1, 2. Иегованыҥ ишчилеринде кандый кӱчтер болот?

АПОСТОЛ Павел Тимофейди бойыныҥ ижин толо бӱдӱрзин деп кӱӱнзеткен (2 Тим. 4:5). Бис ончобыс бу јӧпти тузаланарга база кӱӱнзеп јадыс. Је мыны бӱдӱрерге јеҥил эмес. Нениҥ учун дезе кезик ака-эјелер јарлаарга коркып јат (2 Тим. 4:2). Темдектезе, олордыҥ кезиги бистиҥ ижисти токтодып салган ороондордо јадып јат. Јарлап турала, олор тӱрмеде де болуп калардаҥ айабас.

² Иегованыҥ ишчилери башка-башка уур-кӱчтерге табартат. Темдектезе, кемге де бойыныҥ билезин азыраарга кӧп иштеерге келижип јат. Андый ака-эјелер Иеговага кӧп иштеерге турган да болзо, неделениҥ учында олордо ийде-кӱч чек артпай јат. Кезик ака-эјелер оору-јоболдоҥ ло јажы јаанаганынаҥ улам айылынаҥ да чыгып болбой јат. Анайда ок бойын эш кереги јок деп бодоп турган ака-эјелер база бар. Мария * деп атту эје мынайып куучындаган: «Бойымныҥ јаман санааларымнаҥ улам чек арып каладым, Иеговага иштеерге ийде-кӱч те, ӧй дӧ јетпей турганынаҥ улам бойымды јинедим».

3. Бу јӧрмӧлдӧ нени кӧрӧрис?

³ Иегова биске кӱчтерди ӧдӧргӧ лӧ канча кире аргабыс бар ого иштеерге ийде-кӱч берер аргалу. Је Кудай бистерге канайып болужып турганын кӧрӧрдӧҥ озо, ол Павел ле Тимофейге канайып ийде-кӱч бергенин кӧрӱп ийектер.

4. Павелде кандый кӱчтер болгон?

⁴ Павелде кӧп ченелтелер болгон. Ол соктырткан, тӱрмелеткен, керек дезе оны ӧлтӱрерге де сананган,  бу ӧйлӧрдӧ ого ийде-кӱч сӱреен керектӱ болгон (2 Кор. 11:23—25). Кезикте анда јаман санаалар да болотон (Рим. 7:18, 19, 24). Анайда ок ондо «тегенек» чилеп ӧйкӧп турган оору-јобол болгон. Ол бу оору-јоболдоҥ айрыларга Кудайды јайнап сураган (2 Кор. 12:7, 8).

5. Кӱчтер де болгон болзо, Павел нени эткен?

⁵ Павелде ченелтелер де болгон болзо, Иегова ого оноҥ ло ары јарлаарга ийде-кӱч берген. Темдектезе, ол Римде каруулда болордо кӧп улуска, ол тоодо јамылу улуска, сӱӱнчилӱ јарды эрчимдӱ јарлаган (Ап. ижи 28:17; Флп. 4:21, 22). Анайда ок оны каруулдаган улуска ла «ого келип турган улустыҥ ончозына» јарлап туратан (Ап. ижи 28:30, 31; Флп. 1:13). Бу ок ӧйдӧ Иегова оны самаралар бичииринде тузаланган. Павелдиҥ бичиген самаралары алдындагы ӧйдӧги чындык христиандарга болушкан, бистерге де болужып јат. Павелди кӧрӱп, Римдеги јуунныҥ ака-эјелери «Кудайдыҥ сӧзин там тидим ле јалтанбай јарлыкта[ган]» (Флп. 1:14). Павелде кезикте кӱчтер де болгон болзо, ол бойыныҥ айалгазында, сӱӱнчилӱ јар јарлалзын деп, канча-кире аргазы бар ончоны эткен (Флп. 1:12).

6. 2 Коринфтегилерге 12:9, 10-ло болзо, Павелге Кудайдыҥ ончо јакаруларын бӱдӱрерге не болушкан?

⁶ Павел јарлаар ишти бойыныҥ ийде-кӱчиле эмес, је Кудайдыҥ ийде-кӱчиле эткен деп јакшы оҥдогон. Оныҥ учун ол Кудайдыҥ ийде-кӱчи «чине јок тужында толо кемине једет» деп айткан. (2 Коринфтегилерге 12:9, 10 кычырыгар.) Павел истеткен де, тӱрмелеткен де, ӧскӧ дӧ ченелтелер ӧткӧн дӧ болзо, Иегова ого ончо јакаруларды бӱдӱрерге бойыныҥ агару тыны ажыра ийде-кӱч берген.

