1. Кажы ла кижиге нени талдап алар керек?

 БИСТИҤ кажыбыска ла талдаар керек: Иегова Кудайды Јер-телекейдиҥ башкараачызы эдип талдап аларыс па эмезе оныҥ эҥ јаан ӧштӱзин, Сатананы, талдап аларыс па? Мынаҥ ӧскӧ јол јок. Ӱргӱлји јӱрӱмге јӱрерис пе, јок по бистиҥ талдап алганыстаҥ камаанду (Матф. 25:31—33, 46). «Улу тӱбектиҥ» ӧйинде Кудайга чындык арткан улуска, сӱрлеп айдылганыла болзо, аргадалыш беретен таҥма тургузылар (Ачыл. 7:14; Иез. 9:4, 6). Је аҥныҥ таҥмазын алган улус јоголтышка барар (Ачыл. 14:9—11).

2. а) Еврейлерге 10:35—39-тагы сӧстӧр бисти неге кӱӱнзедет? б) Ачылта деп бичик биске неде болужар?

² Еврейлерге 10:35—39 кычырыгар, ЈТ. Слер Иегованыҥ јанын талдап алган болзоор, сӱреен јакшы. Эмди слер ӧскӧ дӧ улуска Иегованыҥ башкарар јаҥын нениҥ учун талдап алар керек деп, јартап берерге турган эмейигер. Мында слерге Ачылта деген бичик болужар. Бу бичикте Кудайга удурлашкан улусла не болоры керегинде ле Кудайдыҥ башкарузына јӧмӧшкӧн чындык улус кандый сӱреен јараш кайрал алары керегинде чокум, јарт јетирӱлер бичилген. Бу сӱреен јаан учурлу јетирӱ, нениҥ учун дезе оноҥ кажы ла кижиниҥ јӱрӱми камаанду. Бу бичикти шиҥдеп кӧрзӧӧс, Иеговага иштеер бойыстыҥ да кӱӱнисти тыҥыдып аларыс, анайда ок ӧскӧ дӧ улуска Иегованы талдап алзын деп канай болужарын билип аларыс.

3. Бу јӧрмӧлдӧ нени шӱӱп кӧрӧрис?

³ Бу јӧрмӧлдӧ мындый сурактар кӧрӱлер: 1) Иегова оныҥ башкарар јаҥына јӧмӧжип турган улуска кандый јӱрӱм белетеп салган? 2) Ачылтада бичилген кызыл аҥныҥ јаҥын талдап алгандарла не болор?

4. Апостол Иоанн теҥериде Иисусла кожо кемдер турганын кӧргӧн?

⁴ Апостол Иоаннга Иегованыҥ јаҥын талдап алган эки башка бӧлӱк улус кӧрӱлген. Олор јажын-чакка јӱрер. Баштапкы бӧлӱк — теҥериде Иисусла кожо башкаратан бӧлӱк. Олор јердеҥ алынган. Олордыҥ тоозы 144 000 (Ачыл. 7:4; 14:3, 4). Ол улус Иисусла кожо теҥериде Сион кырда тургандар (Ачыл. 14:1). Кудайдыҥ бу Каандыгы јерле башкарар (Ачыл. 5:9, 10).

5. 144 000-ныҥ јерде арткан-калганыла удабас не болор?

⁵ Иегова ӧткӧн чактардыҥ туркунына бойыныҥ агару тыныла канча-канча муҥдар христиандарды майлаган (Лука 12:32; Рим. 8:17). Бу улустыҥ божоордыҥ божогончо Кудайга чындык арткандары эмди теҥериде. Апостол Иоанныҥ сӧстӧрин оноҥ ары кӧрзӧӧс, калганчы кӱндерде 144 000-ныҥ јерде ас ла тоозы артып калган болор (Ачыл. 12:17). Бу артып калган христиандарга улу тӱбектеҥ озо «тирӱ Кудайдыҥ таҥмазы» калганчы катап тургузылар (Ачыл. 7:2, 3). А улу тӱбектиҥ кандый да ӧйинде олор теҥериге алылар. Анда олор Христосло башкарып баштаар (Матф. 24:31; Ачыл. 5:9, 10).

6, 7. а) Иоанн база кандый бӧлӱк улусты кӧрӱп ийген? Бис олор керегинде нени билерис? б) Ачылтаныҥ 7-чи бажалыгы нениҥ учун майлаткандарга да, «кара бајырт» деп адалып турган улуска да јилбилӱ болот?

