1. Бистиҥ кезигиске нени эдерге кӱч болот?

 СЛЕРДЕ кӧгӱс амадугарга b јединип болбогон учурал болгон бо? Мындый неме кӧп ака-эјелерде болот. Темдектезе, Фи́лип ака кӧптӧдӧ лӧ узада мӱргӱӱр амаду тургускан, је ӧй чек таппай туратан. А Э́рика эједе дезе, јарлаар иштиҥ туштажуларына оройтыбай баратан амаду болгон. Је ол тӱҥей ле оройтып калатан. То́маш ака Агару Бичикти бӱдӱнге кычырарга кӱӱнзеген. Ол айдат: «Меге бу бичикти кычырарга јарабай туратан. Андый да болзо, ӱч катап албадангам, је Левитке ле једип келзем, кӱӱним ӧчӧ беретен».

2. Кӧгӱс амадугарга јединип болбой турган болзогор, нениҥ учун чӧкӧбӧс керек?

² Кӧгӱс амадугарга јединип болбой турган болзогор, бир де чӧкӧбӧгӧр. Нениҥ учун дезе кичинек те амадуга јединерге, ӧй лӧ ийде-кӱч керек. Анайып карын да Иеговала колбулараарды баалап турганаар ла ого эҥ артыгын берерге турганаар кӧрӱнер. Ол слердиҥ албаданганаарды сӱреен баалап јат. Оныҥ учун јединип болгодый амадулар тургузыгар. Кудайыс бистеҥ эдип болбогодый неме сакыбай јат (Сар. 103:14; Мих. 6:8). Андый амаду слерде бар болзо, ого јединерге не болужар? Кезик јӧптӧр кӧрӱп ийектер.

3. Амадуга једер кӱӱнди нениҥ учун тыҥыдар керек?

³ Кӧгӱс амадубыска јединерге тыҥ кӱӱнзеер керек. Анайып, амадубыска јединерге бастыра ийде-кӱчисти саларыс. Јорукчы кижи парусту кемеле једетен јерине салкынныҥ болужыла јакшы једип барат. А салкын тыҥ согуп турза, оноҥ тӱрген једип барат. Сальвадордо јадып турган Давид ака мынайып куучындаган: «Кижи нени-нени эдерге тыҥ кӱӱнзезе, оны эдерге тыҥ албаданып јат. Андый кижиге не де чаптыгын јетирип болбос». Айдарда, амадубыс бӱтсин деп тыҥ кӱӱнзеерге нени эдер керек?

4. Бис не керегинде мӱргӱӱр аргалу? (Филиппыдагыларга 2:13). (Јурукты база кӧрӱгер.)

⁴ Амадуга једер кӱӱнеерди тыҥыдарга, Иегованаҥ болуш сурагар. Мындый кӱӱнди Иегова агару тыны ажыра тыҥыдар аргалу. (Филиппыдагыларга 2:13 кычырыгар.) Кезикте бис амадулар тургузар керек деп оҥдоп јадыс. Бу јакшы кӧрӱм-санаа. Је амадуга јединерге тыҥ кӱӱнзебей турзаас, канайдарыс? Андый учурал Нори́на эједе болгон. Ол Уганда деп ороондо јадат. Бу эједе Агару Бичикле ӱредӱ ӧткӱрер амаду болгон. Је ол оны тыҥ кӱӱнзебеген, нениҥ учун дезе бойын уйан ӱредӱчи деп сананган. Ого не болушты? Нори́на эје куучындайт: «Мен кажы ла кӱн Иеговага мӱргӱп, андый кӱӱнимди тыҥытсын деп сурагам. Анайда ок ӱредӱ ӧткӱрер темигӱлеримди тыҥыдарга бойым да албадангам. Анайып, тоолу айдаҥ ӱредӱ ӧткӱрер кӱӱним тыҥый берген. Бир јылдаҥ ас ӧйдӧҥ эки кижиле ӱредӱ баштагам».

5. Кӧгӱс амадуга јединетен кӱӱнисти тыҥыдарга, бис нени шӱӱп сананар аргалу?

