1. Иегова биске кандый арга берген?

ИЕГОВА биске јӱрӱмисле башкарынатан арга берген. Ол бисти чын талдаш эдерге ӱредет ле оны сӱӱндирип турган јӧптӧрис аайынча јӱрерге болужат (Сар. 119:173). Оныҥ учун Кудайдыҥ Сӧзиндеги ойгор јӧптӧрди тузаланып турзаас, чын јӧптӧр чыгарарга ӱренедис (Евр. 5:14).

2. Кандый бир јӧп чыгарган тужыста, бисте кандый кӱчтер болордоҥ айабас?

² Је бис чын јӧп чыгарган да болзоос, баштап алганысты учына јетирерге кӱч болордоҥ айабас. Бир кезик темдер кӧрӱп ийектер. Јиит карындаш Агару Бичикти бӱдӱнге кычырар деп шӱӱп алат. Ол оны бир канча неделениҥ туркунына улай ла кычырган, је оноҥ токтоп калган. Эје пионер болорго шӱӱп алат, је пионердиҥ ижин баштайтан ӧйди јаантайын чӧйип јат. Аксагалдардыҥ јӧби кӱдӱчиниҥ ижин улай ла эдер керек деп шӱӱлтеге келет, је кӧп айлар ӧдӱп калган да болзо, анайып ла не де эдилбей јат. Бу темдер бой-бойынаҥ башка, је олордо тӱҥей неме бар: кандый бир јӧп чыгарган ака-эјелер баштап алганын учына јетире этпеген. Баштапкы чакта мындый ла кӱчтер Коринф каладагы христиандарда болгон. Бу учурал бисти неге ӱредерин шӱӱжип ийектер.

3. Коринфтеги ака-эјелер кандый јӧп чыгарган, је оноҥ не болгон?

³ Б. э. 55 јылы киреде Коринфтеги христиандар јаан учурлу шӱӱлтеге келген. Олор Иерусалимдеги ле Иудадагы ака-карындаштар јоксырап, немеге јединбей барганын, анайда ок ӧскӧ јуундар олорго болужарга, акча јууп турганын угуп ийген. Мынаҥ улам Коринфтеги јалакай ла кысканбас ака-ка рындаштар база акча јуур деп шӱӱп, мыны канайып эдерин Павелдеҥ сурап уккан. Павел јуунга башкарту ийип, олорго акча јуурында болужып берзин деп, Титке јакару берген (1 Кор. 16:1; 2 Кор. 8:6). Је канча айлар ӧткӧн кийнинде, Коринфтеги акалар берер болгон акчазын анайып ла јуубаган деп, Павел билип ийген. Оныҥ учун олор Иерусалимге ӧскӧ јуундардаҥ сыйлар берилип јаткан ӧйгӧ сыйын белетеп болбогон (2 Кор. 9:4, 5).

4. 2 Коринфтегилерге 8:7, 10, 11-ле болзо, Павел Коринфтеги христиандарды неге кӱӱнзеткен?

⁴ Коринфтеги ака-эјелер јакшы јӧп чыгарган, оныҥ учун Павел олорды бек бӱдӱмјизи ле кысканбас болгоны учун мактаган. Је анайда ок олорды баштап алганын учына јетире этсин деп кӱӱнзеткен. (2 Коринфтегилерге 8:7, 10, 11 кычырыгар.) Бу учурал чындык христиандарга да чыгарган јӧби аайынча јӱрерге јеҥил эмес болордоҥ айабас деп ӱредет.

5. Бис кандый сурактар шӱӱп кӧрӧрис?

⁵ Биске Коринфтеги ака-эјелерге чылап, баштап алганысты учына јетире эдерге јеҥил эмес болордоҥ айабас. Нениҥ учун? Толо кемдӱ эмес болгоныстаҥ улам, бис баштап алганысты оноҥ эдип саларыс деп артыргызып јадыс. Анайда ок пландап алган керектерис кандый бир сакыбаган айалгалардаҥ улам бӱтпей јат (Јарл. 9:11; Рим. 7:18). Эмди дезе, кандый бир шӱӱлте эдердеҥ озо ло чыгарган шӱӱлтени такып шӱӱп кӧрӧринеҥ озо ајаруны неге эдерин шӱӱжип ийектер. Анайда ок баштап алганысты бӱдӱрип саларга болужатан јӧптӧр кӧрӱп ийерис.

6. Кезик чыгарган јӧптӧрди нениҥ учун такып кӧрӱп турар керек?

⁶ Бис чыгарган јаан учурлу кезик јӧптӧристи качан да солыбазыс. Темдектезе, Иеговага ӱргӱлјиге иштеерис ле эш-нӧкӧриске чындык артарыс (Матфей 16:24; 19:6). Је кезик чыгарган јӧптӧристи такып кӧрӱп турар керек. Нениҥ учун? Нениҥ учун дезе, айалгалар солынып јат. Эҥ артык шӱӱлтелер эдерге, биске кандый јӧптӧр болужар?

7. Биске нени сураар керек ле нениҥ учун?