⁶ Оноҥ апостол Иоанн экинчи бӧлӱк улусты кӧрӱп ийген. Ол олорды «кара бајырт улус» деп адаган. Бу улустыҥ тоозын 144 000-ды чылап тоолоор арга јок болгон (Ачыл. 7:9, 10). Иоанн олор керегинде бистерге мындый сӧстӧр бичип салган: «Улу ачу-коронноҥ келген улус бу. Олор кийимин јунуп, Кураанныҥ каныла ак эткендер» (Ачыл. 7:14). Бу «кара бајырт улус» сӱреен јараш јерде јадар. Оныҥ јаражын бис эм тургуза јетире аайлабай да јадыс (Сар. 37:9—11, 27—29; Укаа 2:21, 22; Ачыл. 7:16, 17).

⁷ Ачылта деп бичиктиҥ 7-чи бажалыгында, теҥериге каандар болуп баратан бӧлӱк ле јерде јажын-чакка јадатан улустар керегинде бичилген. Слер бу «фотодоҥ» бойоорды кӧрӧдӧӧр бӧ? Сурап турубыс, јазап ајыктап кӧрӱгер. Бу эки бӧлӱк улус Иегованыҥ башкарар јаҥын талдап алганынаҥ айдары јок сӱӱнчи алар! Ачылта деп бичикте улу тӱбек керегинде база кандый јетирӱлер бар? (Матф. 24:21).

8. Улу тӱбек недеҥ башталар? Ол ӧйдӧ кӧп саба улус нени эдер?

⁸ Ӧткӧн јӧрмӧлдӧ кӧргӧнисле, бу телекейдиҥ политический башкарулары удабас Улу Вавилонго, тӧгӱн кудай јаҥдардыҥ телекейлик империязына, табару эдер (Ачыл. 17:16, 17). Бу ла ӧйдӧҥ ала улу тӱбек башталар. Ол ӧйдӧ не болор? Ал-камык улус Иегованыҥ Керечилериниҥ јуунына келер бе? Ачылтаныҥ 6-чы бажалыгын кӧрзӧӧс, јок. Ол улус коруны бу телекейдиҥ политический ле коммерческий организацияларынаҥ бедиреер. Нениҥ учун дезе олордыҥ санаазыла болзо, андый организациялар качан да бузулбайтан кырлар ошкош. Айдарда, бу улус Кудайдыҥ организациязыныҥ јанына турбас болордо, Иегова олорды бойыныҥ ӧштӱлери деп кӧрӧр (Лука 11:23; Ачыл. 6:15—17).

9. Нениҥ учун улу тӱбектиҥ ӧйинде Иегованыҥ ишчилери чек башка деп кӧрӱнер? Мынаҥ улам Кудайдыҥ ӧштӱлери нени эдер?

 ⁹ Улу тӱбектиҥ ӧйинде Иегованыҥ ишчилери бастыра улустаҥ башка деп кӧрӱнер. Нениҥ учун дезе јӱк ле олор Иеговага бажырып турган ла «аҥга» јӧмӧшпӧй турган улус болор (Ачыл. 13:14—17). Мыныҥ улам, Иегованыҥ ӧштӱлери тыҥ атыйланып чыгар. Анайып, албатылардыҥ коалициязы бастыра јердиҥ ӱстиндеги Кудайдыҥ ишчилерине табару эдер. Мындый коркышту јаан табару Агару Бичикте Магог јеринеҥ Гогыныҥ табарузы деп айдылат (Иез. 38:14—16).

10. Иегова бойыныҥ албатызын корулаарга нени эдер? (Ачылта 19:19—21).

¹⁰ Бу табару болзо, Иегова нени эдер? Иезекииль мындый сӧстӧр бичип салган: «Мен калјуурып чыгарым» (Иез. 38:18, 21—23). Ачылтаныҥ 19-чы бажалыгы бу керегинде јакшы јартап јат. Анда айдылганыла, Гогтыҥ табарузына Иегова тӱрген ле удура чыгар. Кудай бойыныҥ албатызын корулап аларга ла ӧштӱлерин јоголторго Иисусты јерге ийер. Иисусла кожо «теҥериниҥ черӱлери» — Кудайдыҥ чындык ангелдери ле 144 000 јуулажар (Ачыл. 17:14; 19:11—15). Бу јуу-согуштыҥ учы-кыйузы кандый болорын бис билерис пе? Эйе! Билерис. Иеговага удурлажып турган бастыра организациялар ла улустар јердиҥ ӱстинеҥ кырдырып салар. Олордоҥ ис те артпас! (Ачылта 19:19—21 кычырыгар.)

