СЛЕР Агару Бичикти канайып ӱренедеер? Слерге ӱренерге јилбилӱ болуп турган ба? Эмезе каа-јаада, кӱчсинип ӱренип турганаар ба? Бис ончобыс кезикте кӱчсинип јадыс. Је немени јаантайын эдериниҥ тузазы керегинде сананып ийзеер. Темдектезе, гигиена јанынаҥ суракты. Јунунып аларга ӧй лӧ ийде-кӱч керек. Је јунунып алза, кандый јакшы ла јеҥил дезеер! Анайып ла Агару Бичикти ӱренерин, јунунганыла тӱҥдештирерге јараар (Эф. 5:26). Мындый тузалу ӱредӱни јаантайын ӧткӱрип турарга биске не болужар?

• Качан ӱренереерди пландап алыгар. Агару Бичикти таҥынаҥ ӱренери, «эҥ артык» керектердиҥ бирӱзи болот ло оны кажы ла христиан кижи эдер учурлу (Флп. 1:10). Оныҥ учун келишкедий ӧйди талдап, оны чаазынга бичип алала, кӧрӱнип турган јерге, темдектезе холодильникке илип салыгар. База бир арга: телефонго напоминание тургузып алыгар.

• Слерге эптӱ болзын деп эдигер. Кемге де узак ӱренерге јарап јат, а та кемге де бир кичинектеҥ, је улам сайын. Слерге кандый арга эптӱ болорын бойоор јакшы билереер. Оныҥ учун слерге канайып эптӱ, анайып ла эдигер. Је ӱренетен ӧй једип келген, а кӱӱн јок болзо, канайдар? Ол тушта, 10 ло минут ӱренерим деп бойоорго айдыгар. Ӱредӱ чек јок болгончо, кыскарта ӱренгени јакшы болор. Анайып ӱренип баштап ийзеер, оноҥ ары ӱренетен кӱӱн једип келердеҥ айабас (Флп. 2:13).

• Теманы озодоҥ талдагар. Слер теманы ӱренип јаткан тушта талдазаар, «ӧйди ойгор тузаланы[п]» болбос болороор (ЈТ) (Эф. 5:16). Тереҥжиде шиҥдеерге турган статьяларды ла темаларды бичип алыгар. Анайда ок кандый бир сурак чыгып келзе, тургуза ла бичип алыгар. Кажы ла ӱренгениниҥ кийнинде база да шиҥдейтен темалар табылар болор.

• Эпчил болугар. Ӧйинеҥ ӧткӱре кату график тургуспагар. Керек болзо, ӱренетен кӱнди, теманы солып турарга јараар. Эҥ учурлузы — ол качан, канча кире ле нени ӱренип турганы эмес, је оны улам сайын, кажы ла неделеде эдери болот.

Агару Бичикти јаантайын шиҥдеп турзаас, алкыштар јок артпазыс. Бистиҥ Иеговала колбуларыс тыҥыыр, јӱрӱмисте ойгор јӧптӧр чыгарарыс ла ийде-кӱчтӱ болорыс (Иис. Н. 1:8).