1. Иегова бойыныҥ ишчилерин неге кӱӱнзедет? (Јурукты база кӧрӱгер.)

 БИС Иеговага мӱргӱп турзаас, ол биске токунал ла јӧп берер аргалу. Ол бойы да бисти ого мӱргӱп турзын деп кӱӱнзеп јат. Агару Бичикте: «Јаантайын мӱргӱгер» — деп айдылат (1 Фес. 5:17, ЈТ). Оныҥ учун бис Иеговага кандый ла ӧйдӧ, кандый ла айалгада мӱргӱӱр аргалу (Укаа 3:5, 6). Биске Иегова Адабыска кӱнине канча да катап болзо мӱргӱӱрге јараар.

2. Бу јӧрмӧлдӧ нени кӧрӧрис?

² Бис мӱргӱйтен арганы сӱреен баалап јадыс. Је бистиҥ кезигиске, иш-тош кӧп болгонынаҥ улам, мӱргӱӱрге ӧй табарга јеҥил эмес болот. Анайда ок бистердиҥ кажыбыска ла мӱргӱӱлдерис Иеговага јарап турзын деп канайып мӱргӱӱрин шӱӱп сананып турар керек. Бу јанынаҥ јӧптӧр Агару Бичикте бар. Мыныла колбой бу јӧрмӧлдӧ Иисустыҥ теми биске канайып болужарын шӱӱжерис. Бого ло коштой не керегинде ле канайып мӱргӱӱри јанынаҥ беш јаан учурлу шӱӱлте кӧрӱп ийерис.

3. Иисус мӱргӱӱл јанынаҥ нени билген?

³ Иегова бистиҥ мӱргӱӱлдеристи сӱреен тыҥ баалап турган деп, Иисус билер. Ол јерге келердеҥ озо, Иегова туку алдынаҥ бери чындык ишчилериниҥ мӱргӱӱлдерине канайып каруу берип туратанын кӧргӧн. Темдектезе, Иегова Аннаныҥ, Давидтиҥ, Ильяныҥ, база да ӧскӧ чындык ишчилериниҥ акту јӱректеҥ мӱргӱгенин угуп, каруузын берерде, Иисус  јанында болгон (1 Сам. 1:10, 11, 20; 1 Каан. 19:4—6; Сар. 32:5). Оныҥ да учун Иисус бойыныҥ ӱренчиктерин јаантайын мӱргӱзин деп ӱреткен ле олордыҥ мӱргӱӱлдери каруу јок артпас деп бӱдӱмјилеген (Матф. 7:7—11).

4. Иисус биске мӱргӱӱл јанынаҥ кандый тем артыргыскан?

⁴ Иисус бойыныҥ ӱренчиктерине мӱргӱӱл јанынаҥ тем артыргыскан. Ол јерде болордо Иеговага јаантайын мӱргӱп туратан. Иисустыҥ јанында јаантайын ла улус болгон. Мынаҥ улам ого Адазына мӱргӱӱрге ӧй табарга јеҥил эмес болгон (Марк 6:31, 45, 46). Оныҥ учун улус тургалакта, ол таҥ-эрте туруп, мӱргӱйтен (Марк 1:35). Бир катап јаан учурлу алтам эдердеҥ озо ол тӱниле мӱргӱген (Лука 6:12, 13). Анайда ок Иисус јердеги јӱрӱминиҥ коркышту кӱч, је сӱреен јаан учурлу ӧйин ӧдӱп чыгарга, божоор алдында тӱнде, кӧп катап мӱргӱген (Матф. 26:39, 42, 44).

5. Иисустаҥ бис неге ӱренедис?

⁵ Иисустаҥ бис, ижис-тожыс кандый да кӧп болзо, мӱргӱӱрге ӧй таап турар керек деп ӱренип јадыс. Мӱргӱӱрин ундыбаска бис оны графигиске темдектеп алар аргалу. Темдектезе, биске Иисус ла чылап эрте турарга ол эмезе бир эмеш орой јадып уйуктаарга келижер болор. Је мынайып Иеговага бу аҥылу сыйды баалап турганысты кӧргӱзерис. Мӱргӱӱл — сӱреен баалу сый деп оҥдоп алган кийнинеҥ, Линн деп атту эјениҥ јӱреги томула берген. Оныҥ сӧстӧри: «Качан мен Иеговала кандый ла ӧйдӧ куучындажар аргалу деп оҥдоп ийеримде, Иегова мениҥ јуук најым болуп калган. Мынаҥ улам мен ого сезимдеримди чыгара айдып, мӱргӱӱлдеримди јарандырып баштагам». Бис те мынайып кӱӱнзеп турган эмейис. Оныҥ учун мӱргӱӱл јанынаҥ јаан учурлу беш јӧпти кӧрӱп ийектер.

