-јӧӧжӧгӧ Иегованыҥ кӧрӱмин оҥдоп аладыс. Кезик ада-энелер балдарын кӧгӱс јанынаҥ тыҥыдардыҥ ордына, акча-јӧӧжӧ јанынаҥ эҥ јакшыны берерге кӱӱнзейт. Је Иегованыҥ кӧрӱмиле болзо, баштапкы јерге кӧгӱс керектерди тургузар керек. Слер оныҥ кӧрӱмиле јӧпсинедигер бе? Слердиҥ керектереер нени кӧргӱзет? (Еврейлерге 13:5 кычырыгар.)

9, 10. Улусты бӱдӱрилтип турган кижиге Иегованыҥ кӧрӱмиле кӧрӱп турганыс недеҥ кӧрӱнет?

⁹ Анайда ок кижи улуска бӱдӱрилетен таш болуп турза, Кудай ого канайып кӧрӱп турганын шӱӱп сананып ийектер. Андый кижи керегинде Иисус: «Мойнына теерменниҥ тажын буулап, талайга таштаза, ого торт болор эди» — деп айткан (Марк 9:42). Кандый кату сӧстӧр! Иисус Адазыныҥ темиле чике јӱрген, оныҥ учун ӧскӧ улустыҥ сезимдерин сананбай турган христиандарды Иегова база јаратпай јат деп бис алаҥзыбас аргалу (Иоанн 14:9).

¹⁰ Бис Иегованыҥ ла Иисустыҥ мындый кӧрӱмиле јӧпсинедис пе? Бистиҥ керектерис нени кӧргӱзет? Темдектезе, бистиҥ кийген кийимис ле тыш бӱдӱмис ака-эјелерди бӱдӱрилтип, балыр санааларга кӱӱнзетпейт пе? Ака-эјелерди сӱӱп турганыс бойыстыҥ кӱӱнисти солыырга кӱӱнзедер бе? (1 Тим. 2:9, 10).

11, 12. Јаман керектерге Кудайдыҥ кӧрӱмин алынып, бойысты тудунып турганыс, бисти кинчектеҥ канайып корулаар?

¹¹ База бир тем кӧрӱп ийектер. Иегова чындык эмезин (неправедность) кӧрӧр кӱӱни јок (Иса. 61:8). Улуска толо кемдӱ эмезинеҥ улам чын јӱрерге кӱч болот деп Кудай оҥдоп јат, оныҥ учун ол бисти чындык јогын база јаман кӧрзин деп кӱӱнзедет. (Сарын 97:10 кычырыгар *.) Иегова кинчекти нениҥ учун кӧрӧр кӱӱни јок деп шӱӱп сананганыс, оныҥ кӧрӱмин алынарга болужар, бу биске чын јӱрерге ийде-кӱч берер.

¹² Анайда ок бис Иегова чылап чындык јогын јаман кӧрзӧӧс, Агару Бичикте бичилбеген де кандый бир керектерди христиандарга эдерге јараар ба, јок по деп оҥдоп ийерис. Темдектезе, бӱгӱнги кӱнде јескинчилӱ бир бије јаан ӧзӱм алынат. Бу бијени бијелеп турган ачык кийимдӱ кижи, кижиниҥ тизезине отурып, белкенчегиле эмезе бастыра  бойыла јайканып јат. Кезик улус бу бијени кинчек деп бодобой јат, не дезе бу эки кижини кожо конгон деп айдып болбозыҥ *. Је Иегова бу керегинде нени сананып турган? Ол кандый ла јаман керекти бир де јаратпай јат. Оныҥ учун бойысты тудунып, Кудайдыҥ кӧрӧр кӱӱни јок керектердеҥ кыйып јӱректер (Рим. 12:9).

13. Кудайдыҥ кандый бир суракта нени сананып турганын озодоҥ шӱӱп сананза, нениҥ учун јакшы болор эди?