7. Тимофейде кандый кӱчтер болгон?

⁷ Тимофей јарлаар иште Кудайдыҥ ийде-кӱчине база иженген. Ол Павелдиҥ миссионер јорыгында кожо јӱрген. Анайда ок Павел ого јуундарга барып, ака-эјелердиҥ кӱӱнин кӧдӱрзин деп јакарган (1 Кор. 4:17). Тимофей бу ишти бӱдӱрип болбос деп сананган болор, оныҥ учун Павел ого мындый сӧстӧр бичип јат: «Сени јиит деп, кем де керекке албай калбазын» (1 Тим. 4:12). Бого коштой Тимофей «улам сайын оорып» туратан  (1 Тим. 5:23). Је ол дезе Иегованыҥ агару тыны ого јарлаарга ла ака-эјелерге болужарга ийде-кӱч берер деп иженген (2 Тим. 1:7).

8. Бӱгӱнги кӱнде Иегова биске канайып болужат?

⁸ Бӱгӱнги кӱнде Иегова бистерге артыкташкан кӱч берип јат, оныҥ учун бис ого чындык артып, оноҥ ло ары иштеер аргалу болодыс (2 Кор. 4:7). Је эмди Иегова биске мӱргӱӱл, Агару Бичик, ака-эјелер ле јарлаар иш ажыра канайып болужып турганын шӱӱжип ийектер.

9. Мӱргӱӱл биске канайып болужып јат?

⁹ Мӱргӱӱл. Павел бисти Ефестегилерге 6:18-ле болзо, Иеговага јаантайын мӱргӱзин деп айдат. Јаантайын мӱргӱп турзаас, Иегова биске ийде-кӱч берер. Боливияда јадып турган, кӧп ченелтелер ӧткӧн Джонни ака мыны бойы оҥдогон. Оныҥ ӱйи ле эне-адазы бир ле ӧйдӧ тыҥ оорый берген. Олорды ӱчӱлезин кичеерге коркышту кӱч болгон, учында энези божоп калган, а ӱйине ле адазына јазыларга кӧп ӧй керек болгон. Бу ончо немени эске алып, Джонни ака мынайып куучындаган: «Анчада ла кӱч ӧйдӧ Иеговага мӱргӱп, ӱзе сезимдеримди куучындап беретем. Мынайып мӱргӱгеним меге јаан болуш болгон». Иегова Джонни акага кӱчтерин ӧдӧтӧн ийде-кӱч берген. Анайда ок Боливияда јадып турган Роналд деп аксагал энези ракла ооруп турганын угуп ийген. Бир айдаҥ ол божоп калган. Мындый ченелтени ӧдӧргӧ Роналд акага не болушкан? Ол айдат: «Мен Иеговага јӱрегимде ӱзе не барын куучындап туратам. Мени Иегованаҥ јакшы кем де оҥдобос деп билгем, ол мени бойымнаҥ да јакшы оҥдоп јат». Кезикте бис ченелтелерди ӧдӱп болбозыс деп сананадыс, не керегинде мӱргӱӱрин де билбей јадыс, је Иегова бисти ого сезимдеристи ле санааларысты айдарга кӱч те болуп турган болзо, тӱҥей ле айдынзын деп кӱӱнзеп јат (Рим. 8:26, 27).

10. Еврейлерге 4:12-ле болзо, биске Агару Бичикти нениҥ учун кычырар ла шӱӱп сананар керек?

¹⁰ Агару Бичик. Бис Павел ле чилеп Агару Бичиктеҥ ийде-кӱч ле токунал алар аргалу (Рим. 15:4). Оны кычырып, шӱӱп сананып турзаас, агару тын биске кычырганысты бойыстыҥ айалгабыска канайып тузаланарга јараар деп кӧргӱзип берер. (Еврейлерге 4:12 кычырыгар.) Ӧрӧги айдылган Роналд ака мынайып айдат: «Мен Агару Бичикти кажы ла эҥир кычырарга ӱренип алгам. Бу меге Иегованыҥ кылык-јаҥдарын ла ол бойыныҥ ишчилерин канайып сӱӱп ле кичееп турганын шӱӱп сананарга болужат. Анайда ок бу меге ийде-кӱч берет».

