1, 2. а) Бис эҥ ле тыҥ нени баалайдыс? б) Бис кандый чындыктарды баалап јадыс ла нениҥ учун? (Јӧрмӧлдиҥ бажындагы јуруктарды кӧрӱгер.)

СЛЕР эҥ ле тыҥ нени баалайдыгар? Иегованыҥ Керечилери эҥ ле тыҥ Кудайла колбуларын баалап јат. Анайда ок бис библиялык чындыкты баалайдыс. Оныҥ болужыла теҥеридеги Адабыс бистиҥ најыбыс болуп калган (Кол. 1:9, 10).

² Бистиҥ Улу Ӱредӱчибис бойыныҥ Сӧзи ажыра сӱрекей кӧп чындыктарды ачып турганын сананып ийзеер де! Ол биске адыныҥ тереҥ учурын јартайт, бойыныҥ сӱрекей јакшы кылык-јаҥын кӧргӱзет, бисти сӱӱп турганынаҥ улам бойыныҥ Уулын, Иисусты, толынты эдип бергенин куучындайт. Анайда ок Мессиан Каандык керегинде чындыкты ачат. Майлаткан христиандарга теҥериде јӱретен ижемји берет, «ӧскӧ койлорго» јердеги райда јӱретен ижемји берет (Иоанн 10:16). Ол бисти јӱрӱмде тузаланатан принциптерге ӱредип јат. Бис бу чындыктарды баалап јадыс, не дезе, олор бисти  Јайаачыбыска јууктадат ла јӱрӱмисти калас ӧткӱрбеске болужат.

3. «Чындыкты садып ал» деген сӧстӧр нени темдектебей јат?

³ Иегова — кысканбас Кудай. Ол чындыкты бедиреп турган улуска кӧп алкыштар берет. Керек дезе, бойыныҥ сӱӱген Уулын да бис учун берген. Оныҥ учун чындыкты акчала садып алзын деп некебей јат. Бир катап Симон деген кижи, улуска агару тын беретен јаҥду болорго, элчи Петрга акча берген. Је Петр ого мынайып айткан: «Мӧҥӱниҥ сениле кожо ӧлӱмге болзын, нениҥ учун дезе Кудайдыҥ сыйын акчала садып аларым деп санангаҥ» (Ап. ижи 8:18—20). Айса болзо, Кудайдыҥ «чындыкты садып ал» деген агару тыныла бичилген сӧстӧрин канайып оҥдоор?

4. Бу јӧрмӧлдӧҥ чындык керегинде нени билип аларыс?

⁴ Укаа сӧстӧр 23:23 кычырыгар *. Кудайдыҥ Сӧзиндеги чындыкты таап аларга, нени эдер керек? Биске нени ле артыргызарга белен болор керек. Укаа сӧстӧр деген ойгор бичикте айдылганыла болзо, бис чындыкты «садып», ӧскӧртӧ айтса билип алган болзоос, биске оны бир де «сатпас», ӧскӧртӧ айтса артыргыспас керек. Бу јӧрмӧлдӧ «чындыкты садып алары» нени темдектейт ле оны садып аларга, нени эдер керек деп сурактар шӱӱжилер. Мынайып чындык учун быйанду болгоныс ӧзӧр лӧ оны качан да «сатпаска» бек шӱӱп алганыс тыҥыыр. Анайда ок Иегованаҥ алган чындык бастыра немедеҥ баалу деп билип аларыс.

5, 6. а) Чындыкты акча тӧлӧбӧзинеҥ канайып садып аларга јараар? Тем куучындап беригер. б) Чындык биске кандый туза экелет?

⁵ Кезикте акча тӧлӧбӧзинеҥ де берилип турган немени аларга, та нени де эдер керек болот. Укаа сӧстӧр 23:23-те «садып ал» дегени кандый бир баалу немени аларга та нени де эдерин эмезе оны ӧскӧ немеле толып аларга белен болорын темдектейт. Чындыкты «садып алары» дегенин мындый темле јартаарга јараар. Темдектезе, банан магазинда акча тӧлӧбӧзинеҥ берилет деп угуп ийдеер. Је банан слердиҥ столоорго бойы ла једип келбес эмей. Оныҥ учун оны аларга, слер озо баштап магазин барып јадыгар. Анайып ла чындык акча тӧлӧбӧзинеҥ де берилип турган болзо, је оны аларга биске та нени де эдер керек.