¹³ Агару Бичикти таҥынаҥ ӱренген ӧйдӧ, Иегованыҥ кӧрӱм-санаазын ла оныҥ кӧрӱмин кандый бир айалгада канайып тузаланарын шӱӱп сананып туругар. Анайып, кандый бир айалга боло берзе, слер белен болорыгар (Укаа 22:3). Агару Бичиктеги темдерди кӧрӱп ийектер.

14. Иосифтиҥ Потифардыҥ ӱйине айткан сӧстӧринеҥ бис неге ӱренедис?

¹⁴ Иосиф Потифардыҥ ӱйиниҥ сӧзине кирбей, кача берген. Анайып, эш-нӧкӧрлӧргӧ берилген Иегованыҥ јакылтазын, Иосиф озодоҥ шӱӱп сананган деп кӧрӱнет. (Башталганы 39:8, 9 кычырыгар.) Анайда ок Иосиф Потифардыҥ ӱйине: «Кудайдыҥ алдына мындый кинчекти, кылыкты мен канайып эдетем?» — деген сӧстӧринеҥ, эш-нӧкӧрлӧр ортодо колбуларга Иегованыҥ кӧрӱмин алынганы кӧрӱнет. Је бисте кандый айалга болуп калардаҥ айабас? Темдектезе, иште кем-кем слерле сертежип (флирт) баштаган болзын. Эмезе телефоныгарга балыр јӱрӱмле колбулу кандый бир сообщение эмезе фотојурук келген болзын *. Бу учуралдарда Иегованыҥ кӧрӱмин озодоҥ шӱӱп сананып, оны алынып алзаар, јастырбаска јеҥил болор.

15. Биске байагы ӱч еврей уул чылап, Иеговага чындык артарга не болужар?

¹⁵ Эмди дезе Седрах, Мисах ла Авденаго деп ӱч еврей уулдыҥ темин кӧрӱп ийектер. Олор Навуходоносор каанныҥ тургускан алтын чалузына бажырбаган. Олордыҥ чике айткан каруузынаҥ Иеговага чындык артары керегинде озодоҥ шӱӱп салганы кӧрӱнет (Чыг. 20:4, 5; Дан. 3:4—6, 12, 16—18). Темдектезе, слердиҥ ижеерде тӧгӱн кудай јаҥла колбулу байрам ӧткӱрилерге јатканынаҥ улам, иштиҥ јааны слерди акча табыштырзын деп сураган болзын. Слер нени эдер эдеер? Мындый  айалга болголокто, Иегованыҥ кӧрӱм-санаазын озодоҥ шӱӱп сананыгар. Анайып, слерге байагы ӱч еврей уул чылап, бойыгардыҥ кӧрӱм-санаагарды јартаарга ла јастырбаска јеҥил болор.

16. Иегованыҥ кӧрӱмин нениҥ учун больницага кирердеҥ озо билип алар керек?

¹⁶ Анайда ок биске кенетийин медицинский болуш керек тушта, Иеговага чындык артарга нени эдер керек деген суракты база озодоҥ шӱӱп сананып алар керек. Бис канды бойын ла оныҥ тӧрт тӧс компонентин урдырбай јадыс. Је канла колбулу медицинский ӧскӧ процедураларды кажы ла кижи бойы кӧрӧт. Бу учуралда Иегованыҥ кӧрӱмин кӧргӱзип турган библиялык принциптерди шӱӱп сананар керек (Ап. ижи 15:28, 29). Мындый суракты больницага кирердеҥ озо шӱӱп сананып салза јакшы, нениҥ учун дезе больницада тыҥ оорып турган тужыгарда, эмчилер слерди кандый бир тӱп-шӱӱлтени эдерге капшайладар болор. Оныҥ учун эмденери јанынаҥ суракты шиҥдеп, кан јанынаҥ документти бичип, слерди эмдеп турган эмчи кижиле эмди ле куучындажып салар керек *.