6. Ачылта 4:10, 11-ле болзо, Иегова нени аларга јарамык?

⁶ Иегованы мактагар. Апостол Павел кижиниҥ куйка-бажы јымыраар кайкамчылу кӧрӱлте кӧрди. Теҥериде 24 аксагал Иегованы мактап турдылар. Олор Иегованы: «Макты, кӱндӱни... аларга јарамык» — деп айдышкан.  (Ачылта 4:10, 11 кычырыгар.) Чындык ангелдерде де Иегованы мактайтан база кӧп шылтактар бар. Олор јаантайын Иегованыҥ јанында болот, оныҥ учун оны јакшы билер. Олор Иегованыҥ эдип турган керектерин ӱзе кӧрӱп јат. Мынаҥ улам оны јаантайын мактагылайт (Иов 38:4—7).

7. Бис Иегованы нениҥ учун мактаар аргалу?

⁷ Бис база мӱргӱӱлдеристе Иегованы мактаар аргалу. Темдектезе, Иегованы нениҥ учун сӱӱп турганысты ла бисти оныҥ кандый кылык-јаҥдары кайкадып турганын айдар аргалу. Агару Бичикти кычырып, ӱренип јаткан тушта, Иегованыҥ анчада ла слерге јарап турган кылык-јаҥдарын кӧрӧргӧ албаданып туругар (Иов 37:23; Рим. 11:33). А оноҥ Иеговага бойоордыҥ сезимдереерди куучындагар. Анайда ок Иегованы биске ле ака-эјелерге болужып турганы учун мактаарга јараар. Нениҥ учун дезе ол бисти качан да артыргыспай јат ла кичееп јат (1 Сам. 1:27; 2:1, 2).

8. Бис Иеговага нениҥ учун быйанду? (1 Фессалоникадагыларга 5:18).

⁸ Иеговага быйанду болыгар. Бисте Иеговага быйанду болотон шылтактар сӱреен кӧп. (1 Фессалоникадагыларга 5:18 кычырыгар.) Оныҥ учун бисте бар сыйлар учун Иеговага быйанысты айдып турактар. Нениҥ учун дезе биске бу сыйларды ӱзе Иегова берген (Иак. 1:17). Темдектезе, бис ого сӱреен јараш јерис учун ла ӧскӧ дӧ кайкамчылу јайаандар учун быйанысты айдар аргалу. Анайда ок јӱрӱмис, билегис, најыларыс ла ижемјибис учун быйанды айдарга јараар. Је эҥ баалу сыйы дезе, Иегова биске оныҥ јуук најылары болотон арга берген.

9. Иеговага быйанысты кӧргӱзип турарга нениҥ учун албаданар керек?

⁹ А мен Иеговага нениҥ учун быйанду? Је мынайып шӱӱп сананарга јеҥил эмес болот. Нениҥ учун дезе телекейде улус јӱк ле нени аларын сананып јӱрет. Олор бар немелери учун быйанын айдарга сананбай да јат. Бистиҥ кӧрӱмис андый болуп калза, мӱргӱӱлдеристе јӱк ле суранчыктап божобозыс. Калак, мындый кӧрӱмди алынбактар. Карын оныҥ ордына Иеговага оноҥ ло ары быйанду болуп, оныҥ биске берип турган ончо сыйлары учун быйанысты айдып турактар (Лука 6:45).

10. Бир эјеге Иеговага быйанду болгоны ченелтени ӧдӧргӧ канайып болушкан? (Јурукты база кӧрӱгер.)

¹⁰ Быйанзак кижиге кӱчтерди ӧдӧргӧ јеҥил болот. Кюнг-Сук эјениҥ темин кӧрӱп ийектер b. Бу эјениҥ ӧкпӧзинде  там ла јаанап бараткан рак деп оору табылган. Ол айдат: «Мен бу оору керегинде угала, ал-санаага тӱшкем. Ӱзе немени јылыйтып салгам деп санангам, мен тыҥ коркый бергем». Бу ченелтени чыдажарга ого не болушкан? Ол кажы ла кӱн уйуктаар алдында, туразыныҥ ӱстиндӧӧн чыгып, ӧткӧн кӱнниҥ беш алкыжы учун Иеговага ӱнденип, быйанын айдып туратан. Мынаҥ улам ол јӱрегинде амыр сезип, Иегованы тыҥ сӱӱп турган деп айдар кӱӱни келетен. Иегова кӱчтердиҥ ӧйинде чындык ишчилерине болужып турган деп, ол бойыныҥ кӧзиле кӧргӧн. Анайып, јӱрӱмисте алкыштар кӱчтердеҥ кӧп деп, Кюнг-Сук эје аайлап ийген. Бистиҥ кӱчтерис узак ӧтпӧй турза, бу эједе чилеп бисте Иеговага быйанду болотон кӧп шылтактар бар. Мӱргӱӱлдеристе Иеговага быйанысты айдып турзаас, кӱчтерде турумкай артып, амырысты ла сӱӱнчибисти јылыйтпазыс.