⁶ Исаия 55:1—3 кычырыгар *. «Чындыкты садып ал» дегенин јакшы оҥдоорго, агару тынныҥ болужыла бичилген Исаияныҥ сӧстӧри болужат. Бу ӱлгерлерде Иегова чындыктыҥ  сӧстӧрин суула, сӱтле, кызыл аракыла тӱҥдештирет. Кудайдыҥ Сӧзиндеги чындык соок, ару суудый болуп, бисти сергидип јат. Баланыҥ ӧзӱмине керектӱ сӱттий болуп, бисти тыҥыдып, кӧгӱс јанынаҥ ӧзӧргӧ болужып јат. Анайда ок Иегованыҥ сӧстӧри кызыл аракыга тӱҥей. Мыны канайып оҥдоор? Агару Бичикте кызыл аракы кижини сӱӱндирип јат деп айдылат (Сар. 104:15). Оныҥ учун Иегова бойыныҥ ишчилерин: «Кызыл аракыны... акча тӧлӧбӧзинеҥ алыгар» — деп айтканыла, оныҥ сӧзин бӱдӱрип јӱрзегер, сӱӱнчи аларыгар деп бӱдӱмјилеерге кӱӱнзеген (Сар. 19:8). Мындый јараш тӱҥдештирӱнеҥ Кудайдыҥ Сӧзиндеги чындыкла танышканы ла оны јӱрӱмде тузаланганы кандый туза экелип турганы кӧрӱнет. Айдарда, бистиҥ албаданганысты чындык учун тӧлӧгӧн баа деп айдарга јараар. Кезик улуска чындыкты садып аларга нени эдерге келишкенин кӧрӱп ийектер.

7, 8. а) Чындыкты садып аларга, нениҥ учун ӧйисти берер керек? б) Бир студент кыс чындыкты садып аларга нени эткен ле бу кандый једимге экелген?

⁷ Ӧй. Чындыкты садып аларга, улус ӧйин берет. Темдектезе Каандык керегинде јарды угарга, Агару Бичикти ле ого тӧзӧлӧнгӧн бичиктерди јаантайын кычырарга ла таҥынаҥ ӱренерге, анайда ок јуунныҥ туштажуларына белетенерге ле барарга, ӧй керек болот. Андый ӧйди табарга, јаан эмес керектерди туура јылдырарга келижет. (Ефестегилерге 5:15, 16 кычырыгар.) Агару Бичиктиҥ тӧс ӱредӱлерин јакшы оҥдоп аларга канча кире ӧй керек? Кажы ла учурал башка. Темдектезе, Иегованыҥ ойгорын, оныҥ амадуларын ла эткен керектерин билерге, учы кыйузы јок ӧй керек (Рим. 11:33). «Каруулчы шибеениҥ» баштапкы чыгармазында чындык «јараш чечекле» тӱҥдештирилген. Бу јӧрмӧлдӧ мынайып айдылган: «Чындыктыҥ бир чечегиле болорзынбагар. Бир ле чечек једетен болзо, Кудай ӧскӧ чындыктарды ачпас эди. Оныҥ учун олорды токтобозынаҥ бедиреп, јуугыгар». Бойыгардаҥ мынайып сураарга јараар: «Мен чындыктыҥ канча чечегин јууп алгам?» Бис ӱргӱлјиге јӱрзеес, Иегова керегинде јаҥы билгирлерди јаантайын аларыс. Је эм тургуза, чындыкты тереҥ билерге, ӧйди ойгор тузаланар керек. Чындыкты бедиреген бир кыстыҥ учуралын кӧрӱп ийектер.

