1, 2. Биске Ачылта деп бичикке нениҥ учун јаан ајару эдер керек

 СЛЕР кемниҥ-кемниҥ фотоальбомын кӧрӱп јатканаар деп сананып ийзеер де. Фотолордогы улустыҥ кӧбизи слерге таныш эмес. Је бир фотоны кӧрӱп ийеле, слер кайкай бередеер. Нениҥ учун? Нениҥ учун дезе анда слер бойоорды кӧрӱп ийгенеер. Бу фото кайда, качан, кемдерле кожо соктырылган деп сананып јадыгар. Бӱдӱн фотоальбомноҥ шак ла бу фото санаагарга артып калар дезеер?

² Ачылта деп бичикти шак ла бу фотого тӱндештирерге јараар. Бого эки шылтак бар. Баштапкызында, бу бичик бистерге бичилген. Ол мындый сӧстӧрлӧ башталып јат: «Иисус Христостоҥ болгон ачылта. Бу ачылтаны Ого удабастаҥ не болотонын Бойыныҥ кулдарына кӧргӱзейин деп, Кудай берген» (Ачыл. 1:1). Айдарда, бу бичик бастыра улуска эмес, је Кудайга учурланып салган ишчилерге берилген. Оныҥ да учун бу судурлардыҥ бӱдеринде Кудайдыҥ албатызы туружып јат. Ӧскӧртӧ айтса, бу «фотоноҥ» бис бойысты кӧрӱп ийер аргалу.

3, 4. Ачылтагы судурлар качан бӱдӱп јат, бу бисти неге кӱӱнзедер учурлу?

³ Ачылта деп бичиктиҥ судурлары биске база нениҥ учун јилбилӱ болуп турганы — бу судурлардыҥ бӱдетен ӧйи. Јажы јаанап калган апостол Иоанн бу судурлар «Кайраканныҥ кӱнинде» бӱдер деп бичиген (Ачыл. 1:10). Иоанн бу бичикти б. э. 96-чы јылында бичиген. Айдарда, «Кайраканныҥ кӱнине» јетире база да канча  кире ӧй ӧдӧр керек болгон (Матф. 25:14, 19; Лука 19:12). Библиялык хронологияла болзо, бу кӱн 1914 јылда, Иисус теҥериде Кудайдыҥ Каандыгыныҥ Кааны болуп отурарда башталган. Шак ла бу ӧйдӧҥ ала Кудайдыҥ албатызыла колбулу Ачылтадагы судурлар бӱдӱп баштаган. Эмди бис «Кайраканныҥ кӱнинде» јададыс!

⁴ Бис бу кайкамчылу ӧйдӧ јададыс, оныҥ учун Ачылта 1:3-теги сӧстӧргӧ јаан ајару эдер керек. Анда мынай бичилген: «Бу судур сӧстӧрди кычырып турган кижи, анайда ок бу судурдыҥ сӧстӧрин угуп, анда бичилгенин бӱдӱрип тургандар ырысту, нениҥ учун дезе тургузылган ӧй јууктап келди». Мында айдылганыла, бу судурдыҥ сӧстӧрин кычырар, угар, бӱдӱрер керек. Оныҥ учун бу судурларды шиҥдеп кӧрӱп ийектер.

5. Ачылта деп бичиктеҥ Иегова, бис ого канайып бажырып турганыска ајару эдет деп, недеҥ кӧрӱнет?

⁵ Ачылта деп бичиктиҥ баштапкы ла бажалыгынаҥ ала Иисус Кудайдыҥ албатызында не болуп турганын јакшы билер деп јарт кӧрӱнип јат (Ачыл. 1:12—16, 20; 2:1). Бис мыны Иисустыҥ Кичӱ Азиядагы јети јуунга айткан сӧстӧринеҥ кӧрӧдис. Иисус бу јуундарга олордыҥ бажырузы Кудайга јарап турзын деп јакарулар айдып берген. Бу јакарулар Кудайдыҥ эмдиги де ишчилерине керектӱ болуп јат. Бис неге ӱренедис? Бистиҥ Башчыбыс Иисус Христос бистиҥ кӧгӱзис кандый деп, јакшы билер. Иисус бисти башкарып јат ла бисти корулап јат. Оныҥ кӧзинеҥ не де туура калбай јат. Анайда ок Иегованыҥ јарадузын јылыйтпаска нени эдер керек деп јакшы билер. Эмди Ачылта деп бичикте Иисус кандый јакарулар берген деп кӧрӱп ийектер.

6. а) Ачылта 2:3, 4-тӧ Иисус Эфестеги христиандарга кандый јӧп берген? б) Иисустыҥ сӧстӧри бисти неге ӱредет?

