1. Слер тӧрӧӧндӧрӧӧргӧ лӧ најылараарга чындыкты баштапкы катап куучындап турала неге иженгенеер?

ЧЫНДЫКТЫ табып алараарда, слерде кандый сезимдер болгоны санаагарга кирип туру ба? Агару Бичиктеги чындык кандый јарт, кандый јакшы деп сананганаар! Бу чындыкты бастыра улус уккан болзо, кандый јакшы болор эди, улус јӱрӱмниҥ учурын да оҥдоп алар эди, келер ӧйгӧ сӱреен јакшы ижемјилӱ де јӱрер эди деп сӱӱнген болороор (Сар. 119:105). Оныҥ учун слер бу чындыкты тӧрӧӧндӧрӧӧргӧ, најылараарга капшай ла куучындаганаар. Је олор слерди уккан ба? Кӧп саба улус слердиҥ куучындаганаарды јуутпай турарда кайкаган болороор.

2, 3. Кӧп саба улус Иисус керегинде нени сананган?

² Улус сӱӱнчилӱ јарды укпай турза, бис кайкабай јадыс. Нениҥ учун дезе Иисусты да кӧп саба улус укпаган. Керек дезе Иисус Кудайдыҥ болужыла кайкалдар да эдип туратан. Темдектезе, Лазарьды тиргискен. Бу кайкалды Иисуска бӱтпей турган улус та кӧрӧлӧ, айдар сӧзин таппай барган. Је иудейлердиҥ кудай јаҥыныҥ башчылары Иисусты Мессия деп тӱҥей ле бӱтпеген. Олор Иисусты да, Лазарьды да экилезин ӧлтӱрерге санангылаган (Иоанн 11:47, 48, 53; 12:9—11).

³ Иисус, кӧп саба улус оныҥ Мессия болгонына бӱтпес деп билер болгон (Иоанн 5:39—44). Ол оныҥ да учун Крестеечи Иоанныҥ ӱренчиктерине мынайып айткан: «Эреҥистелбей Меге бӱткен кижи кежиктӱ» (Матф. 11:2, 3, 6). Иисуска кӧп саба улус нениҥ учун бӱтпеген?

4. Бу јӧрмӧлдӧ не кӧрӱлер?

⁴ Бу јӧрмӧлдӧ лӧ келер јӧрмӧлдӧ баштапкы чакта кӧп саба улус Иисуска нениҥ учун бӱтпегенин кӧрӧрис.  Анайда ок бӱгӱнги де кӱнде кӧп саба улус бисти нениҥ учун укпай турганы керегинде шӱӱжерис. Је эҥ керектӱ неме, бу јӧрмӧлдӧҥ бисте Иисуска бӱтпейтен тӧзӧлгӧ јок деп билип аларыс.

5. Кезик улус Иисусты Мессия деп нениҥ учун бӱтпеген?

⁵ Кӧп саба улус Иисустыҥ чыккан-ӧскӧн јерин, оныҥ билезин јабыс кӧрӱп, ого бӱткилебеген. Олор Иисусты улу Ӱредӱчи деп, анайда ок кайкалдар эдип турган кижи деп јӧпсингилеген де болзо, је олордыҥ кӧзинде Иисус агашла узанып турган јокту-јойу кижиниҥ уулы болгон. Анайда ок олордыҥ санаазыла болзо, Назарет бир де јарлу кала эмес. Керек дезе Иисустыҥ ӱренчиги болгон Нафанаил де: «Назареттеҥ јакшы чыгар беди?» — деп айткан (Иоанн 1:46). Ол мынайып Назарет каланы јаратпай турганы учун айткан болор. Ол эмезе Нафанаил Михей 5:2-де Мессия Назаретте эмес, је Вифлеемде чыгар учурлу деп айдылганын сананала мынайып айткан болор.

6. Иисустыҥ ӧйинде јаткан улуска оны Мессия деп бӱдерге не болужар эди?

⁶ Агару Бичик нени айдат? Агару Бичикте Мессияныҥ угы-тӧзи ле чыккан-ӧскӧн јери керегинде судурлар бар. Је бу судурларды Иисустыҥ ӧштӱлери ајаруга албас деп, Исаия судурлап салган (Иса. 53:8). Улус бу судурларды шиҥдеген болзо, Михейдиҥ айтканыла, Мессия Вифлеемде чыгар деп ле Давидтиҥ угынаҥ болор деп билгилеп алар эди (Лука 2:4—7). Је мынайып шиҥдебегенинеҥ улам олор Иисусты Мессия эмес деп, јастыра тӱп-шӱӱлте эткилеген.

7. Нениҥ учун кӧп улус чындыкты алынбай јат?

