1, 2. Кезикте мӱргӱӱлдерис аайынча бисте кандый сурак чыгып келет?

 СЛЕРДЕ качан бирде мындый сурак болгон бо: «Иегова мениҥ мӱргӱӱлдеримди угат па?» Бу сурак кӧп ака-эјелерде, анчада ла кӱчтер болуп турза, чыгат. Нениҥ учун дезе биске андый ӧйдӧ мӱргӱӱлдеристиҥ каруузын кӧрӧргӧ кӱч болуп турган.

² Айдарда, Иегова бойыныҥ ишчилериниҥ мӱргӱӱлдерине каруузын берип турганында бис нениҥ учун алаҥзыбас аргалу деп кӧрӱп ийектер (1 Иоанн 5:15). Анайда ок мындый сурактар кӧрӧрис: Иегова кезикте бистиҥ мӱргӱӱлдериске каруузын бербей турган деп нениҥ учун билдирип турган? Бӱгӱнги кӱнде мӱргӱӱлдеристиҥ каруузын ол канайып берет?

3. Иегова бисти нениҥ учун ого мӱргӱп турзын деп кӱӱнзейт?

³ Агару Бичикте айдылганыла болзо, Иегова бисти сӱӱйт ле баалайт (Агг. 2:7; 1 Иоанн 4:10). Оныҥ да учун Кудай бисти ого мӱргӱп турзын деп айдат (1 Пётр 5:6, 7). Иегова биске најы болорго ло кӱч ӧйлӧрдӧ болужарга кӱӱнзейт.

4. Иегова бойыныҥ ишчилериниҥ мӱргӱӱлдерине каруузын берип турган деп, бис кайдаҥ билерис? (Јурукты база кӧрӱгер.)

⁴ Агару Бичикте Иегова ишчилериниҥ мӱргӱӱлдерине каруузын берген учуралдар кӧп бар. Кемниҥ учуралы сагыжарга кирет? Озо ло баштап Давид каанныҥ болбой. Оны кӧп улус јаман кӧргӧн. Оныҥ учун ол Иеговага мӱргӱп, јаантайын болуш сурап туратан. Бир катап ол Иегованы мынайда јайнаган: «Иегова, мениҥ мӱргӱӱлимди, болуш сурап јайнаганымды уксаҥ, Кудайым.  Сенеҥ каруу сакып јадым, нениҥ учун дезе сен сӧзине турар чындык Кудай» (Сар. 143:1). Иегова дезе оныҥ мӱргӱӱлдерин угуп, оны ӧштӱлердеҥ аргадап туратан (1 Сам. 19:10, 18—20; 2 Сам. 5:17—25). Оныҥ да учун Давид: «Иегова... болуш сурап турган улустыҥ ончозына јуук» — деп, бир де алаҥзыбай айдар аргалу болгон. Бис те мынай алаҥзыбай айдар аргалу (Сар. 145:18).

5. Иегова ишчилериниҥ мӱргӱӱлдерине карууны јаантайын олордыҥ сакыганы аайынча берген бе? Тем куучындап береер. (Јурукты база кӧрӱгер.)

⁵ Иегова кезикте бистиҥ мӱргӱӱлдериске каруузын сакыганыс аайынча бербей јат. Темдектезе, апостол Павел Иеговага «тегенекти» јоголтсын деп, ӱч катап јайнап мӱргӱген. Иегова ого каруузын берген бе? Эйе, берген, је Павелдиҥ сакыганынча эмес. Иегова тегенекти јоголтпогон до болзо, Павелге оноҥ ло ары чындык иштеерге ийде-кӱч берген (2 Кор. 12:7—10).

6. Нениҥ учун кезикте Иегова мӱргӱӱлдериске каруу бербей турган деп билдирет?

⁶ Кезикте Иегова бистиҥ де мӱргӱӱлдериске каруузын сакыганыс аайынча бербестеҥ айабас. Нениҥ учун дезе Иегова биске канайып болужатанын бистеҥ јакшы билер. Керек дезе ол «нени сураганыстаҥ эмезе сананганыстаҥ... кӧпти эдер аргалу» (Эф. 3:20). Оныҥ да учун Иегова кезикте сураганыстаҥ башка каруу берет, эмезе мӱргӱӱлдеристиҥ каруузын чек ӧскӧ ӧйдӧ аладыс.

7. Биске нениҥ учун кезикте ӧскӧ неме керегинде мӱргӱӱр керек? Тем куучындап беригер.

