1. Нениҥ учун кезик ака-эјелерге Агару Бичикти ӱренерге келишпей јат?

БӰГӰНГИ кӱнде акча иштеп аларга јеҥил эмес. Кӧп ака-эјелер билезин азыраарга узак иштеп јат. Олордыҥ кезигине ишке барарга ла ойто кайра јанып келерге, јолго канча саат барат. Кемизине де уур иш эдерге келижет. Оныҥ учун иштиҥ кийнинеҥ Агару Бичикти ӱренетен ийде-кӱч чек артпай калат.

2. Слер Агару Бичикти кандый ӧйдӧ ӱренедигер?

² Андый да болзо, бис Агару Бичикти ле ого тайанган бичиктерди ӱренерге — чыннаҥ ла тереҥжиде ӱренерге — ӧй табар учурлу. Нениҥ учун дезе мынаҥ Иеговала колбуларыс ла ӱргӱлјиге јӱретен аргабыс камаанду (1 Тим. 4:15, 16). Мыны оҥдоп, кем де кажы ла кӱн эрте туруп, айылда амыр тушта, ару башка ӱренип јат. Је кем де кӧгӱс јанынаҥ меҥдебезинеҥ шӱӱп сананарга эҥирде ӧй табат.

3, 4. Кепке базылып турган ла интернетке чыгып турган материалдар канайып астадылган, нениҥ учун?

³ Агару Бичикти ӱренерге ӧй табып турар керек деп, слер јӧпсинер болорыгар. Је нени ӱренер керек? Слер мынайып айдар болорыгар: «Бисте бар ончо немени кычырарга меге ӧй јетпей јат». Эйе, Иегованыҥ организациязыныҥ чыгарып турганын ӱзе кычырарга эмезе сайтта ла интернет-телевидениеде чыгып турган кӧрӱлмелердиҥ кажызын ла кӧрӧргӧ ӧй јетпей јат. Башкару јӧп мыны оҥдоп, кепке базылып турган бичиктерди ле интернетке чыгып турган материалдарды астадар деп шӱӱлтеге келген.

⁴ Оныҥ учун «Ежегодник Свидетелей Иеговы» деп бичик база чыкпай јат, не дезе, јилбилӱ учуралдарды jw.org^® сайттаҥ  табып аларга јараар эмезе интернет-телевидениедеги кажы ла ай чыгып турган программалардаҥ кӧрӱп аларга јараар. Эмди «Каруулчы шибеениҥ» таркадатан чыгармазы ла «Ойгоныгар!» деген журналдар бир јылда јӱк ле ӱч катап чыгат. Бу солынталар бисте ӧскӧ керектерге бош ӧй табылзын деп эдилбеген, карын баштапкы јерге эҥ учурлу керектерди тургузарга эдилген (Флп. 1:10). Эмди озо баштап нени ӱренип баштаарын ла Агару Бичикти таҥынаҥ ӱренери тузалу болзын деп, нени эдерин шӱӱжип ийектер.

5, 6. Биске нени тереҥжиде ӱренер керек?

⁵ Озо ло баштап нени ӱренер керек? Биске кажы ла кӱн Кудайдыҥ Сӧзин ӱренер керек. Иштеер кӱндерде ӧдӱп турган туштажуда шӱӱжилетен Агару Бичиктиҥ ӱзӱги кыскартылып калган. Анайып, бисте кычырганысты шӱӱп сананатан ла кожулта јетирӱлер таап алатан ӧй кӧптӧй берген. Бис берилген бажалыктарды јӱк ле кычырып аларга турган эмезис, је Агару Бичиктеги чындык јӱрекке тереҥ кирип турзын деп, шӱӱп сананарга амадап јадыс. Анайып, Иеговала колбуларыс оноҥ јуук болор (Сар. 19:14).

⁶ Анайда ок биске «Каруулчы шибееге» ле иштеер кӱндерде ӧдӱп турган туштажуга белетенер керек. Је «Каруулчы шибее» ле «Ойгоныгар!» деп журналдардыҥ јаҥы чыгармаларын кычырарга база ундыбас керек.

