1. Јарлаар ишке Иисустыҥ кӧрӱми кандый болгон? Ӱренчиктер оноҥ кандый тем алган? (Кадарындагы јурукты кӧрӱгер.)

ИИСУС јерде болордо, јарлаар ишке чын кӧрӱмдӱ болгон. Ол ӱренчиктерин де јарлаар иште сӱӱнчизин јылыйтпазын деп кӱӱнзеген (Иоанн 4:35, 36). Иисус олорло кожо болордо, олор јарлаар ишке эрчимдӱ турушкан, а оны тудуп, ӧлтӱргилеп саларда, олордыҥ кӱӱни ӧчӧ берген (Лука 10:1, 5—11, 17; Иоанн 16:32). Оныҥ учун тирилген кийнинде, ол ӱренчиктериниҥ кӱӱнин кӧдӱрип, олорго оноҥ ло ары јарлазын деп айткан. Оноҥ Иисус теҥеридӧӧн јӱре берерде, оныҥ ӱренчиктери эрчимдӱ јарлап баштаган. Мыны кӧрӱп, олордыҥ ӧштӱлери чугулданып: «Бойыгардыҥ ӱредӱгерди Иерусалим ичине таркадып... јадыгар» — деп айдышкан (Ап. ижи 5:28).

2. Иегова јарлаар ишке алкыжын канайып јетирген?

² Баштапкы чакта јарлаар иште турушкан христиандардыҥ ижин Иисус башкарган, а Иегова олорго бу ишти бӱдӱрерге болушкан. Оныҥ учун Каандык керегинде чындыкты кӧп улус алынган. Темдектезе, б. э. 33 јылында, Беженинчи кӱнде, 3 000 кире кижи сууга чӧҥӱрилген (Ап. ижи 2:41). Мыныҥ кийнинде ӱренчиктердиҥ тоозы оноҥ тыҥ кӧптӧгӧн (Ап. ижи 6:7). Је калганчы кӱндерде јарлаар иш оноҥ јаан ӧзӱм алынар деп, Иисус судурлап салган (Иоанн 14:12; Ап. ижи 1:8).

3, 4. Нениҥ учун кезик ороондордо јарлаарга кӱч болот? Бу јӧрмӧлдӧ нени кӧрӧрис?

³ Бис ончобыс јарлаар ишке чын кӧрӱмдӱ болорго албаданадыс. Кезик ороондордо јарлаарга јеҥил, нениҥ учун дезе ондо Агару Бичик ӱренерге турган улустыҥ тоозы сӱреен кӧп. Андый улустыҥ кезигине Иегованыҥ Керечилерин сакыырга келижет. Је кезик ороондордо  јарлаарга јеҥил эмес. Нениҥ учун дезе улус айылдарында болбой јат эмезе айылдарында болуп турган улус Агару Бичик ӱренерге кӱӱнзебей јат.

⁴ Слер јарлаарга кӱч јерде јадып турган болзогор, бу јӧрмӧлдӧги јӧптӧр слерге болужар болор. Је эмди, канча ла кире кӧп улуска јарлаарга, ака-эјелер нени эдип турганын кӧрӱп ийектер. Анайда ок улус бисти укпай да турза, бис нениҥ учун сӱӱнчилӱ болор аргалу деп шӱӱжип ийектер.

5. Кӧп ака-эјелерде кандый кӱчтер болуп јат?

⁵ Кӧп ака-эјелерге улуска айылдарында јолыгарга там ла кӱч болуп барат. Кезик јарчылар каруулдалып турган тураларлу јерде јадат. Андый туралардӧӧн, айылдыҥ ээзи кычырбаган болзо, кирер арга јок болот. Кезик ака-эјелер каруулдалбай турган тураларда јарлап та турган болзо, кӧп улуска јолыгып болбой јадылар. Ӧскӧ ака-эјелер ас улус јадып турган јерде јарлап јат. Олор бир де кижиле болзо куучындажарга ыраактаҥ једип барза, айылда кем де јок болуп калат. Бисте мындый кӱчтер болуп турган болзо, бир де чӧкӧбӧктӧр. Је андый кӱчтерди ӧдӧргӧ лӧ јарлаар ижис једимдӱ болзын деп нени эдер керек?

6. Јарчылар балыкчыларга незиле тӱҥей?

⁶ Иисус јарлаар ишти балык тударыла тӱҥдештирген (Марк 1:17). Кезикте балыкчылар канча кӱнниҥ туркунына бир де балык тудуп болбой јат. Је олор чӧкӧбӧй, балык тудатан ӧйин, јерин ле эп-аргазын солып јадылар. Бис те јарлаар иште анайып ла эдер аргалу. Мыныла колбой кезик јӧптӧр кӧрӱп ийектер.