⁸ Јопон јериниҥ Марико * деген кыс Нью-Йорктӧӧн (США) ӱренип келген. Ол Јопон јериндеги 1950 јылдардыҥ учында башталган кудай јаҥга бӱткен. Бир катап Марико айылдар сайын јарлап јӱрген бистиҥ пионер эјеле танышкан. Бу кыс библиялык билгирлер алып баштайла сӱрекей тыҥ сӱӱнген, оныҥ учун эјени Агару Бичикти бир неделеде эки катап ӱренерге сураган. Мариконыҥ кӧп ӧйи ӱредӱге ле кере  тӱжине иштебей турган ишке барып та турган болзо, ол тургуза ла јуунныҥ туштажуларына јӱрӱп баштаган. Анайда ок Агару Бичикти ӱренерге ӧй табарга, Марико общественный ижин токтодып салган. Мындый алтамдар эдип, ол кӧгӱс јанынаҥ тӱрген ӧзӱп баштаган. Анайып, бир де јыл болголокто, сууга чӧҥӱрилген. А база алты ай ӧдӧ берерде, 2006 јылда Марико пионердиҥ ижин баштаган. Ол бӱгӱнги де кӱнде пионер болуп иштейт.

9, 10. а) Чындыкты билип алзаас, акча-јӧӧжӧгӧ кӧрӱмис канайып солынып јат? б) Бир јиит ӱй кижи нени артыргыскан ла андый шӱӱлтеге келгени керегинде ол нени айдат?

⁹ Акча-јӧӧжӧ. Кезикте чындыкты садып аларга, акчалу ишти эмезе карьераны артыргызар керек. Иисус Петр ла Андрей деп балыкчыларды «улус тудаачы» болугар деп кычырарда, олор «шӱӱнин артырып койды» (Матф. 4:18—20). Је бӱгӱнги кӱнде улус чындыкты уккан ла кийнинде ижин артыргыспай јат эмей. Нениҥ учун дезе олор Агару Бичикте бичилгениле, бойыныҥ билезин кичеер учурлу (1 Тим. 5:8). Је андый да болзо, андый улуска акча-јӧӧжӧгӧ кӧрӱмин солып, јӱрӱмде эҥ керектӱзин чын јерге тургузарга ӱренер керек. Иисус бу керегинде мындый сӧстӧр айткан: «Бойыгарга јерде јӧӧжӧ јӧӧбӧгӧр... Карын, бойыгарга теҥериде јӧӧжӧ јӧӧгӧр» (Матф. 6:19, 20). Анайып ла бир јиит ӱй кижи эткен.

¹⁰ Мария гольф деген ойынга школдоҥ до озо ӱренип баштаган. Ол мындый спортко туружып, јаан једимдерге јеткен ле университетке ӱренерге стипендия алган. Гольф оныҥ јӱрӱми болгон, оныҥ учун ол профессиональный гольфистка болорго ло јаан гонорарлар аларга кӱӱнзеген. Је оноҥ Мария Агару Бичикти ӱренип баштаган. Ого библиялык чындыктарды билерге тыҥ јарап туратан ла бу чындыктар оныҥ јӱрӱмин солып турганына сӱӱнетен. Ол мынайып айдат: «Кӧрӱм-санаамды ла јӱрӱмимди солыырга библиялык принциптерди канча ла кире кӧп тузаланып турзам, ончо ло кире ырысту болгом». Јӱрӱмде кӧгӱс јанынаҥ ла акча-јӧӧжӧ јанынаҥ бир уунда байып болбозыҥ деп, Мария оҥдоп алган (Матф. 6:24). Чындыкка болуп ол јарлу гольфистка болорынаҥ ла байып каларынаҥ мойноп ийген. Мария чындыкты садып алала, пионердиҥ ижин баштаган. Оныҥ айтканыла болзо, эмди ол јӱрӱмин калас ӧткӱрбей турган сӱрекей ырысту кижи болот.

11. Чындык аайынча јӱрерге шӱӱп алганысты најыларыс ла тӧрӧӧндӧрис нениҥ учун јаратпас болордоҥ айабас?