7. Бистиҥ сайттагы ла интернет-телевидениедеги чыгып турган ончо немени кычырарга ла кӧрӧргӧ келишпей турган болзо, нениҥ учун санааркабас керек?

⁷ Слер ӧрӧги айдылганыла јӧпсинип турган болорыгар: «Је сайттагы ла интернет-телевидениедеги материалдардыҥ кажызын ла кычырарга, кӧрӧргӧ келишпей турза, канайдар? Ондо андый кӧп неме!» — деп, айдып турган болзогор, бир тем кӧрӱп ийектер. Слер «шведский стол» јазалган ресторанга келдигер. Анда сӱрекей амтанду курсактыҥ кӧбине кӧзигер јӱгӱре берет. Је ӱзе немени јип болбозыгар деп оҥдоп, јӱк ле тоолу курсак талдап аладыгар. Анайып ла кӧгӱс курсакла болот: бистиҥ интернет-ресурстарда чыгып турган материалдардыҥ кажызын ла кычырарга ла кӧрӧргӧ ӧйӧӧр јетпей турган болзо, санааркабагар. Канча кире аргагар бар, ончо ло кире кычырып ла кӧрӱп туругар. Эмди Агару Бичикти канайып ӱренерин ле ӱренгенис тузалу болзын деп, нени эдерин шӱӱжип ийектер.

8. «Каруулчы шибеени» ӱренерине канайып белетенерге јараар? Анайып ӱренгени, слерге кандый тузазын јетирер?

⁸ Ӱренери — кандый бир амадулу тереҥ сананып кычырары. Материалды ӱренери дегени — ол јӱк ле јӱгӱре кычырып, карууларын тартып алары эмес. Темдектезе, «Каруулчы шибееге» белетенип јатсагар, озо баштап јӧрмӧл не керегинде болгонын, оныҥ адын, бӧлӱктерин, анайда ок такып кӧрӧтӧн сурактарын кӧрӱп ийигер. Мыныҥ кийнинеҥ меҥдебей, јӧрмӧлди бойын јазап кычырып алыгар. Кычырып јада, тӧс шӱӱлтелерин табып туругар (кӧп сабада олор абзацтыҥ баштапкы эрмегинде болот). Бу эрмектер абзацта не керегинде айдыларын кӧргӱзип јат. Анайда ок јӧрмӧлди кычырып јада, кажы ла абзац јӧрмӧлдиҥ ле бӧлӱктиҥ адыла кандый колбулу болгонын кӧрӱп туругар. Јарт эмес сӧстӧрдиҥ ле шӱӱлтелердиҥ учурын шиҥдеп ийерге, олорды чыгара бичип алыгар.

9. а) «Каруулчы шибеени» ӱренерине белетенип јада, нениҥ учун библиялык ӱлгерлерге ајару эдер керек, оны канайып эдер? б) Сарын 119:27-ле болзо, ӱлгерлерди кычырарынаҥ башка база нени эдер керек?

⁹ «Каруулчы шибеени» ӱренери — ол Агару Бичикти ӱренери. Оныҥ учун библиялык ӱлгерлерге, анчада ла туштажуда кычырылатан ӱлгерлерге, јазаптыра ајару эдигер. Темдектезе, бу ӱлгерлердиҥ тӧс сӧстӧри абзацтагы шӱӱлтени канайып јартап турганын сананып  кӧрӱгер. Анайда ок кычырып алган ӱлгерлерди шӱӱп, јӱрӱмде канайып тузаланарын сананыгар. (Сарын 119:27 кычырыгар *.)

10. Еврейлерге 5:14-лӧ болзо, балдарды билелик бажырыштыҥ ӧйинде Агару Бичикти ӱренерине, јуунныҥ туштажуларына белетенерине ле шиҥжӱ ӧткӱрерине нениҥ учун ӱредер керек?