⁷ Бис Иегованыҥ табын билип турзаас, ӧскӧ этире мӱргӱӱр керек деп оҥдоп ийедис. Мартин Пётцингер аканыҥ учуралын кӧрӱп ийектер. Мартин аканы кижи алган ла кийнинеҥ, јаан удабай, нацисттер концлагерьге отургыскан. Ака дезе озо баштап, Иегова ого јайым берип, ӱйин кичеейтен ле јарлаар ижин орныктыратан арга берзин деп, мӱргӱп туратан. Је эки неделениҥ туркунына ака јайымга анайып ла чыкпады. Оныҥ учун ол Иеговага мынайып мӱргӱген: «Иегова, Кудайым, сен мени нени этсин деп кӱӱнзеп турганыҥды кӧргӱзип берзеҥ». Мындый мӱргӱӱлдиҥ кийнинеҥ ака концлагерьде отурган акалардыҥ кӱчтерин шӱӱп санаган. Акалар дезе бойыныҥ ӱйлери ле балдары керегинде коркышту тыҥ санааркагылап туратан. Мартин ака мыны  оҥдоп ийеле, Иеговага мӱргӱген: «Иегова Ада, меге јаҥы јакылта бергениҥе сеге јаан быйан. Эмди меге акалардыҥ кӱӱнин кӧдӱрип, олордыҥ бӱдӱмјизин тыҥыдарга болужып берзеҥ». Оноҥ ло бери тогус јылдыҥ туркунына Мартин Пётцингер ака концлагерьде отурган акалардыҥ кӱӱнин кӧдӱрип, бӱдӱмјизин тыҥыткан!

8. Мӱргӱп турзаас, нени ундыбас керек?

⁸ Иеговада амадузы бар, ол бу амадузын бӱдӱрерге ӧй тургузып салган деп ундыбас керек. Оныҥ амадузы аайынча удабас улуска кӧп кыйын-шыра јетирип турган уур-кӱчтердиҥ ончозы јоголып калар. Темдектезе, ар-бӱткенниҥ тӱбеги, оору-јобол ло ӧлӱм. Иегова бу кӱчтерди Каандыгыныҥ болужыла јоголтор (Дан. 2:44; Ачыл. 21:3, 4). Эм тура бу кӱчтер јоголголокто Иегова Сатанага калју телекейле башкаратан арга берип јат (Иоанн 12:31; Ачыл. 12:9) b. Иегова бистиҥ ончо кӱчтеристиҥ аайына чыгарга болужып турган болзо, Сатананы јакшы башкараачы деп сананар эдис. Оныҥ учун биске Иегованыҥ амадузы бӱдӱп калатан ӧйди сакыыр керек. Је бу Иегованыҥ биске болушпаска турганын кӧргӱспей јат. Је эмди Иегованыҥ биске канайып болужып турганын кӧрӱп ийектер.

9. Ойгор тӱп-шӱӱлте эдерге, Иегова биске канайып болужат? Тем куучындап беригер.

⁹ Ол биске ойгор берип турган. Иегова биске ойгор тӱп-шӱӱлтелер эдерге болужар деп сӧзин берет. Кандый айалгаларда биске анчада ла ойгор керек болуп јат? Бастыра јӱрӱмиске тузазын эмезе каршузын јетиретен айалгаларда. Темдектезе, биле тӧзӧӧр бӧ, јок по деп суракта (Иак. 1:5). Мария c деген сыйынныҥ учуралын кӧрӱп ийектер. Ол текши пионер болуп иштеген. Ого мындый јӱрӱм јарап туратан. Је оноҥ ол бир акала танышкан. Сыйын куучындайт: «Бис кӧп куучындажып баштаганыс. Анайып бир эмештеҥ бой-бойыска јарай бергенис. Је мен оҥдоп туратам, меге дезе кандый бир шӱӱлтеге келер керек деп. Оныҥ учун Иеговага кӧп мӱргӱгем. Меге Иегованыҥ ойгоры ла башкартузы керек болгон. Је бу ла ок ӧйдӧ Иегова мен учун тӱп-шӱӱлте чыгарбас деп билер болгом». Мария сыйын Иегова оныҥ мӱргӱӱлине каруу берген деп, бир де алаҥзыбай јат. Ол оныҥ каруузын канайып кӧрӱп ийген? Ол дезе бойыныҥ сурактарыныҥ карууларын табып аларга, бистиҥ бичиктерди  шиҥдеген. Анайда ок ого энезиниҥ ойгор јӧби болушкан. Энези база Иегованыҥ Керечизи. Мынайып Мария бойыныҥ сезимдерин лаптап шӱӱп сананала, ойгор тӱп-шӱӱлте эткен.

