1. Јажы јаан улустаҥ нениҥ учун ӱренер керек?

 БИС јӱрӱмисте кандый бир јӧп чыгарарга јатсаас, биске кем-кем јӧп берзе, быйанду болодыс. Андый јӧпти биске аксагалдар эмезе кӧгӱзи тереҥ ака-эјелер берер аргалу. Јажы јаан улустыҥ јӧби эмдиги ӧйгӧ келишпей турган деп сананбас керек. Иегова бисти јажы јаанап калган улустаҥ ӱрензин деп кӱӱнзеп јат. Андый улус узак јӱрӱм јӱрген, оныҥ учун олор кӧпти билер, ойгор, олордыҥ ченемели де јаан (Иов 12:12).

2. Бу јӧрмӧлдӧ нени шӱӱжерис?

² Јебрен ӧйлӧрдӧ Иегова албатызына болужып, башкартуны јажы јаанап калган чындык эр улус ажыра берген. Олордыҥ ортозында Моисей, Давид ле апостол Иоанн болгон. Олор башка-башка ӧйдӧ јаткан ла олордыҥ айалгалары да башка болгон. Јӱрӱминиҥ калганчы кӱндеринде бу ӱч эр кижи келер ӱйеге ойгор јӧптӧр берип салган. Олор ӱчӱлези Кудайга сӧсуккур болоры сӱреен керектӱ деп айткан. Бӱгӱнги де кӱнде бу јӧптӧрди тузаланзын деп, Иегова Агару Бичигинде бичидип салган. Оныҥ учун бистиҥ ончобыска — јииттерге де, јаан да улуска — бу јӧптӧрди шӱӱп сананып турар керек (Рим. 15:4; 2 Тим. 3:16). Бу јӧрмӧлдӧҥ ол эр улустыҥ калганчы кӱндеринде нени айтканын ла олордыҥ сӧстӧринеҥ неге ӱренеристи шӱӱжерис.

СЛЕР УЗАК ЈӰРЕРЕЕР

3. Моисей кем болгон?

³ Моисей Иеговага бастыра јӱрӱмине чындык болгон. Ол јаргычы, судурчы, јуучылдардыҥ башчызы ла тӱӱкичи  болгон. Оныҥ ченемели коркышту јаан. Моисей Египеттеҥ Израиль албатыны чыгарган, анайда ок Иегованыҥ эткен кайкалдарын кӧргӧн. Кудай Моисейди агару тыны ажыра Агару Бичиктиҥ баштапкы беш бичигин ле 90-чы Сарынды бичиткен. Анайда ок 91-чи Сарынды база ол бичиген болор. Иовтыҥ да бичигин Моисей бичиген болор.

4. Моисей кемдерди токунаткан ла нениҥ учун?

⁴ Моисей 120 јашту болордо, божоор алдында, ончо Израиль албатыны јууп ийеле, Иегова олорго нени эткенин эске алындырган. Олордыҥ кезиги кичинек болордо, Кудай кайкалдарды канайып эткенин ле египтяндарды канайып кату каруузына тургусканын кӧргӧн (Чыг. 7:3, 4). Олордыҥ кӧзинче ле Кызыл талай эки јара бӧлӱне берерде, олор кургак јерле ӧдӧ бергендер. Оноҥ Иегова Египеттиҥ черӱзин јоголтып салган (Чыг. 14:29—31). Чӧлдӧ Кудай албатызын корулаган ла олорды кичееген (Јаҥ. т. 8:3, 4). Эмди, израильтяндар Ханаан јерине кирерге јадарда, Моисей олордыҥ бӱдӱмјизин калганчы катап тыҥыдарга јат a.

5. Јаҥды такыганы 30:19, 20-деги Моисейдиҥ калганчы сӧстӧри израильтяндарды неде бӱдӱмјилеген?