11. Иисустыҥ ӱренчиктерине нениҥ учун јалтанбас болор керек болгон?

¹¹ Јалтанбай јарлаарга, Иегованаҥ болуш сурагар. Иисус теҥери барар алдында ӱренчиктерине олор «Иерусалимде, Иудей ле Самар ичинде, јердиҥ јаказына да јетире» јарлаар учурлу деп эске алындырган (Ап. ижи 1:8; Лука 24:46—48). Мыныҥ кийнинде удабай ла иудей јаҥныҥ башчылары апостол Пётрды ла Иоаннды тудала, Синедрионго экелип, база јарлабазын деп некеп кезетлеген (Ап. ижи 4:18, 21). Пётр ла Иоанн нени этти?

12. Апостолдордыҥ ижи 4:29, 31-ле болзо, ӱренчиктер нени эткен?

¹² Пётр ла Иоанн мынайып айтты: «Шӱӱп кӧрзӧгӧр, слерди Кудайдаҥ артык укса, Кудайдыҥ алдында чын болор бо? Нени кӧргӧнисти ле нени укканысты айтпас аргабыс јок» (Ап. ижи 4:19, 20). Бу эки апостолды божодып ийерде, ӱренчиктер Иегованаҥ оныҥ кӱӱн-табын бӱдӱрерге болуш сураган. Олор мынайда мӱргӱген: «Бойыҥныҥ кулдарыҥа сӧзиҥди јалтанбай айдарга болушсаҥ». Олордыҥ акту јӱрегинеҥ мӱргӱгени каруу јок артпады. (Апостолдордыҥ ижи 4:29, 31, ЈТ кычырыгар.)

13. Джин Хёк аканыҥ теми бисти неге ӱредет?

¹³ Бис Иисустыҥ ӱренчиктери ле чилеп, јарлаар иш токтодуда да болзо, оноҥ ло ары јалтанбай јарлаар аргалу. Джин Хёк деп аканыҥ темин кӧрӱп ийектер. Оны нейтралитет учун тӱрмеге отургызып салган. Ондо ого одиночный камераларда отурган улуска курсак јетиретен иш берилген. Је акага бу улусла кожо јӱзӱн-јӱӱр темаларга, ол тоодо Агару Бичик керегинде, куучындажарга јарабас болгон. Оныҥ учун бистиҥ ака чындык керегинде куучындап ийетен арга ла боло берзе, ајарыҥкай ла јалтанбас болорго, Иегованаҥ болуш сурап туратан (Ап. ижи 5:29). Джин Хёк ака куучындайт: «Иегова меге јалтанбас та, ойгор до болорго болушкан. Анайып мен чике ле камераныҥ эжигинде, Агару Бичикле беш минуттыҥ туркунына ӱредӱлер ӧткӱргем. Анайда ок эҥирлер сайын самаралар бичип туратам. Оноҥ бу самараларды отурган улуска эртезинде араайынаҥ берип ийетем». Бистер де бу ака чылап Иегованаҥ јалтанбас ла ойгор болорго болуш сурап турзаас, ол биске оныҥ  јакылтазын бӱдӱрерге болужар деп, бир де алаҥзыбас аргалу.

14. Кӱчтерди ӧдӧргӧ биске не болужар? (Сарын 37:3, 5).

¹⁴ Кӱчтерди ӧдӧргӧ, Иегованаҥ болуш сурагар. Бистиҥ кӧп сабагыс эмоциональный ла физический јанынаҥ ооруп јат, јууктарын јылыйтат, эмезе истежӱлерге табартат ла оноҥ до ӧскӧ кӱчтерге туштайт. Мыныҥ ӱстине ар-бӱткенниҥ тӱбеги, пандемия ла јуу-чак болзо, бу кӱчтерди ӧдӧргӧ оноҥ кӱч боло берет. Мындый айалгаларда санааркаардыҥ эмезе бойоорго иженердиҥ ордына, карын Иеговага, јуук најыгарга чылап, сезимдереерди ачыгынча куучындагар. Бир де алаҥзыбагар: Иегова слерге болужар. (Сарын 37:3, 5 кычырыгар.)

15. Ачу-корондо турумкай артарга, мӱргӱӱл канайып болужат? Тем куучындап беригер.

