1. Агару Бичик чын сӱӱш керегинде нени айдат?

 «СӰӰШ — јалбышталган от, Йахтыҥ јалбыжы. Чакпынду суулар сӱӱшти ӧчӱрбес, агын суулар оны агыспас» (Кожоҥ 8:6, 7) b. Агару Бичик чын сӱӱш керегинде кандый јараш айдат! Бу сӧстӧр эш-нӧкӧрлӧрдиҥ сӱӱжи јажын-чакка ӧтпӧс аргалу деп кӧргӱзет.

2. Эш-нӧкӧрлӧр бой-бойына сӱӱжи сообозын деп нени эдер учурлу?

² Эш-нӧкӧрлӧр бастыра јӱрӱмине бой-бойын сӱӱр аргалу ба? Бу дезе олор экӱдеҥ камаанду. Тем кӧрӱп ийектер. Отко удура ла одын салып турза, от качан да ӧчпӧс. Је отко кем де одынды салбай турза, от араайынаҥ ӧчӱп баштаар. Анайып ла эш-нӧкӧрлӧр экилези ле бой-бойына сӱӱжин тыҥыдып турза, олордыҥ сӱӱжи сообос. Је кезикте эш-нӧкӧрлӧрдиҥ сӱӱжи сооп баштайт. Нениҥ учун дезе олор су-кадык, акча-манат јанынаҥ санааркап јат. Ол эмезе бала-барказы јанынаҥ кӱчтер болот. Оныҥ учун кару эш-нӧкӧрлӧр, слер «Йахтыҥ јалбыжына» јӧмӧжӧргӧ нени эдер аргалу? Бу јӧрмӧлдӧ эш-нӧкӧрлӧргӧ болужатан ӱч јӧп кӧрӱлер c.

3. Эш-нӧкӧрлӧргӧ бой-бойын оноҥ тыҥ сӱӱрге, Иегованы сӱӱп турганы канайып болужар? (Экклезиаст 4:12). (Јурукты база кӧрӱгер.)

³ Эш-нӧкӧрлӧргӧ «Йахтыҥ јалбыжына» јӧмӧжӧргӧ, Иегованы тыҥ сӱӱр керек. Нениҥ учун? Эш-нӧкӧрлӧр теҥеридеги Адазыла колбуларын баалап турза, оныҥ  берип турган јӧптӧрин тузаланып јат. А бу дезе олорго сӱӱжин сооткодый кӱчтерди ӧдӧргӧ болужат. (Экклезиаст 4:12 кычырыгар.) Анайда ок Иегованы сӱӱп турган улус оноҥ тем алып, оныҥ кылык-јаҥына ӱренерге албаданат. Андый улус бой-бойына јалакай, чыдамкай болуп, бой-бойыныҥ јастыраларын акту јӱрегинеҥ таштап јат (Эф. 4:32—5:1). Эш-нӧкӧрлӧр мынайда эдерге албаданып турза, олордыҥ сӱӱжи там тыҥыыр. Кижиде болгоны 25 јылдаҥ ажып калган Лена мынайда айдат: «Кӧгӱс кижини сӱӱрге де, тоорго до јеҥил».

4. Иегова нениҥ учун Мессияга ада-эне эдип, Иосифти ле Марияны талдаган?

⁴ Бир библиялык тем кӧрӱп ийектер. Иегова Мессияга ада-энезин талдап турарда, Давидтеҥ барган Иосифке ле Марияга ајару эткен. Нениҥ учун дезе Иосиф ле Мария Иеговала бек колбуларлу болгон. Анайда ок олордыҥ билезинде Иегова баштапкы јерде болор деп ол билген. Эш-нӧкӧрлӧр, Иосиф ле Мариянаҥ слер кандый тем алар аргалу?

5. Билениҥ бажы Иосифтеҥ неге ӱренер аргалу?