17—19. Иегованыҥ кӧрӱмин нениҥ учун эмди ле оҥдоп алар керек? Биске кандый айалгаларга озодоҥ белетенип алар керек?

¹⁷ Эмди Петрдыҥ: «Бойыҥды киле, Кайраканым» — деп, сананбай айткан сӧстӧрине Иисус кандый каруу бергенин эске алып ийектер (Матфей 16:22, ЈТ). Иисус Кудайдыҥ табын, анайда ок оныҥ јердеги јӱрӱми ле ӧлӱми керегинде судурларды кӧп сананган болор. Мынайып шӱӱп сананганынаҥ улам ондо Кудайга  чындык артатан ла улус учун јӱрӱмин беретен ийде-кӱч болгон. (Матфей 16:21—23 кычырыгар.)

¹⁸ Бӱгӱнги кӱнде Кудай ишчилерин оныла колбуларын тыҥытсын, анайда ок кӧп ӧйин ле ийде-кӱчин сӱӱнчилӱ јарды јарлаарына берзин деп кӱӱнзейт (Матф. 6:33; 28:19, 20; Иак. 4:8). Је Иисусла болгон учуралда чылап, кезик улус биске болужарга болуп, бисти кандый бир ӧскӧ немеге кӱӱнзедер болор. Темдектезе, иштиҥ јааны јамыгарды јаанадып, ижеердиҥ јалын кӧптӧдӧргӧ турган болзын, је бу слердиҥ кӧгӱс керектереерге чаптыгын јетирер деп оҥдоп јадыгар. Эмезе школдо ӱренип турган болзоор, айылыгардаҥ ыраак јӱрӱп, јакшы школго ӱренетен арга ачылган болзын. Слер бу учуралдарда чын тӱп-шӱӱлтеге келерге, мӱргӱп, шиҥжӱ ӧткӱрип, јуук улузыгарла, аксагалдарла куучындажып ийерге кӱӱнзеер болорыгар. Оныҥ учун Иегованыҥ кӧрӱм-санаазын эмди ле не шӱӱп сананып албас? Ол тушта, мындый учуралдар боло берзе, ченелтеге кирбезигер. Анайып слер кӧгӱс амадуларыгарга јединеригер ле озодоҥ сананып алган тӱп-шӱӱлтегер аайынча јӱреригер.

¹⁹ Анайда ок база кандый айалга боло берерин шӱӱп сананарга јараар. Је кажы ла айалганы сананып салар арга јок. Андый да болзо, Агару Бичикти таҥынаҥ ӱренген ӧйдӧ Иегованыҥ кӧрӱм-санаазын шӱӱп сананып турганыс кандый бир айалга боло берзе ӱренгенисти эске алып, чын тӱп-шӱӱлтеге келерге болужар. Айдарда, Агару Бичикти ӱренип, Кудайдыҥ кӧрӱм-санаазын шӱӱп, оны алынып турактар. Анайда ок Кудайдыҥ кӧрӱмиле јӱргенис эмди де, келер де ӧйдӧ ойгор тӱп-шӱӱлтелер эдерге канайып болужарын сананып јӱректер.

20, 21. а) Јаҥы телекейде бисте кандый јайым болор? б) Бис недеҥ улам эмди ле ырысту јӱрер аргалу?

²⁰ Бис јаҥы телекейди энчикпей сакып јадыс. Бистиҥ кӧбизис јердеги райда јӱрерге иженет. Кудайдыҥ Каандыгы башкарза, улус база качан да кыйын-шыра кӧрбӧс. Анайда ок кажы ла кижи нени эдерин бойы кӧрӧр.

²¹ Је мындый јайым токтодуларлу болор. Нениҥ учун дезе јобош улус нези чын, нези јастыра деп талдап тура, Иегованыҥ јасагыла, кӧрӱм-санаазыла башкарынар (Сар. 37:11). Је бу ӧй келгелекте, бис эмди ле Кудайдыҥ кӧрӱм-санаазын алынып, ырысту јӱрер аргалу.