⁷ Бӱгӱнги кӱнде айалга кандый? Иегованыҥ ишчилериниҥ кӧбизи тегин ле улус болот. Кӧп улус бисти «бичик билбес тегин улус» деп айдыжат (Ап. ижи 4:13). Кезиги дезе бисти, кудай јаҥныҥ ӱредӱзин божотпогон бойлоры Агару Бичикке улусты канайып ӱредип турган деп айдыжат. Кезиктери дезе Иегованыҥ Керечилерин Американыҥ кудай јаҥы дешкилейт. Је чынынча болзо, США-да Иегованыҥ Керечилериниҥ јӱк ле 14 кире проценти јадат. Ол эмезе бистерди улус канча јылдардыҥ туркунына коммунисттер, американский шпиондор ло экстремисттер деп санангылайт. Је кемдер де бисти Иисус Христоско бӱтпей турган деп айдадылар. Кӧп саба улус бого бӱделе, немениҥ аайы-тӧӧйине чыгарга кӱӱнзебей јат. Оныҥ учун чындыкты да алынбай јат.

8. Апостолдордыҥ ижи 17:11-ле болзо, бӱгӱнги кӱнде кемдер Кудайдыҥ ишчилери болуп турганын билип аларга нени эдер керек?

⁸ Бӱткенисти тыҥыдарга нени эдер керек? Јетирӱлерди шиҥдеп турар керек. Лука шак ла мынайып бойыныҥ Сӱӱнчилӱ јарын «ончозын учы-бажынаҥ ала быжулап шиҥжӱлейле» бичип салган. Нениҥ учун дезе ол улусты Иисус чыннаҥ ла Мессия болгон деп, бӱдӱмјиленип алзын деп кӱӱнзеген (Лука 1:1—4). Вериядагы иудейлер Кудайдыҥ Сӧзин Лука ла чылап шиҥдеп туратандар. Олор Иисус керегинде укканын Еврей Бичимелдерле тӱҥдештиргилеген. (Апостолдордыҥ ижи 17:11 кычырыгар.) Бӱгӱнги кӱнде бистерге Иегованыҥ Керечилериниҥ ӱредӱлерин Агару Бичикле база тӱҥдештирип турар керек. Анайда ок Иегованыҥ Керечилери кандый иш эдип турганын  билип алар керек. Мынайып шиҥдеген кижи кандый да копко, тӧгӱнге бӱдӱрилбес.

9. Иисус улуска теҥеридеҥ кӧрӱлте кӧргӱспеген болордо, не болгон?

⁹ Иисустыҥ ӧйинде кезик улуска кулагыла укканы ас болгон. Оныҥ учун олор Иисусты Мессия деп бӱдерге, «теҥеридеҥ билди [кӧрӱлте] кӧргӱссин» деп сурагылап јат (Матф. 16:1). Олор Даниил 7:13, 14-тӧги судурды јастыра оҥдогылаган болор. Иегованыҥ амадузыла бу судурдыҥ бӱдетен ӧйи јеткелек болгон. Је улуска Иисусты Мессия деп бӱдерге, уккан билгирлери ле једер эди. Оныҥ учун Иисус олорго кандый да кӧрӱлте кӧргӱспеген. Мынаҥ улам, теҥеридеҥ кайкал сураган улус Иисуска бӱтпегендер (Матф. 16:4).

10. Исаия 42:1, 2-деги Мессия керегинде судурды Иисус канайып бӱдӱрген?

¹⁰ Агару Бичик нени айдат? Мессия керегинде Исаияныҥ судурыла болзо, «оныҥ ӱни арай угулар. Ол бастыра улус уксын деп кыйгырбас» (Иса. 42:1, 2). Иисус улустаҥ ајару сакыбаган. Ол улу ӧргӧӧ дӧ тутпаган, аҥылу кандый бир кийим де кийбеген, титулдарла да ададарын некебеген. Кийнинде, ол јаргыладып јадарда, Иродко јакшы кӧрӱнерге болуп, кайкал да этпеген (Лука 23:8—11). Иисус јерде болордо кайкалдар кӧргӱскен де болзо, је озо ло баштап Каандык керегинде сӱӱнчилӱ јарды јарлаган. Оныҥ учун ӱренчиктерине мынайып айткан: «Мен бого болуп келген инем» (Марк 1:38).

11. Кудайга бажырары јанынаҥ улуста кандый јастыра кӧрӱм бар?

