1. Павел болушчы ишчилерге канайып баштанатан?

 БОЛУШЧЫ ишчилер јуунда јаан иш эдет. Апостол Павел Кудайга чындык эр улусты тыҥ баалаган. Темдектезе, Филиппыдагы христиандарга бичиген самаразында Павел јӱк ле аксагалдарла эмес, је болушчы ишчилерле эзендешкен (Флп. 1:1).

2. Луис ака болушчы ишчи болуп турганы керегинде нени сананат?

² Јуунда акалар канча да јашту болзо, болушчы ишчи болор аргалу. Темдектезе, Де́ван деп карындаш 18 јаштуда болушчы ишчи болуп калган, а Лу́ис деп ака — 50 јаштаҥ ажа берген болгон. Бу иш олорго јаан сӱӱнчи экелет. Лу́ис куучындайт: «Ака-эјелердиҥ сӱӱжин кӧрӱп, меге де олорго нени-нени эдип ийер кӱӱним келет. Меге олорго болужарга сӱреен јарап јат!» Мындый сезимдер јердиҥ ӱстинде кӧп ака-карындаштарда болот.

3. Бис нени шӱӱжерис?

³ Сен сууга чӧҥӱрилип калгаҥ ба? Эйе болзо, болушчы ишчи болорго не амаду тургузып албас? Бу јӧрмӧлдӧ болушчы ишчи болорго не кӱӱнзедер керек ле бу ишти бӱдӱрерге, кандый библиялык некелтелерге келижер керек деп шӱӱжип ийерис. Је озо баштап болушчы ишчи кандый иш эдип турганын кӧрӱп ийектер.

БОЛУШЧЫ ИШЧИЛЕР КАНДЫЙ ИШ БӰДӰРЕТ?

4. Болушчы ишчилер нени эдет? (Јурукты база кӧрӱгер.)

⁴ Јуунныҥ болушчы ишчизи — ол агару тын ажыра  кӧстӧлип калган, аксагалдарга кандый ла ишти бӱдӱрерге болужып турган, сууга чӧҥӱрилип калган ака болот. Кезик болушчы ишчилер ака-эјелерге бичиктер ле јарлайтан участоктор берип јат. Ӧскӧ болушчы ишчилер Каандыктыҥ Туразын кичееринде ле арутаарында туружат. Бого коштой болушчы ишчилер јуунныҥ туштажуларында распорядительдер болуп јат, анайда ок аудио ло видео аппаратураларла иштенет. Эйе, болушчы ишчилер кӧп иштер бӱдӱрет, олордыҥ ончозы Иегованы ла ака-эјелерди тыҥ сӱӱп, библиялык нормаларла јӱрерге албаданып турганыла аҥыланат (Матф. 22:37—39). Сууга чӧҥӱрилип калган ака канайып болушчы ишчи болуп калар аргалу?

5. Јуунныҥ болушчы ишчизи болорго, акага эмезе карындашка нени эдер керек?

⁵ Болушчы ишчилерге берилген некелтелер Агару Бичикте бичилип калган (1 Тим. 3:8—10, 12, 13). Бу некелтелерди јазап шиҥдеп ийеле, анайып јӱрерге албадан. Је озо баштап сен нениҥ учун болушчы ишчи болорго турганыҥды сананып кӧр.

МОЛЈУЛАР АЛАРГА НЕ КӰӰНЗЕДЕР УЧУРЛУ?

6. Аканы эмезе карындашты болушчы ишчи болорго не кӱӱнзедер керек? (Матфей 20:28; кадарындагы јурукты база кӧрӱгер).

⁶ Бис Иисус Христостоҥ тем алып јадыс. Ол Адазын ла улусты сӱӱп турган. Бу сӱӱш оны кӧпти эдерге ле јабыс деп бодолып турган ишти эдерге кӱӱнзеткен (Матфей 20:28, ЈТ кычырыгар; Иоанн 13:5, 14, 15.) Сен ӱзе немени сӱӱштеҥ улам эдип турган болзоҥ, Иегова сеге болушчы ишчи болорго болужып, алкыжын берер (1 Кор. 16:14; 1 Пётр 5:5).

7. Болушчы ишчи болорго турган акага эмезе карындашка нениҥ учун бийиркек болбос керек?

⁷ Бу телекейде бийик једимдерге јеткен кижини улус јакшы кӧрӱп јат. Је Иегованыҥ организациязында андый эмес. Јуунда акалар молјуларды бийиркеп турганынаҥ улам эмес, а Иисус ла чылап сӱӱштеҥ улам эдет. Јуунда бойын бийиркенип турган аканы аксагал эмезе болушчы ишчи эдип кӧстӧп салза, ол Иегованыҥ кӧзинде баалу, је улустыҥ кӧзине кӧрӱнбей турган ишти этпес болор. Кӧрӱмјилӱ болорго турган кижи  мындый јабыс ишти не бӱдӱретен деп сананар болор (Иоанн 10:12). Бийиркек кижиниҥ јуундагы эдип турган ижин Иегова качан да алкабас (1 Кор. 10:24, 33; 13:4, 5).

