1, 2. а) Ченелтелерди турумкай ӧдӧргӧ, биске не болужып јат? Јартап беригер. б) Бис бу јӧрмӧлдӧ нени шӱӱп кӧрӧрис?

«БУ ЧЕНЕЛТЕНИ бойым качан да ӧдӱп болбос эдим!» Слер мындый сӧстӧр качан бирде айтканаар ба? Темдектезе, слер јаан ооруга табарткан эмезе јуук кижигерди јылыйткан болороор. Ӧткӧн кӱчтерди сананып, ӱзе немени јӱк ле Иегованыҥ болужыла ӧткӧнигер деп оҥдоп јадыгар. Оныҥ агару тыны слерге «артыкташкан кӱч» берип, кӱчтерди турумкай ӧдӧргӧ болушкан (2 Кор. 4:7—9).

² Анайда ок бис агару тын јокко, калју телекейдиҥ каршузына удура туруп болбос эдис (1 Иоанн 5:19). Бого ло коштой, бис «теҥеридеги јаманныҥ тындарыла» тартыжып јадыс (Еф. 6:12). Бу ончо немени ајаруга алып, Иегова агару тыны ажыра биске канайып болужып турганын кӧрӱп ийектер. Мыныҥ кийнинде, агару тынныҥ болужын толо аларга нени эдер керек деп шӱӱжип ийерис.

3. Иегованыҥ биске ченелтелерди ӧдӧргӧ болужып турган аргаларыныҥ бирӱзи кандый?

³ Иегованыҥ агару тыны биске, ченелтелер де болуп турза, бойыстыҥ молјуларысты бӱдӱрерге ийде-кӱч берет. Анайып, элчи Павел, кӱчтер де болуп турарда, «Христостыҥ кӱчине» иженип турганы учун Иегованыҥ ижин бӱдӱрер аргалу болгонын оҥдоп туратан (2 Кор. 12:9). Павел экинчи миссионер јорыгында эрчимдӱ јарлаган да, бойын јеткилдеерге иштеген де. Ол Коринф калада болордо, Акила ла Прискилланыҥ айылында јаткан. Бу эш-нӧкӧрлӧр палаткалар кӧктӧп иштеген.  Павел база палаткалар кӧктӧп билер болгон, оныҥ учун кезик кӱндеринде олорло кожо иштейтен (Ап. ижи 18:1—4). Мынайып, Кудайдыҥ агару тыны ого иштеерге де, јарлаарга да болушкан.

4. 2 Коринфтегилерге 12:7—9-ла болзо, Павелде кандый ченелте болгон?

⁴ 2 Коринфтегилерге 12:7—9 кычырыгар. Павелдиҥ: «Эди-каныма „тегенек“... берилген» — деп айтканы нени темдектейт? Агару Бичиктиҥ Заокский кӧчӱрмезинде «тегенек» деп сӧс «ӧйкӧп турган тегенек» деп кӧчӱрилген. Тегенек кижиге ас эмес оору јетирип јат, айдарда, Павел, бойыныҥ ӧҥзӱредип турган ченелтези керегинде айдарга сананган болор. Павел бу кыйнадып турган ченелтени «сатананыҥ элчизи» деп адаган. Павелдиҥ ченелтезинде чике ле Сатана эмезе кӧрмӧстӧр бурулу болбогон болор. Је олор Павелдиҥ «тегенегин» кӧрӱп ийеле, оноҥ тыҥ кыйналзын деп, «тегенекти» оноҥ тереҥ сайган болор. Бу айалгада Павел нени эткен?

5. Иегова Павелдиҥ мӱргӱӱлине кандый каруу берген?

⁵ Озо баштап Павел бу «тегенектеҥ» јайымдаларга, Иегованаҥ болуш сураган. Ол мынайып айткан: «Оны менеҥ айрызын деп, Кайраканды [Иегованы] ӱч катап јайнагам». Је Павел јайнап сураган да болзо, тегенектеҥ јайымдалбаган. Айса болзо, Павелдиҥ мӱргӱӱли каруу јок артты ба? Јок. Иегова каруузын берген. Иегова оны ченелтенеҥ айрыбаган да болзо, је ченелтени ӧдӧтӧн ийде-кӱч берген. Ол айткан: «Сен чине јок тужыҥда Мениҥ кӱчим толо кемине једет» (2 Кор. 12:8, 9). Анайып, Павел Кудайдыҥ болужыла сӱӱнчизин ле кӧксиндеги амырын јылыйтпаган (Флп. 4:4—7).