⁵ Иосиф Иегованыҥ башкартуларыла јӱрген. Оныҥ учун ол билениҥ бажы болотон молјузын сӱреен јакшы бӱдӱретен. Агару Бичикте ол Иегованыҥ берген јакылталарын, кӧп солынталар эдер керек те болзо, тӱрген ле бӱдӱрип туратаны керегинде бичилген ӱч учурал бар (Матф. 1:20, 24; 2:13—15, 19—21). Мынаҥ бис Иосифтиҥ Марияны тыҥ баалап, кичееп јӱргенин кӧрӧдис. Мария дезе Кудайга сӧсуккуры учун ӧбӧӧнин оноҥ тыҥ сӱӱп, тооп јӱрген. Биледе баш болуп турган кару эр улус, слер Иосифтеҥ неге ӱренер аргалу? Билениҥ сурактарына болужатан јӧптӧрди Агару Бичиктеҥ бедиреп туругар d. Табып алган јӧпти, јаан солынталар эдерге де келишсе, тузаланыгар. Анайып, ӱйлереерди оноҥ тыҥ сӱӱреер, билегер де качан да чачылбас. Вануа́туда јадып турган бир эјениҥ темин кӧрӱп ийектер. Оныҥ кижиге барганы 20 јылдаҥ ажып калган. Ол айдат: «Ӧбӧӧнимди Иегованыҥ башкартуларыла јӱрерге албаданып турганы учун сӱреен баалап јадым. Оныҥ да учун мен биледе кандый да сурак чыкса, ӧбӧӧним оны Кудайдыҥ башкартулары аайынча эдип салар деп иженип, бир де санааркабай јадым».

6. Эш-нӧкӧрлӱ эје-сыйындар Мариянаҥ неге ӱренер аргалу?

⁶ Марияда Иеговала бойыныҥ колбулары болгон. Оныҥ бӱдӱмјизи ӧбӧӧнинеҥ камаанду болбогон. Ол Агару  Бичимелди де јакшы билген e. Анайда ок Кудайдыҥ Сӧзин шӱӱп сананарга, ӧй табып туратан (Лука 2:19, 51). Мария Иосифке јакшы эш-нӧкӧр болгон деп, бис бир де алаҥзыбай јадыс. Бӱгӱнги де ӧйдӧ эш-нӧкӧрлӱ эје-сыйындар Мариянаҥ тем аларга албаданат. Темдектезе, Эмико́ деп эје мынайда куучындаган: «Кижиге барбаган тужымда менде јакшы кӧгӱс график болгон. Је кижиге барган кийнинде кӧп неме солына берген. Эмди дезе кӧп сабада ӧбӧӧним мӱргӱп јат, билелик бажырыш ӧткӱрет, керек дезе кӱнниҥ ӱлгерин де ол кычырат. Мынаҥ улам Иеговала колбуларымды тыҥыдарга, мен бойым нени де этпей баргам деп билдире берген. Оныҥ учун Иегова Кудайыма јууктаарга, ого бойым мӱргӱп, Агару Бичикти кычырып, шӱӱп сананып баштагам» (Гал. 6:5). Эш-нӧкӧрлӱ кару эје-сыйындар, Иеговага сӱӱжигерди тыҥыдарга бойоор албаданзаар, эш-нӧкӧрлӧрӧӧр слерди оноҥ тыҥ сӱӱр ле оноҥ кӧп мактаар (Укаа 31:30).

7. Эш-нӧкӧрлӧр Иеговага кожо бажырары јанынаҥ Иосиф ле Мариянаҥ неге ӱренер аргалу?

⁷ Иосиф ле Мария Иеговала колбуларын кожо тыҥыткан. Олор билер болгон, Кудайга бӱдӱн билеле бажырар керек деп (Лука 2:22—24, 41; 4:16). Је мыны эдерге, анчада ла балдарлу боло берерде, јеҥил эмес келишкен болор. Андый да болзо, олор кӧгӱс керектерди бир де туура јылдырбаган. Бӱгӱнги эш-нӧкӧрлӧргӧ кандый јакшы тем! Слерде балдар бар болзо, јуунныҥ туштажуларына јӱрерге ле билелик бажырышты ӧткӱретен ӧйди табарга, кӱч болуп турган болор. Анайда ок кожо мӱргӱп, ӱренетен ӧй табарга, оноҥ кӱч болуп турган болор. Андый да болзо, Иеговага кожо бажырарга албаданып турзаар, бой-бойоорго до, Иеговага да јуук болороор. Оныҥ учун слердиҥ билегерде Иеговага бажырары баштапкы јерде турзын.