¹⁵ Бис Иеговага јаантайын мӱргӱп турзаас, ол биске «ачу-корондо чыдамкай бол[орго]» болужар (Рим. 12:12). Иегова ишчилериниҥ кӱчтерин билер. Агару Бичикте айдылганыла, Иегова олордыҥ «болуш сураган кыйгызын угат» (Сар. 145:18, 19). Бу сӧстӧр чын деп, 29 јашту Кристи сыйын бӱдӱмјиленген. Оныҥ су-кадыгы кенетийин уйадай берерде, ол коркышту тыҥ депрессияга кирген. Бого ло коштой оныҥ энези ӧлӱмге экелгедий оорула оорый берген. Кристи айдат: «Мен кажы ла эртен тура Кудайды јайнап, бӱгӱнги кӱнге ийде-кӱч берзин деп сурап туратам. Анайда ок меге кӧгӱс график сӱреен болушкан: јуунныҥ туштажуларына барып туратам ла Агару Бичикти таҥынаҥ ӱренип туратам». Ол оноҥ ары куучындайт: «Мӱргӱӱлдер кызалаҥду ӧйимде колымды бош салбаска болушкан. Иегова јаантайын мениҥ јанымда деп билгем. Су-кадыгым тӱрген оҥдоло бербеген де болзо, Иегова мениҥ мӱргӱӱлдеримге  каруу берип, кӧп санааркабаска болушкан ла јӱрегиме амыр берген». Качан да ундыбактар: Иегова «беринген [чындык] улусты канайып ченелтедеҥ айрыйтанын» билер (2 Пётр 2:9).

16. Ченелтеге тӱжӱп калбаска, биске нениҥ учун Иегованаҥ болуш сураар керек?

¹⁶ Ченелтеге тӱжӱп калбаска, Иегованаҥ болуш сурагар. Бис толо кемдӱ эмезис, оныҥ учун Иегованы сӱӱндиретен керектер эдерге кӱнӱҥ сайын тартыжып јадыс. Сатана бисти бу тартыжуда јеҥдиртип алзын деп, јӱзӱн-јӱӱр јепселдер тузаланат. Темдектезе, бистиҥ санаабысты ӱрейтен јепсел — балыр, кирлӱ немелер кӧрӧри ле угары. Андый немелер кӧрӱп турзаас, бистиҥ санаабыс киртип калардаҥ айабас. А киртип калган кийнинде, бистиҥ јӱрегис быјарсып калар ла уур кинчек эдип салардаҥ айабазыс (Марк 7:21—23; Иак. 1:14, 15).

17. «Ченелтени ӧдӧргӧ болуш» деген сӧстӧр аайынча канайып јӱрерис? (Јурукты база кӧрӱгер.)

¹⁷ Ченелтелерге кирип калбаска, биске Иегованыҥ болужы керек. Иисус бойыныҥ кӧргӱзӱ мӱргӱӱлинде мындый сӧстӧр айткан: «Ченелтени ӧдӧргӧ болуш, Дьяволдоҥ бисти корула» (Матф. 6:13, ЈТ). Иегова дезе болужарга јаантайын белен, је биске бойыстыҥ јаныстаҥ Иегованаҥ болуш сурап, мӱргӱӱлдерис аайынча эдер керек. Санаабысты бу телекейдиҥ јастыра кӧрӱминеҥ корулаарга, тыҥ албаданар керек (Сар. 97:10). Је мыны канайып эдер? Агару Бичикти кычырып, ӱренип јада, санаабысты јакшы ла тузалу шӱӱлтелерле толтырып турзаас, анайда ок јуунныҥ туштажуларына ла јарлаар ишке туружып турзаас корулайдыс. Иегова дезе биске ӧдӱп болбойтон ченелтени качан да болдыртпас деп сӧзин берет (1 Кор. 10:12, 13).

18. Бистиҥ ончобыска нени эдер керек?

¹⁸ Биске бу калганчы кӱч ӧйлӧрдӧ, Иеговага чындык артарга, алдындагызына кӧрӧ, оноҥ кӧп мӱргӱӱр керек. Кажы ла кӱн акту јӱректеҥ мӱргӱӱрге, ӧй табып туругар. Иегова бисти јӱрегисте не барын чыгара айдып турзын деп кӱӱнзеп јат (Сар. 62:8). Иегованы мактап туругар ла оныҥ ончо эдип турган керектери учун быйаныгарды айдып туругар. Анайда ок јарлаар ишке јалтанбай туружарга, Иегованаҥ болуш сурагар. Бого коштой ченелтелерге тӱшпеске ле уур-кӱчтерди ӧдӧргӧ, база болуш сурагар. Иеговага јаантайын мӱргӱп турарга биске кем де, не де чаптыгын јетирбезин. Је Иегова мӱргӱӱлдерге карууны канайып берет? Бу јаан учурлу суракты келер јӧрмӧлдӧ шӱӱжип ийерис.