7. Башка-башка ӧйдӧ јарлазаас, кандый једим болор аргалу?

⁷ Башка-башка ӧйдӧ јарлагар. Бис улус айылында болгодый ӧйдӧ јарлазаас, кӧп улуска јолыгарыс. Нениҥ учун дезе олор качан-бирде айылына тӱҥей ле јанар эмес пе! Кӧп ака-эјелер тӱште эмезе эҥирде јарлап јадылар. Бу ӧйдӧ кӧп саба улус айылда болот, кайдӧӧн дӧ меҥдебей јат. Оныҥ учун олор бисле куучындажар болор. Слерге Дэвид деп аксагалдыҥ тузаланып турган эп-аргазы јараар болор. Оныҥ айтканыла, олор бир-эки саат јарлап ийеле, айылда болбогон улуска кайра келгилейт. Ака айдат: «Экинчи катап келеле, кӧп улуска јолыгып турганыс сӱреен кайкадып јат» *.

8. Экклезиаст 11:6-дагы сӧстӧрди јарлаар ишке канайып тузаланарга јараар?

⁸ Биске бир де чӧкӧбӧс керек. Шак бу керегинде јӧрмӧлдиҥ тӧс ӱлгеринде айдылат. (Экклезиаст 11:6 кычырыгар.) Дэвид ака мындый кӱӱн-санаалу јарлап јат. Оныла бир катап мындый учурал болгон. Ол бир айылдыҥ ээзине чек јолыгып болбой туратан. Је Дэвид ака чӧкӧбӧгӧн. Ол база бир катап келерде, эжикти эр кижи ачкан. Анайып, олордо Агару Бичик керегинде сӱреен јакшы куучын болгон. Эр кижи ого мынайып айткан: «Мен мында сегис кире јыл јададым, је Иегованыҥ Керечилери меге бир де келбеген». Дэвид ака бойы мынайып куучындаган: «Айылда узак ӧйгӧ јолыгып болбой турган улуска туштазаҥ, олор сӱӱнчилӱ јарды карын да јакшы угат деп ајардым».

9. Кезик јарчылар айылда болбой турган улуска јарлаарга нени эткен?

 ⁹ Башка-башка јерде јарлагар. Айылда болбой турган улуска јарлаарга, кезик јарчылар башка-башка јерде јарлайт. Темдектезе, тышкары ла стендтӱ јарлаары, јарлаар арга јок тураларда јадып турган улусла куучындажар арга берет. Анайда ок кезик ака-эјелердиҥ ајарганыла, улус бисле паркта, рынокто ло деловой райондо јакшы куучындажып, бичиктер алат. Боливияда аймак кӧрӧӧчи болуп турган Флойран деп ака мынайып куучындайт: «Бис паркта, магазинде улусла тал-тӱштиҥ 1 садынаҥ ала 3 садына јетире куучындажадыс. Нениҥ учун дезе бу ӧйдӧ садучылар бир эмеш бош болот. Анайып бисте јакшы куучындар да болот, Агару Бичикле ӱредӱлер де башталат».

10. Јарлаарга база кандый эп-арга тузаланарга јараар?

¹⁰ Башка-башка эп-аргаларла јарлагар. Слер кижиге башка-башка ӧйдӧ, канча катап келип, јолыгарга албаданган болороор. Је јолыгарга келишпеген болзын. Мындый айалгада нени эдерге јараар? Катарина эје мынайып куучындаган: «Мен јолыгарга келишпеген улуска нени айдарга сананганымды самарага бичийдим». Бу бисти неге ӱредет? Бойыгардыҥ участогордо јарлап турала, кажы ла кижиге јарлаарга, башка-башка эп-арга тузаланыгар.

11. Кезик улус сӱӱнчилӱ јарды нениҥ учун укпай јат?

¹¹ Кезик улус сӱӱнчилӱ јарды укпай јат. Олорго Кудай да, Агару Бичик те керек  јок. Олор телекейдеги кыйын-шыраны кӧрӱп, Кудайга бӱтпей јадылар. Эмезе кудай јаҥныҥ башчыларыныҥ эдип турган јастыра керектерин кӧрӱп, Агару Бичикке бӱтпей јат. Анайда ок јӱк ле билезин, ижин, уур-кӱчтерин сананып јӱрген улус олорго Агару Бичик болушпас деп сананат. Јарлаар иште бисти укпай турган улуска учурап турзаас, биске сӱӱнчибисти јылыйтпаска не болужар?

12. Филиппыдагыларга 2:4-тӧги сӧстӧр јарлаар иште биске канайып болужат?