⁵ Моисей нени айткан? (Јаҥды такыганы 30:19, 20 кычырыгар.) Ол Израиль албатыга, олорды сӱреен јакшы келер ӧй сакып јат деп айткан. Иегованыҥ болужыла олор Ханаан јерине узак јадар аргалу болгон. Бу сӱреен јакшы тӱжӱмдӱ јер. Моисей айткан: «Иегова Кудайаар слерди... слер тутпаган јаан ла јараш калаларлу, слер иштеп албаган јӱзӱн-јӱӱр јӧӧжӧлӧ толгон тураларлу, слер каспаган кутук сууларлу, слер отургыспаган виноградтарлу ла маслиналарлу берер болгон јерге экел[ер]» (Јаҥ. т. 6:10, 11).

6. Нениҥ учун Кудай ӧскӧ албатыларга Израильди јуулап алзын деп јараткан?

⁶ Анайда ок Моисей израильтяндарга бу байлык јерге узак јадарга турган болзо, Кудайдыҥ јакылталарын бӱдӱрер керек деп айдып салган. Моисей олорды јӱрӱм талдап алзын, ӧскӧртӧ айтса Кудайдыҥ сӧзин угуп, ого чындык артсын деп кӱӱнзеткен. Је израильтяндар Иегованаҥ туура јӱре бергендер. Оныҥ учун Кудай Ассирияныҥ ла Вавилонныҥ черӱзине олорды јуулап, олјого апарзын деп јай берген (2 Каан. 17:6—8, 13, 14; 2 Лет. 36:15—17, 20).

7. Моисейдиҥ сӧстӧри бисти неге ӱредет? (Јурукты база кӧрӱгер.)

⁷ Биске мында кандый ӱредӱ бар? Сӧсуккур болоры јӱрӱмди аргадайт. Канайып израильтяндар Ханаан јерге кирер алдында болгон, анайып ла бис бӱгӱн Кудайдыҥ берер болгон јаҥы телекейиниҥ бозогозында турадыс. Бис удабас ла јердиҥ рай болуп каларын кӧрӧрис (Иса. 35:1; Лука 23:43). Анда Дьявол ло кӧрмӧстӧр болбос (Ачыл. 20:2, 3). Тӧгӱн кудай јаҥ база кемди де тӧгӱндебес (Ачыл. 17:16). Кижиниҥ башкарулары улусты базынып болбос (Ачыл. 19:19, 20). Анайда ок ондо тӱймеечилер болбос (Сар. 37:10, 11). Ончозы Иегованыҥ чындык јасактарын бӱдӱрип амырла, бирликле јакшызынып јӱрер (Иса. 11:9). Бис бу ӧйди энчикпей сакып јадыбыс. Анайда ок бис Иеговага сӧсуккур болзоос, райда јӱрӱмис канча да јӱс јылдар  эмес, је јажын-чакка улалар! (Сар. 37:29; Иоанн 3:16).

8. Бир миссионерге ӱргӱлји јӱрӱмге ижемји канайып болушкан? (Иуда 20, 21).

⁸ Ӱргӱлји јӱрӱмге ижемји биске Кудайга чындык артарга ла ончо кӱчтерди ӧдӧргӧ болужар. (Иуда 20, 21, ЈТ кычырыгар.) Анайда ок бойыстыҥ уйан јандарысла тартыжарга болужат. Мындый тартыжу Африкада узак јылдардыҥ туркунына миссионер болуп турган акада болгон. Ол айдат: «Иеговага сӧсуккур болгонымнаҥ улам мениҥ ӱргӱлји јӱрӱмим камаанду деп оҥдогом. Оныҥ учун бу уйан јанымла оноҥ ло ары тартыжар деп сананып алгам. Бу керегинде Иеговага тыҥыда мӱргӱп баштагам. Оныҥ болужыла уйан јанымды јеҥип чыккам».

«СЕН... ЈЕДИМДӰ БОЛОРЫҤ»

9. Давидтиҥ јӱрӱминде кандый кӱчтер болгон?