8. Иисус апостолдорго нени јартаган?

⁸ Керек дезе Иисустыҥ јуук најылары да јастыра санаазынаҥ улам молјулар аларга сананган. Темдектезе, Иоанн ла Иаковтыҥ учуралын эске алып ийектер. Олор Иисустаҥ оныҥ Каандыгынаҥ кӧрӱмјилӱ јер берзин деп сураган. Је Иисус бастыра 12 апостолына мынайып јартаган: «Ортогордо јааны болойын дегенигер, слерге јалчы болзын. Ортогордо баштапкы болойын дегенигер, ончогорго кул болзын» (Марк 10:35—37, 43, 44). Јуунда молјуларды ака-эјелерге болужарга турганынаҥ улам алып турган ака-карындаштар јуунга чыннаҥ ла алкыш болот (1 Фес. 2:8).

УЛУСКА БОЛУЖАТАН КӰӰН БОЛЗЫН ДЕП НЕНИ ЭДЕР?

9. Улуска болужатан кӱӱн болзын деп нени эдер керек?

⁹ Сен Иегованы сӱӱп, улуска болужарга кӱӱнзеп јадыҥ деп, бис алаҥзыбай јадыс. Је эм тура јуунда болушчы ишчиниҥ ижин бӱдӱрерге тыҥ ла кӱӱнзебей турган болорыҥ. Кӧрӱмиҥди солыырга нени эдер? Ака-эјелерге болушканы кандый јаан сӱӱнчи экелип турганын шӱӱп сананып кӧр. Иисус мынайып айткан: «Алып турганы эмес, берип турганы оноҥ артык ырысту» (Ап. ижи 20:35). Бу чын ла андый деп, оныҥ јӱрӱминеҥ јарт кӧрӱнген: ол улуска болужып, јаан сӱӱнчи алып туратан. Сен де база андый јаан сӱӱнчи алар аргалу.

10. Иисуска улуска болужарга јарап турган деп недеҥ кӧрӱнет? (Марк 6:31—34).

¹⁰ Иисус улуска болушканынаҥ јаан сӱӱнчи алган деп, бир учурал кӧрӱп ийектер. (Марк 6:31—34 кычырыгар.) Бир катап Иисус ла оныҥ апостолдоры тыҥ арыйла, улус јок јерде амырап аларга сананган. Је кӧп улус мыны билип ийеле, Иисустыҥ ойгор ӱредӱлерин угарга, олорды озолоп, ары једип баргандар. Иисус ла апостолдорго «ажанарга да бош јок болгон». Оныҥ учун олор мындый кӧп улусты кӧрӱп, олорды ӱретпес аргалу болгон эмезе улуска тоолу шӱӱлтелер айдып ийеле, олорды јандырып ийер эди. Је Иисус улусты сӱӱп турганынаҥ улам «олорды кӧпкӧ ӱредип баштады», анайып ӱредӱзин «орой боло берерде» божоткон (Марк 6:35). Иисус мынайып этпес аргалу болгон, је ол улусты сӱӱп, карамдап турганынаҥ улам олорды ӱредерге кӱӱнзеген. Улуска болушканы Иисуска јаан сӱӱнчи экелип туратан.

11. Иисус оны угуп келген улуска база канайып болушкан? (Јурукты база кӧрӱгер.)

¹¹ Бу учуралда Иисус улусты јӱк ле ӱреткен эмес, ол олордыҥ керексиништерин ајаруга алган. Оныҥ учун оны угуп келген улуста артыгынча курсак болзын деп, ол кайкал эткен. Оноҥ ол ӱренчиктерин бу курсакты улуска ӱлеп берзин деп сураган (Марк 6:41). Анайып Иисус улуска канайып болужарын ӱренчиктерине кӧргӱскен. Анайда ок ол улуска јӱк ле кӧгӱс јанынаҥ эмес, ӧскӧ дӧ јанынаҥ болужып турганы — сӱреен јаан учурлу иш болот деп оҥдоорго болушкан. А мындый ишти шак ла јуунныҥ болушчы ишчилери эдет. Сананып ийзеер де, апостолдор Иисусла кожо ал-камык улусты тойгончо азырап салганына кандый тыҥ сӱӱнгиледи не! (Марк 6:42). Бу Иисус улустыҥ керексиништерин бойындыйынаҥ бийик  тургускан учуралдардыҥ јӱк бирӱзи. Не дезе ол јердеги бастыра јӱрӱмин улуска болужарга учурлаган (Матф. 4:23; 8:16). Улусты ӱредери ле олордыҥ керексиништерин јеткилдеери Иисуска јаан сӱӱнчи экелетен. Сен болушчы ишчи болуп ака-эјелерге акту јӱрегиҥнеҥ болужып турзаҥ, андый ла јаан сӱӱнчи аларыҥ деп, бир де алаҥзыба.

