1. Бис Иеговага нениҥ учун багынар учурлу?

БИС Иегова Кудайга багынар * учурлу, нениҥ учун дезе ол бистиҥ Јайаачыбыс. Ол Јайаачы болордо, ондо бойыныҥ јайаандарына кандый бир нормалар тургузатан јаҥ бар (Ачыл. 4:11). Је бисте оныҥ сӧзин угатан ӧскӧ дӧ јаан шылтак бар — ол эҥ ле јакшы башкараачы. Кижиликтиҥ тӱӱкизинде кандый башкараачы болбоды дееригер. Је олордыҥ кемизи де Иегованыҥ ойгорына, сӱӱжине, буурзагына ла килемкейине јуук та турбас (Чыг. 34:6; Рим. 16:27; 1 Иоанн 4:8).

2. Еврейлерге 12:9—11-ле болзо, бис Иеговага нениҥ учун багынар учурлу?

² Иегова бисти ого коркып турганыстаҥ улам эмес, је оны сӱӱп, Адабыс деп бодоп турганыстаҥ улам багынзын деп кӱӱнзеп јат. Элчи Павел Еврейлерге бичиген самарада, бис «Адабыска оноҥ артык багар учурлу» деп јартап јат, нениҥ учун дезе Кудайдыҥ ӱредӱзи бистиҥ бойыска ла тузалу болот. (Еврейлерге 12:9—11 кычырыгар.)

3. а) Бис Иеговага багынып турганысты канайып кӧргӱзер аргалу? б) Бис кандый сурактар кӧрӧрис?

³ Бис Иеговага багынып турганысты канайып кӧргӱзерис? Биске Кудайдыҥ кажы ла сӧзин угарга бастыра кӱчистеҥ албаданар керек ле ӱзе ле немени бойыстыҥ санаасла эдетен кӱӱнле тартыжар керек (Укаа 3:5). Бис Иегованыҥ кылык-јаҥын јакшы билип алзаас, биске ого багынарга јеҥил болор. Нениҥ учун дезе Кудайдыҥ эткен керектеринеҥ  оныҥ сӱреен јакшы кылык-јаҥдары кӧрӱнет (Сар. 145:9). Бис Иеговала канча ла кире јуук танышсаас, оны ончо ло кире тыҥ сӱӱп јадыс. Анайып, оныҥ сӧзин угарга, биске кӧп ээжилер де керек јок болот. Бистиҥ сезимдерис ле санааларыс Кудайдыҥ јакшыныҥ ла јаманныҥ нормаларына келижип турзын деп ӱренедис (Сар. 97:10). Је кезикте биске Иеговага багынарга кӱч болуп јат. Нениҥ учун андый болот? Аксагалдар, адалар ла энелер Неемия башкараачынаҥ, Давид кааннаҥ ла Иисустыҥ Мария энезинеҥ неге ӱренер аргалу? Бу сурактарды шӱӱжип ийектер.

4, 5. Римдегилерге 7:21—23-ле болзо, биске Иеговага багынарга кезикте нениҥ учун кӱч болот?

⁴ Биске Иеговага багынарга кезикте нениҥ учун кӱч болот? Шылтактардыҥ бирӱзи — бис кинчекти энчиленип, толо кемдӱ эмес болуп калганыс. Мынаҥ улам бис ончобыс ӱзе ле немени бойыстыҥ санаасла эдерге кӱӱнзейдис. Адам ла Ева јарабас јиилекти јигениле, јаманныҥ ла јакшыныҥ нормаларын бойлоры тургузарга кӱӱнзеп, Кудайга удура барган (Баш. 3:22). Анайып, улус эмдигенче Иегованыҥ кӧрӱмин керекке албай, јакшыныҥ ла јаманныҥ нормаларын бойлоры тургузат.

⁵ Иегованыҥ айтканын ончозын бӱдӱрерге, оны билер ле сӱӱп турган улуска да кӱч болот. Мыны элчи Павелдиҥ теминеҥ кӧрӧдис. (Римдегилерге 7:21—23 кычырыгар.) Бис Павел ле чилеп Иегованы сӱӱндирерге кӱӱнзейдис. Је биске јастыра кӱӱнисле јаантайын ла тартыжарга келижет.

6, 7. Иеговага багынарга база кандый шылтактаҥ улам кӱч болордоҥ айабас? Тем куучындап беригер.