6. а) Иегова мӱргӱӱлдериске кандый каруу берер аргалу? б) Абзацта берилген ӱлгерлердиҥ кажызы слерге ийде берет?

⁶ Слерди Иегова кандый бир ченелтенеҥ јайымдазын деп, Павел чилеп, јайнаганаар ба? Тыҥ суранган кийнинде, ченелте ӧтпӧй, керек дезе оноҥ до кӱч болуп каларда, слерге Иегованыҥ јарадузын јылыйтып салганаар деп билдирген болор. Андый болзо, Павелдиҥ темин сананып ийигер. Иегова Павелдиҥ мӱргӱӱлине каруу берген болордо, слердиҥ де мӱргӱӱлигерге алаҥзу јогынаҥ каруу берер! Ол слердиҥ ченелтегерди јоголтпос то болзо, је агару тынныҥ болужыла кӱчтерди турумкай ӧдӧргӧ ийде-кӱч берер (Сар. 61:3, 4). Слер «јыга сок[тыртып]» та калзагар, Иегова слерди артыргыспас (2 Кор. 4:7—9).

7, 8. а) Агару тын незиле салкынга тӱҥей? б) Петр агару тынныҥ болужын кандый темле јартаган?

⁷ Биске агару тын база канайып болужат? Ол, тымык јок талайдагы салкын чылап, биске јоткон ошкош ченелтелерди ӧдӱп, амыр јерге — Кудайдыҥ јаҥы телекейине — једерге болужат.

⁸ Элчи Петр балыкчы болгон, оныҥ учун парусту керепле јӱзерин јакшы билген. Оныҥ да учун агару тынныҥ болужын јартаарга, талайла колбулу сӧстӧр тузаланган болор. Ол бичиген: «Јарлыкчылардыҥ сӧзи кижиниҥ табыла качан да айдылбаган, је Кудайдыҥ агару улузы Агару Тынга баштадып, сӧсти Кудайдаҥ айткандар». Бу ӱлгерде «баштадып» деп кӧчӱрилген грек сӧсти, «башкартып» эмезе «апардырып» деп кӧчӱрерге јараар (2 Петр 1:21).

9. Петр нениҥ учун «баштадып» деп сӧсти тузаланган?

⁹ Петр нениҥ учун «баштадып» деп сӧсти тузаланган? Бого тӱҥей, андый ла учурлу грек сӧсти Апостолдордыҥ ижинде Лука «салкынныҥ табына салдырып» бараткан кереп керегинде бичиген тушта тузаланган (Ап. ижи 27:15). Айдарда, Агару Бичикти бичиген улус агару тынга баштаткан деп Петрдыҥ айтканы, бир Агару Бичиктиҥ шиҥдеечизиниҥ сӧстӧриле болзо, «талайла јӱзӱп  јӱрериле колбулу сӱреен јакшы метафора» болот. Айдарда, Петрдыҥ сӧстӧриниҥ учуры мындый болгон: канайып кереп једетен јерине салкынныҥ болужыла једет, анайып ла судурчылар ла Агару Бичикти бичигендер агару тынныҥ болужыла Кудайдыҥ јакарузын бӱдӱрип салган. Байагы ла шиҥдеечи мынайып айткан: «Судурчылар, сӱрлеп айтса, бойлорыныҥ парустарын кӧдӱрип алатан». Иегова дезе, бойыныҥ јанынаҥ керектӱ ишти эткен: салкын ийген, ол эмезе агару тынын. Бичиичилер дезе, бойы јанынаҥ керектӱ ишти эткен: олор агару тынга башкартып јӱрген.

10, 11. Бисти агару тын апарат деп бӱдӱмјиленип аларга, кандый эки алтам эдер керек? Тем куучындап беригер.

¹⁰ Иегованыҥ Агару Бичикти агару тынныҥ болужыла бичиткен ӧйи ӧдӱп калган эмей. Је ол бойыныҥ албатызына јакаруларды агару тынныҥ болужыла тӱҥей ле берип јат. Иегова, алдындагызындый ла чылап, бойыныҥ јанынаҥ керектӱ ишти бӱдӱрет. Биске, агару тынныҥ болужын аларга, нени эдер керек? Бойыстыҥ јаныстаҥ ижисти бӱдӱрип турганыс деп, бӱдӱмјиленип алар керек. Мыны канайып эдер?