8. Кӱчтердеҥ улам билелик бажырышты кожо ӧткӱрерге кӱӱнзебей турган эш-нӧкӧрлӧр нени эдер аргалу?

⁸ Је слерде кӱчтер болуп турган болзо, нени эдерге јараар? Мынаҥ улам слер билелик бажырышты да кожо ӧткӱрерге кӱӱнзебей турган болороор. Је кандый да болзо чӧкӧбӧгӧр. Мындый айалгада баштап тарый слер экӱге нени-нени кыскарта шӱӱжип турарга јараар. Мынайып эдерге кӧндӱге берзеер, слер бой-бойыгарга оноҥ јуук болуп калараар, анайда ок слерге кӧгӱс керектерди кожо эдип турарга јарай берер.

9. Нениҥ учун эш-нӧкӧрлӧргӧ бой-бойыла ӧй ӧткӱрип турар керек?

⁹ Эш-нӧкӧрлӧргӧ јаантайын бой-бойлорыла ӧй ӧткӱрип, сӱӱжин ӧчӱрбеске албаданар керек. Ол тушта слер эш-нӧкӧрӧӧрдиҥ нени сананып, нени сезип турганын билип турараар (Баш. 2:24). Руслан ла Лилия тойдыҥ кийнинеҥ удабай ла мындый неме ајарып ийген. Олордыҥ јуртаганы 15 јылдаҥ ажа берген. Лилия эске алат: «Бис экӱлегис иштегенис. Иштиҥ кийнинеҥ айылдыҥ ижи. Оныҥ ӱстине балдарлу болуп калганыс. Бис мынаҥ да ары бой-бойысла ӧй ӧткӱрбезеес, ыраажып баштаарыс деп оҥдоп ийгенис».

10. Эш-нӧкӧрлӧр Эфестегилерге 5:15, 16-дагы принципти канай тузаланар аргалу?

¹⁰ Эш-нӧкӧрлӧр кожо болотон ӧйди  табарга нени эдер аргалу? Андый ӧйди озодоҥ пландап турза јакшы болор. (Эфестегилерге 5:15, 16 кычырыгар.) Нигеряда јадып турган Узо́нду деп ака мынайда айдат: «График тургузып јатсам, ӱйимле болор ӧйди баштапкы јерге бичип аладым» (Флп. 1:10). Молдовада аймак кӧрӧӧчиниҥ ӱйи, Анастасия, мынайда куучындайт: «Ол Кудайдыҥ ижин эдип јатса, мен бойымныҥ керектеримди эдип јадым. Качан ол ижинеҥ божой берзе, кожо болуп јадыс». Је эш-нӧкӧрлӧр бой-бойына ӧй таппай турза, нени эдер аргалу?

11. Акила ла Прискилла нени кожо эткен?

¹¹ Эш-нӧкӧрлӧр Акила ла Прискилланаҥ кӧп немеге ӱренер аргалу. Баштапкы чактыҥ кӧп ака-эјелери бу эш-нӧкӧрлӧрди сӱреен тыҥ сӱӱген (Рим. 16:3, 4). Олордыҥ јӱрӱми керегинде Агару Бичикте ас та айдылган болзо, олор јаантайын кожо јӱрген деп кычырадыс. Иштеп те јӱрзе, јарлап та турза, улуска да болужып јӱрзе, кожо болотон (Ап. ижи 18:2, 3, 24—26). Чындап та, Агару Бичикте олор керегинде айдылза, олордыҥ аттары јаантайын кожо бичилет.

12. Эш-нӧкӧрлӧргӧ кожо ӧй ӧткӱрип турарга не болужар? (Јурукты база кӧрӱгер.)