⁷ Кудайдаҥ ойгор сурагар. Иаков Иегованыҥ агару тыны ажыра мынайып бичиген: «Кемигерге ойгорлык јетпей турган болзо, ончо улуска тегинге, каарып айтпай берип турган Кудайдаҥ сура[зын]» (Иак. 1:5). Бистиҥ ончобыска «ойгорлык јетпей турган» деп айдарга јараар. Оныҥ учун биске јӧп чыгарардаҥ озо ло чыгарган јӧпти такып кӧргӧн тушта Иеговага иженер керек. Анайып, Иегова биске ойгор талдаш эдерге болужар.

8. Биске чыгарган јӧпти бастыра јанынаҥ шӱӱп сананарга кандый јӧптӧр болужар?

⁸ Чыгарган јӧпти бастыра јанынаҥ шӱӱп сананыгар. Јӧпти Агару Бичиктеҥ бедирегер, Иегованыҥ организациязы чыгарып турган бичиктерде не айдылып калганын кычырыгар ла бӱдӱмјилӱ улусла куучындажыгар (Укаа 20:18). Бу јӧпти анчада ла иш солыырга турзаар, ӧскӧ јерге кӧчӧргӧ эмезе Иеговага иштеерге, керектӱ не-неме болзын деп ӱредӱ талдап турзагар, тузаланыгар.

9. Биске бойысты нениҥ учун тӧгӱндебес керек?

⁹ Кандый бир јӧпти недеҥ улам чыгарганаарды шӱӱп сананыгар. Иегова бистиҥ кандый бир керекти недеҥ улам эдип турганыска јаан ајару эдип јат (Укаа 16:2). Ол бисти ончо немеде тӧгӱндебей јӱрзин деп кӱӱнзейт. Оныҥ учун кандый бир јӧпти недеҥ улам чыгарарга турганысты јазап шӱӱп сананар керек. Бис бойысты да, ӧскӧ дӧ улусты тӧгӱндебеске кӱӱнзейдис. Нениҥ учун дезе јастыра кӱӱн санаабысла јӧп чыгарзаас, чыгарган јӧбисле јӱрерге кӱч болордоҥ айабас. Темдектезе, јиит ака пионер болуп калды. Је бир канча ӧйдӧҥ ого Иеговага беретен ӧйин бӱдӱрерге кӱч боло берерде, бу ака јарлаар  иштеҥ сӱӱнчи албай барган. Ака Иегованы сӱӱндирерге турганынаҥ улам пионер болуп калган деп сананган болор. Је чынынча болзо, ол ада-энезин, эмезе баалап турган база та кемди де сӱӱндирерге кӱӱнзеген болор бо?

10. Солынарга нени эдер керек?

¹⁰ Агару Бичикти ӱренип, таҥкыны таштаарга шӱӱп алган кижини сананып ийзеер. Озо баштап ол эки неделе таҥкыны тартарыла тартыжып јат, је оноҥ чыдажып болбой, тартып ийет. Је учы-учында ол бу јаман кылыктаҥ айрылат! Ого мындый јаман кылыктаҥ айрыларга, Иегованы сӱӱп турганы ла оны сӱӱндирерге турганы болушкан (Кол. 1:10; 3:23).

11. Бойына чокум амадулар тургузары нениҥ учун јаан учурлу?

¹¹ Чокум амадулар тургузып алыгар. Амаду јарт ла чокум болзо, ого јединерге јеҥил болор. Слер Агару Бичикти кажы ла кӱн кычырарга сананып алдаар. Је слерде кычырарыныҥ графиги јок болзо, бу амадуга јединерге кӱч болор *. Эмезе аксагалдар јаантайын јуунныҥ јарчыларына кӱдӱчиниҥ болужын јетирер јӧп чыгарган болзын. Је ӧй ӧдӱп ле јат, чыгарылган јӧп бӱдӱрилбей јат. Бойыныҥ амадузына јединерге олорго бойынаҥ сураар керек: «Ака-эјелердиҥ анчада ла кемизине кӱдӱчиниҥ болужы керек болуп турганын бис шӱӱшкенис пе? Олорго качан барып келетениниҥ ӧйин чокум јарташканыс па?»

12. Биске нени эдерге келижер болор ло нениҥ учун?

¹² Бойыгардаҥ эдип болбосты сакыбагар. Кемде де нени ле кӱӱнзегенин эдерге ӧй дӧ, ийде-кӱч те, арга да јок. Оныҥ учун бойыгардаҥ кӧпти сакыбагар. Керектӱ болзо, чыгарган јӧбигер аайынча эдерге кӱчигер јетпей турза, оны такып кӧрӱгер (Јарл. 3:6). Је слер кандый бир јӧпти бастыра јанынаҥ шӱӱп сананып, оны ойто катап кӧрӱп, эмди баштап алганаарды учына јетире эдип ийеригер деп сананар болороор. Слерге болужатан беш алтам кӧрӱп ийектер.

13. Чыгарган јӧп аайынча эдетен ийде-кӱчти аларга, биске нени эдер керек?