¹² Акту јӱректеҥ ајару эдигер. Алдында сӱӱнчилӱ јарды укпаган улус јарчылардыҥ олорго акту јӱректеҥ ајару эткенин кӧрӱп, чындыкты алынган. (Филиппыдагыларга 2:4 кычырыгар.) Ӧрӧги айдылган Дэвид ака куучындайт: «Улус бисти угарга кӱӱнзебезе, бис Агару Бичикти ле ӧскӧ бичиктерди туура эдип, олордоҥ: „Слерге нениҥ учун јилбилӱ эмес?“ — деп, сурап угадыс». Улустыҥ санаазында кӧп сабада бистиҥ нени айтканыс эмес, је олорго канайып баштанганыс артып калат. Оныҥ учун биске јарлаарга келишпеген де болзо, улуска акту јӱректеҥ ајару эткенис олордыҥ кӧзинеҥ туура калбай јат.

13. Сӱӱнчилӱ јарды кажы ла кижиниҥ айалгазына келиштирип, канайып куучындаарга јараар?

¹³ Бис јарды улустыҥ айалгазына келиштирип куучындап турзаас, олорго акту јӱректеҥ ајару эдип турганысты кӧргӱзедис. Темдектезе, айылда балдар бар деп кӧрӱп ийдеер. Ол тушта айылдыҥ ээзиле Агару Бичиктиҥ принциптери балдарды таскадарга канайып болужып турганын эмезе Агару Бичик билеге ырысту болорго канайып болужып турганын шӱӱжип ийерге јараар. Ол эмезе айылдыҥ эжигинде кӧп сомоктор кӧрӱп ийген болзоор, кижиге каршулу керектер кӧптӧгӧнинеҥ улам кӧп улус коркып јат деп айдып, удабас јӱрӱм јакшы јанына солынып калар деп, Агару Бичиктиҥ болужыла јартап беригер. Је улусла кандый да темага куучындажатан болзоор, озо ло баштап Агару Бичик олорго канайып болужарын кӧргӱзигер. Ӧрӧги айдылган Катарина эје мынайып куучындаган: «Агару Бичик меге канайып болушканын сананадым». Оныҥ учун ол сӱӱнчилӱ јарды бӱдӱмјилӱ куучындап јат. Улус та мыны ајаруга алып ийет.

14. Укаа сӧстӧр 27:17-ле болзо, јарчылар бой-бойына канайып болужар аргалу?

¹⁴ Ака-эјелердеҥ ӱренигер. Апостол Павел Тимофейге канайып јарлайтанын ла чындыкка канайып ӱредетенин јартаган.  Анайда ок Тимофейди алган билгирлерин ӧскӧ ака-эјелерге болужарга тузаланзын деп кӱӱнзеткен (1 Кор. 4:17). Бис те, Тимофей чилеп, ченемелдӱ ака-эјелердеҥ ӱренер аргалу. (Укаа сӧстӧр 27:17 кычырыгар.) Шон деп аканыҥ темин кӧрӱп ийектер. Ол алдында пионер болуп, деремне јерде јарлаган. Андагы улус бойыныҥ кудай јаҥын чын деп сананган. Шон акага мындый јерде јарлап, сӱӱнчизин јылыйтпаска не болушкан? Шон ака куучындаган: «Мен јаҥыскан јӱрбей, ака-эјелерле јарлаарга албаданып туратам. Бис јолой барып јадала, улуска чындыкты оноҥ јакшы канайып куучындаарын сананып туратаныс. Ӧткӧн куучынды сананып, келер тушта кандый ӧскӧ каруу береристи шӱӱжетенис».

15. Јарлаар ишке барардаҥ озо, нениҥ учун мӱргӱп алар керек?

¹⁵ Иегованаҥ болуш сурагар. Јарлаар ишке барган ла сайын Иегованаҥ болуш сурагар, нениҥ учун дезе бу ишти эдерге, Иегованыҥ агару тыныныҥ болужы керек болот (Сар. 127:1; Лука 11:13). Мӱргӱӱлде слерге не јанынаҥ болуш керек болуп турганын чокум айдыгар. Темдектезе, Кудайды билерге ле бисти угарга кӱӱнзеп турган улуска ууландырзын деп сурагар. Оноҥ мӱргӱгенеер аайынча эдип, кажы ла туштаган кижиге јарлагар.

16. Јарлаар ижис једимдӱ болзын деп, Агару Бичикти нениҥ учун таҥынаҥ ӱренер керек?