¹² Эш-нӧкӧрлӧр Акила ла Прискилланаҥ кандый тем алар аргалу? Айылдыҥ ижи андый кӧп, оны ӱзе чоттоп то болбозыс. Бу иштерди кожо не эдип кӧрбӧс? Акила ла Прискилла јаантайын кожо јарлаган. А слер кожо јарлаарга, ӧй табып болороор бо? Анайда ок Акила ла Прискилла кожо иштеген. Је слер эки башка иште иштеп турган болзоор, айылдыҥ ижин кожо не этпес? (Эккл. 4:9). Слер кожо иштенип турзаар, бойоорды бир команда деп сезереер, анайда ок бой-бойоорло кӧптӧдӧ куучындажып та турараар. Роберт ле Линданыҥ кожо јуртаганы 50 јылдаҥ ажа берген. Роберт мынайып айдат: «Чынын айтса, бисте амырап отуратан ӧй кӧп болбой јат. Темдектезе, мен айак-казан јунып турзам, ӱйим арчып јат. Ол эмезе огородто баргаа јулып јатсам, ӱйим јанында болужып турза, мен андый ырысту! Бис кожо јаантайын иштенип турзаас, бой-бойыска оноҥ тыҥ карузыйдыс ла бой-бойысты оноҥ тыҥ сӱӱйдис».

13. Эш-нӧкӧрлӧр нени этсе чыннаҥ ла бой-бойына јуук болор аргалу?

¹³ Ундыбагар, эш-нӧкӧрлӧр кожо до болзо, олорды чыннаҥ ла бой-бойына јуук улус деп айдып болбозыс. Бразилияда јадып турган, эш-нӧкӧрлӱ эје мынайда айдат: «Бӱгӱнги кӱнде эш-нӧкӧрлӧргӧ бой-бойына ӧй табарга јеҥил эмес. Оныҥ учун кезик улус, эмеен-ӧбӧӧн бир турада кожо јадып турган ла болзо, олорды јакшы јаткылап турган  деп сананар болор. Је эмди оҥдоп алганымла болзо, јаҥыс ла кожо јадар керек эмес, је бой-бойына ајару эдип турар керек». Бру́но ло оныҥ ӱйи Таи́с мыны канайып эдет? Бруно айдат: «Бис экӱ кожо болзоос, телефонысты туура салала, јакшызынып, куучындажып отурадыс».

14. Эш-нӧкӧрлӧргӧ бой-бойыла ӧй ӧткӱрерге јарабай турган болзо, нени эдерге јараар?

¹⁴ Слерге бой-бойоорло кожо болорго јарабай турза эмезе бой-бойоорго кыртыштанып турзаар, ол эмезе кӧрӱмеер чек эки башка болзо, нени эдерге јараар? Байагы от керегинде темди эске алып ийзеер де. От кенете ле јалбырап кӱйе бербей јат не? Оны кӱйдӱрерге, кижи озо баштап кичинек ооктор салып јат, а јаанада кӱйе берзе, одын салып јат. Анайып ла ок эш-нӧкӧрлӧргӧ кажы ла кӱн бир эмештеҥ де болзо, бой-бойыла ӧй не ӧткӱрип баштабас? Је бой-бойоорды чагып ийгедий керектерди эмес, карын экӱлегерге јарап турган неме эдип кӧрӱгер (Иак. 3:18). Анайып, олордыҥ сӱӱжи араайынаҥ кӱйӱп баштаар.

15. Эш-нӧкӧрлӧргӧ нениҥ учун бой-бойын тооп турар керек?

¹⁵ Биледе бой-бойын тооры — отко керектӱ кислород болуп јат. Кислород јокко от тӱрген ӧчӱп калат. Анайып ла эш-нӧкӧрлӧр бой-бойын тообой турза, олордыҥ сӱӱжи тӱрген ӧчӧ берердеҥ айабас. Је тооп турза, олордыҥ сӱӱжи јалбырап кӱйет. Слер эш-нӧкӧрӧӧрди тооп турганаар деп сананып турган да болзоор, ол оны сезет пе? Аре́т ле Пе́нни деп эш-нӧкӧрлӧр 25 јылдаҥ ажыра јуртап койгон. Пенни айдат: «Бис бой-бойысты тооп јадыс. Оныҥ учун бистиҥ биледе сӱӱштиҥ јалбыжы ӧчпӧй јат. Бис бой-бойысты качан да јаман айдып, јаргылабайдыс. Оныҥ учун бой-бойыска санаа-шӱӱлтегисти ачыгынча айдарга коркыбайдыс». Эш-нӧкӧрӧӧр слердиҥ оны чыннаҥ ла тооп турганаарды сезип турзын деп нени эдереер? Авраам ла Сарраныҥ темин кӧрӱп ийектер.

16. Эш-нӧкӧрлӱ эр улус Авраамнаҥ неге ӱренер аргалу? (1 Пётр 3:7). (Јурукты база кӧрӱгер.)