⁶ Ачылта 2:3, 4 кычырыгар. Бис Иеговага баштапкы сӱӱжисти јылыйтпас учурлу. Иисустыҥ сӧстӧрин кӧрзӧ, Эфестеги христиандар башка-башка кӱчтер де болуп турган болзо, Кудайга оноҥ ло ары турумкай иштегилеген. Је олор баштапкы сӱӱжин јылыйтып салган. Олорго баштапкы сӱӱжин ойто кӱйдӱрер керек болгон, оноҥ башка Иегова олорды бойыныҥ ишчилери деп кӧрбӧс эди. Бис неге ӱренедис? Бистерге база турумкай болор керек. Је турумкай артарга бисти не кӱӱнзедип турган? Иегова Кудай јӱк ле керектеристи кӧрӱп турган эмес, је ол керектерди недеҥ улам эдип турганысты кӧрӱп јат. Оныҥ учун Иегова бисти ого акту сӱӱжистеҥ ле быйанду болгоныстаҥ бажырзын деп кӱӱнзейт (Укаа 16:2; Марк 12:29, 30).

7. а) Ачылта 3:1—3-те Иисус Сардистеги христиандарга кандый јӧп берген? б) Сардистеги христиандар чылап јастырбаска биске нени эдер керек?

⁷ Ачылта 3:1—3 кычырыгар, ЈТ. Биске оноҥ ло ары ойгу болор керек. Иисус Сардистеги христиандарга база јӧп берген. Нениҥ учун дезе олордыҥ кӧгӱс јаны уйадап, Кудайга чала-была иштегилеген. Оныҥ учун Иисус олорды ойгу, сергек болугар деген. Бис неге ӱренедис? «Кудай чындык, ол... эдип турган ижигерди ле сӱӱжигерди ундыбас» (Евр. 6:10, ЈТ). Је андый да болзо, биске јайымжып отурбас  керек. Кудайга иштеер јолыста кандый да буудактар болотон болзо, Кайраканныҥ ижинде кӱйӱп, учына јетире сергек артар керек (1 Кор. 15:58; Матф. 24:13; Марк 13:33).

8. Иисустыҥ Лаодикиядагы христиандарга айткан сӧстӧринеҥ бис неге ӱренедис? (Ачылта 3:15—17).

⁸ Ачылта 3:15—17 кычырыгар. Биске кӧгӱс јанынаҥ кӱйӱп турар керек. Иисус Лаоди́киядагы христиандарга ӧскӧ јанынаҥ јӧп берген. Олор кӧгӱс јанынаҥ изӱ де эмес соок то эмес, је јылузымак болуп калгылаган. Андагы христиандардыҥ мынайып јайымжып калганын кӧрӱп, Иисус олорды шыралап калган ла кижиниҥ ичи ачыыр деп айткан. Оныҥ учун олорго кӧгӱс јанынаҥ кӱйӱп баштаар керек болгон (Ачыл. 3:19). Бис неге ӱренедис? Кӧгӱс јанынаҥ сооп калган кижиге, Иеговага быйаны јетпей турган болор. Оныҥ учун биске Иегова ла оныҥ организациязы кынайып болужып турганын ла канайып сӱӱп турганын јаантайын сананып турар керек (Ачыл. 3:18). Бистерге эптӱ јӱрӱмге тартылып, кӧгӱс керектерди экинчи јерге јылдырбас керек.

9. Пергамдагы ла Фиатирдеги христиандарга Иисус кандый јӧп берген?

⁹ Јана баскандардыҥ тӧгӱн ӱредӱлерине кирбегер. Пергамдагы христиандарга Иисус база јӧп берген (Ачыл. 2:14—16). Нениҥ учун дезе олор бой-бойыныҥ ортозында бӧлӱнгилеп турган, анайда ок јана баскандардыҥ ӱредӱлериле јӱргӱлеп турган болгон. А Фиатирдеги кезик христиандарды «Сатананыҥ тереҥ јажыттары дегенди» јуутпай турганы учун мактап, олорды чындыктаҥ оноҥ ло ары бек тудунзын деген (Ачыл. 2:24—26). Је тӧгӱн ӱредӱлерге јайыла берген христиандарды Иисус кинчектерин алынзын деп айткан. Бис неге ӱренедис? Бистер, христиандар, Иегованыҥ кӧрӱмине келишпей турган ӱредӱлерди бир де јууктатпас учурлу. Јана баскандарды кӧрзӧ, Кудайга чындык улус деп билдирер, је олордыҥ эдип турган керектери Кудайдыҥ кӧрӱмине чек келишпей јат (2 Тим. 3:5). Олордыҥ тузагына тӱшпеске биске нени эдер керек? Агару Бичикти тереҥ шиҥдеп турзаас, тӧгӱн ӱредӱлерге јайылбаска јеҥил болор (2 Тим. 3:14—17; Иуда 3, 4).