¹⁰ Ада-энелер балдарын билелик бажырыштаҥ сӱӱнчи алзын деп кӱӱнзейт. Је ада-энелерге балдарыла нени шӱӱжерин сананар керек те болзо, кажы ла неделеде кандый бир јилбилӱ неме сананып таппаска да јараар. Билелик бажырыштыҥ ӧйинде интернет-телевидениедеги ай сайын чыгып турган программаларды кӧрӧргӧ лӧ кезикте јилбилӱ нени-нени эдерге, темдектезе Нойдыҥ ковчегин эдерге, јараар да болзо, балдарды Агару Бичикти ӱренерине ӱредер керек. Олорды јуундардыҥ туштажуларына канайып белетенерине ле школдо боло беретен учуралдарга керектӱ јетирӱлерди канайып табып аларына ӱредип салар керек. (Еврейлерге 5:14 кычырыгар.) Балдар библиялык темаларды шиҥдеерине ӧй табып турза, олорго јуундардыҥ туштажуларында ла курултайларда айдылып турганын айлаарга јеҥил болор, не дезе, ондо кӧрӱлмелер јаантайын ла кӧргӱзилбей јат. Билелик бажырыштыҥ узуны балдардыҥ јажынаҥ ла балдардыҥ кылык јаҥынаҥ камаанду.

11. Ӱредӱлер алып турган улусты Агару Бичикти тереҥжиде ӱренерине нениҥ учун ӱредер керек?

¹¹ База кемди Агару Бичикти ӱренерине ӱредер керек? Агару Бичикле ӱредӱлер алып турган улусты. Баштап тарый олор ӱредӱлерге эмезе јуунныҥ туштажуларына белетенип тура, јӱк карууларды да тартып турганына сӱӱнип јадыс. Је биске олорды бажынаҥ ла ала Агару Бичикти тереҥжиде ӱренип, таҥынаҥ шиҥдеерине тӱҥей ле ӱредер керек. Ол тушта, олор кандый бир уур-кӱчке туштаза, јуунныҥ улузынаҥ нени эдетенин айдып берзин деп сурабас, карын бистиҥ бичиктердеҥ керектӱ јетирӱни бойлоры табып аларга албаданар.

12. Агару Бичикти бис кандый амадулу ӱренип јадыс?

¹² Слерге Агару Бичикти ӱренерге тыҥ ла јарабай турза, нени эдерге јараар? Озо баштап кыска ӧйгӧ ӱренип кӧрӱгер, је оноҥ ӧйди араайынаҥ кӧптӧдип туругар. Агару Бичикти нениҥ учун ӱренип турганаарды ундыбагар. Бистиҥ тӧс амаду — Иеговага оноҥ јуук болоры. Је бисте ӧскӧ дӧ амадулар бар. Кезикте биске кандый бир сурактыҥ каруузын табып алар керек, кезикте кандый бир айалгада нени эдерин оҥдоп аларга, шиҥжӱ ӧткӱрер керек.

13. а) Школдо ӱренип турган бала кожо ӱренип турган балдарга бойыныҥ кӧрӱмин куучындап берерге канайып белетенер аргалу? б) Колоссыдагыларга 4:6-дагы сӧстӧрди слер канайып тузаланар аргалу?

 ¹³ Темдектезе, слер школдо ӱренип турганаар. Анда слерле кожо ӱренип турган балдардыҥ ончозы эволюцияныҥ теориязына бӱдӱп турган болзын. Слер Агару Бичиктиҥ кӧрӱмин айдарга турган да болзогор, је билгиреер арай ла ас деп сананып турганаар. Мындый айалгада шиҥжӱ ӧткӱрер керек болот. Эки амаду тургузып алыгар: баштапкызы — ӱзе немени Кудай јайаган деп, бӱдӱмјигерди тыҥыдар, экинчизи — чындыкты корулаарга ӱренип алар (Рим. 1:20; 1 Петр 3:15). Озо баштап кожо ӱренип турган балдар эволюция чын деп, кандый керелер айдып турганын сананыгар. Оноҥ бу тема аайынча бистиҥ бичиктерде не айдылганын шиҥдеп кӧрӱгер. Улуска бойыстыҥ кӧрӱмисти јартаарга андый ла уур эмес. Кӧп саба улус эволюцияга, тоомјылу кандый бир кижи оны чын деп айтканынаҥ улам бӱдӱп јат. Агару Бичиктиҥ кӧрӱмин керелеп турган тоолу кере таап алзагар, кемге-кемге бу сурактыҥ аайына чыгып аларга болужар болорыгар. (Колоссыдагыларга 4:6 кычырыгар.)