¹⁶ Авраам Саррага тоомјылу баштанган. Ол оныҥ кӧрӱм-санаазын ла сезимдерин ајарып туратан. Бир катап Сарра коркышту тыҥ ачынала, сезимдерин тудунып болбой, Авраамды бурулай берген. Мындый учуралда Авраам бойын канайып тудунган? Саррала тартыжа берди бе? Јок. Карын ол ӱйин лаптап угуп, керектиҥ аайына чыгарга албаданган. Не дезе Авраам Сарраны јобош, сӧсуккур кижи деп билер болгон (Баш. 16:5, 6). Мынаҥ эш-нӧкӧрлӱ  эр улус неге ӱренер аргалу? Билениҥ бажы бойыныҥ билезиле колбой кандый бир тӱп-шӱӱлтелер чыгарар јаҥду (1 Кор. 11:3). Андый да болзо, андый кижи ӱйиниҥ кӧрӱм-санаазын ајаруга алып турза, сӱӱжин кӧргӱзип јат (1 Кор. 13:4, 5). Слердиҥ ӱйигер та неге де тыҥ санааркап, чыгара айдынып аларга турган болор. Андый учуралда слер оны лаптап угуп, оныҥ сезимдерин ајаруга алараар ба? (1 Пётр 3:7 кычырыгар.) Кожо јуртаганы 30 јылдаҥ ажа берген Анжела ла Дмитрий деп эш-нӧкӧрлӧрдиҥ учуралын кӧрӱп ийектер. Анжелада ӧбӧӧни оны тооп, баалап турганында бир де алаҥзу јок. Ол айдат: «Мен неге-неге санааркап турзам, ол эмезе меге чыгара айдынып алар керек болзо, Дима мени угарга јаантайын белен. Мен сезимдеримди тудунып болбой до турзам, ол меге бир де кыртыштанбай, карын чыдамкай болот».

17. Эш-нӧкӧрлӱ эје-сыйындар Сарранаҥ неге ӱренер аргалу? (1 Пётр 3:5, 6).

¹⁷ Сарра Авраамды сӱреен тоогон, оныҥ учун оныҥ айтканын ӱзе бӱдӱрип туратан (Баш. 12:5). Бир катап Авраам оны, эдип јаткан ижин артыргызала, сакыбаган јанынаҥ келген айылчыларды кӱндӱлеерге, калаш быжырзын деп сураган (Баш. 18:6). Сарра дезе калашты тӱрген ле быжырып ийген. Эш-нӧкӧрлӱ кару эје-сыйындар, слер де Сарра чылап, ӧбӧӧнӧӧрдиҥ чыгарган јӧбине јӧмӧжӧр аргалу. Анайып, слердиҥ билегер бек болор. (1 Пётр 3:5, 6 кычырыгар.) Ӧрӧги абзацта айдылган Дмитрий ака ӱйи оны нениҥ учун тооп турганыныҥ шылтагын мынайда куучындаган: «Мениҥ јӧбим ойгор эмес те болзо, ол мени јамандабай јат». Сени тооп турган кижини сӱӱрге кандый јеҥил!

18. Нениҥ учун эш-нӧкӧрлӧргӧ бой-бойына сӱӱжин ӧчӱрбес керек?

¹⁸ Сатана христиан билелердиҥ сӱӱжиниҥ одын ӧчӱрип саларга кӱӱнзейт. Ол, эш-нӧкӧрлӧр бой-бойын сӱӱбей барза, Иегованаҥ тууралай берер деп билер. Је чын сӱӱшти не де ӧчӱрип болбос! Оныҥ учун эш-нӧкӧрлӧрдиҥ сӱӱжи Соломонныҥ кожоҥында бичилген сӱӱштий болзын. Иегованы билегерде баштапкы јерге тургузыгар. Бой-бойыгардыҥ сезимдереерди, керексиништереерди тооп туругар. Бой-бойыгарла кожо куучындажып туратан ӧй табып туругар. Анайып, слердиҥ билегер чын сӱӱштиҥ Тӧзӧӧчизине — Иеговага — мак јетирер. Слердиҥ сӱӱжигер јажын-чакка ӧчпӧзин!