⁵ Иегованыҥ слерге нени эдип турганын сананып туругар (Сар. 143:5). Апостол Павел Иегованыҥ ого берген алкыштарын сананып јӱрген, оныҥ учун ого кӧптӧдӧ иштеген (1 Кор. 15:9, 10; 1 Тим. 1:12—14). Бис те Иегованыҥ болужын канча ла кире кӧп сананып турзаас, амадуларыска јединерге ончо ло кире тыҥ кӱӱнзеп турарыс (Сар. 116:12). Гондураста јадып турган бир эје текши пионер болорго тыҥ кӱӱнзеген. Ол мынайда куучындаган: «Иегова мени тыҥ сӱӱп турган деп кӧп сананып туратам. Ол мени бойыныҥ билезине кожуп алган. Иегова мени корулап, кичееп јат. Мынаҥ улам ого сӱӱжим де, текши пионер болор кӱӱним де тыҥыган».

6. Амадуга јединер кӱӱнисти база не тыҥыдар?

⁶ Амадугардыҥ тузазын сананып туругар. Ӧрӧги айдылган Эрикага не болушканын ајаруга алып ийигер. Ол куучындайт: «Јарлаар иштиҥ  туштажуларына оройтып турала, кӧп немени божодып турганымды оҥдоп ийгем. Туштажуларга эрте келзем, ака-эјелерле куучындажып алар эдим, анайда ок оноҥ јакшы јарлаарга ла јарлаар иштеҥ оноҥ кӧп сӱӱнчи аларга болужатан шӱӱлтелер угар эдим». Анайып, Эрика туштажуга оройтыбай келериниҥ тузазын кӧрӱп, амадузына јединген. А слер амадугарга јединзеер, кандый туза алараар? Слер Агару Бичикти јазап кычырарга ла кӧптӧдӧ мӱргӱӱрге амадап турган болзогор, Иеговага оноҥ јуук болороор (Сар. 145:18, 19). Ол эмезе кандый бир христиан кылык-јаҥыгарды тыҥыдарга турган болзоор, ака-эјелерге јуук болороор (Кол. 3:14). Оныҥ учун амадулараардыҥ тузазын бичип алала, оны јаантайын ла кӧрӱп турзаар кайдар? Ӧрӧги айдылган Томаш ака мынайда айткан: «Амадуларымныҥ тузазын канча ла кире кӧп сананып турзам, амадуларымга јединерге ончо ло кире тыҥ албаданып јадым».

7. Хулио ло оныҥ ӱйине амадузына јединерге не болушкан?

⁷ Амадулараарга јединерге болужатан улусла кожо болуп туругар (Укаа 13:20). Ху́лио ло оныҥ ӱйиниҥ темин кӧрӱп ийектер. Олор јарлаар иште кӧптӧдӧ туружарга кӱӱнзегендер. Бу амадузына јединерге олорго не болушкан? Ака эске алат: «Бис амадубыска јединерге болужатан ака-эјелерле најылашканыс. Олордыҥ кӧбизи бисте ле ошкош амадуларына јединип алган. Оныҥ учун биске тузалу јӧптӧр айдып беретен. Анайда ок олор једимдеристи угуп-эштеп, кӱӱнисти кӧдӱрген».

8. Амадуга јединерге кӱӱнис келбей турза, не болуп калардаҥ айабас? (Јурукты база кӧрӱгер.)

⁸ Кезикте бистиҥ амадуга јединетен кӱӱнис ӧчӧ берет. Мынаҥ улам амадубыска јединип болбозыс па? Јок, андый эмес. Байагы темди ойто кӧрӱп ийектер. Талайда салкын тыҥ согуп турза, парусту кеме тӱрген јӱзӱп барадар. Је кезикте салкын јок тымык болот. Мындый айалгада јорыкчы једетен јерине канайып једер? Кезик кемелерде мотор ло кайык бар. Олордыҥ болужыла ол јол-јорыгын улалтар аргалу. Амадуга једер кӱӱнис кезикте тыҥ болот, а кезикте оны ајаруга албай барадыс. Кӱӱнеер јок ло дейле отурзаар, амадугарга оной ло јетпезигер. Јорыкчы кижи салкын јок то болзо, талайла оноҥ ло ары јӱзӱп барарга, ӧскӧ аргалар тузаланат. Бу јеҥил эмес болордоҥ айабас, је амадулараарга јединип алзагар, јаан сӱӱнчи алараар. Айдарда, амадубыска јединер кӱӱнис келбей турза, нени эдерге јараар? Бу  сурактыҥ каруузын алардаҥ озо, ӧскӧ суракты шӱӱжип ийектер.

9. Кӧгӱс амадуларга јединерге, бойысты албадаар керек пе? Јартап беригер.