10. Фиатирдеги ле Пергамдагы јуундарга Иисустыҥ айткан јӧбинеҥ бис база неге ӱренедис?

 ¹⁰ Кей-кебизин јӱрӱмнеҥ качыгар. Иисус Пергамдагы ла Фиатирдеги јуундарга база да ӧскӧ јӧп берген. Ондо кезик христиандар кей-кебизин јӱрӱм јӱргӱлеген (Ачыл. 2:14, 20). Бис неге ӱренедис? Бис Иеговага кӧп јылдардыҥ туркунына да иштеп турган болзоос, јуунда кандый да молјуларлу болзоос, је балыр керектер эдип турган болзоос, Иегова кӧрбӧчӧҥ болуп отурбас. Оныҥ учун биске де балыр јӱрӱм јӱрбес керек, анайда ок андый керектерге кӧрбӧчи болбос керек (1 Сам. 15:22; 1 Пётр 2:16). Бу телекейдиҥ нравственный нормалары чек саҥ-тескери де болуп калган болзо, Иегова бистерди оныҥ бийик нормаларыла јӱрзин деп кӱӱнзейт (Эф. 6:11—13).

11. Бу абзацтардаҥ бис нени билип алдыс? ( «Бис неге ӱренедис?» деген рамканы кӧрӱгер.)

¹¹ Айдарда, бу абзацтарда кӧргӧнисле, Иегованыҥ табы аайынча бажырары бистиҥ молју болуп јат. Бу молјуны бӱдӱрбей турган болзоос, биске тӱрген ле тӱзединер керек (Ачыл. 2:5, 16; 3:3, 16). Мынаҥ ары абзацтарда Кичӱ Азияга Иисустыҥ айткан сӧстӧринде база да тузалу јӧптӧр бар.

12. Смирна ла Филадельфиядагы јуундарга Иисустыҥ айткан сӧстӧринеҥ бис неге ӱренедис? (Ачылта 2:10).

¹² Эмди дезе Иисус Смирна ла Филадельфиядагы јуундарга нени айтканын кӧрӱп ийектер. Ол андагы христиандарды истежӱлердеҥ коркыбазын деп кӱӱнзеткен, нениҥ учун дезе анайып олор Кудайга чындык артканы учун кайрал алар эди. (Ачылта 2:10 кычырыгар; 3:10). Бис неге ӱренедис? Истежӱлер тӱҥей ле болор. Оныҥ учун биске белен болор керек (Матф. 24:9, 13; 2 Кор. 12:10). Анчада ла эмдиги ӧйдӧ.

13, 14. Ачылтаныҥ 12-чи бажалыгындагы сӧстӧр бӱдерде, Кудайдыҥ улузыла не болгон?

¹³ Апостол Иоанн «Кайраканныҥ кӱнинде», ӧскӧртӧ айтса бӱгӱнги кӱндерде, Кудайдыҥ албатызы истежӱлерге табартар деп судурлап салган. Ачылта деп бичиктиҥ 12-чи бажалыгында айдылганыла, теҥериде Кудайдыҥ Каандыгы тургузылган ла кийнинде, ондо јуу-согуш башталган. Михаилдиҥ черӱлери Сатана ла оныҥ кӧрмӧстӧриле јуулашкан (Ачыл. 12:7, 8). Је Кудайдыҥ ӧштӱлери јеҥдиртип, јердӧӧн ташталгандар (Ачыл. 12:9). Мынаҥ улам јердиҥ ӱстинде сӧслӧ де айдып болбос кыйын-шыра башталган (Ачыл. 12:12). Кудайдыҥ албатызыла не болгон?

¹⁴ Ачылтада бу да сурактыҥ каруузы јарталып јат. Сатанага теҥеридӧӧн  барар аргазы јок боло берерде, ол бастыра бойыныҥ чугулын јердеги майлаткан христиандарга тӱжӱрген. Нениҥ учун дезе олор Кудайдыҥ Каандыгыныҥ «элчилери». Бу майлаткандар јерде Иисус Христос керегинде јарлап јадылар (2 Кор. 5:20; Ачыл. 12:17; Эф. 6:19, 20). Сатана олорго кандый табару эткен?

15. Ачылтаныҥ 11-чи бажалыгындагы эки керечи кемди темдектейт ле олорло не болгон?

¹⁵ Сатана бойыныҥ ишчилерине Каандыктыҥ ижиле башкарып турган улуска табару этсин деп јакарган. 1918 јылда каруулу сегис аканы тӧгӱн јерге бурулап, узак јылдарга тӱрмелеп салган. Бу акалар Ачылтада, ӧлтӱртип койгон «эки керечи» деп бичилет (Ачыл. 11:3, 7—11) *. Кижиниҥ кӧзиле кӧрзӧ, олордыҥ башкарып турган ижи чын ла «ӧлтӱртип» койгон ол эмезе токтоп калган деп билдирген.