⁹ Давид улу каан болгон. Анайда ок ол кӱӱчи, ӱлгерчи, јуучыл ла судурчы болгон. Оныҥ јӱрӱминде кӧп кӱчтер болгон. Канча јылдардыҥ туркунына Давид качып-јажынып јӱрген. Нениҥ учун дезе оны кӱйӱнчек Саул каан истеген. Кийнинде бойы каан болуп каларда, ого ойто ло јажынарга келишкен. Не дезе оныҥ уулы Авессалом адазын ӧлтӱреле, јерине отурып аларга сананган. Давид кӱчтерге ле бойыныҥ јастыраларына кӧрбӧй Иеговага учына јетире чындык арткан. Иегова ол керегинде «јӱрегиме јараган» кижи деп айткан. Давидтиҥ айткан сӧстӧрин ајаруга алар керек! (1 Каан. 15:5; Ап. ижи 13:22, сноска).

10. Нениҥ учун Соломонго Давидтиҥ јӧби керек болгон?

¹⁰ Давид оныҥ кийнинде каан болотон Соломон уулына кандый јӧптӧр айтканын кӧрӱп ийектер. Иегова бу јиит уулды ару бажырышка јӧмӧшсин ле ӧргӧӧ тутсын деп талдап алган (1 Лет. 22:5). Соломонго коркышту јаан иш бӱдӱрер керек ле бӱдӱн албатыны кичеер керек болгон. Кудайдыҥ болужы эмес болзо, ол бу ишти бӱдӱрип болбос эди. Эмди Давид ого кандый сӧстӧр айтканын кӧрӱп ийектер.

11. 1 Каандар 2:2, 3-ле болзо, Давид уулына нени айткан ла Соломон бу сӧстӧрлӧ јӱрӱп турарда оныҥ јӱрӱми кандый болгон? (Јурукты база кӧрӱгер.)

¹¹ Давид нени айткан? (1 Каандар 2:2, 3 кычырыгар.) Давид уулына Иегованыҥ сӧзин угуп јӱрзе, јӱрӱми једимдӱ болор деп айткан. Соломон кийнинде кӧп немеге јединген (1 Лет. 29:23—25). Ол улу ӧргӧӧ туткан ла Агару Бичиктиҥ кезик бичиктерин бичиген. Анайда ок оныҥ сӧстӧри Агару Бичиктиҥ ӧскӧ бичиктеринде туштайт. Оныҥ ойгоры ла  сӱреен бай болгоны јӱк ле Израильде эмес ӧскӧ дӧ јерлерде угулган болгон (1 Каан. 4:34). Је ого Давидтиҥ оныҥ једими Иеговага сӧсуккур болгонынаҥ камаанду деп айткан сӧстӧрин ундыбас керек болгон. Андый да болзо, кийнинде ол ӧскӧ кудайларга бажырып баштаган. Иеговага бу јарабаган, оныҥ учун ол Соломонго ойгорын бербей барган. Оныҥ ойгоры јогынаҥ ол албатыны јакшы башкарып болбой барган (1 Каан. 11:9, 10; 12:4).

12. Давидтиҥ сӧстӧри бисти неге ӱредет?

¹² Мынаҥ биске кандый ӱредӱ бар? Сӧсуккур болгоны једимге экелет (Сар. 1:1—3). Иегова бисти Соломон чылап бай ла јарлу эдип салар деп сӧзин бербеген. Је ол биске ойгор берет (Укаа 2:6, 7; Иак. 1:5). Библиялык принциптер биске иш, ӱредӱ, амыраары ла акча-манат јанынаҥ сурактарда јакшы јӧптӧр чыгарарга болужар. Кудайдыҥ јӧптӧрин тузаланып турзаас, бисте оныла јакшы колбулар ла ӱргӱлјиге јӱретен арга болот (Укаа 2:10, 11). Анайда ок бисте чындык најылар ла ырысту биле болор.

13. Карменниҥ јӱрӱмин чыннаҥ ла не једимдӱ эткен?

