1. Биске нениҥ учун ойгор болор керек? (Укаа сӧстӧр 4:7).

 КЕЗИКТЕ бистиҥ кажыбыс ла јаан алтамдар эдип јадыс. Мындый айалгаларда биске Иегованыҥ ойгоры керек болуп јат, оныҥ учун бис оны сурап јадыс (Иак. 1:5). Соломон каан да мынайып бичиген: «Ойгор бол... бу эҥ ле керектӱзи». (Укаа сӧстӧр 4:7 кычырыгар.) Је Соломон мында кӧп бичиктер кычырган, кӧп неме билер кижи керегинде айтпаган. Ол Иегова Кудайдыҥ берип турган ойгоры керегинде айткан (Укаа 2:6). Соломонныҥ ойгоры бӱгӱнги кӱнде тузалу ба? Кудайдыҥ ойгоры бӱгӱнги кӱнниҥ кӱчтериниҥ аайына чыгарга болужар ба? Эйе, болужар. Бу суракты тереҥжиде кӧрӱп ийектер.

2. Чыннаҥ ла ойгор болорго биске не болужар?

² Јебрен ӧйлӧрдӧ эки эр кижи ойгорыла јарлу болгон. Олор керегинде кӧптӧдӧ билип алзаас, бис те ойгор болуп каларыс. Баштапкызы, Соломон каан. Ол керегинде Агару Бичикте айдылганыла: «Кудай Соломонды сӱреен ойгор ло ӧткӱн кижи эдип салган» (1 Каан. 4:29). Экинчизи дезе, Иисус Христос. Ол Соломонноҥ до ойгор болгон (Матф. 12:42). Иисус керегинде мындый судур бичилген: «Ого Иегованыҥ тыны, ойгоры, оҥдомолы берилер» (Иса. 11:2).

3. Бу јӧрмӧлдӧ нени шӱӱп кӧрӧрис?

³ Кудайдыҥ агару тыныныҥ болужыла ойгор болгон Соломон ло Иисус кажы ла кижиге керектӱ јӧптӧр айткан. Бу јӧптӧрдиҥ ӱчӱзин кӧрӱп ийектер: акчага кандый кӧрӱмдӱ болор керек, ишке ле бойыска кандый кӧрӱмдӱ болор керек.

4. Соломонныҥ ла Иисустыҥ арга-чагы кандый болгон?

⁴ Соломон сӱрекей бай, акча-јӧӧжӧзи коркышту кӧп кижи болгон (1 Каан. 10:7, 14, 15). А Иисуста бойыныҥ туразы да јок, кийим-тудумы да ас болгон (Матф. 8:20). Је бу эки кижиниҥ арга-чагы башка да болгон болзо, бирӱзи бай, бирӱзи јокту да болзо, экилезиниҥ акча-јӧӧжӧго кӧрӱми чын болгон, нениҥ учун дезе олор Кудайдыҥ ойгорыла јӱрген.

5. Соломон акчага кандый кӧрӱмдӱ болгон?

⁵ Соломон акча кижиге кору берип турганын билер болгон (Эккл. 7:12). Ол чын ла андый, темдектезе, акчаныҥ болужыла бис чыгымдарысты бӧктӧп јадыс, ол эмезе бойыска нени-нени садып аладыс. Је Соломон андый бай болгон до болзо, акчанаҥ баалу неме бар деп билген. Агару Бичикте ол мындый сӧстӧр бичиген: «Јакшы ат-јол баалу јӧӧжӧнӧҥ дӧ артык» (Укаа 22:1). Анайда ок Соломон акча сӱӱп турган улус бар немезин тыҥ ла баалабай турган деп айткан (Эккл. 5:10, 12). Бого ло коштой акча-јӧӧжӧгӧ иженгени ойгор эмес, нениҥ учун дезе акча-јӧӧжӧ бир ле кӱн јок болуп калардаҥ айабас деп бичиген (Укаа 23:4, 5).

6. Иисус акча-јӧӧжӧгӧ кандый кӧрӱмдӱ болгон? (Матфей 6:31—33).