12. Слердиҥ болужаар јуунга керек јок деп, нениҥ учун сананбас керек?

¹² Сен бойыҥды нени де эдип билбезиҥ деп сананып турган болзоҥ, санааркаба. Сенде ака-эјелерге болужатан јакшы кылык-јаҥ тӱҥей ле бар. Павелдиҥ 1 Коринфтегилерге 12:12—30-та айдылган сӧстӧрин шӱӱп сананып, бу сӧстӧрди јӱрӱмде канайып тузаланар деп оҥдоп ийерге, Иегованаҥ болуш сура. Бу ӱлгерлердеҥ Иегованыҥ кажы ла ишчизинде, ол тоодо сенде де, јуунда бойыныҥ јери, бойыныҥ эдетен ижи бар деп јарт кӧрӱнип јат. Эм тура сен болушчы ишчи болотон некелтелерге келишпей де турган болзоҥ, колыҥды бош салба. Иеговага иштеерге ле ака-эјелерге болужарга, бастыра ийде-кӱчиҥнеҥ албадан. Аксагалдар сени нени эдип ийер аргалу болгоныҥды ајаруга алып, сеге бӱдӱрип ийгедий јакылталар берер деп алаҥзыба (Рим. 12:4—8).

13. Болушчы ишчилерге берилген некелтелер керегинде нени айдарга јараар?

¹³ Мындый шӱӱлтени сананып кӧр. Агару Бичикте болушчы ишчиге берилген кӧп саба некелтелер ончо христиандарга келижип јат, нениҥ учун дезе биске ончобыска Иеговала колбуларысты тыҥыдып, улуска болужып, Кудайга јараар эдип јӱрер керек. Оныҥ учун сенде болушчы ишчи болотон јакшы кылык-јаҥдар бар болор. Је јуунда молјулар аларга турган акаларга кандый болор керек?

АМАДУГА КАНАЙЫП ЈЕДИНЕР?

14. «Тӧп болор учурлу» дегенин канайып оҥдоор? (1 Тимофейге 3:8—10, 12).

¹⁴ 1 Тимофейге 3:8—10, 12-де, ЈТ (кычырыгар) бичилген некелтелердиҥ кезигин кӧрӱп ийектер. Олордыҥ бирӱзи — болушчы ишчилер «тӧп болор учурлу». Бу сӧстӧрди «улустыҥ алдында тоомјыда јӱрген кижи» деп кӧчӱрерге јараар. Је бу кокырлап, каткырбай јӱрерин темдектебей јат (Эккл. 3:1, 4). Андый да болзо, тӧп кижи берилген молјуларды јазап бӱдӱрерге албаданып јат.  Сеге иженерге, бӱдерге јараар болзо, јуундагы ака-эјелер сени тооп турар.

15. «Экијӱстенбес» ле «акча-јӧӧжӧгӧ ачыркак болбос учурлу» дегени нени темдектейт?

¹⁵ «Экијӱстенбес... учурлу». Бу сӧстӧрдиҥ учурыла болзо, андый кижи ачык-јарык, берген сӧзин бӱдӱрет, улусты тӧгӱндебей јат (Укаа 3:32). «Акча-јӧӧжӧгӧ ачыркак болбос учурлу» дегени, кижи акча-манат јанынаҥ сурактарда тӧгӱндебес учурлу дегенин темдектейт. Анайда ок бу сӧстӧр, байыырга болуп, ака-эјелерди тузаланарга јарабас деп кӧргӱзет.

16. а) «Аракыга тартылбас» болор керек дегени нени темдектейт? б) «Ару уйатту» болоры дегени нени темдектейт?

¹⁶ «Аракыга тартылбас... учурлу». Андый кижи ӧйинеҥ ӧткӱре кӧп аракы ичпей јат, анайда ок кезикте кӧп ичип ийетен кижи деп, јаман ады чыкпай јат. «Ару уйатту» христиан кижи Иегованыҥ нормаларыла јӱрет. Ол толо кемдӱ эмес те болзо, оныҥ Кудайла колбулары јуук, мынаҥ улам оныҥ јӱрегинде амыр.

17. Болушчы ишчи болор аргалу деп кӧргӱзерге, акага јакылталарды канайып бӱдӱрер керек? (1 Тимофейге 3:10; јурукты база кӧрӱгер).