10. Филиппыдагыларга 4:13-те айдылганыла, Иегова бойыныҥ ишчилерине канайып болужат? Тем куучындап беригер. (Јурукты база кӧрӱгер.)

¹⁰ Ол биске кӱчтерди ӧдӧргӧ ийде-кӱч берет. Иегова апостол Павелди бир де артыргыспаган. Айдарда, ол биске де кӱч ӧйлӧрдӧ чыдал берер. (Филиппыдагыларга 4:13, ЈТ кычырыгар.) Бир учурал кӧрӱп ийектер. Бе́нджамин ака јиит тужында кӧп сабада ада-энезиле, ака-эјелериле кожо Африкада беженецтердиҥ лагерьлеринде јаткан. Ол айдат: «Мен Иеговага чындык артарга, јаантайын ийде-кӱч сурап туратам. А ол јӱрегиме токунал берген, оноҥ ло ары јалтанбай јарлаарга болушкан. Анайда ок кӧгӱс јанынаҥ бек артарга, библиялык бичиктер берген. Анайып, бистиҥ бичиктердеҥ ака-эјелердиҥ кӱч ӧйинде Иегова канайып болушканын кычырала, бӱдӱмјим тыҥыган».

11, 12. Иегова мӱргӱӱлдериске каруузын берерге кӧгӱс билегисти канайып тузаланар аргалу? (Јурукты база кӧрӱгер.)

¹¹ Ол биске ака-эјелер ажыра болужат. Иисус божоор алдында, тӱнде, Иеговага коркышту тыҥ јайнап мӱргӱген. Ол Иегованаҥ нени сураган? Кудайдыҥ ады јабарлалбазын деп сураган. Је Иегова оныҥ сурагын бӱдӱрбеди. Карын оныҥ ордына Иисуска болуш этире ангелди, оныҥ карындаштарыныҥ бирӱзин, ийген (Лука 22:42, 43). Анайып ла ок Иегова биске болужар аргалу. Ол ака-эјелердиҥ кемизин-кемизин биске телефон согуп ийзин, ол эмезе айылдап кирип ийзин деп кӱӱнзедип ийер. Оныҥ учун бистиҥ кажыбыска ла ака-эјелерге «јакшы сӧс» айдатан арга бедиреп турар керек (Укаа 12:25).

¹² Ми́риам эјениҥ учуралын кӧрӱп ийектер. Оныҥ ӧбӧӧни божоп калган кийнинеҥ тоолу неделе ӧдӧ берерде, ол айылда јаҥыскан ыйлап, чек токунабай турды. Эјеге коркышту ачу болгон, јӱрегинде сызы ӧтпӧй турды. Ого  кемле-кемле куучындажып ийер керек болгон. Эје айдат: «Менде кемге-кемге телефон согуп ийетен кӱч те болбогон. Мен јӱк ле мӱргӱгем. Ол ло ӧйдӧ бистиҥ билегистиҥ јуук најызы болуп турган аксагал телефон согуп ийген». Бу ака ла оныҥ ӱйи Мириам эјени токунадып салган. Ол айалгада бу аканы телефон согорго шак ла Иегова кӱӱнзеткен деп, Мириам эје бӱдӱп јат.

13. Иегова бойыныҥ ишчизи эмес кижи ажыра Неемияга канайып болушкан?

¹³ Ол биске ӧскӧ дӧ улус ажыра болужат (Укаа 21:1). Темдектезе, Иегова Артаксерксти Неемияны божодып ийзин деп кӱӱнзедип ийген. Анайып, Неемия Иерусалимди орныктырар аргалу болгон (Неем. 2:3—6). Бӱгӱнги кӱнде Иегова биске де Кудайга бажырбай турган улус ажыра болужар аргалу.

14. Су Цин эјениҥ учуралы слерге незиле јарады? (Јурукты база кӧрӱгер.)