⁶ Иисус акча-јӧӧжӧгӧ база чын кӧрӱмдӱ болгон. Оныҥ ичкен-јиген курсагы да јакшы болгон (Лука 19:2, 6, 7). Оныҥ баштапкы эткен кайкалы санаагарга кирип туру ба? Ол тойдо суудаҥ эҥ артык кызыл аракы эдип ийген (Иоанн 2:10, 11). А божогон тушта оныҥ кийген кийими баалу бӧстӧҥ болгон (Иоанн 19:23, 24). Је оныҥ санаазы бир де акча-јӧӧжӧдӧ болбогон. Ӱренчиктерине мынайып айткан: «Кем де эки бийге јаҥыс уунда јалчы болуп албас... Кудайга ла акча-јӧӧжӧгӧ теҥ јалчы болуп албазыгар» (Матф. 6:24). Иисустыҥ јартаганыла болзо, Кудайдыҥ Каандыгын  баштапкы јерге тургускан кижиге керектӱ немени Кудай ӱзе берер. (Матфей 6:31—33 кычырыгар.)

7. Акчага чын кӧрӱмдӱ болгоны Дэниелге кандый алкыштар берген?

⁷ Акча-манатла канайып тузаланары јанынаҥ библиялык принциптер кӧп ака-эјелерге болушкан. Темдектезе, биле тӧзӧбӧгӧн Дэниел деп ака мынайып куучындаган: «Јиит тужымда ла кӧгӱс керектерди баштапкы јерге тургузарым деп шӱӱп алгам». Анайып, Дэниел ака Кудайга кӧптӧдӧ иштер аргалу болгон, керек дезе Бет-Элде де иштеген. Ол бойы мынайып айдат: «Чын ла айдадым, Иеговага иштеерге талдап алган јолымды неге де солыбас эдим. Мениҥ јӱрӱмимде баштапкы јерде акча болгон болзо, мен эмди акчалу болор эдим. Је акчага садынып ийген болзом, менде мындый јакшы најылар болор беди? Ол эмезе Иеговага иштегенимнеҥ алган сӱӱнчини акчага садып алар бедим? Кандый да акча-јӧӧжӧ Иегованыҥ берген сыйларына турбас». Айдарда, баштапкы јерге акча-јӧӧжӧни эмес, кӧгӱс керектерди тургузар керек.

8. Соломонныҥ ишке чын кӧрӱмдӱ болгоны недеҥ кӧрӱнет? (Экклезиаст 5:18, 19).

⁸ Эткен ижиске сӱӱнетен арганы Соломон каан «Кудайдыҥ сыйы» деп айткан. (Экклезиаст 5:18, 19 кычырыгар.) Ол бичиген: «Кандый ла иштеҥ туза бар» (Укаа 14:23). Бу јӱк ле куру сӧстӧр болбогон, нениҥ учун дезе Соломон бойы да иштеҥкей кижи болгон. Темдектезе, ол туралар туткан, парктар эткен, виноград отургыскан, кӧп-кӧп калалар туткан (1 Каан. 9:19; Эккл. 2:4—6). Бу иштерге кӧп ийде-кӱч керек болгон эмей. Је Соломон эткен ижин кӧрӱп, јаан сӱӱнчи алган болор. Андый да болзо, ол кижиге эҥ јаан сӱӱнчини ӧскӧ неме берип турган деп оҥдоп, Иеговага акту јӱрегинеҥ кӧп иштенген. Темдектезе, ол јети јылдыҥ туркунына Иерусалимдеги Иегованыҥ улу ӧргӧӧзин тударын башкарган (1 Каан. 6:38; 9:1). Айдарда, Соломон Кудайдыҥ да ижинде, ӧскӧ тегин де иштерде јаан једимдерге јеткен эмтир. Је учы-учында Соломон кандый тӱп-шӱӱлтеге келген? Ого Иегованыҥ ижин эткени кандый ла иштеҥ артык болгоны бу сӧстӧринеҥ кӧрӱнет: «Анайдарда, айдылган сӧстӧрдиҥ учуры мындый: чындык Кудайдаҥ айап, оныҥ јакылталарын бӱдӱрип јӱр» (Эккл. 12:13).

9. Иисустыҥ јӱрӱминде иш баштапкы јерде болбогон деп недеҥ кӧрӱнет?