14—16. а) Библиялык кандый бир бичикти јакшы билип аларга не болужар? б) 16-чы абзацтыҥ учында берилген ӱлгерлер Амостыҥ бичигин оҥдоп аларга канайып болужар? (« Агару Бичиктеги учуралдар санаагарга јуралып турзын!» деген рамканы кӧрӱгер.)

¹⁴ Темдектезе, јуунныҥ келер туштажузында кичӱ судурчылар деп адалып турган бичиктердиҥ бирӱзи шӱӱжилер болзын. Је слер бу бичик керегинде јакшы билбес болодыгар. Оныҥ учун бу судурчыныҥ бичигенин кычырарга јилбилӱ болзын деп, нени эдер керек?

¹⁵ Озо баштап бойыгарга мындый сурактар беригер: «Бу бичикти бичиген кижи керегинде мен нени билерим? Бу кижи кем болгон, кайда јаткан, нени эткен?» Анайып, бу судурчы керегинде кӧптӧдӧ билип алала, ол кандый бир сӧстӧрди эмезе кӧргӱзӱ темдерди нениҥ учун тузаланган деп оҥдоп аларыгар. Анайда ок кычырып јада, судурчыныҥ кылык-јаҥын кӧргӱзип турган сӧстӧргӧ ајарып туругар.

¹⁶ Бу бичиктиҥ качан бичилгенин билип алза база јакшы, анда уур неме јок. Мыны билип аларга, «Јаҥы телекейдиҥ кӧчӱрмезинде» «Таблицу библейских книг» кӧрӱгер. Анайда ок «Слово Бога в картах и схемах» деп брошюрада «Пророки и цари Иуды и Израиля» деген схеманы база кӧрӱгер. Јуунныҥ туштажузында ӱренетен библиялык бичик, судурларлу бичик болордо, ол ӧйдӧги айалга кандый болгонын билип алза, јакшы болор эди. Бу судурчы улусты кандый јаман керектердеҥ кыйып турарына кӱӱнзеткен? Оныла јаҥыс ӧйдӧ кемдер јаткан? Бу бичикти јакшы билип аларга, Агару Бичиктиҥ ӧскӧ бичиктерин кӧрӧр керек болор. Темдектезе, судурчы Амостыҥ ӧйиндеги айалга кандый болгонын јакшы оҥдоп аларга, Амос 1:1-ге берилген перекрестный ссылкаларды — Каандардыҥ экинчи бичигин ле Экинчи Летописьти — кӧрзӧ тузалу болор. Анайда ок Осияныҥ судурын эске алып ийерге јараар. Ол Амостыҥ ӧйинде јаткан болор. Анайып, слер Амостыҥ јаткан ӧйи кандый болгонын јакшы билип алараар (2 Каан. 14:25—28; 2 Лет. 26:1—15; Ос. 1:1—11; Ам. 1:1).

17, 18. Абзацтагы темдердиҥ эмезе бойыгардыҥ темигердиҥ болужыла, озо баштап кӧрӱнбей турган оок-теек јетирӱлер Агару Бичикти ӱренерин канайып јилбилӱ эдет деп куучындап беригер.