11. Ачылта деп бичиктиҥ судурларыныҥ учында не болор?

¹¹ «Бис Армагеддонды ӧттис!» «Иегова бойыныҥ ӧштӱлерин канайып јоголтконын мен бойымныҥ кӧзимле кӧрдим!» Ол ӧйдӧ јердеги Кудайдыҥ чындык ишчилериниҥ сезимдерин сананып ийзеес, јымыража бередис. А теҥериде ол ӧйдӧ не болор? Кудайдыҥ бастыра јайаандары Улу Вавилонныҥ јоголтылганын байрамдаар, је онойдо ок ондо оноҥ до јаан улу байрам болор (Ачыл. 19:1—3). Ол байрам — «Кураанныҥ тойы». А бу той Ачылта деп бичиктиҥ судурларында эҥ ле јаркынду учурал (Ачыл. 19:6—9).

12. Кураанныҥ тойы качан болор? (Ачылта 21:1, 2).

¹² Бу той качан болор? Армагеддонныҥ башталарыныҥ ла алдында, теҥериге 144 000 ончозы јуула берер. Је јуу-согуштыҥ алдында той-јыргалды канайып ӧткӱрет? (Ачылта 21:1, 2 кычырыгар.) Оныҥ учун Кураанныҥ тойы Кудайдыҥ бастыра ӧштӱлери јоголгон кийнинде, Армагеддон ӧткӧн кийнинде, болор (Сар. 45:3, 4, 13—17).

13. Кураанныҥ тойы нени немдектейт?

¹³ Мындый той нени темдектейт? Канайып алыжып јаткан јииттер бир эт-кан болуп калат, анайып ла сӱрлеп айдылган той Иисус Христос каанды ла оныҥ «сыргалјызын» — 144 000-ды бириктирип салар. Тӱӱкиде мындый кайкамчылу той, јаҥы башкару бастыра јер-телекейле 1 000 јылга башкарып баштаганын кӧргӱзер (Ачыл. 20:6).

14, 15. Ачылтаныҥ 21-чи бажалыгында 144 000 неге тӱҥдештирилген? (Кадарындагы јурукты кӧрӱгер.)

¹⁴ Оныҥ кийнинде Ачылтаныҥ 21-чи бажалыгында 144 000-ды сӱреен јараш кала деп айдат. Бу каланыҥ ады — Јаҥы Иерусалим (Ачыл. 21:2, 9). Бу  «каланыҥ стенези он эки тӧстӱ [12 ташка тӧзӧлӧнгӧн]. Олордо Кураанныҥ апостолдорыныҥ ады-јолыдоры бичилген» (Ачыл. 21:10—14; Эф. 2:20). Сананзаар да, Иоанн бу таштарды канайып кайкап кӧрди не! Таштардыҥ бирӱзинде оныҥ да ады бичилип калган. Ол сӱреен јаан кӱндӱ!

¹⁵ Јаҥы Иерусалимдий јаан ла јараш кала качан да болбогон. Бу каланыҥ узуны да, тууразы да, бийиги де тӱп-тӱҥей. Оныҥ тӧс оромы баалу алтыннаҥ эдилген. 12 каалганыҥ кажызы ла «эрјинедеҥ эдилген». А стенелери ле тӧзӧлгӧзи баалу таштарла јарандырылган (Ачыл. 21:15—21). Је Иоанн бу каладаҥ ӧргӧӧни кӧрӱп таппай турды. Ол чын ла анда јок болгон, нениҥ учун дезе јаҥы Иерусалимге кирип тургандар шак ла Иегованыҥ јанында болор (Евр. 7:27; Ачыл. 22:3, 4). Иоанн бу керегинде мындый сӧстӧр бичийт: «Калада байзыҥ кӧрбӧгӧм, нениҥ учун дезе оныҥ байзыҥы — кӱчтӱдеҥ кӱчтӱ Кудай Кайракан [Иегова] ла Кураан. Калага јарыдар кӱн де, ай да керек јок, оны Кудайдыҥ магы јарыткан, оныҥ јарыткыжы — Кураан» (Ачыл. 21:22, 23).

16. Кудайдыҥ Каандыгы Бир муҥ јылга башкарза, јерде јадатан улуска кандый алкыштар урулар?