¹³ Мозамбикте јадып турган Ка́рмен бийик ӱредӱ јокко бу јӱрӱмде неге де јединип болбозыҥ деп сананган. Оныҥ учун ол университеттиҥ архитектурный факультедине кирип алган. Ка́рмен бичиген: «Меге ӱредӱ сӱреен јараган. Је ого коркышту кӧп ӧй лӧ ийде-кӱч барып турган болгон. Ӱредӱ 7:30-та башталып, 18:00 саатта божоп туратан. Мынаҥ улам меге јуунныҥ туштажуларына јӱрерге кӱч болгон. Учы-учында кӧгӱзим уйадай берген. Мен эки кайраканга иштерге албаданып тургам деп оҥдоп ийгем» (Матф. 6:24). Кармен мӱргӱген ле бистиҥ бичиктерди шиҥдеп баштаган. Ол оноҥ ары айдат: «Аксагалдар ла энем меге јакшы јӧптӧр берген. Анайып мен университетти таштап ийеле, пионердиҥ ижин баштагам. Бу мениҥ јӱрӱмимде эҥ јакшы талдаш болгон. Мен бого тыҥ сӱӱнедим».

14. Моисей ле Давид калганчы сӧстӧрин айдып турала, кандый шӱӱлтеге ајару эдерге санангылаган?

¹⁴ Давид ле Моисей Иегованы тыҥ  сӱӱген ле ого сӧсуккур болоры сӱреен учурлу деп оҥдогон. Калганчы сӧстӧриле олор ӧскӧ улусты олордыҥ темиле јӱрӱп, Иегова Кудайына чындык артсын деп кӱӱнзеткен. Анайда ок олор Иегованы артыргызып салган улус оныҥ јарадузын ла алкыштарын јылыйтып салар деп озолондыра айдып салган. Олордыҥ сӧстӧри бӱгӱнги де кӱнде тузалу болот. Канча јӱс јылдар ӧткӧн кийнинде Иегованыҥ база бир ишчизи Кудайга чындык болоры сӱреен учурлу деп кӧргӱскен.

МЫНАҤ «ЈААН СӰӰНЧИ МЕНДЕ ЈОК»

15. Апостол Иоанн јӱрӱминде нени кӧргӧн?

¹⁵ Иоанн Иисустыҥ јуук најызы ла апостолы болгон (Матф. 10:2; Иоан. 19:26). Иисус јерде јарлап турарда, ол оныҥ јанында болгон ло Иисустыҥ эткен кайкалдарын кӧргӧн, анайда ок оныҥ кӱч ӧйлӧринде ого болушкан. Иоанн Иисустыҥ кыйналып божогонын ла тирилгенин база кӧргӧн. Анайда ок бир кичинек бӧлӱк ака-эјелердеҥ јаан јуун болуп калганын ла сӱӱнчилӱ јаар «теҥери алдында јӱргендерге ончозына јарлалган[ын]» кӧргӧн (Кол. 1:23).

16. Иоанныҥ самаралары алдында ӧйдӧ кемдердиҥ бӱдӱмјизин тыҥыткан, бӱгӱнги кӱнде кемдерди тыҥыдат?

¹⁶ Иоаннга узун јӱрӱминиҥ учында Агару Бичикти бичииринде туружатан кӱндӱ эдилген. Ол Иисус Христостоҥ болгон сӱреен јилбилӱ ачылтаны бичиген (Ачыл. 1:1). Анайда ок ол Евангелиелердиҥ бирӱзин ле ӱч самара бичиген. Ӱчинчи самаразын Иоанн Гай деп чындык христианга бичиген. Ол оны уулын чылап сӱӱген (3 Иоанн 1). Је јуунда ӧскӧ дӧ кӧп ака-эјелерди Иоанн балдарын чылап сӱӱген болор. Бу јажы јаанап калган чындык кижиниҥ бичигени бӱгӱнги кӱнде јадып турган Иисустыҥ ӱренчиктериниҥ бӱдӱмјизин тыҥыдып јат.

17. 3 Иоанн 4-лӧ болзо, јаан сӱӱнчини не экелет?