⁹ Иегова бисти ого сӱӱнчилӱ ле акту јӱректеҥ иштезин деп кӱӱнзеп јат (Сар. 100:2; 2 Кор. 9:7). Амадубыска јединер кӱӱнис келбей турза, нени де этпей отурарыс па? Апостол Павел мынайып айткан: «Эди-канымды согуп, оны бойыма кул эдип јадым» (1 Кор. 9:25—27). Бу сӧстӧрлӧ болзо, Павелге јакшыны эдерге јеҥил эмес те болгон болзо, ол бастыра ийде-кӱчинеҥ албаданган. Иегова оныҥ эткен ижин јараткан ба? Эйе! Ол оны албаданганы учун кайрал јок артыргыспаган (2 Тим. 4:7, 8).

10. Амадубыска јединер кӱӱнис келбей де турза, нениҥ учун албаданар керек?

¹⁰ Павелдиҥ темиле болзо, кӱӱнис јок то болзо, амадубыска јединерге албаданып турзаас, Иегова сӱӱнип јат. Бисти бого эдип турган ижисти сӱӱгенис эмес, је оны сӱӱп турганыс кӱӱнзедип турза, ого јарап јат. Канайып Иегова Павелди алкыш јок артыргыспаган, анайып ла биске де алкыжын берер (Сар. 126:5). Мынаҥ бистиҥ кӱӱнис кӧдӱрилер. Польшада јадып турган Люци́на деп эје мынайда куучындаган: «Кезикте арып калзам, јарлаар ишке барар кӱӱним келбей јат. Андый да болзо, јарлап барып келзем, сӱреен јаан сӱӱнчи аладым». Је эмди дезе, амадубыска јединер кӱӱнис келбей турза, нени эдер керек деген суракты јартажып ийектер.

11. Биске бойысты тудунып ӱренип аларга, Иегова канайып болужар аргалу?

¹¹ Бойыгарды тудунып турарга, Иегованаҥ болуш сурагар. Бойын тудунары — бойыныҥ санааларын ла керектерин тудуп билери. Бу сӧс кӧп учуралдарда кижи бойын јаман неме этпеске албаданып турганын кӧргӱзет. Је бойын тудунары јакшы керектер эдерге база керек болуп јат, анчада ла биске јеҥил эмес болзо эмезе бис оны эдер кӱӱнис јок болзо. Бойын тудунары — агару тынныҥ тӱжӱми. Оныҥ учун бу јакшы кылык-јаҥды ӧскӱрерге, Иегованаҥ агару тын сурагар (Лука 11:13; Гал. 5:22, 23). Ӧрӧги айдылган Давид мӱргӱӱл ого канайып болушканын јартап јат. Ол Агару Бичикти јаантайын таҥынаҥ ӱренерге кӱӱнзеген. Бу амадуга јединерге ол нени эткен? «Мен Иегованаҥ бойымды тудунып ӱренип аларга болуш сурагам. Иегова меге болушкан. Эмди мен таҥынаҥ ӱренерин улам сайын эдедим. Меге анайып ӱренери сӱреен јарайт».

12. Экклезиаст 11:4-тӧги принцип амадуга јединерге канайып болужар?

¹² Сӱреен јакшы айалга сакыбагар. Нениҥ учун дезе јӱрӱмде андый болбой јат. Сӱреен јакшы айалга сакызаас, тургускан амадубыска качан да јетпезис. (Экклезиаст 11:4 кычырыгар.) Дэ́ниел ака мынайда куучындаган: «Айалга сӱреен јакшы болор деп сакыбас керек. Кижи андый айалганы бойы эдип јат». А Угандада јадып турган Пол деп аканыҥ айтканыла болзо, јӱрӱмде кӱчтер де болуп турза, айалга јакшы боло берер деп сакыбай, карын амадубыска јединерге албаданып турзаас, Иегова алкыжын берер (Мал. 3:10).

13. Нениҥ учун кичинек амадулардаҥ баштаар керек?

¹³ Бир эмештеҥ баштагар. Тургузып  алган амадубыс кӱч деп билдирип турза, кӱӱнис ӧчӧ берердеҥ айабас. Слердиҥ амадугар андый болзо, оны кичинек бӧлӱктерге не бӧлӱп албас? Кандый бир кылык-јаҥыгарды тыҥыдарга турган болзоор, оны бир кичинектеҥ тыҥытса кайдар? Ол эмезе Агару Бичикти бӱдӱнге кычырарга турган болзогор, оны бир кичинектеҥ кычырып баштазаар кайдар? Ӧрӧги айдылган Томаш Агару Бичикти бир јылга кычырып болбогон. Ол айдат: «Мен ӧткӱре тӱрген кычырган эмтирим. Оныҥ учун ойто кычырып баштайла, тоолу ла абзацтарды кычырып, шӱӱп сананып туратам. Анайып меге Агару Бичикти кычырарга јарай берген». Мынаҥ улам Томаш кычырар ӧйин бир эмештеҥ кӧптӧдип баштайла, Агару Бичикти тӱгезе кычырып салган c.