¹³ Ийде-кӱч сурагар. Кудай биске чыгарган јӧбис аайынча эдерге, ийде-кӱч берер аргалу (Флп. 2:13). Оныҥ учун андый ийде-кӱч аларга, Иегованаҥ агару тын сурагар. Карууны узак албай турганаар деп сананып турзагар, мӱргӱӱрин токтотпогор. Иисус айткан: «[Агару тынды] сурагар — слерге берилер» (Лука 11:9, 13).

14. Укаа сӧстӧр 21:5-теги принцип чыгарган јӧбигер аайынча эдерге канайып болужар?

¹⁴ План тургузып алыгар. (Укаа сӧстӧр 21:5 кычырыгар *.) Кандый бир ишти эдердеҥ озо план тургузып алала, оны бӱдӱрер керек. Анайып ла чыгарган јӧбис аайынча јӱрерге, чокум алтамдар тургузып алар керек. Кандый бир јаан ишти бир эмештеҥ эдип баштаарга јараар. Анайып, једимдериҥди кӧрӱп турарыҥ. Павел Коринфтеги ака-эјелерди бастыра сыйларды јӱк оныҥ келген тужында јууп баштаарыныҥ ордына, керектӱ акчаны «неделениҥ баштапкы кӱнинде» јууп аларына кӱӱнзеткен (1 Кор. 16:2). Кандый бир јаан ишти бир эмештеҥ эдип баштазаар, тургузып алган амадугарды бӱдӱрип болбозоор деп санааркабазаар.

15. Планды тургузып алган кийнинеҥ, нени эдерге јараар?

¹⁵ Планыгарды бичип алзагар, ол аайынча эдерге јеҥил болор (1 Кор. 14:40). Анайып, аксагалдардыҥ јӧптӧрине, аксагалдардыҥ кемизи-кемизи јӱк ле кандый јӧп чыгарылганын  эмес, је оны кем, качан бӱдӱрерин бичип турзын деп јакару берилген. Аксагалдардыҥ јӧптӧри бу јакару аайынча эдип турза, чыгарган јӧбин једимдӱ бӱдӱрер болор (1 Кор. 9:26). Бу јӧпти не тузаланып кӧрбӧс? Темдектезе, кажы ла кӱнде нени эдеристи бичиирге ле бу керектердиҥ кандыйын озо баштап эдерин тургузарга јараар. Бу, јаҥыс ла баштап алганысты учына јетире эдерге болужар эмес, је кыска ӧйгӧ кӧпти эдип саларга болужар.

16. Тургузып алган амадуга јединерге нени эдер керек ле бу шӱӱлте Римдегилерге 12:11-де канайып кӧргӱзилген?

¹⁶ Албаданыгар. План аайынча эдерге ле тургузып алган амадуга јединерге албаданар керек. (Римдегилерге 12:11 кычырыгар.) Анайып, Павел Тимофейди јакшы ӱредӱчи болзын деп кӱӱнзеген. Оныҥ учун Тимофейди баштап алган ижин бӱдӱреринде турумкай болзын деп јӧп берген. Павелдиҥ берген јӧбин ӧскӧ дӧ кӧгӱс амадуларга тузаланарга јараар (1 Тим. 4:13, 16).

17. Ефестегилерге 5:15, 16-да бичилген јӧп, сананып алганын бӱдӱрерге канайып болужат?

¹⁷ Ӧйди ойгор тузаланыгар. (Ефестегилерге 5:15, 16 кычырыгар.) Ижигерди кандый ӧйдӧ божодорго турганаарды шӱӱп алыгар ла бу ӧйди чӧйбӧгӧр. Чек эптӱ ӧй сакыбагар, нениҥ учун дезе, андый ӧй болбостоҥ до айабас (Јарл. 11:4). Јаан учурлу эмес керектер, учурлу керектерге беретен ӧйӧӧрди ле ийде-кӱчигерди айрыбазын (Флп. 1:10). Слерге кем де чаптык этпес ӧйди талдап алыгар. Јаныгарда улусты бу ӧйдӧ слерге чаптык этпезин деп сурагар, анайып олор слерге чаптык этпес. Анайда ок бу ӧйдӧ телефоныгарды ӧчӱрип саларга јараар, электронный почтаны кӧрбӧскӧ лӧ социальный сетьтерге кирбеске јараар *.

18, 19. Чыгарган јӧп аайынча јӱрерге јеҥил эмес те болзо, токтойтон јериске једерге биске не болужар?

¹⁸ Једетен једимигерди сананыгар. Чыгарып алган јӧбистиҥ једимин барып јаткан јолдыҥ токтойтон јерине тӱҥдештирерге јараар. Једетен јериске чыннаҥ ла једерге турган болзоос, кезик јолдорды туйуктап та салган болзо, маршрутты солып, јолысты улалтарыс. Анайып ла чыгарган јӧп аайынча: једетен једимисти сананып турзаас, бисте кандый да кӱчтер болуп, јолысты солыырга да келишсе, једетен јериске једип барарыс (Гал. 6:9).

¹⁹ Чын јӧп чыгарарга ла бу јӧп аайынча јӱрерге јеҥил эмес. Је Иегова баштап алган керекти учына јетире эдерге ойгор ло ийде-кӱч берер аргалу.