¹¹ Тем кӧрӱп ийектер. Талайчыларга салкын болушсын деп, эки немени ундыбас керек. Баштапкызында, керепке салкынды тудуп аларга, ачык талайга чыгар керек. Нениҥ учун дезе салкын јогынаҥ кереп јӱзӱп болбос. Экинчизинде, парустарды канча кире арга бар, ончо ло кире јаан јайаар керек. Нениҥ учун дезе, талайда салкын бар да болзо, је парустар јайылбаганча, кереп ичкери барбас. Анайып ла бис Иеговага јӱк ле агару тынныҥ болужыла иштеер аргалу. Агару тынныҥ болужын аларга, эки алтам эдер керек. Баштапкызында, биске, сӱрлеп айтса, салкын согуп турган ачык талайда болор керек, ӧскӧртӧ айтса, Кудайдыҥ агару тыныла башкарылып турган ишке туружар керек. Экинчизинде, биске «парустарысты јаанада ачып алар керек», ӧскӧртӧ айтса, агару иште  бастыра ийде-кӱчистеҥ туружар керек (Сар. 119:32). Ол тушта, агару тын биске истежӱлердиҥ ле ченелтелердиҥ толкуларын ӧдӧргӧ болужар. Анайда ок јолдоҥ туура чыга бербеске ле Кудайдыҥ амыр јаҥы телекейине једип барарга болужар.

12. Эмди нени шӱӱп кӧрӧрис?

¹² Мынайып, агару тын биске канайып болужып турганын билип алдыс. Ол биске ченелтелерди турумкай ӧдӧргӧ ийде-кӱч берет. Анайда ок ичкери барарга ла ӱргӱлји јӱрӱмге апарып јаткан јолдоҥ туура барбаска болужат. Эмди, агару тынныҥ болужын толо аларга болужатан тӧрт јӧп кӧрӱп ийектер.

13. 2 Тимофейге 3:16, 17-ле болзо, Агару Бичик бисти канайып солыыр аргалу? Агару Бичик бисти солызын деп, нени эдер керек?

¹³ Баштапкызында, Кудайдыҥ Сӧзин ӱренигер. (2 Тимофейге 3:16, 17 кычырыгар.) «Кудайдыҥ Тыныла» деген сӧсколбу грек сӧстӧҥ кӧчӱрилген. Бу грек сӧс «Кудай» ла «тынар» деп сӧстӧрдӧҥ бӱткен. Кудай Агару Бичикти бичиген улустыҥ санаазына бойыныҥ санааларын «кийдире тынып ийерге», агару тынын тузаланган. Бис Агару Бичикти кычырып, шӱӱп сананып турзаас, Кудайдыҥ јакарулары бистиҥ санаабыска ла јӱрегиске кирип јат. Иегованыҥ тыныла бичилген сӧстӧр бисти оныҥ табына келиштире јӱрерге кӱӱнзедет (Евр. 4:12). Је агару тынныҥ болужын толо аларга, Агару Бичикти кычырарына ла тереҥ шӱӱп сананарына ӧй табып турар керек. Ол тушта, Агару Бичик бистиҥ айткан сӧстӧриске ле эткен керектериске тузазын јетирер.

14. а) Христиан туштажуларда агару тын бар деп, бис нениҥ учун алаҥзыбай јадыс? б) Бисти агару тын апарзын деп, нени эдер керек?

¹⁴ Экинчизинде, Кудайга ака-эјелерле кожо бажырыгар (Сар. 22:22). Христиан туштажуларда бис, сӱрлеп айтса, «салкынды тудуп алар» аргалу. Нениҥ учун дезе бу туштажуларда Иегованыҥ тыны бар (Ачыл. 2:29). Бис нениҥ учун мында алаҥзыбай јадыс? Нениҥ учун дезе, Кудайга ака-эјелерле кожо бажырып тура, бис агару тын сурайдыс, Кудайдыҥ Сӧзине тайанган Каандыктыҥ кожоҥдорын кожоҥдойдыс, анайда ок агару тынла кӧстӧлгӧн акалардыҥ библиялык куучын-эрмектерин угуп јадыс. Бу ла агару тын эјелерге туштажуларда јакаруларын бӱдӱрерге болужат. Агару тынныҥ болужын толо аларга, биске туштажуларга белетенер керек ле јартамал береринде туружар керек. Ол тушта, канайып салкын ачык парустарлу керепти апарып јат, анайып ла агару тын бисти ичкери апарар.