¹⁷ Агару Бичикле болзо, аканы эмезе карындашты болушчы ишчи эдип кӧстӧӧрдӧҥ озо, «бу ишке келижип турган ба деп, озо ченеп кӧрӧр керек». Айдарда, аксагалдар сени јуунда берилген јакылталарды јакшы бӱдӱрип тургаҥ ба деп кӧрӱп турар учурлу. Оныҥ учун олор сеге кандый бир јакылта берзе, бу јакылталарды аксагалдардыҥ берген башкартуларыла, Иегованыҥ организациязы берген башкартуларыла бӱдӱр. Сеге нени эдер керек деп, берилген јакылтаны кандый ӧйгӧ јетире эдип койор керек деп, јазап бӱдӱмјиленип ал. Сен ончо берилген јакылталарды јазап бӱдӱрерге албаданып турзаҥ, ака-эјелер мыны кӧрӱп, сени баалап баштаар. Аксагалдар, сууга чӧҥӱрилип калган ака-карындаштарды ӱредер керек деп ундыбагар. (1 Тимофейге 3:10 кычырыгар.) Слердиҥ јуунда 10—14 јашту эмезе оноҥ јаш сууга чӧҥӱрилип калган карындаштар бар ба? Олор Агару Бичикти бойлоры шиҥдеп турган ба? Јуунныҥ туштажуларына белетенип турган ба? Туштажуларда јаантайын каруулар берет пе? Јарлаар иште туружат па? Эйе болзо, олорго јажына келишкедий јакылталар берип туругар. Анайып, карындаш  «бу ишке келижип турган ба деп» оҥдоп ийереер. Ол тушта карындаштыҥ 17 ле јажы једе берзе, оны болушчы ишчи эдип кӧстӧп саларга јараар болор.

18. «Јек јок» болоры нени темдектейт?

¹⁸ «Јек јок» кижини «неде де бурулап болбозыҥ». Ӧскӧртӧ айтса, андый кижини јаан кинчек эткен деп бурулайтан кандый да тӧзӧлгӧ јок болот. Је андый да болзо, христиандар актуга ла буруладардаҥ айабас. Иисус та кӧп катап актуга бурулаткан, кийнинде оныҥ ӱренчиктери де база анайып ла буруладар деп айдылган (Иоанн 15:20). Је сен Иисус ла чылап оноҥ ло ары чын керектер эдип турзаҥ, јуунда јакшы адыҥ чыгар (Матф. 11:19).

19. «Болушчы ишчи бир ӱйлӱ болор учурлу» дегени нени темдектейт?

¹⁹ «Болушчы ишчи бир ӱйлӱ болор учурлу». Иегова билени бир эр ле бир ӱй кижинеҥ тӧзӧгӧн. Кудайдыҥ тургускан бу нормазыла бастыра христиандар јӱрер учурлу (Матф. 19:3—9). Христиан эр кижиге бойыныҥ эш-нӧкӧри эмес ӱй улусла конбос керек (Евр. 13:4). Ол бойыныҥ ӱйине чындык артып, ӧскӧ ӱй улуска керек јок ајару этпей јат (Иов 31:1).

20. «Билезин јакшы башкарар учурлу» дегени нени темдектейт?

²⁰ «Бала-барказын ла билезин јакшы башкарар учурлу». Сен билелӱ болзоҥ, молјуларыҥды јазап бӱдӱр. Билелик бажырышты улам сайын ӧткӱр, билеҥниҥ кажы ла кижизиле кӧптӧдӧ јарлаарга албадан. Балдарыҥа Иеговага јууктаарга болуш (Эф. 6:4). Сен билеҥди кичееп билер болзоҥ, јуунды да кичеер аргалу болорыҥ. (1 Тимофейге 3:5 тӱҥдештиригер.)

21. Эм тура болушчы ишчи болголок ака-карындаштар нени эдер аргалу?

²¹ Кару ака эмезе карындаш, сен эм тура болушчы ишчи эмес болзоҥ, бу јӧрмӧлдӧ берилген јӧптӧрди шӱӱп сананып кӧр, анайда ок бу керегинде Иеговага мӱргӱ. Јуунныҥ болушчы ишчизине берилген некелтелерди јазап шиҥдеп, олорго келижерге албадан. Ака-эјелерге сӱӱжиҥди ӧскӱр, анайда ок сен олорго нениҥ учун болужарга турганыҥды сананып тур (1 Пётр 4:8, 10). Јуунныҥ болушчы ишчизи болотон амаду тургузып ал. Ол тушта ака-эјелерге болужып, кӧп сӱӱнчи аларыҥ. Иегова сеге алкыжын берер деп, бир де алаҥзыба! (Флп. 2:13).