1. Баштапкы чактыҥ учында элчи Иоанн кандый айалгада болуп калган?

БИСТИҤ эраныҥ баштапкы чагыныҥ учында јажы јаанаган элчи Иоанн кӱч айалгада болуп калган. Ол Патмос деп ортолыкта ссылкада болгон, анайда ок јерде јӱрген элчилердиҥ калганчызы болгон болор (Ачыл. 1:9). Бу ӧйдӧ Кудайдаҥ јана баскан улустыҥ јуундарды аскыртып, христиандардыҥ ортозында бӧлӱништер эдип турганын Иоанн билер болгон. Анайып, христианствоныҥ јаҥду ла кӱйӱп јаткан оды удабас ла ӧчӧ берер деп билдирген болор (Иуда 4; Ачыл. 2:15, 20; 3:1, 17).

2. Ачылта 7:9—14-лӧ болзо, Иоанн кандый кӧрӱлте кӧргӧн? (Кадарындагы јурукты кӧрӱгер.)

² Бу мындый кӱч айалгада элчи Иоанн сӱрекей јилбилӱ кӧрӱлте кӧргӧн. Ондо ангелдер улу тӱбектиҥ тӧрт салкынын тудуп алган. Олор бу тӧрт салкынды, кулдар калганчы таҥманы албаганча тудуп јат (Ачыл. 7:1—3). Таҥмалаткан улус — Иисусла кожо теҥериде башкаратан 144 000 кижи (Лука 12:32; Ачыл. 7:4). Оноҥ Иоанн база бир бӧлӱк улусты кӧрӱп ийген. Бу — «кем де тоолоп болбогон кара-бајырт улус». Олор керегинде Иоанн мындый сӧстӧр бичиген: «Ончо уктардаҥ, ӱйелердеҥ, калыктардаҥ ла тилдердеҥ улус болгон. Олор ширеениҥ алдында ла Кураанныҥ алдында тургандар». (Ачылта 7:9—14 кычырыгар.) Иоанн келер ӧйдӧ Кудайга чын бажырар улустыҥ тоозы сӱреен кӧп болор деп билип алала, тыҥ сӱӱнген болор!

3. а) Иоанныҥ кӧрӱлтези нениҥ учун бӱдеристи тыҥыдып јат? б) Бу јӧрмӧлдӧ нени шӱӱжерис?

³ Бу кӧрӱлте Иоанныҥ бӱдерин тыҥыткан. Је бистиҥ бӱдеристи  бу кӧрӱлте оноҥ тыҥ эдер, нениҥ учун дезе бис шак ла бу судурдыҥ бӱдӱп јаткан ӧйинде јададыс! Улу тӱбекти ӧдӱп, јерде ӱргӱлјиге јӱрерге турган миллиондор тоолу улустыҥ јуулып турганын бойыстыҥ кӧзибисле кӧрӱп јадыс. Бу јӧрмӧлдӧҥ Иегова 80 кире јыл кайра бу албаты кем болгонын канайып ачып бергенин билип аларыс. Оноҥ бу албатыныҥ 1) сӱрекей кӧп болгонын ла 2) башка-башка албатылардаҥ јуулганын шӱӱп кӧрӧрис. Мындый шӱӱжӱ бу албатыныҥ тоозына киретен ончо улустыҥ бӱдӱмјизин тыҥыдар.

4. Бастыра телекейдиҥ христиан серкпелери Агару Бичиктиҥ кандый чындыгын оҥдобой јат, је Агару Бичиктиҥ Шиҥдеечилери олордоҥ незиле аҥыланган?

⁴ Агару Бичикте, Кудайга сӧсуккур улус јерде ӱргӱлјиге јӱрер деп, јарт бичилип калган да болзо, бӱгӱнги кӱнниҥ кудай јаҥдары анайып ӱретпей јат (2 Кор. 4:3, 4). Кӧп саба христиан серкпелер јакшы улус божогон кийнинеҥ теҥеридӧӧн барат деп ӱредет. Је XIX чактыҥ учында «Каруулчы шибее» деген журналды чыгарып баштаган Агару Бичиктиҥ Шиҥдеечилеринде (Исследователи Библии) ӧскӧ кӧрӱм болгон. Бу бӧлӱк улус Кудай јердеги райды орныктырар ла миллиондор тоолу сӧсуккур улус теҥериде эмес, је мында, јерде јадар деп оҥдоп алган. Је Кудайга кемдер сӧсуккур болор деп јарт билип аларга, бир канча ӧй керек болгон (Матф. 6:10).

5. Агару Бичиктиҥ Шиҥдеечилери 144 000 керегинде нени оҥдоп алган?

⁵ Анайда ок Агару Бичиктиҥ Шиҥдеечилери, кезик улус теҥериде Иисусла башкарарга, јердеҥ садылып алылар деп оҥдоп алган (Ачыл. 14:3). Бу бӧлӱк улус, јерде Кудайга чындык иштеген 144 000 эрчимдӱ христиандардаҥ турар учурлу. Је кара-бајырт улус керегинде нени айдарга јараар?

6. Агару Бичиктиҥ Шиҥдеечилери кара-бајырт керегинде чындыкты канайып оҥдоп туратан?

⁶ Иоанн кӧрӱлтезинде «ширеениҥ алдында ла Кураанныҥ алдында» турган кара-бајырт улусты кӧргӧн (Ачыл. 7:9). Оныҥ учун Агару Бичиктиҥ Шиҥдеечилери кара-бајырт улус 144 000 чылап теҥериде јадар деп бодогон. Је андый болзо, бу эки бӧлӱктиҥ башказын олор канайып јартаган? Агару Бичиктиҥ Шиҥдеечилери кара-бајырт улустыҥ тоозына, јерде јӱрерде Кудайга бӱткӱлинче сӧсуккур болбогон улус кирер деп сананган. Андый улус библиялык нормаларла јӱрген де болзо, је олордыҥ кезиги христиан серкпелердеҥ чыкпаган болор. Агару Бичиктиҥ Шиҥдеечилериниҥ санаазыла болзо, андый улус Иисусла кожо башкарарга турбас, нениҥ учун дезе олордыҥ Кудайга сӱӱжи арай ла ас болгон. Айдарда, кара-бајырт улус Кудайды тыҥ сӱӱбей турган болордо, олор ширееге отурбас, је ширеениҥ алдында турар.

7. Агару Бичиктиҥ Шиҥдеечилериниҥ санаазыла болзо, бир муҥ јылдыҥ ӧйинде јерде кемдер јадар учурлу болгон, анайда ок олор Христостоҥ озо божогон, је Кудайга чындык арткан эр улус керегинде нени сананган?

⁷ Айса болзо, Шиҥдеечилер јерде кемдер јадар учурлу деп сананган? Кара-бајырт улус ла 144 000 кижи теҥериде јуула берзе, миллиондор тоолу улуска јерде јадатан арга ачылып, Христостыҥ бир муҥ јылга башкаратан ӧйинде болотон алкыштар берилер. Андый улус Кудайдыҥ јасактарына Христостыҥ бир муҥ јылга башкаратан ӧйинде ӱредӱ алар. Оныҥ учун олордоҥ Иисус башкарып баштагалакта Иеговага иштеери некелбей јат. Ӱредилген кийнинеҥ Иегованыҥ нормаларын бӱдӱрип турган улус јерде ӱргӱлјиге јӱретен кайрал алар, бӱдӱрбей турган улус дезе, јоголтылып калар. Анайда ок ол ӧйдӧ «бастыра јердиҥ ӱстинде јайзаҥдар» болотон улустыҥ кезиги бир муҥ јылдыҥ учында теҥериде јӱретен арга алар болгон (Сар.  45:16). Олордыҥ ортозында Христостоҥ озо божогон, је Кудайга чындык арткан эр улус болор деп, Шиҥдеечилер сананган.

8. Агару Бичиктиҥ Шиҥдеечилери кандый ӱч бӧлӱк улус болор деп сананган?

⁸ Анайдарда, Агару Бичиктиҥ Шиҥдеечилериниҥ санаазыла болзо, ӱч бӧлӱк улус болор: 1) Иисусла теҥериде башкаратан 144 000 кижи; 2) теҥериде «ширеениҥ алдында ла Кураанныҥ алдында» туратан јаан эрчимдӱ иштенбей турган кара-бајырт улус; 3) Христостыҥ бир муҥ јылга башкаратан ӧйинде Иегованыҥ јасактарына ӱренетен миллиондор тоолу улус *. Је Иегова бойыныҥ ӧйинде чындыкты јарт ачып берген (Укаа 4:18).

9. а) Кара-бајырт улус «ширеениҥ алдында ла Кураанныҥ алдында» турат дегенин канайып оҥдоор? б) Ачылта 7:9-ты мынайып оҥдогоныс нениҥ учун чын болот?

⁹ 1935 јылда Иегованыҥ Керечилерине Иоанныҥ кӧрӱлтезиндеги кара-бајырт улус кемдер болорын билип алатан јарт оҥдомол берилген. Мынаҥ улам олор «ширеениҥ алдында ла Кураанныҥ алдында» турарга, кара-бајырт улус теҥеридӧӧн барбас деп оҥдоп алган. Нениҥ учун дезе олор јерде де болзо, «ширеениҥ алдында» турар аргалу. Је «ширеениҥ алдында» турарга, Иегованыҥ башкарар јаҥын тооп, ого сӧсуккур болор керек (Иса. 66:1). Бу улус Христостыҥ тайылгазына бӱдӱп турганыла «Кураанныҥ алдында» турат. Анайып ла Матфей 25:31, 32-де «ончо калыктар», ол тоодо калју да улус, улу ширееде отурган Иисустыҥ алдына «јуулар» деп айдылат. Бастыра албатылар теҥериде эмес, јерде јадып турган эмей. Бу мындый сӱрекей чын оҥдомол Агару Бичикте нениҥ учун кара-бајырт улус теҥеридӧӧн јуулбас деп айдылганын јартап јат. Теҥеридеги ӱргӱлји јӱрӱмди јӱк ле 144 000 кижи алар. Олор Иисусла кожо «јерле башкарар» (ЈТ) (Ачыл. 5:10).

10. Кара-бајырт албатыга Иегова керегинде билгирлерди нениҥ учун Христостыҥ бир муҥ јылга башкарарынаҥ озо алар керек?

¹⁰ Айдарда, 1935 јылдаҥ ала Иегованыҥ Керечилери Иоанныҥ кӧрӱлтезиндеги кара-бајырт албаты јерде ӱргӱлјиге јӱретен чындык христиандардаҥ турат деп оҥдоп баштаган. Олорго улу тӱбекти ӧдӧргӧ, Христостыҥ бир муҥ јылга башкарарынаҥ озо, Иегова керегинде билгирлерди алып, ого бажырар керек. Анайда ок Иисустыҥ бир муҥ јыл башкаратан ӧйинеҥ озо келип јаткан ончо тӱбектеҥ кыйып ӧдӧргӧ, бек бӱдӱмјилӱ болор керек (Лука 21:34—36).

11. Агару Бичиктиҥ кезик Шиҥдеечилери Христостыҥ бир муҥ јылга башкаратан ӧйиниҥ учында Иегованыҥ кезик ишчилери нениҥ учун теҥеридӧӧн барар деп сананган?

¹¹ Је Христостыҥ бир муҥ јылга башкаратан ӧйиниҥ учында Кудайдыҥ кезик чындык ишчилери јердеҥ теҥеридӧӧн алылар дегенин канайып оҥдоор? Бу керегинде 1913 јылдыҥ кочкор айдыҥ 15-чи кӱниниҥ «Каруулчы шибеезинде» айдылган. Кем де мынайып сананар аргалу болгон: «Нениