44 ӰРЕНЕТЕН ЈӦРМӦЛ
33 КОЖОҤ Уур јӱгиҥди Иеговага берип сал
Биске улус јаман баштанза, канайып тудунар?
«Јаманга јеҥдирбе, је јаманды јакшыла јеҥ» (РИМ. 12:21).
НЕНИ ШӰӰЖЕРИС
Слерге кем-кем јаман баштанган болзо, айалга катулана бербезин деп, канайып тудунар керек?
1, 2. Бис справедливость јогына туштазаас, нени сезедис? Јартап беригер.
ИИСУС јаргычынаҥ чын јаргы чыгарзын деп сурап турган тул ӱй кижи керегинде укаа сӧс куучындаган. Иисустыҥ ӱренчиктери бу ӱй кижиниҥ сезимдерин јакшы оҥдогон. Нениҥ учун дезе ол ӧйдӧги тегин улус справедливость јогынаҥ улам шыралап туратан (Лука 18:1—5). Мындый айалга бӱгӱнги де кӱнде болуп јат. Нениҥ учун дезе кезикте биске база јаман баштангылайт.
2 Бӱгӱнги кӱнде улус бой-бойын јаман кӧрӱп, базынып турганы коркышту кӧптӧгӧн. Оныҥ учун телекейдиҥ улузы биске јаман баштанза, бис кайкабай јадыс (Эккл. 5:8). Је мындый неме јуунда болуп турза, бис тыҥ санааркап, чӧкӧй берердеҥ айабазыс. Ака-эјелер биске ӧштӱлер эмес. Олор билбей калала, толо кемдӱ эмес болгонынаҥ улам бисти ачындырып ийет. Је андый да болзо, биске тӱҥей ле ачу болот. Мындый сезимдерле тартыжарга не болужар? Иисустыҥ теми. Ого ӧштӱлери јаман баштанып турарда, ол бойын канайып тудунганын кӧрӧрис. Ӧштӱлеристи чыдажып турар керек болордо, биске ака-эјелериске оноҥ чыдамкай болор керек эмес пе? Јуунда да, телекейде де чындык јогынаҥ улам шыралап турганысты кӧрӱп, Иегова нени сезет? Ол бисти килейт пе?
3. Иеговага оныҥ ишчилерине јаман баштанып турза, јарабай турган деп, бис кайдаҥ билерис?
3 Бистиҥ теҥеридеги Адабыс бисле не болуп турганын кӧрӱп јат. Улус биске јакшы баштанзын деп ол кӱӱнзейт. Не дезе «Иегова справедливостьты сӱӱйт» (Сар. 37:28). Кудай бойыныҥ ӧйинде «справедливостьты тӱрген орныктырып ийер» деп, Иисус айткан (Лука 18:7, 8, ЈТ). Удабас Иегова ончо кӱчтеристи јоголтып салар. Анайда ок справедливость јогынаҥ улам бисти база шыралабазын деп эдип салар (Сар. 72:1, 2).
4. Биске улус јаман баштанган болзо, чын эдерге Иегова канайып болужат?
4 Биске Иегова ончо кӱчтеристиҥ аайына чыгатан ӧйди сакып алар керек (2 Пётр 3:13). Је ол биске эмди ле болужып јат. Улус биске јаман баштанган тушта керектерисле кӱчтердиҥ ӱстине кӱчтер эдип салбаска, бойысты канайып тудунарына Кудай ӱредет. Канайып ӱредет? Ол јердӧӧн бойыныҥ Уулын ийген. Иисус биске бойын канайып тудунарыныҥ сӱреен јакшы темин кӧргӱскен. Анайда ок Кудай биске мындый айалгага келишкедий тузалу јӧптӧр берет.
СПРАВЕДЛИВОСТЬ ЈОГЫНА ТУШТАЗААР, АЈАРЫҤКАЙ БОЛУГАР
5. Улус биске јаман баштанган тушта нениҥ учун ајарыҥкай болор керек?
5 Улус јаман баштанып турза, биске ачу болот. Мынаҥ улам чӧкӧй берердеҥ айабазыс (Эккл. 7:7). Бого тӱҥей сезимдер Кудайдыҥ чындык ишчилеринде база болгон, темдектезе Иовто ло Аввакумда (Иов 6:2, 3; Авв. 1:1—3). Мындый сезимдер кижиде болуп јат, је ајарыҥкай болор керек. Ајарыҥкай болбозоос, сезимдериске салдырала, јастыра керектер эдип, айалганы там ла уурладып саларыс.
6. Авессаломло болгон учурал бисти неге ӱредет? (Јурукты база кӧрӱгер.)
6 Качан биске ле јуук улузыска јаман баштанып турза, керектиҥ аайына бойыс чыгып, ачындырган кижини кату-каруузына тургузып ийер кӱӱнис келет. Је бу оноҥ јаан кӱчтерге экелердеҥ айабас. Давидтиҥ билезинде не болгонын эске алып ийектер. Амнон, Авессаломныҥ сыйнызын — Фамарьды, албадап саларда, Авессалом коркышту тыҥ чугулданган. Моисейдиҥ јасагыла болзо, Амнонды ӧлтӱрип салар керек болгон (Лев. 20:17). Авессаломныҥ сезимдерин оҥдоорго јараар, је ондо Амнонды ӧлтӱретен јаҥ болбогон (2 Сам. 13:20—23, 28, 29).
Авессалом оныҥ сыйнызын, Фамарьды, албадап салганын билип ийеле, бойыныҥ чугулына јай берген. (6 абзацты кӧрӱгер.)
7. 73-чи Сарынныҥ чӱмдеечизи справедливость јогын кӧрӱп канайткан?
7 Бисти ачындырган кижи кату-каруузына тургузылбай турган деп билдирип турза, чын керектер эдетен кӱӱнис ӧчӧ берердеҥ айабас. Анайып ла 73-чи Сарынныҥ чӱмдеечизи сананган. Ол јаман улус акту улусты базынып турган да болзо, олорло не де болбой турганын кӧрӱп туратан (Сар. 73:12). Мынаҥ улам ол тыҥ кунугып, Кудайга иштееринде бир де јакшыны кӧрбӧй барган. Сарнаачы айткан: «Мыны оҥдоорго шӱӱп санангам, је оҥдоорго кӱч болды» (Сар. 73:14, 16). Керек дезе ол мынайып айткан: «Мен чындыктаҥ арай ла туура јӱре бербедим, мен арай ла тайкылып јыгылбадым» (Сар. 73:2). Мындый учурал бистиҥ бир карындашла болгон. Оныҥ ады Альбе́рто болзын.
8. Бир аканы актуга бурулап саларда, оныла не болгон?
8 Альбертоны актуга ла јуунныҥ акчазын уурдаган деп бурулаган. Мынаҥ улам ол аксагал болотон молјузын јылыйткан. Анайда ок јуундагы кӧп ака-эјелер оны кыйа кӧрӱп баштаган. «Ачынганыма ичи-буурым кайнаган болгон» — деп, ол эске алат. Бу ачу сезимдердеҥ улам Альберто јуунга да јӱрбей барган. Анайып беш јылдыҥ туркунына улалган. Бу учурал, биске јаман баштанган тушта ачынып, бойысты тудунбазаас, неге экелерин јакшы кӧргӱзет.
ИИСУС БОЙЫН КАНАЙЫП ТУДУНГАН?
9. Иисуска улус канайып баштанган? (Јурукты база кӧрӱгер.)
9 Иисус справедливость јок болзо, бойын канайып тудунарыныҥ сӱреен јакшы темин артыргыскан. Улус оны не ле деп јамандаган, бурулаган, јууктары да оны јӱӱлип калган деп сананган. А кудай јаҥныҥ башчылары оны кӧрмӧстӧрлӧ тудуш деп айдышкан. Римниҥ јуучылдары дезе ого каткырыжып, оны кыйнап, учы-учында ӧлтӱрип салгандар (Марк 3:21, 22; 14:55; 15:16—20, 35—37). Иисус бу ончо ченелтелерди турумкай ӧдӱп чыгала, ӧчин аларга бир де албаданбаган. Бу бисти неге ӱредет?
Иисуска улус јаман баштанарда, ол бойын канайып тудунарыныҥ сӱреен јакшы темин кӧргӱскен. (9, 10 абзацтарды кӧрӱгер.)
10. Иисуска улус јаман баштанарда, ол бойын канайып тудунган? (1 Пётр 2:21—23).
10 1 Пётр 2:21—23 кычырыгар a. Улус биске јаман баштанза, бис Иисустаҥ тем алар аргалу. Ол качан айдарын, качан айтпазын билген (Матф. 26:62—64). Улус ол керегинде тӧгӱн немелер айдып турза, кезикте унчукпайтан (Матф. 11:19). Је айдар тушта, истежип турган улусты јамандабаган да, коркытпаган да. Мынайып тудунарга Иисуска не болушкан? Ол чындык Јаргычыга иженген. Адазы оныла не болуп турганын кӧрӱп турган деп, ол билген. Иисус Иеговага бӱткен ле бойыныҥ ӧйинде Кудай ӱзе тӱзедип салар деп, бир де алаҥзыбаган.
11. Айдатан ба, айтпайтан ба деп сананып турала, нени ајаруга алар керек? (Јурукты база кӧрӱгер.)
11 Улус биске јаман баштанып турза, бис Иисуска канайып тӱҥейлежер аргалу? Нени-нени айдардаҥ озо сананар керек. Кижиниҥ јастыразы јаан эмес болгон болзо, оны ајаруга албаска јараар. Эмезе айалганы уурлатпаска, нени де айтпаза јакшы болор (Эккл. 3:7; Иак. 1:19, 20). Је кезикте, айдар керек. Темдектезе, та кемниҥ де адаанын аларга эмезе чындыкты корулаарга келишсе (Ап. ижи 6:1, 2). Је бу айалгада биске јобош ло тоомјылу болор керек (1 Пётр 3:15). b
Биске улус јаман баштанган ӧйдӧ нени, качан айдарын сананып турзаас, Иисустаҥ тем аладыс. (11, 12 абзацтарды кӧрӱгер.)
12. Чындык Јаргычыга иженери нени темдектейт?
12 Бис Иисус чылап чындык Јаргычыга иженер аргалу. Качан улус бис керегинде јаман сананып турза эмезе јаман баштанып турза, Иегова ӱзе кӧрӱп турган деп билерис. Иегова ӱзе немени бойыныҥ јерине тургузып салар деп алаҥзыбай јадыс. Бу биске ончо јаманды чыдажарга болужат. Иеговага иженип, ӱзе немени оныҥ колына берип турзаас, ачынары ла јаман кӧрӧри бистиҥ јӱрегисте ириҥ чилеп јуулбас. Оноҥ башка, јаман сезимдер бисти јастыра керектерге ийде салар. Мынаҥ улам сӱӱнчибисти јылыйтып, Иеговала колбуларысты ӱреп саларыс (Сар. 37:8).
13. Справедливость јогын чыдажып ӧдӧргӧ не болужар?
13 Бис качан да Иисустыҥ темиле толо кеминде этире јӱрӱп болбозыс. Кезикте бис та нени де айдып эмезе эдип ийеле, кийнинде тыҥ санааркайдыс (Иак. 3:2). А кезикте улус биске јаман баштанат. Мынаҥ улам кезик шыркалар андый тереҥ болот. Олор бу телекейдиҥ учына јетире јоголбос. Андый болзо, алаҥзыбагар: Иегова слер нени ӧдӱп турганаарды ончозын билер. Иисус та слер ле чылап шыралаган, оныҥ учун ол слерди сӱреен јакшы оҥдоп јат (Евр. 4:15, 16). Иегова јӱк ле Иисустыҥ темин берген эмес, анайда ок Агару Бичикте справедливость јогын ӧдӧргӧ болужатан тузалу јӧптӧр берген. Је эмди биске болужатан Римдегилерге бичиген самараныҥ эки ӱлгерин кӧрӱп ийектер.
«КУДАЙДЫҤ ЧУГУЛЫНА ЈЕР БЕРИГЕР»
14. «Кудайдыҥ чугулына јер беригер» дегенин канайып оҥдоор? (Римдегилерге 12:19).
14 Римдегилерге 12:19 кычырыгар. Апостол Павел христиандарды «Кудайдыҥ чугулына јер беригер» деп кӱӱнзеткен. Бу не дегени? Бис чындыкты качан ла канайып орныктырарын Иегова кӧрзин деп берип јадыс. Джон деп кижиге улус јаман баштанган болгон. Ол мынайып айдат: «Сезимдеримге салдырып, јастыра керектер этпеске, меге коркышту тыҥ албаданарга келишкен. Меге Римдегилерге 12:19-та бичилген сӧстӧр Иегованы чыдамкай сакыырга болушкан».
15. Иеговага кӱчтеристи берип салзаас, нениҥ учун артык болор? Тем куучындап беригер.
15 Бис кӱч айалгабысты Иегованыҥ колына берип салзаас, бойыска ла јакшы болор. Анайып ийде-кӱчис те јылыйбас, санааркабазыс та. Кудай биске болужарга кӱӱнзейт. Ол биске мынайда айдып тургандый: «Кӱчтериҥди меге артыргызып сал. Оныҥ аайына бойым чыгып саларым». Анайда ок Иегова: «Мен јандыра берерим» — деп сӧзин берет. Бис бу сӧстӧргӧ бӱдӱп турзаас, бир де санааркабазыс, нениҥ учун дезе Иегова ӱзе немени јакшы эдип салар. Ӧрӧги айдылган Джон анайып ла эткен. Ол мынайда айдат: «Иегова мениҥ кӱчтеримниҥ аайына чыкканча сакыырым. Не дезе, ол оны менеҥ јакшы эдип салар».
«ЈАМАНДЫ ЈАКШЫЛА ЈЕҤ»
16, 17. Мӱргӱӱл биске јаманды јакшыла јеҥерге канайып болужат? (Римдегилерге 12:21).
16 Римдегилерге 12:21 кычырыгар. Анайда ок Павел христиандарды јаманды јакшыла јеҥзин деп кӱӱнзеткен. Иисус бойыныҥ јарлу Кырдагы куучынында «ӧштӱлеригерди сӱӱгер, слерди истежип тургандар учун мӱргӱгер» деп айткан (Матф. 5:44, ЈТ). Иисус анайып ла эдип јӱрген. Оныла не болгонын эске алып ийектер. Римниҥ јуучылдары оны тӧҥӧшкӧ јаба кадап салгандар. Ол тушта Иисуска кандый кыйын-шыра ӧдӧргӧ келишкенин сананарга да кӱч.
17 Иисус ончо кыйын-шыраны ӧдӱп, чындык артып, бир де катуланбаган. Ол јуучылдарга бир де јаманды кӱӱнзебеген. А карын олор учун мынайда мӱргӱген: «Ада! Олордыҥ јаманын таштап кой. Олор нени эдип тургандарын билбей јадылар» (Лука 23:34). Качан биске јаман баштанган улус учун мӱргӱзеес, бу биске токуналу артарга ла чугулданбаска болужат. Анайда ок олорго бистиҥ кӧрӱмис солынардаҥ айабас.
18. Альбертого ло Джонго мӱргӱӱл канайып болушкан?
18 Мӱргӱӱл бу јӧрмӧлдӧ айдылган эки акага болушкан. Альберто куучындайт: «Меге јаман баштанган акалар учун мӱргӱп туратам. Канча катап Иегованаҥ ачуны ундыырга ла јаман болгон айалганы ӧткӱрип саларга болушсын деп сурайтам». Эмди Альберто Иеговага ойто чындык иштеп јат. А Джон мынайып куучындайт: «Мени ачындырган ака учун мен канча катап мӱргӱгем. Бу мӱргӱӱлдер меге ого кӧрӱмимди солыырга ла оны јаргылабаска болушкан. Анайда ок меге токунал берген».
19. Бу телекейдиҥ учы келгенче, биске нени эдер керек? (1 Пётр 3:8, 9).
19 Телекейдиҥ учына јетире улус биске јаман баштанардаҥ айабас. Је не де болзо, Иегованаҥ болуш сурагар. Анайда ок Иисустыҥ ого јаман баштанарда, ол канайып тудунганынаҥ тем алып, јӱрӱмисте библиялык принциптерди тузаланып турактар. Ол тушта Иегова бисти кыйалта јогынаҥ кайралдаар. (1 Пётр 3:8, 9, ЈТ кычырыгар.)
38 КОЖОҤ Кудай сени ийдезиле кайралдаар
a Апостол Пётр баштапкы самаразыныҥ 2-чи ле 3-чи бажалыктарында баштапкы чактыҥ христиандары улуска јаман кӧрдӱргениниҥ учуралдарын бичиген: казыр улус бойыныҥ јалчыларына јаман баштанган, Кудайга бӱтпес эр улус христиан ӱйлерине јаман баштанган (1 Пётр 2:18—20; 3:1—6, 8, 9).
b jw.org сайтта «Кайда сӱӱш, анда чыннаҥ ла амыр-энчӱ» деген видеоны кӧрӱгер.