15. Агару тын јарлаар иште канайып болужат, бис нени эдер учурлу?

¹⁵ Ӱчинчизинде, јарлагар. Јарлаар иште Агару Бичикти ачып турзаас, биске агару тын јарлаарга ла улусты ӱредерге болужат (Рим. 15:18, 19). Је Кудайдыҥ агару тыныныҥ болужын толо аларга, јарлаар иште јаантайын туружып, кандый ла айалгада Агару Бичикти тузаланар керек. Јарлаар иш тӱжӱмдӱ болзын деп, «Јӱрӱмис ле ижибис» деген иштиҥ тетрадынаҥ куучындардыҥ планын тузаланарга јараар.

16. Агару тынды алатан эҥ ле тӱрген арга кандый?

¹⁶ Тӧртинчизинде, мӱргӱгер (Матф. 7:7—11; Лука 11:13). Агару тынды алатан эҥ ле тӱрген арга — Иеговага мӱргӱӱри. Иеговага мӱргӱӱрге эмезе оныҥ јакшы сыйын, агару тынын аларга, биске кем де, не де — тӱрмениҥ стенелери де, Сатана бойы да буудактап болбос (Иак. 1:17). Агару тынныҥ болужын толо аларга, биске канайып мӱргӱӱр керек? Каруузын аларга, јӱк Луканыҥ Сӱӱнчилӱ Јарында бичилген укаа сӧсти кӧрӱп ийектер *.

17. Лука 11:5—9, 13-те бичилген укаа сӧстӧҥ кандый тӱп-шӱӱлте эдерге јараар?

¹⁷ Лука 11:5—9, 13 кычырыгар. Иисустыҥ укаа сӧзи агару тынды канайып сураар керек деп кӧргӱзет. Бу укаа сӧстӧги кижи чӧкӧбӧй кӧп катап сураганынаҥ улам, керектӱ немезин алып алган. Тӱн аразы болгон до болзо, ол кижи најызынаҥ болуш сураарга уйалбаган *. Иисус бу укаа сӧсти куучындап, мӱргӱӱл керегинде нени айдарга сананган? Ол айткан: «Сурагар — слерге берилер, бедирегер — таап аларыгар; токылдадыгар — слерге ачып бергилеер». Мынаҥ кандый тӱп-шӱӱлте эдерге јараар? Агару тын биске болушсын деп турган болзоос, биске оны кӧптӧдӧ сураар керек.

18. Иисустыҥ укаа сӧзи аайынча, Иегова агару тынын берер деп, бис нениҥ учун алаҥзыбай јадыс?

¹⁸ Иисустыҥ укаа сӧзи, Иегова биске агару тынын нениҥ учун кыйалта јогынаҥ берер деп, оҥдоорго болужат. Укаа сӧстӧ айдылган кижи орой келген айылчыны кӱндӱлеерге кӱӱнзеген. Је айылчыны азыраарга курсак јок болордо, ол айылдаш кижиге барган. Иисустыҥ сӧстӧриле болзо, ол айылдаш кижинеҥ калашты тыҥ сураганынаҥ улам алган. Бу укаа сӧслӧ Иисус бисти неге ӱредерге сананган? Толо кемдӱ эмес кижи чӧкӧбӧс айылдаш кижизине анайып болужып берерде, теҥеридеги јалакай Адабыс агару тынды тыҥ сурап турган улуска алаҥзу јогынаҥ берер эмей! Бу укаа сӧслӧ болзо, Иегованыҥ агару тынын чӧкӧбӧй, јайнап сураар керек (Сар. 10:17; 66:19).

19. Бис Кудайга чындык артар аргалу деп, нениҥ учун алаҥзыбай јадыс?

¹⁹ Сатананыҥ токтобой турган табаруларын турумкай ӧдӱп чыгарыс деп, бис алаҥзыбай јадыс. Нениҥ учун? Нениҥ учун дезе биске агару тын болужат. Баштапкызында, ол ченелтелерди ӧдӧргӧ ийде-кӱч берет. Экинчизинде, Иеговага иштеерге ле Кудайдыҥ јаҥы јӱрӱмин кӧрӧргӧ, бистиҥ кӧгӱс парустарысты толтырып јат. Айдарда, бистиҥ кажыбыс ла агару тынныҥ болужын толо алзын!