⁶ База бир шылтак — бистиҥ чыдаган культурабыс болот. Бу телекейдиҥ кӧрӱм-санаазыныҥ кезиги Иегованыҥ кӧрӱмине келишпей јат, оныҥ учун кандый бир кӧрӱмге кирип калбаска, биске јаантайын тартыжарга келижип турган болор. Бир тем кӧрӱп ийектер.

⁷ Кезик ороондордо јииттерди, јӱрӱмде эҥ ле учурлу неме — кӧп акча иштеери деп бӱдӱмјилеп салат. Мындый айалга Мэри * деген сыйында болгон. Чындыкты билердеҥ озо, ол орооныныҥ эҥ јакшы университеттериниҥ бирӱзинде ӱренген. Тӧрӧӧндӧри Мэрини акчалу ла јамылу ишке кирзин деп кӱӱнзедип туратан. Мэри бойы да анайып кӱӱнзеген. Је Иегованы билип, оны сӱӱп баштаарда, оныҥ амадулары солына берген. Андый да болзо, ол мынайып айдат: «Кезикте Иеговага иштеерине чаптык болгодый кӧп акча иштейтен аргалар табыла берет. Је меге ада-энемниҥ ӱреткениле, јок деп айдарга кӱч болот. Оныҥ учун јарлаар ишке чаптык болгодый ишке кирбейин деп, кажы ла катап Иегованы јайнап сурайдым» (Матф. 6:24).

8. Бис нени шӱӱп кӧрӧрис?

⁸ Иеговага багынганыс биске туза экелет. Је Кудайдаҥ јаҥ алган аксагалдарда ла ада-энелерде Кудайга багынатан база бир шылтак бар, нениҥ учун дезе олор улустыҥ јӱрӱми учун каруулу. Эмди Агару Бичиктеҥ, Кудайдаҥ берилген јаҥды чын тузаланарга болужатан тоолу темдер кӧрӱп ийектер.

9. Неемияда кандый кӱчтер болгон?

⁹ Иегова аксагалдарга бойыныҥ албатызын кичеейтен молју берген (1 Петр 5:2). Аксагалдар андый молјузын бӱдӱреринде  Неемияныҥ сӱреен јакшы теминеҥ ӱренер аргалу. Неемия Иуданыҥ јаан јамылу башчызы болгон (Неем. 1:11; 2:7, 8; 5:14). Темдектезе ондо мындый кӱчтер болгон: иудейлер ӧргӧӧни быјарсыдып туратан; албаты левиттерге акча-јӧӧжӧ јанынаҥ болужатан Јасакты бӱдӱрбей туратан; суббот кӱнди ӧткӱрбей туратан ла эр улус ӧскӧ укту ӱй улус алып туратан. Оныҥ учун Неемияга бу кӱч айалганыҥ аайына чыгар керек болгон (Неем. 13:4—30).

10. Неемия Иегованыҥ албатызына канайып баштанган?

¹⁰ Неемия Кудайдыҥ албатызына бойыныҥ ээжилерин тургузып, јаҥын јастыра тузаланбаган. Карын, Иегованаҥ акту јӱрегинеҥ болуш сурап, улусты Кудайдыҥ Јасагына ӱреткен (Неем. 1:4—10; 13:1—3). Анайда ок Неемия иудейлерле кожо ӧмӧ-јӧмӧ иштенип, керек дезе Иерусалимниҥ стенелерин јаҥыдаҥ тударга да болушкан (Неем. 4:15).

11. 1 Фессалоникадагыларга 2:7, 8-ле болзо, аксагалдар ака-эјелерге канайып баштанар учурлу?

¹¹ Бӱгӱнги кӱнде аксагалдар Неемияныҥ кӱчтериндий кӱчтерге туштабай турган да болзо, олор оныҥ теминеҥ кӧп немеге ӱренер аргалу. Темдектезе, олор ийде-кӱчин кысканбай, ака-эјелерге болужып јат. Улусты башкаратан јаҥ Кудайдаҥ берилген деп оҥдоп, бийиркенбейдилер ле јуундагы ончо улуска јалакай баштанадылар. (1 Фессалоникадагыларга 2:7, 8 кычырыгар.) Олордыҥ айткан сӧстӧринеҥ акту сӱӱжи ле јобожы кӧрӱнип јат. Кӧп јылдарга аксагал болуп турган Эндрю ака айдат: «Аксагалдыҥ јалакайы ла сӱӱжи ака-эјелердиҥ јӱрегин томултып, олорго јӧмӧжӧргӧ кӱӱнзедет». Ченемели јаан Тони деп аксагал мынайып айдат: «Филиппыдагыларга 2:3-те бичилген јӧпти бӱдӱрерге албаданганым, бойымды улустаҥ јабыс тударга болужат. Анайып, мен улусты бир иске бастырбай јадым».