¹⁷ Иоанн нени бичиген? (3 Иоанн 4 кычырыгар.) Иоанн Кудайга сӧсуккур болоры кандый сӱӱнчи экелип турганы керегинде бичиген. Ол бойыныҥ ӱчинчи самаразын бичип салган тушта, тӧгӱн ӱредӱлер таркадып турган ла јуунды бӧлӱп турган улус табылган. Је «чындыктыҥ јолында» јӱрӱп турган улус база болгон. Олор Иегованыҥ сӧзин угуп «Кудайдыҥ јакылталарыла» јӱрген  (2 Иоанн 4, 6). Бу чындык христиандар јаҥыс Иоаннды эмес, Иегованы да сӱӱндирген (Укаа 27:11).

18. Иоанныҥ сӧстӧри бисти неге ӱредет?

¹⁸ Бис мынаҥ кандый ӱредӱ аладыс? Чындык болоры јаан сӱӱнчи экелет (1 Иоан. 5:3). Темдектезе, Иеговага јарап турган керектер эдип турзаас, бис ырысту болодыс. Бу телекейдиҥ ченелтелерине кирбей, оныҥ јасактарын бӱдӱрип јӱрзеес, Иегова сӱӱнип јат (Укаа 23:15). Теҥериде ангелдер де база сӱӱнет (Лука 15:10). Анайда ок ака-эјелер истежӱлерге де, ченелтелерге де кӧрбӧй, Кудайга чындык артат. Бис олорло оморкойдыс (2 Фес. 1:4). Качан Сатананыҥ телекейи јоголып калза, бис Иеговага чындык артканыс учун тыҥ сӱӱнерис.

19. Рейчел улусты чындыкка ӱредип, нени сезет? (Јурукты база кӧрӱгер.)

¹⁹ Биске Иегова керегинде чындыктарды куучындайтан арга јаан сӱӱнчи экелип јат. Доминиканский Республикада јадып турган Ре́йчел улуска Кудайдыҥ ишчилери болорго болужатан арганы сӱреен тыҥ баалайт. Ол бойыныҥ кӧгӱс балдары керегинде мындый сӧстӧр айдат: «Агару Бичикти ӱренип турган улус Иегованы сӱӱп, ого бӱдӱп, јӱрӱмин солып баштаза, сӱӱнгенимди сӧслӧ дӧ айдып болбозым. Мыны кӧрӱп, албаданганым калас эмес деп оҥдоп јадым».

КУДАЙДЫҤ ЧЫНДЫК ИШЧИЛЕРИНИҤ КАЛГАНЧЫ СӦСТӦРИН УГУГАР

20. Бисте Моисейле, Давидле, Иоаннла не тӱҥей болот?

²⁰ Моисей, Давид, Иоанн озогы ӧйдӧ јаткан. Бистиҥ айалга олордыҥ айалгазынаҥ чек башка болот. Је андый да болзо, бисте кӧп тӱҥей неме бар. Олор чындык Кудайга бажырган. Бис те ол ло Кудайга бажырадыс. Олор ло чылап бис мӱргӱп, ого иженип, оноҥ болуш ла јӧптӧр сурайдыс. Иегова бу эр улусты сӧсуккуры учун кайралдаган. Бис те сӧсуккур болзоос, бисти кайралдаар деп бир де алаҥзыбай јадыс.

21. Моисейдиҥ, Давидтиҥ ле Иоанныҥ калганчы сӧстӧрин угуп јӱрген улусты не сакыйт?

²¹ Кудайдыҥ ӱч ойгор, ченемелдӱ, чындык ишчилери бисти оныҥ јасактарын бӱдӱрип јӱрзин деп кӱӱнзедет. Анайып ла эдип јӱректер. Ол тушта бис нени ле этсеес, једимдӱ болорыс. Бис узак, учы-кыйузы јок јӱрӱм јӱрерис (Јаҥ. т. 30:20). Јӱрӱмис бистиҥ сӱӱнчилӱ болор, не дезе Кудай бисти јарадып турган. Ол ончо берген сӧзин бӱдӱрип салар. А биске сакыбаган кайкамчылу алкыштар берер (Эф. 3:20).