11. Агару Бичик ӧбӧӧнин јылыйткан эјеге канайып болушкан?

¹¹ Кычырганысты шӱӱп сананып турзаас, кӱчтериске чын кӧрӱмдӱ болуп јадыс. Бу јуукта ӧбӧӧни божогон эјениҥ темин кӧрӱп ийектер. Ого болужарга, аксагал оны Иовтыҥ бичигин кычырзын деп айткан. Бу бичикти кычырып турала, ол мынайып сананган: «Иов, јӱрӱмде јӱк ле кӱчтерди сананып јӱрбес керек!» Је оноҥ бу эје Иовтыҥ кӱӱн-санаазы оныҥ санаазына кандый тӱҥей болгонын оҥдоп ийген. Бу учурал оныҥ да јӱрӱминде јакшы неме ас эмес деп эске алындырган. Ол Иегова ла  бистиҥ ижемји керегинде кӧптӧдӧ сананып баштаган. Мынаҥ улам эједе бу кӱч ченелтени ӧдӧргӧ ийде-кӱч болгон.

12. Иегова биске ака-эјелер ажыра канайып ийде-кӱч берет?

¹² Ака-эјелер. Анайда ок Иегова биске ака-эјелер ажыра болужып, ийде-кӱч берет. Апостол Павел кӧгӱс ака-эјелерине мындый сӧстӧр бичиген: «Слерди кӧрӱксеп јадым. Ортогордо болзом... бой-бойыстаҥ кӧкӱдӱ аларыс» (Рим. 1:11, 12). Бу јӧрмӧлдиҥ бажында айдылган Мария эјеге ака-эјелерле куучындажарга јарап јат. Ол айдат: «Иегова меге ака-эјелер ажыра болужып јат. Олор менде кандый кӱчтер болуп турганын билбес те болор. Мынайып олордыҥ айткан јылу сӧстӧри ле аткарган открыткалары меге сӱреен керектӱ ӧйдӧ болотон! Анайда ок менде ошкош кӱчтерлӱ эје-сыйындарла куучындажып, олор бу кӱчтерди канайып ӧткӧнин билип алатам. Бого коштой аксагалдар да мени јуундагы ака-эјелер сӱӱп ле баалап турган деп бӱдӱмјилеп јат».

13. Бис бой-бойыбысты јуунныҥ туштажуларында канайып оморкодор аргалу?

¹³ Јуунныҥ туштажулары бой-бойысты оморкодотон сӱреен јакшы арга болот. Оныҥ учун туштажунаҥ озо эмезе кийнинде, ака-эјелерди сӱӱп турганаарды ла олордыҥ ижи учун быйанду болгоноорды не айтпас? Темдектезе, Питер деп атту аксагал ӧбӧӧни Керечи эмес эјеге мындый сӧстӧр айткан: «Јуунда сени ле балдарыҥды кӧрӧргӧ кандый јакшы! Сениҥ алты балаҥ јаантайын ару-чек ле јартамалдар берерге белен болот». Бу сӧстӧрдиҥ кийнинеҥ эјениҥ кӧстӧри јаштала берген. Ол акага мынайып айткан: «Бӱгӱн бу сӧстӧр меге сӱреен керектӱ болгон!»

14. Јарлаар иш биске канайып болужат?

¹⁴ Јарлаар иш. Улус сӱӱнчилӱ јарды угуп та, укпай да турган болзо, јарлаар иш биске ийде-кӱч берет (Укаа 11:25). Стейси эјениҥ темин кӧрӱп ийектер. Оныҥ јуук тӧрӧӧнин јууннаҥ чыгарып саларда ол ал-санаага тӱжӱп, бойынаҥ: «Мен ого болужарга ончоны эткем бе?» — деп сурап туратан. Ого мынаҥ ӧскӧ неме керегинде сананарга кӱч болгон. Бу айалгада Стейси эјеге не болушкан? Јарлап турала, ол бойыныҥ кӱчтерин эмес, је улуска канайып болужарын сананган. Ол куучындаган: «Мен ол ӧйдӧ кӧгӱс јанынаҥ тӱрген ӧскӧн ӱй кижиле ӱредӱ ӧткӱргем. Бу ӱредӱ чыннаҥ ла Иегованыҥ сыйы болгон. Јарлаар иш эмес болзо, та канай јӱрер эдим!»