12. Аксагалдар нениҥ учун јобош болор учурлу?

 ¹² Аксагалдар Иегованаҥ тем алып, јобош болор учурлу. Иегова Јер-телекейдиҥ Бийи де болзо, «јокту кижини тобрактаҥ» кӧдӱрерге, «бӧкӧйип јат» (Сар. 113:6, 7; 18:35). Оныҥ учун бийиркек ле улуркак улус Иеговага јескинчилӱ болот (Укаа 16:5).

13. Аксагалдарга нениҥ учун бойыныҥ тилин тудар керек?

¹³ Иеговага багынарга турган аксагалдарга бойыныҥ тилин тудуп турар керек. Оноҥ башка олорго ака эмезе эје тоомјылу баштанбаза, олор тудунып болбой, јастыра неме айдардаҥ айабас (Гал. 5:14, 15; Иак. 1:26). Ӧрӧги айдылган Эндрю ака мынайып куучындаган: «Кезикте, мениҥ кӧрӱмимле, меге тоомјылу баштанбаган аканы эмезе эјени јерине тургузып ийер кӱӱним келет. Је Агару Бичиктеги чындык ишчилердиҥ темдерин шӱӱп сананганым, меге јобош ло јымжак артарга болужат». Аксагалдар јуунныҥ улузыла, ол тоодо ӧскӧ аксагалдарла, јымжак ла јалакай куучындажып турганыла, Иеговага багынып турганын кӧргӱзет (Кол. 4:6).

14. Иегова адаларга кандый молју берген ле олор нени эдер учурлу?

¹⁴ Иегова адаларга билениҥ бажы болотон молју берген. Оныҥ учун адалар бойлорыныҥ балдарын ӱредип таскадар учурлу (1 Кор. 11:3; Еф. 6:4). Је ада кижиге, билениҥ бажы да болзо, Иегованыҥ алдында каруулу болгонын ундыбас керек. Нениҥ учун дезе Кудайдыҥ «ады-јолынаҥ... не ле ук-тӧс бойыныҥ ады-јолын алган» (Еф. 3:14, 15). Адалар Иеговага багынып турганын канайып кӧргӱзет? Олор бойыныҥ јаҥын Кудайды сӱӱндирерге тузаланып јат. Адалар Давид каанныҥ јӱрӱмин шӱӱп сананып, кӧп немеге ӱренер аргалу.

15. Давид каан нениҥ учун адаларга јакшы тем болот?

¹⁵ Иегова Давидти јӱк билениҥ бажы болуп эмес, је бӱдӱн Израиль албатыныҥ башчызы эдип тургускан. Давид каанныҥ јамызы сӱрекей јаан болгон. Кезикте ол бойыныҥ јаҥын јастыра тузаланып, јаан јастыралар эткен (2 Сам. 11:14, 15). Је Давид тӱзедӱлерди алынып туратаныла Иеговага багынып турганын кӧргӱскен. Ол Иеговага мӱргӱзе, сезимдерин ачыгынча айдып, бар-јок кӱчиле Иеговага јараар эдип јӱрерге албаданган (Сар. 51:1—4). Анайда ок јобош болуп, эр де, ӱй де улустыҥ ойгор сӧстӧрин угуп туратан (1 Сам. 19:11, 12; 25:32, 33). Давид бойыныҥ јастыраларынаҥ ӱренген. Ол Иеговага иштеерин баштапкы јерге тургускан.

16. Давид каанныҥ теминеҥ адалар неге ӱренер аргалу?

 ¹⁶ Давид каанныҥ теминеҥ адалар неге ӱренер аргалу? Оныҥ теминде мындый ӱредӱлер бар: Иегованыҥ берген јаҥын чын тузаланыгар. Анайда ок јастыралараарды алынып, слерди Агару Бичикке тайанып тӱзеткен улусты угуп туругар. Ол тушта билегер слердиҥ мынайып јобош болгоноорды кӧрӱп, слерди тооп турар. Иеговага билегерле кожо мӱргӱген тужыгарда, сезимдеригерди куучындап туругар, анайып јууктарыгар слерге Иегованыҥ болужы ла башкартузы керек болуп турганын кӧрӧр. Је эҥ учурлузы, олор слердиҥ Иеговага иштебей јӱрӱп болбозыгарды јарт кӧрӱп турар учурлу (Јаҥ. т. 6:6—9). Слердиҥ јакшы темигер — билегерге берип турган эҥ баалу сыйлараардыҥ бирӱзи болот.