¹⁷ Агару Бичикти кычырып јада, оок-теек јетирӱлерине ајарып турзаас, јакшы болор. Темдектезе, Захарияныҥ бичигиниҥ 12-чи бажалыгында Мессияныҥ ӧлӱми керегинде судурды кычырып јадыс (Зах. 12:10). 12-чи ӱлгерде  Мессияныҥ божогонына «Нафанныҥ билези» кородоп ыйлаар деп айдылат. Бу сӧстӧргӧ ајару этпеске де јараар. Је токтой тӱжӱп: «Мессияныҥ ла Нафанныҥ билезинде кандый колбу бар? Бу јетирӱ керегинде кӧптӧдӧ кайдаҥ билип аларга јараар?» — деп, сананып ийигер. Шиҥдеп кӧрӱп ийектер. Бу ӱлгерде «Нафан» деп сӧскӧ эки перекрестный ссылка берилген. Оныҥ бирӱзи 2 Самуил 5:14. Ондо Нафан — Давид каанныҥ уулдарыныҥ бирӱзи деп айдылган. Экинчи ссылка — Лука 3:31-ге экелет. Бу ӱлгердеҥ Иисус энези, Мария, ажыра Нафанныҥ калдыгынаҥ болгон деп билип аладыс *. Јилбилӱ, дезеер! Судур аайынча болзо, Мессия Давидтиҥ калдыгынаҥ болор учурлу дегенин билерис (Матф. 22:42). Је Давидтиҥ уулдарыныҥ тоозы 20-неҥ ажык болгон. Оныҥ учун Иисустыҥ божогонына кородоп ыйлаар улустыҥ ортозында Нафанныҥ билези болор деп нениҥ учун айдылганын билип алары јилбилӱ эмес пе?

¹⁸ Је эмди база бир тем кӧрӱп ийектер. Луканыҥ Сӱӱнчилӱ јарыныҥ 1-кы бажалыгында Гавриил деп ангелдиҥ Марияга чыгатан уулы керегинде айткан сӧстӧрин кычырадыс: «Ол улу болор, Ӧрӧ Турганныҥ Уулы деп адалар. Кудай Кайракан Ого улу Давид адазыныҥ ширеезин берер. Ол Иаковтыҥ калдыгын каан болуп ӱргӱлјиге башкарар» (Лука 1:32, 33). Бис озо ло баштап ангелдиҥ јарыныҥ баштапкы бӧлӱгине, анчада ла Иисусты «Ӧрӧ Турганныҥ Уулы» деп айдылганына, ајару эдер болорыс. Је анайда ок Гавриил Иисусты башкараачы болор деп судурлаган. Мария бу сӧстӧрди угала, нени сананганын шӱӱп кӧрӧргӧ јараар. Ол Иисусты Ирод каанныҥ эмезе оныҥ ордына каан болотон кандый бир кижиниҥ ордына отурар деп сананган ба? Мария мынайып сананар аргалу болгон: «Иисус чын ла каан болуп отурза, мен каан-абакай болорым,  билем дезе, байзыҥда јадар». Је Агару Бичикте Мария Гавриилга анайып айтканы кайда да айдылбаган. Анайда ок Мария, Иаков ло Иоаннга кӧрӧ, Кудайдыҥ Каандыгында јамылу јерге отурарын качан да сурабаган (Матф. 20:20—23). Бу јетирӱнеҥ Мария сӱрекей јобош кижи болгон деп кӧрӱнет.

19, 20. Иаков 1:22—25-те ле 4:8-те айдылганыла болзо, бис Агару Бичикти кандый амадуларлу ӱренер учурлу?

¹⁹ Ундыбагар: Кудайдыҥ Сӧзин ле библиялык бичиктерди ӱренериниҥ тӧс амадузы — Иеговага јууктаары. Анайда ок Кудайды сӱӱндирерге, бис бойыстыҥ кандый болгонысты билип, неде солынар керек деп оҥдоп аларга кӱӱнзейдис. (Иаков 1:22—25; 4:8 кычырыгар.) Агару Бичикти ӱренер алдында, јаантайын Иегованаҥ агару тын сураар керек. Анайда ок кычырып јаткан јетирӱнеҥ јаан туза аларга ла бойыска Кудайдыҥ кӧрӱмиле кӧрӧргӧ, Иегованаҥ болуш сураар керек.

²⁰ Сарнаачы Иегованыҥ чындык ишчизи керегинде мындый сӧстӧр айткан: «[Ол] сӱӱнчини Иегованыҥ јасагынаҥ табат, оныҥ јасагын јарым ӱнле тӱн-тӱш кычырат. [...] Нени ле эткенде ол ӱзе эдип алар» (Сар. 1:2, 3). Мындый сӧстӧр бис керегинде айдылып турзын деп, кажыбыс ла кӱӱнзеп јат!