16. 1919 јылда айалга канайып кенете солынган? Оноҥ бери Сатана нени эдет?

¹⁶ Ачылтаныҥ 11-чи бажалыгындагы айдылган бу «эки керечи» удабай ла тирилер керек болгон. Бу судур канай бӱткен? Айалга кенете солынарда, бистиҥ акаларды бир де јыл ӧткӧлӧктӧ, тӱрмедеҥ јайымдап јат. Бу дезе 1919 јылдыҥ тулаан айында болгон. Керек дезе кийнинде, јаргы олорды актап та салган. Акалар јайымдалган ла кийнинде, јарлаар ишти ле улусты ӱредер ишти башкарып баштаган. Је Сатана јайымжыбаган. Ол Кудайдыҥ бастыра ишчилерине «агын суудый» истежӱлер ийген (Ачыл. 12:15). Оныҥ учун бистиҥ кажыбыска ла «чыду ла бӱдӱмји» керек (Ачыл. 13:10).

17. Кудайдыҥ албатызы Сатананыҥ истежӱлери токтобой до турган болзо, кезикте кандый болуш алат?

¹⁷ Ачылтаныҥ 12-чи бажалыгында судурлалганыла, Кудайдыҥ албатызына сакыбаган јанынаҥ болуш келер керек болгон. Агару Бичикте бу дезе, «јер» истежӱлерге тӱҥдештирилген «агын сууны» јудуп ийген деп бичилген (Ачыл. 12:16). Бу судур канайып бӱдет? «Јер» деп Сатананыҥ телекейиниҥ тӧс элементтерин,  темдектезе, јаргы системазын айдарга јараар. Бу јаргылар Сатананыҥ јанында болор керек ошкош, је кезикте олор Кудайдыҥ албатызын актап салат. Анайып, Иегованыҥ Керечилери ас эмес юридический јеҥӱлер алган. Мынаҥ улам олордо Иеговага бажыратан јайым болот. Бу јайымын олор Кудайдыҥ ижин бастыра ийде-кӱчинеҥ эдерге тузалангылайт (1 Кор. 16:9). Олор кандый иш эдет?

18. Бу калганчы ӧйлӧрдӧ кандый иш эҥ ле керектӱ болот?

¹⁸ Иисустыҥ судурлаганыла болзо, чактыҥ учы келердеҥ озо, «Каандык керегинде Сӱӱнчилӱ Јар јер-ӱстине јарлалар» (Матф. 24:14). Ачылта 14:6-да айдылганыла, «јерде јуртаган улуска кандый ла укка, ӱйеге, тилге ле калыкка ангел мӧҥкӱлик сӱӱнчилӱ јарды» јарлап јат. Айдарда, јарлаар ишке биске ангелдер болужат.

19. Иегованы сӱӱп турган улус сӱӱнчилӱ јардаҥ ӧскӧ база не керегинде јарлаар учурлу?

¹⁹ Кудайдыҥ албатызы јӱк ле сӱӱнчилӱ јар јарлап турган эмес. Олор анайда ок Ачылта 8—10 бажалыктарда бичилген ангелдерди бӱдӱрип турган ижине јӧмӧжӧдилер. Ангелдер дезе Кудайдыҥ Каандыгын талдабагандарла не болорын јарлайдылар. Оныҥ учун Иегованыҥ Керечилери Сатананыҥ телекейиниҥ элементтери јоголып калар деп јарлайт. Бу јар «мӧндӱр ле отло» тӱҥдештирилет (Ачыл. 8:7, 13). Бис улуска ӧйдиҥ учы јууктап келген деп куучындап салар учурлу. Анайып, олор јӱрӱмин солып, «Иегованыҥ чугулы тӧгӱлер кӱнде» аргадалар аргалу (Соф. 2:2, 3). Је бу јарды кӧп улус укпай јат. Оныҥ учун биске јалтанбас болор керек. А улу тӱбектиҥ ӧйинде бис бу керегинде кӧндӱрезинеҥ айдарыс (Ачыл. 16:21).

20. Келер эки јӧрмӧлдӧрдӧ нени кӧрӧрис?

²⁰ Ачылта деп бичиктиҥ судур сӧстӧрине бис јаан ајару эдедис. Нениҥ учун дезе бис бу бӱдӱп јаткан судурга туружып јадыс (Ачыл. 1:3). Истежӱлердиҥ ӧйинде улуска Кудайдыҥ јарын јетирерге јеҥил эмес. Је Ачылта деп бичикти оноҥ ары шӱӱшкенис биске коркыбаска болужар. Келер эки јӧрмӧлдӧрдӧ: 1) Кудайдыҥ ӧштӱлериле не болор ло 2) Иегова чындык улузын канайып кайралдаар деп сурактарды кӧрӱп ийерис.