¹¹ Бӱгӱнги кӱнде айалга кандый? Бӱгӱнги кӱнде улусты коркышту улу эдип тудулган соборлор кайкадып јат. Олордыҥ ичиндеги јӧӧжӧзин де кӧрзӧ, не аайлу баалу-чулу. Андагы иштеп турган абыстар кандый ла титулдарла аданып јат. Олордыҥ чӱм-јаҥдары да коркышту  эдип ӧткӱрилет. Бу чӱм-јаҥдардыҥ кайдаҥ келгенин кӧп саба улус билбес те. Мындый соборлорго јӱрген улус Кудай керегинде, Кудайдыҥ амадузы керегинде билгирлер алат па? Је бистиҥ христиан туштажуларда айалга чек башка. Анда улус Кудай керегинде билгирлер алат. Бистиҥ Каандыктыҥ Туралары да бай эдип тудулбаган, ичинде турган јӧӧжӧзи де баалу-чулу эмес, јуунды башкарып турган акалар да аҥылу эдип кийинбей јат, кандый бир титулдарла да аданбай јат. Бистиҥ бӱткенис јӱк ле Кудайдыҥ Сӧзине тӧзӧлӧнӧт. Оныҥ учун кезик улус бистерди ӧйинеҥ ӧткӱре тегин улус деп кӧрӧт. Анайда ок олор бистиҥ ӱредӱлерди јуутпай јат.

12. Еврейлерге 11:1, 6-ла болзо, бистиҥ бӱдерис неге тӧзӧлӧнӧр учурлу?

¹² Бӱткенисти тыҥыдарга нени эдер керек? Павел Римдеги христиандарга мындый сӧстӧр бичиген: «Кижи Јарды угуп турганда, бӱдӱп баштайт, Христос јарлалып турганда, угат» (Рим. 10:17). Айдарда, бӱдеристи тыҥыдарга, кудай јаҥдардыҥ чӱм-јаҥдарына туружардыҥ ордына, Кудайдыҥ агару Сӧзин ӱренер керек. Бистиҥ бӱдерис Агару Бичиктеги билгирлерге тӧзӧлӧнзӧ, бӱдӱмјибис бек болор. Оноҥ башка, «бӱдӱмји јокко, Кудайга јараар арга јок». (Еврейлерге 11:1, 6, ЈТ кычырыгар.) Оныҥ да учун чындыкты табып алганыс деп бӱдерге, биске теҥеринеҥ кандый да кӧрӱлте керек јок. Агару Бичиктиҥ ӱредӱлерин ле шиҥдеп турзаас, бисте кандый да алаҥзыштар болбос.

13. Кӧп улус Иисусты Мессия деп нениҥ учун бӱткилебеген?

¹³ Крестеечи Иоанныҥ ӱренчиктери Иисустыҥ ӱренчиктерин орозо тутпай турган деп кайкашкылаган. Је олорго, Иисус тирӱ јӱрерде, орозо тутпас керек болгон (Матф. 9:14—17). Андый да болзо, фарисейлер де, ӧскӧ дӧ улус Иисусты олордыҥ чӱм-јаҥдарын ӧткӱрбей туру  деп бурулаган. Темдектезе Иисус суббот кӱнде оору улусты јасса, олор ого коркышту тыҥ атыйланатан (Марк 3:1—6; Иоанн 9:16). А бойлоры дезе суббот кӱнде ӧргӧӧдӧ садышкылап туратан. Качан Иисус олордыҥ јастыразын кӧргӱзип ийзе, олор ого ачынып туратандар (Матф. 21:12, 13, 15). Анайда ок Иисус Назаретте иудейлердиҥ јаҥыс бойын сананып турганын ла бӱдериниҥ ас болгонын кӧргӱзерге, Израиль албатыныҥ тӱӱкизинеҥ эки учурал куучындаарда, олор ого оноҥ ло ары атыйланган (Лука 4:16, 25—30). Анайып олор Иисустыҥ эткен керектерин кӧрӱп, оны Мессия деп бӱтпегендер (Матф. 11:16—19).

14. Иисус Кудайдыҥ Сӧзине келишпей турган чӱм-јаҥдарды нениҥ учун јаргылаган?

¹⁴ Агару Бичик нени айдат? Иегова судурчы Исаия ажыра мынайып айткан: «Бу албаты мени јӱк ле оозыла мактап турган, је олордыҥ јӱректери менеҥ ыраак. Олор менеҥ айап јӱрердиҥ ордына, бойлорыныҥ чӱм-јандарын байлап јат» (Иса. 29:13). Оныҥ да учун Иисус олордыҥ Агару Бичимелге келишпей турган чӱм-јаҥдарын јаргылаар јолду болгон. Бойыныҥ чӱм-јаҥдарын Кудайдыҥ Сӧзинеҥ бийик тургускан улус Иегованы ла оныҥ ийген Мессияны јектеп салгылаган.

15. Кӧп улуска Иегованыҥ Керечилери нениҥ учун јарабай јат?