¹⁴ База бир учурал Су Цин деп эјеле болгон. Бу эје Иегова ого врач ажыра болушкан деп сананат. Эјениҥ уулы бир канча психический расстройстволорлу болгон. Бир катап оныҥ уулыла коркышту јаман јеткер болордо, эјеге бойына да, оныҥ ӧбӧӧнине де ижинеҥ чыгарга келишкен. Мынаҥ улам олордыҥ билези чек акчага јединбей барган. Санааркаштардаҥ улам кӧӧркий эјениҥ чыдалы да чыккан. Оныҥ учун ол Иегованаҥ болуш сурап, бастыра сезимдерин куучындап берди. Јаан удабай, бу билеге бир врач ајару эткен. Оныҥ болужыла ороонныҥ јаҥдары олорго баазы јеҥил тура берген ле ӧскӧ дӧ болуш јетирген. «Бис Иегованыҥ колын кӧргӧнис. Ол чын ла бистиҥ мӱргӱӱлдеристи угуп турган» — деп, Су Цин эје айдат (Сар. 65:2).

15. Бир эјеге Иегова оныҥ мӱргӱӱлдерин угуп турган деп оҥдоорго не болушкан?

¹⁵ Иегова бистиҥ мӱргӱӱлдериске каруузын јаантайын ла кайкамчылу эдип берер деп сакыбас керек. Је Иегованыҥ биске берген кажы ла каруузы чындыктыҥ јолынаҥ јӱре бербеске болужат. Оныҥ учун Иегова бистиҥ мӱргӱӱлдериске каруузын канайып бергенин кӧрӱп турар керек. Йо́ко эјениҥ учуралын кӧрӱп ийектер. Бистиҥ эјеге Иегова оныҥ мӱргӱӱлдерин укпай турган деп билдирген. Оныҥ учун ол Иегованаҥ  нени сураганын бичип баштаган. Кийнинде, кӧрӧр болзо, Иегова оныҥ кӧп саба мӱргӱӱлдерине каруузын берген эмтир. Керек дезе ол сурактарыныҥ кезигин ундып та салыптыр. Айдарда, биске де бир канча ӧйдӧҥ Иегова мӱргӱӱлдериске каруузын канайып бергенин шӱӱп сананып турар керек (Сар. 66:19, 20).

16. Бистиҥ бӱдӱмји недеҥ кӧрӱнер? (Еврейлерге 11:6).

¹⁶ Бистиҥ бӱдӱмјибис јаҥыс ла Иеговага мӱргӱӱринеҥ эмес, је оныҥ берген карууларын алынганыстаҥ кӧрӱнер. (Еврейлерге 11:6, ЈТ кычырыгар.) Темдектезе, Майк ака ла оныҥ ӱйи Крисси Бет-Элде иштеерге кӱӱнзеген. Майк куучындайт: «Бис канча јылдыҥ туркунына Бет-Элге иштеерге заявление бичигенис. Анайда ок кӧп мӱргӱгенис. Је бисти ары кычырбады». Андый да болзо, бу экӱ Иегова олорды кандый иште тузаланыларын сӱреен јакшы билер деп, бир де алаҥзыбаган. Оныҥ учун кӱчи јеткенче ле Кудайга оноҥ ло ары иштеген. Олор јарчылар јетпей турган јерлерде текши пионерлер болгон. Анайда ок бистиҥ организацияныҥ туралар тудар проекттеринде турушкан. Эмди олор аймак кӧрӧӧчиниҥ ижинде. Майк оноҥ ары куучындайт: «Кезикте Иегова бистиҥ сурагыска ӧскӧ каруу беретен. Је бир де сурагыс каруу јок артпаган. Керек дезе, Иегованыҥ берген каруузы нени сураганыстаҥ да артык болотон».

17, 18. Сарын 86:6, 7-ле болзо, бис неде алаҥзыбас аргалу?

¹⁷ Сарын 86:6, 7 кычырыгар. Сарнаачы Давид Иегова оныҥ мӱргӱӱлдерин уккан ла каруузын берген деп, бир де алаҥзыбаган. Бис те алаҥзыбас аргалу. Бу јӧрмӧлдӧ кӧрӱлген темдер Иегова биске турумкай артарга, ойгор ло ийде-кӱчтӱ болорго болужар деп бӱдӱмјиледи. Ол биске кӧгӱс билегис ажыра эмезе ого бажырбай да турган улус ажыра болужар аргалу.

¹⁸ Чын ла, кезикте Иегованыҥ каруузы сураганыстаҥ башка болот. Андый да болзо, мӱргӱӱлдерис качан да каруу јок артпай јат. Је ол нени, качан берерин бистеҥ јакшы билер. Оныҥ учун Иеговага оноҥ ло ары мӱргӱгер. Ол слерди бӱгӱнги де кӱнде, келер де ӧйдӧ бир де артыргыспас. Иегова јаҥы јӱрӱмде кажы ла ишчизиниҥ кӱӱнин бӱдӱрип салар (Сар. 145:16).