¹¹ Најылар ла тӧрӧӧндӧр. Чындык аайынча јӱрерге шӱӱп алганысты најыларыс ла тӧрӧӧндӧрис јаратпас болордоҥ айабас. Нениҥ учун? Иисус ӱренчиктери керегинде мынайып мӱргӱген: «Олорды чындыкла агарулап сал: Сениҥ сӧзиҥ — чындыктыҥ бойы» (Иоанн 17:17). «Олорды... агарулап сал» дегенин «олорды айрып сал» деп айдарга јараар. Чындыкты алынып, бис бу телекейдеҥ айрылып јадыс, нениҥ учун дезе бис эмди оныҥ нормаларыла эмес, је Кудайдыҥ нормаларыла јӱредис.  Мынаҥ улам бистиҥ кӧрӱм-санаагыс солынып јат, оныҥ учун улустыҥ да кӧрӱми биске солынып јат. Бис најыларыска ла тӧрӧӧндӧриске јакшы баштанарга албаданып турган да болзоос, олор бистеҥ ырап, керек дезе јаҥы кудай јаҥыска удурлажардаҥ да айабас. Је биске мыны кайкабас керек. Иисус айткан: «Кижиге бойыныҥ айылдагы улузы ӧштӱ болор» (Матф. 10:36). Анайда ок Иисус бисти чындыкты садып алган болзоос, артыргысканыстаҥ јӱс катапка артыктай аларыс деп бӱдӱмјилеген. (Марк 10:28—30 кычырыгар.)

12. Бистиҥ бир ака чындыкка болуп нени эткен?

¹² Предприниматель болуп турган еврей укту Аарон деп кижи Кудайдыҥ адын айдарга јарабас деп сананган. Ол јаштаҥ ала мынайып ӱредилген де болзо, чындыкты таап аларга албаданган. Бир катап ого Иегованыҥ Керечили Кудайдыҥ адына кирип турган тӧрт тунгак табышка ӱнгӱр табышту таныктар кожуп ийзе, бу ат «Иегова» деп кычырыларын кӧргӱзип берген. Аарон тыҥ сӱӱнип, раввиндерге јилбилӱ јетирӱни куучындап берерге синагогага барган. Оныҥ санаазыла болзо, Кудайдыҥ ады керегинде чындыкты билип, олор база сӱӱнер эди. Је олор ого тӱкӱрип, синагоганаҥ чыгара сӱрӱп ийген. Ааронныҥ тӧрӧӧндӧриле де колбулары ӱрелген. Је ол чӧкӧбӧй, Агару Бичикти ӱренерин токтотпогон ло бастыра јӱрӱмине Иеговага јалтанбай иштеген. Бис те Аарон чылап, чындыкка болуп, улустыҥ алдына тоомјылу болгонысты јылыйтарга ла тӧрӧӧндӧрисле де ыраажып каларга белен.

13, 14. Чындыкты садып аларга кӧрӱм-санааны ла јӱрӱмди канайып солыыр керек? Тем куучындап беригер.

¹³ Кудайга јарабай турган кӧрӱм-санаа ла јӱрӱм. Чындыктыҥ јолына туруп, библиялык нормаларла јӱрерге, кӧрӱм-санааны ла јӱрӱмди солыыр керек. Элчи Петр мындый солынталар керегинде мынайып бичиген: «Сӧсуккур балдардый болыгар, башкыда билбей јӱргенигердеҥ улам слерде болгон кычаларга бакпагар. Карын... бойыгар да јӱрӱмеерде агару болыгар» (1 Петр 1:14, 15). Кинчектерине кӧмӱлип калган Коринфтиҥ улузына чындыкты садып аларга, јӱрӱминде јаан солынталар эдер керек болгон (1 Кор. 6:9—11). Анайып ла бӱгӱнги кӱнниҥ улузы чындыкты садып аларга, Кудайга јарабай турган јӱрӱмнеҥ айрылар учурлу. Анайда ок Петр христиандарга бичиген: «Ӧткӧн ӧйлӧрдӧ кара јаҥдулар чылап јӱргенигер, болор. Балыр јӱрӱп, кычага башкартып, аракыдап, тойлоп-јыргап, ичип-јип, јескинчилӱ чалуларга бажырган эдигер» (1 Петр 4:3).