¹⁵ Бӱгӱнги кӱнде айалга кандый? База андый ла. Кезик улус, Иегованыҥ Керечилери Агару Бичикке келишпей турган байрамдарды байрамдабай турза, ачынып јат. Темдектезе чыккан кӱнди, Јаҥы јылды ӧткӱрбей турза. Кезик улус дезе, Иегованыҥ Керечилери патриотический байрамдар байрамдабай турганын ол эмезе божогон кижиниҥ сӧӧгин јуурыла колбой чӱм-јаҥдарды ӧткӱрбей турганын јаратпай јат. Керечилердиҥ мындый кӧрӱмин чек јаратпай турган улус дезе, бойлорын Кудайга чын ла бажырып турганыс деп сананат. Је чынынча болзо, олор Кудайдыҥ јарадузын алып болбос, нениҥ учун дезе Кудайдыҥ Сӧзиндеги јап-јарт бичилип калган ӱредӱлерди тузаланардыҥ ордына, улустыҥ сананып тапкан јаҥын јаҥдайдылар (Марк 7:7—9).

16. Биске нени эдер керек, је нени этпес керек? (Сарын 119:97, 113, 163—165).

¹⁶ Бӱткенисти тыҥыдарга нени эдер керек? Биске Кудайдыҥ јасактарын ла принциптерин акту јӱрегистеҥ сӱӱр керек. (Сарын 119:97, 113, 163—165 кычырыгар.) Ол тушта бис Кудайга јарабай турган чӱм-јаҥдарды этпезис. Кудайга сӱӱжисти не де ӧчӱрип болбозын!

17. Кӧп иудейлер кандый буудактардаҥ улам Мессияга бӱтпеген?

¹⁷ Кӧп иудейлер Иисусты политиканы солыыр деп иженген. Нениҥ учун дезе Иисус башкарза, олор римляндардыҥ колынаҥ јайымдаларыс деп сананган (Иоанн 6:14, 15). Је кезик иудейлер дезе, политика солынбазын деп кӱӱнзеген. Нениҥ учун дезе ол тушта Римниҥ јаҥы олордыҥ абыс болотон јаҥын айрып алар эди. Мындый буудактардаҥ улам кӧп иудейлер Иисусты Мессия деп бӱтпеген.

18. Иисустыҥ ӧйиндеги улус Мессия керегинде кандый судурларды керекке албаган?

¹⁸ Агару Бичик нени айдат? Иисус улуска јайым экелетен јуучыл болор деп судурлалган, је јайым экелердеҥ озо ол јӱрӱмин улус учун берер учурлу  деп судурлар база бар болгон (Иса. 53:9, 12). Андый болзо, иудейлерде нениҥ учун јастыра санаалар болгон? Нениҥ учун дезе олордыҥ кӱчтери капшай ла јоголбос деп кӧргӱзип турган судурларды олор керекке албаган (Иоанн 6:26, 27).

19. Улус бистиҥ јарды нениҥ учун укпай јат?

¹⁹ Бӱгӱнги кӱнде айалга кандый? Кӧп улус бистиҥ јарды укпай јат, нениҥ учун дезе бис политикага киришпей јадыс. Олор бисти талдаштарга барзын деп јат. Је бис кандый бир кижи учун ӱнисти берзеес, Иегованы јектеп салгандый болорыс (1 Сам. 8:4—7). Кезик улус бистерди благотворительный иш этсин деп айдыжат. Темдектезе школдор, больницалар тутсын деп. Је бистиҥ амаду эмдиги ӧйдиҥ курч сурактарыныҥ аайына чыгары эмес, је сӱӱнчилӱ јарды јарлаары. Олор оныҥ да учун бистиҥ јарды укпай јат.

20. Матфей 7:21—23-теги Иисустыҥ сӧстӧриле болзо, бис баштапкы јерге нени тургузадыс?

²⁰ Бӱткенисти тыҥыдарга нени эдер керек? (Матфей 7:21—23 кычырыгар.) Бистер баштапкы јерге Иисустыҥ берген јакарузын тургузып јадыс (Матф. 28:19, 20). Оныҥ учун бис бу телекейдиҥ кӱчтериниҥ аайына чыгарга ӧйисти јылыйтпайдыс. Андый да болзо, бис улусты сӱӱп, олорго болужып јадыс. Је эҥ јаан болуш — улуска Кудайдыҥ Каандыгы керегинде куучындаары ла олорго Иеговала најылажарга болужары.

21. Биске нени эдерге бек шӱӱп алар керек?

²¹ Бу јӧрмӧлдӧ баштапкы чакта Иисусты улус нениҥ учун јуутпаганыныҥ тӧрт шылтагын кӧрдис. Ол ло шылтактардаҥ улам бӱгӱнги кӱнде Иисустыҥ ӱренчиктерин јуутпай јадылар. Мынаҥ ӧскӧ шылтактар бар ба? Эйе, база да тӧрт шылтак бар. Олорды келер јӧрмӧлдӧ кӧрӧрис. Айдарда, бӱдӱмјибисти јаантайын тыҥыдып турарга ла Иисусты Кудай ийген деп алаҥзыбай турарга бек шӱӱп алактар!