⁹ Иисус база иштеҥкей кижи болгон. Ол јаштаҥ ла ала агашла узанар ишке ӱренген (Марк 6:3). Иисус јаан биледе чыдаган, оныҥ учун мынайып иштегени оныҥ ада-энезине јаан јӧмӧлтӧ болгон. Сананып ийзеер де, Иисустыҥ, толо кемдӱ кижиниҥ, агаштаҥ эткен немелери чынык та, јараш та болгон болор, оныҥ учун заказтары да кӧп болгон болор. Иисуска бойына да эткен ижи байла јараган. Је оныҥ эткен ижи кандый да једимдӱ болгон болзо, ол кӧгӱс керектерге ӧй табып туратан (Иоанн 7:15). Кийнинде Иисус бастыра ӧйин јарлаар ишке берип баштаарда, улуска мындый сӧстӧрлӧ баштанган: «Ӱрелер курсак учун эмес, ӱргӱлји јӱрӱм јӱргӱзер курсак учун иштегер» (Иоанн 6:27). Анайда ок Кырдагы куучынында ол мынайып айткан: «Теҥериде јӧӧжӧ јӧӧгӧр» (Матф. 6:20).

10. Ака эмезе эје начальнигине јакшы кӧрӱнерге болуп нени эдердеҥ айабас?

 ¹⁰ Кудайдыҥ ойгоры аайлу-башту јӱрерге болужат. Темдектезе, иш јанынаҥ сурактарда. Бис чындык христиандар, иштеген ижисте бир де тӧгӱнденбей јадыс (Эф. 4:28). Мындый кылык-јаҥысты кӧрӱп, кезикте начальниктерис бисти иштеҥкей, тӧгӱндебес кижи болгоныс учун мактап јат. Мынаҥ улам кезик ака-эјелер иште улуска јакшы кӧрӱнерге болуп, оройго јетире иштенип отурып калат. Је олорго билезине, јуунныҥ керектерине ӧй чек артпай барат. Мынайда эдерге јарабас. Кӧгӱс керектер ле иш бойыныҥ јеринде турар учурлу.

11. Уильям ака иш јанынаҥ нени билип алган?

¹¹ Ижиске канча кире ӧй берерин билип турар керек. Мыны Уильям деп јиит ака билип алган. Оныҥ ижиниҥ начальниги бистиҥ аксагал болгон. Ака бу аксагал керегинде мынайып куучындаган: «Ол ака улуска јалакай, иштеҥкей, немени чынык эдер, оныҥ учун клиенттери оны баалап јат. Је ол иш божозо, оноҥ ло ары иштеп отурбай, билезиле кожо болот, Кудайдыҥ ижин эдет. Бу ака чын ла сӱӱнчилӱ јӱрет!» *

12. Озо баштап Соломон бойына чын кӧрӱмдӱ болгон деп недеҥ кӧрӱнет, је кийнинде ол кандый тузакка тӱшкен?

¹² Соломон Иеговага чындык болордо, бойына чын кӧрӱмдӱ болгон. Ол кезик немени бойы эдип болбос деп оҥдоп, Кудайдаҥ болуш сурап туратан (1 Каан. 3:7—9). Керек дезе Соломон бийиркенери ойгор эмес деп оҥдогон. Бис мыны оныҥ сӧстӧринеҥ кӧрӧдис: «Улуркак болгоны ӧлӱмге экелет, бийиркек болгоны јыгыларына экелет» (Укаа 16:18). Је кийнинде Соломон бойы ла бу тузакка тӱжӱп калган: ол тыҥ  бийиркенип, Кудайдыҥ некелтелерин ээчий-деечий бузып баштаган. Темдектезе, ол каан кижи «јӱреги ӱрелбезин деп, кӧп ӱйлер албазын» деген јасакты билер болгон (Јаҥ. т. 17:17). Андый да болзо, ол «700 ӱйлӱ ле 300 наложницалу» болуп калган, бу ӱй улустыҥ кӧбизи тӧгӱн кудайларга бажырып туратан! (1 Каан. 11:1—3). Ол байла: «Менле јаман не де болбос» — деп сананган. Је чынынча болзо, ол мындый керектердеҥ улам кӧп кыйын-шыра кӧргӧн (1 Каан. 11:9—13).