15. Мария эјениҥ сӧстӧри бисти неге ӱредет?

¹⁵ Кезик ака-эјелер бойыныҥ айалгаларынаҥ улам Иеговага кӧп иштеп болбос деп сананат. Мынайып сананып турган болзогор, ундыбагар: канча кире аргагар бар ончоны эдип турзагар, Иегова сӱӱнип јат. Мария эјениҥ темин база катап кӧрӱп ийектер. Ол ӧскӧ тилге куучындап турган улустыҥ јерине кӧчӱп келеле, оныҥ јарлаар ижинеҥ јаан ла туза болбой турган деп сананып баштаган. «Баштап тарый мен јӱк ле кыска каруулар берип, Агару Бичиктиҥ ӱлгерлерин кычырып, буклет берип ийетем». Мынаҥ улам ол бойын јербойыныҥ улузы чылап јакшы куучындап болбос деп сананган. Је кийнинде оныҥ кӧрӱми солына берген. Иегова оны, тилди јакшы билбес те болзо, улуска болужарга тузаланар аргалу деп, Мария эје оҥдогон. Ол айдат: «Библиялык чындыктарды оҥдоорго бир де кӱч эмес. Шак ла бу чындыктар улустыҥ јӱрӱмин солып јат».

16. Айылдаҥ чыкпай турган ака-эјелерге ийде-кӱчти не берер аргалу?

 ¹⁶ Кезик ака-эјелер уйан су-кадыгынаҥ улам айылынаҥ чыгып болбой јат. Је андый да болзо, Иегова андый ака-эјелердиҥ јарлаарга турган кӱӱнин баалап јат. Оныҥ учун олорго јарлайтан аргалар ачат. Темдектезе, бу ака-эјелер врачтарга эмезе медсестраларга јарлап јадылар. Бис алдындагы ӧйдӧ канайып јарлаганысты бӱгӱнги ӧйлӧ тӱҥдештирип турзаас, кунуга берердеҥ айабазыс. Је тӱҥдештирбей, Иегованыҥ эмди биске канайып болужып турганын кӧрӱп турзаас, бисте кандый ла ченелтени ӧдӧргӧ лӧ сӱӱнчини јылыйтпаска ийде-кӱч болор.

17. Јарлаар ижис једимдӱ эмес те деп билдирип турза, Экклезиаст 11:6-ла болзо, нениҥ учун оноҥ ло ары јарлаар керек?

¹⁷ Бистиҥ таштаган ӱренистиҥ кажызы тазылданып, ӧзӱп чыгарын билбей де јадыс. (Экклезиаст 11:6 кычырыгар.) 80 јаштаҥ ажып калган Барбара эјениҥ темин кӧрӱп ийектер. Ол улуска телефон согуп, самаралар бичип, јаантайын јарлап јат. Бир катап ол самарала кожо 2014 јылдыҥ тулаан айыныҥ 1-кы кӱниниҥ «Каруулчы шибеезин» аткарып ийген. Ол «Каруулчы шибееде» «Что для вас сделал Бог» деген јӧрмӧл болгон. Кӧрӧр болзо, самара јууннаҥ чыгардырып салганы 27 јылдаҥ ажып калган эш-нӧкӧрлӧргӧ барган. Бу эш-нӧкӧрлӧр журналды канча катап кычыргылаган. Ӧбӧӧнине Иегова чек ле ого баштанып турган деп билдирген. Оныҥ учун олор јуунныҥ туштажуларына јӱрӱп, Иеговага ойто иштеп баштаган. Барбара эје оныҥ самаразы мындый јаан једим экелер деп билбеген де. Бу дезе ого сӱӱнчи ле ийде-кӱч берген!

18. Иегованыҥ ийде-кӱчин аларга биске нени эдер керек?

¹⁸ Бу јӧрмӧлдӧҥ Иегова биске мӱргӱӱл, Агару Бичик, ака-эјелер ле јарлаар иш ажыра ийде-кӱч берип турган деп билип алдыс. Бу аргаларды тузаланып турзаас, Иегова биске болужарга кӱӱнзеп турган ла биске болужып ийер аргалу деп бӱдӱп турганысты кӧргӱзедис. Оныҥ учун теҥеридеги Адабыска оноҥ ло ары иженип јӱректер. Ол ого бастыра јӱрегинеҥ чындык иштеп јӱрген улуска ийде-кӱчин берерге белен (2 Лет. 16:9).