17. Иегова энелерге кандый иш берип салган?

¹⁷ Иегова энелерге јаан кӱндӱ эдип, балдарды таскадарында туружатан каруулу иш берген (Укаа 6:20). Баланыҥ бастыра јӱрӱми энениҥ ӱреткенинеҥ камаанду болордоҥ айабас (Укаа 22:6). Эјелер, Иисустыҥ Мария энезинеҥ неге ӱренер аргалу?

18, 19. Энелер Марияныҥ теминеҥ неге ӱренер аргалу?

¹⁸ Мария Агару Бичикти сӱреен јакшы билген. Ол Иегованы акту јӱрегинеҥ тооп, оныла јуук колбуларлу болгон. Оныҥ бастыра јӱрӱми тыҥ солына беретен де болзо, Иегованыҥ табына багынарга белен болгон (Лука 1:35—38, 46—55).

¹⁹ Марияныҥ теминеҥ слер, эје-сыйындар, неге ӱренер аргалу? Баштапкызында, Иеговала јуук колбуларлу болыгар. Јуук колбуларлу болорго, Агару Бичикти таҥынаҥ шиҥдеп, јаантайын мӱргӱп туругар. Экинчизинде, Иегованы сӱӱндирерге, јӱрӱмигерди солыырга белен болыгар. Слер бойын тудунып болбой, балдарыла кату куучындажып турган биледе ӧскӧн болзогор, балдарга кыйгырарында јаман неме јок деп сананып турган болорыгар. Керек дезе балдарды таскадарына Иегованыҥ кӧрӱмин билип алган да болзоор, јобош ло чыдамкай артарга, анчада ла арып калган тужыгарда балдараар сӧс укпай турза, кӱч деп кӧрӱп турган болорыгар (Еф. 4:31). Мындый айалгада Иегованаҥ болуш сураар керек. Лидия эје мынайып куучындайт: «Кезикте уулым сӧзимди укпай турза, калјуурбай тудунарга, Иегованы јайнап јадым. Керек дезе айдып јатканымды токтодып ийеле, бойыма мӱргӱп ийедим. Нениҥ учун дезе мӱргӱӱл меге токынай берерге болужат» (Сар. 37:5).

20. Кезик энелерге нени эдерге кӱч болот, је бу кӱчти ӧдӧргӧ, нени эдер керек?

 ²⁰ Кезик энелерге дезе, балдарына сӱӱжин кӧргӱзерге кӱч болордоҥ айабас (Тит. 2:3, 4). Андый ӱй улус, ада-энелер ле балдар ортодо јуук колбулар болбогон биледе чыдаган болор. Слер де мындый биледе чыдаган болзогор, ада-энегердиҥ јастыраларын этпегер. Иегованыҥ табына багынып турган ӱй кижи балдарына сӱӱжин кӧргӱзерге ӱренип алар учурлу. Ого бойыныҥ санаазын, сезимдерин ле кылык-јаҥын солыырга кӱч келижип турган да болзо, је солынар арга бар! Анайып ол бойы да, оныҥ билези де јаан сӱӱнчи алар.

21, 22. Исаия 65:13, 14-лӧ болзо, Иеговага багынып турзаас, кандый туза аладыс?

²¹ Давид каан Иеговага багынары сӱрекей јаан сӱӱнчи экелип турганын билер болгон. Ол бичиген: «Иегованыҥ чындык јакарулары јӱректи сӱӱндирип јат. Иегованыҥ ару јакылталары кӧсти ачат. Олор чындык ишчиҥди корулайт, олорды тузаланган кижи улу кайрал алат» (Сар. 19:8, 11). Иеговага багынып турган улустыҥ ла оныҥ сӧзин укпай турган улустыҥ башказын јарт кӧрӱп јадыс. Ого багынып турган улус «сӱӱнип кыйгырар». (Исаия 65:13, 14 кычырыгар *.)

²² Аксагалдар, адалар ла энелер Иеговага акту јӱректеҥ багынып турганынаҥ туза алат, олордыҥ билезине сӱӱш ле сӱӱнчи келет, јуун дезе, бирлик болот. Је эҥ учурлузы — олор Иегованы сӱӱндирип јат (Укаа 27:11). Мынаҥ артык неме бар эмеш пе?