¹⁴ Девинн ле Джасминниҥ учуралын кӧрӱп ийектер. Олор узак јылдардыҥ туркунына аракыдап јӱрген. Девинн јакшы бухгалтер болгон до болзо, је аракынаҥ улам бир де ишке узак иштеп болбойтон. Джасмин ачынчак ла кылыкту ӱй кижи болгон. Бир катап јолдо эзирик барып јадала, миссионерлер болуп турган эки Керечилге  туштаган. Олор оныла Агару Бичик ӱренерге куучындажып алган. Је миссионерлер олордыҥ айылына бир неделенеҥ келерде, олор экилези эзирик болгон. Миссионерлердиҥ келерин олор сакыбаган да. Је миссионерлер база такып келерде олорло ӱредӱ башталган. Джасмин ле Девинн бажынаҥ ла ала Агару Бичикти јакшы ӱренип, билгирлерин тузаланган. Ӱч айдыҥ туркунына олор аракызын таштап, эш-нӧкӧрлӧр болорго јасак аайынча регистрация эдип алган. Мындый солынталарды кӧрӱп, олордыҥ деремнезиниҥ кезик улузы база Агару Бичик ӱренерге кӱӱнзей берген.

15. Кезик улус чындыкка болуп нени артыргызат ла нениҥ учун?

¹⁵ Кудайга јарабай турган чӱм-јаҥдар. Кезик улуска Кудайга јарабай турган чӱм-јаҥдарды артыргызарга коркышту кӱч болот. Кемге де Агару Бичикте јарадылбай турган чӱм-јаҥдарды артыргызарга јеҥил болот, а кем де најыларынаҥ, тӧрӧӧндӧринеҥ эмезе кожо иштеп турган улузынаҥ коркып, мындый алтамды эдерге белен эмес болот. Анчада ла јуук кижи божогон ӧйдӧ ӧткӱрилип турган јӱзӱн-базын чӱм-јаҥдардаҥ кыйарга кӱч болот (Јаҥ. т. 14:1). Је ака-эјелердиҥ теми бисти андый солынталар эдерге кӱӱнзедер болор. Баштапкы чакта јаткан Эфестиҥ улузы нени эткенин эске алып ийектер.

16. Эфестиҥ кезик улузы чындыкты садып аларга нени эткен?

¹⁶ Эфес деген кала тармазыныҥ таркаганыла јарлу болгон. Је Агару Бичиктеги чындыкты билип ийеле, тармала урушкан кезик улус нени эткен? Агару Бичикте мынайып айдылган: «Илбизиндеп јӱргендердиҥ тапту кӧбизи тӱрбектерин чогуп, ончо улус кӧзинче ӧртӧдилер. Баазын чотоп кӧрӧрдӧ, бежен муҥ мӧҥӱн акчага турар болды. Кайраканныҥ сӧзи анайып элбеде јайылып, кӱч алынып турды» (Ап. ижи 19:19, 20). Бу чындык христиандар баалу бичиктерин ӧртӧп, јаан алкыштар алган.

17. а) Бис чындыкты садып аларга, нени эткенис? б) Келер јӧрмӧлдӧ кандый сурак шӱӱжилер?

¹⁷ Слер чындыкты садып аларга нени эткенеер? Бис ончобыс чындыктыҥ «чечегин» јууп аларга, ӧйисти бергенис. Кем де чындыкка болуп кӧп акча иштееринеҥ мойногон, а кем де најыларыла, тӧрӧӧндӧриле колбуларын јылыйткан. Кӧп улус бойыныҥ кӧрӱм-санаазын ла јӱрӱмин солыган эмезе Кудайга јарабай турган чӱм-јаҥдардаҥ айрылган. Је чындыкты садып аларга нени де эткен болзоос, Кудайдыҥ чындыгы бастыра немедеҥ баалу. Бу чындык биске эҥ ле баалу эрјинени — Кудайла јуук колбуларды берген. Чындыкты билгенис кандый алкыштар берип турганын сананзаас, кезик улус оны канайып садып ийет, ӧскӧртӧ айтса, артыргызып салат деп кайкап јадыс. Је улус чындыкты нениҥ учун садып ийердеҥ айабас ла биске мындый јастыра алтам этпеске не болужар деген сурак келер јӧрмӧлдӧ шӱӱжилер.