¹⁶ Майлаткандар Јаҥы Иерусалим керегинде сананып турза, ӧкпӧӧрип турган болор. Је бу судур ӱргӱлјиге јерде јадар улустыҥ да кӱӱн-санаазын кӧдӱрер. Нениҥ учун дезе Кудайдыҥ Каандыгы Бир муҥ јыл башкарза, Јаҥы Иерусалим јерде сӱреен кайкамчылу солынталар эдер. Бу солынталар андый кӧп болор! Оныҥ учун Агару Бичикте олор «јӱрӱмниҥ ару суузы» деп адалып јат. Ол сууныҥ эки јарадыла «јӱрӱмниҥ агаштары» ӧзӧр, а олордыҥ «јалбырактары калыктарды эмдеер» (Ачыл. 22:1, 2). Јердиҥ ӱстинде јажын-чакка јӱретен улуска Кудайдыҥ Каандыгыныҥ сӱреен кӧп алкыштары берилер. Кудайдыҥ кажы ла чындык ишчизи араайынаҥ толо кемдӱ болуп калар. Андый јакшы јӱрӱмде кем де шыралабас, ыйлабас, оорубас (Ачыл. 21:3—5).

17. Каандык Бир муҥ јыл башкарза, јерде кемдер јадар? (Ачылта 20:11—13).

¹⁷ Каандык Бир муҥ јыл башкарза, јерде кемдер јадар? Озо ло баштап, Армагеддонды ӧткӧн кара бајырт улус. Анайда  ок јаҥы јӱрӱмде чыгатан балдар. Бого ло коштой Ачылтаныҥ 20-чи бажалыгында, божогон улус тирилер деп айдылат. (Ачылта 20:11—13 кычырыгар, ЈТ.) А кемдер тирилер? «акту» улус, ол дезе Иегованыҥ ишчилери, анайда ок «акту эместер». Бу улуста Иегова керегинде јазап билип алатан арга болбогон (Ап. ижи 24:15; Иоанн 5:28, 29). Је бир немени ундыбас керек: Иегова кезик улусты тиргиспес. Олордо, тирӱ јӱрерде, Иеговага иштейтен арга болгон, је олор коркышту тыҥ бийиркенип, Кудайга удурлажып, оныҥ ишчизи болор арганы јектеп ийген. Андый улусты Иегова јердеги рай јӱрӱмге тиргиспес (Матф. 25:46; 2 Фес. 1:9; Ачыл. 17:8; 20:15).

18. 1 000 јылдыҥ учында не болор?

¹⁸ 1 000 јылдыҥ учында бастыра улус толо кемине једер. Анайып, Адамныҥ кинчегинеҥ улам келген каршу јоголып калар (Рим. 5:12). Толо кемине јеткен улус, Агару Бичикте сӱрлеп айдылганыла, тирилип келгендий болор (Ачыл. 20:5).

19. Калганчы ченелтениҥ амадузы кандый?

¹⁹ Сатана Иисусты Иегова Кудайдаҥ јана бассын деп, канча катап албаданган. Је Иисус ончо ченелтелерди ӧдӱп, Иеговага чындык арткан. А эмди Христостыҥ Бир муҥ јылга башкарган ӧйиниҥ учында не болорын кӧрӱп ийектер. Слер толо кемдӱ болуп калдаар, је Сатана тӱби јок јердеҥ јайымдалып, слерди калганчы катап ченеп јат (Ачыл. 20:7). Бу айалгада слер Иисус чылап Кудайга чындык артараар ба? Ол ӧйдӧ кажы ла кижи бу суракка каруу берер. Бу калганчы ченелтени ӧдӱп, Иеговага чындык арткан улус ӱргӱлји јӱрӱм алар ла чын јайымда болор (Рим. 8:21). Је Кудайга удура баргандар Сатана ла оныҥ кӧрмӧстӧриле катай јажын-чакка јоголтылып калар (Ачыл. 20:8—10).

20. Ачылта деп бичиктиҥ судурларын шӱӱжеле, слерде кандый сезимдер болды?

²⁰ Слерге Ачылта деген «фотографияны» кӧрӧргӧ јарады ба? Ондо бойоорды кӧрӧргӧ јакшы болды ба? Эмди слер ӧскӧ дӧ улус Иегованыҥ јанына туруп алзын деп кӱӱнзеп турган болороор. Ол тушта ол до улус бисле кожо Агару Бичиктиҥ калганчы бичигинде бичилген кайкамчылу судурлардыҥ бӱдеринде туружар (Ачыл. 22:17). Бу ӱч јӧрмӧлди шӱӱжип, бис келер ӧйдӧ бӱдетен судурлардыҥ ӧйине барып келдис. Оныҥ учун эмди апостол Иоанн чылап: «Аминь. Кел, Иисус Кайракан!» — деп айдадыс (Ачыл. 22:20).