13. Иисустыҥ јобожын нениҥ учун сананып кӧрӧр керек?

¹³ Иисус јобош болгонынаҥ улам, улусты бойынаҥ бийик туткан. Иисус теҥериде Адазыла кожо кайкамчылу, сӱреен кайкамчылу улу иш эткен де болзо, ол бир де бийиркенбеген. Агару Бичикте айдылганыла: «Ол ажыра ончозы јайалган: теҥеридези де, јердези де» (Кол. 1:16). Иисус сууга чӧҥӱрилерде, теҥеридеги јӱрӱми ӱзе сагыжына кирип келген болор (Матф. 3:16; Иоанн 17:5). Је ол тӱҥей ле бойын улустаҥ бийик тутпаган. Иисустыҥ айтканыла болзо, ол јерге «улусты ого јалчы болзын деп эмес, улуска јалчы болойын деп, кӧп улус учун бойыныҥ јӱрӱмин берейин деп келген» (Матф. 20:28). Анайда ок Иисус качан да бойыныҥ кӧрӱмиле башкарынбас болгон (Иоанн 5:19). Иисустыҥ јобожынаҥ биске ончобыска ӱренер керек!

14. Бойыска чын кӧрӱмдӱ болорго Иисустыҥ сӧстӧри канайып болужат?

¹⁴ Иисус ӱренчиктерин бойына чын кӧрӱмдӱ болзын деп ӱреткен. Бир катап ол мындый сӧстӧр айткан: «Слердиҥ дезе бажыгардыҥ кылы да ончозы тоололып калган» (Матф. 10:30). Бу сӧстӧр анчада ла бойын уйан кӧрӱп турган ака-эјелерге сӱреен тузалу. Бисти теҥеридеги Иегова Адабыс кичееп ле сӱӱп јат. Оныҥ учун ака-эјелер, Иегованыҥ слерди баалап турганына не алаҥзып јадаар?! Карын ол бистерди баалап  турган, керек дезе бойыныҥ улузына ӱргӱлји јӱрӱм сыйлаарга кӱӱнзейт.

15. а) «Каруулчы шибеениҥ» чыгармаларыныҥ бирӱзинде кандый јӧп берилген? б) Бис јӱк ле бойысты сананзаас, кандый алкыштар албазыс?

¹⁵ Бир катап «Каруулчы шибееде» мындый јӧп берилген: «Биске бойысты уйан кӧрбӧс керек, ол эмезе менде бир де јаман кылык јок деп сананбас керек. Оноҥ ӧскӧ, бис кунуга берердеҥ айабазыс, эмезе бийиркене берердеҥ айабазыс. Оныҥ учун биске бойыстаҥ кӧпти сакыбас керек, ол эмезе јастыраларыска кӧзисти бӧктӧбӧс керек. Бир эје бойы керегинде мынайып айткан: „Мен бойымды чек ле јакшы кижи деп сананбай јадым, је бойымды ӧйинеҥ ӧткӱре јаман да деп кӧрбӧй јадым. Менде јакшы да, уйан да јандарым бар. Кажы ла кижи андый эмей“» *. Ајардаар ба, бойына чын кӧрӱмдӱ болорынаҥ кандый туза бар эмтир?

16. Иегова биске нениҥ учун ойгор јӧптӧр берет?

¹⁶ Иегова бойыныҥ Агару Сӧзи ажыра бистерге ойгор јӧптӧр берип јат. Нениҥ учун дезе ол бисти сӱӱп јат ла бистерди ырысту болзын деп кӱӱнзейт (Иса. 48:17, 18). Бис Иегованыҥ табын бӱдӱрип турзаас, чыннаҥ ла ырысту болорыс ла ойгор болорыс. Анайып бисте ишке, акчага, бойыска јастыра кӧрӱм болбос. Иегова бистиҥ кажыбыска ла мындый сӧстӧр айдат: «Сениҥ јӱрегиҥ ойгор болзо, мениҥ де јӱрегим сӱӱнер» (Укаа 23:15). Оныҥ учун ойгор болорго ло Теҥеридеги Адабыстыҥ кӱӱнин јандырбаска албаданактар!