14. Амадуларга јединерге чаптыгын јетирип турган кандый кӱчтер бар?

¹⁴ Бис канча ла кире албаданзаас, канча да кире кӱӱнзезеес, кезикте амадуларыска јединерге келишпей јат. Темдектезе, сакыбаган айалганаҥ улам бисте амадубыска јединерге ӧй јок боло берердеҥ айабас (Эккл. 9:11). Ол эмезе кандый бир кӱчке туштап, кӱӱнис ӧчӱп, ийде-кӱчис ас болот (Укаа 24:10). Анайда ок толо кемдӱ эмезистеҥ улам кезикте јастыралар эдип јадыс. Бу јастыралар амадубыска јединерге чаптыгын јетирет (Рим. 7:23). А кезикте бис тыҥ арып калган болодыс (Матф. 26:43). Биске бу кӱчтерди ӧдӱп чыгарга не болужар?

15. Амадугар бӱтпезе, нениҥ учун чӧкӧбӧс керек? Јартап беригер (Сарын 145:14).

¹⁵ Амадугарга јединерге келишпеген болзо, чӧкӧбӧгӧр. Агару Бичикте бисте кӱчтер болбос деп айдылбаган. Карын  андый ӧйдӧ Иегова биске болужар деп бӱдӱмјилейт. (Сарын 145:14 кычырыгар.) Ӧрӧги айдылган Филип бойыныҥ једимдери керегинде мынайда айдат: «Мениҥ једимдерим канча катап јыгылганымнаҥ эмес, је канча катап туруп келгенимнеҥ камаанду». А Давид дезе мынайда айткан: «Кӱчтерди амадуларга чаптык эдетен буудак эмес, карын Иеговага сӱӱжимди кӧргӱзетен арга деп кӧрӧдим». Чын ла, кӱчтердиҥ ӧйинде колоорды бош салбай, амадуга јединерге албаданып турзаар, Иегованы сӱӱндирерге турганаарды кӧргӱзедеер. А Иегова слердиҥ чӧкӧбӧй турганаарды кӧрӱп, тыҥ сӱӱнип јат!

16. Амадуга јединбегенеердеҥ слер неге ӱренер аргалу?

¹⁶ Амадугарга јединип болбогоноордоҥ ӱредӱ алыгар. Бойоордоҥ мынайып сурагар: «Нениҥ учун мен амадуумга јединип болбогом? Кийнинде андый неме болбозын деп, мен нени эдер эдим?» (Укаа 27:12). Бис бойыска јединип болбойтон амаду тургузып турган болорыс па? Јазап шӱӱп сананып ийзегер, бу амаду слерге келижип турган ба деп оҥдоп ийеригер d. Је слер амадугарга јединип болбозоор до, Иегова слерди качан да јектебес (2 Кор. 8:12).

17. Нениҥ учун једимдеристи ундыбай турар керек?

¹⁷ Једимдереерди ундыбагар. Агару Бичикте мынайда айдылган: «Кудай чындык, ол... эдип турган ижигерди... ундыбас» (Евр. 6:10, ЈТ). Оныҥ да учун христиан јолдо јеткен једимдеристи биске де ундыбай турар керек. Темдектезе, слер Иегованыҥ најызы болуп калганаар, ол керегинде куучындап баштаганаар ол эмезе сууга чӧҥӱрилгенеер. Канайып алдында да амадулар тургузып, ого једингенеер, эмди де оноҥ ло ары анайда эдигер (Флп. 3:16).

18. Амадубыска јединерге албаданып турзаас, нени ундыбас керек? (Јурукты база кӧрӱгер.)

¹⁸ Канайып јорукчы једетен јерине јакшы једип барат, анайып ла слер Иегованыҥ болужыла кӧгӱс амадулараарга јединер аргалу. Је ундыбагар: јорукчы једетен јерине једип барадала, солун јерлер ајыктап јат. Анайда ла слер амадугарга јӱткӱген тужыгарда, Иегованыҥ слерге канайып болушканын ла алкаганын кӧрӱп туругар. Бу слерге јаан сӱӱнчи экелер (2 Кор. 4:7). Слер чӧкӧбӧзигер, Иегова слерге арбынду алкыштар берер (Гал. 6:9).