¹⁶ Агару Бичикти таҥынаҥ ӱренерге ӧй табыгар. Агару Бичик бисти: «Кудай слердеҥ нени кӱӱнзеп турганын, не Ого... јарап турганын, Оныҥ толо кеми не болгонын билип аларыгар [«бӱдӱмјиленип туругар», ЈТ]» — деп кӱӱнзедет (Рим. 12:2). Нениҥ учун дезе бис чындыкты таап алганыс деп бӱдӱмјиленип алзаас, јарлаар иште улусла куучындажарга биске канча кире јеҥил болор. Катарина айдат: «Меге Агару Бичиктиҥ тӧс ӱредӱлерине бӱдӱмјимди тыҥыдар керек деп оҥдогом. Оныҥ учун Јайаачы бар деп, Агару Бичик ол Кудайдыҥ сӧзи деп, анайда ок Иеговада бӱгӱнги кӱнде организациязы бар деп кӧргӱзип турган керелерди јазаптыра шиҥдегем». Бу Катарина эјеге бӱдӱмјизин тыҥыдып аларга ла јарлаар иштеҥ јаан сӱӱнчи аларга болушкан.

17. Иисус јарлаар ишке нениҥ учун чын кӧрӱмдӱ болгон?

¹⁷ Иисусты кезик улус укпаган да болзо, ол јарлаар ишке чын кӧрӱмдӱ болуп, оноҥ ло ары јарлаган. Ого чын кӧрӱмдӱ болорго не болушкан? Иисус чындыкты ӱзе улуска куучындаар керек деп билген. Оныҥ учун канча ла кире кӧп улуска болужарга кӱӱнзеген. Анайда ок чындыкты укпай турган улус оны качан бирде алынар деп оҥдогон. Темдектезе, Иисус јерде ӱч јарым јылдыҥ туркунына јарлаарда, оныҥ карындаштарыныҥ бирӱзи де оныҥ ӱренчиги болбогон (Иоанн 7:5). Је Иисус тирилген кийнинде олор ого бӱде берген (Ап. ижи 1:14).

18. Бис нениҥ учун оноҥ ло ары јарлайдыс?

¹⁸ Агару Бичиктеги чындыкты кем алынар, кем алынбас билбей јадыс. Улус башка-башка, та кемге де чындыкты алынарга кӧп ӧй керек болуп јат. Керек дезе бисти укпай да турган улус бистиҥ јакшы кылык-јаҥысты ла оноҥ ло ары јарлап турганысты кӧрӱп, кийнинде Иегованыҥ ишчилери болуп калардаҥ айабас (1 Петр 2:12).

19. 1 Коринфтегилерге 3:6, 7-деги сӧстӧр бисти неге ӱредет?

 ¹⁹ Бис чындыктыҥ ӱренин отургызып, сугарып та турган болзоос, је оны Иегова ӧскӱрет деп ундыбай турактар. (1 Коринфтегилерге 3:6, 7 кычырыгар.) Эфиопияда јарлап турган Гетахун деп ака мынайып куучындаган: «Мен 20 јылдаҥ ажыра ас јарлалып турган јерде сок јаҥыс Керечил болгом. Эмди мында 14 јарчы. Олордыҥ он ӱчӱзи, ол тоодо мениҥ ӱйим ле ӱч балам, сууга чӧҥӱрилип калган. Јуунныҥ туштажуларына дезе 32 кире кижи келет». Гетахун ака Иегова бойыныҥ организациязына ачык јӱректӱ улусты јууктадар деп иженип, чӧкӧбӧй јарлаганына сӱӱнип јат (Иоанн 6:44).

20. Бисти нениҥ учун аргадаачыларга тӱҥдештирерге јараар?

²⁰ Иеговага кажы ла кижиниҥ јӱрӱми баалу. Ол биске оныҥ Уулыла кожо ончо албатылардаҥ улусты јуузын деп, јаан учурлу иш берген (Агг. 2:7). Бу ишти улус аргадап турган ишле тӱҥдештирерге јараар. Бистерди дезе баспактадып салган улусты чыгара тартып турган аргадаачыларга тӱҥдештирерге јараар. Тирӱ артып калгандарды аргадаачылардыҥ јӱк кезиги табып алат. Је андый да болзо, бу иште ӱзе команда туружып јат. Анайып ла бис бу Сатананыҥ телекейинеҥ канча кире улусты аргадап аларысты билбезис, је Иегова олорго болужарга, бистиҥ кажыбысты ла тузаланып јат. Боливияда јадып турган Андреас ака айдат: «Кижи чындыкты билип, сууга чӧҥӱрилген болзо, бу ончобыстыҥ ӧмӧ-јӧмӧ иштегенистеҥ болгон деп, оҥдоп јадым». Бис те јарлаар ишке мындый чын кӧрӱмдӱ болзоос, Иегова јарлаар ижиске алкыжын јетирер, анайда ок бу ишке турушканыстаҥ јаан сӱӱнчи аларыс!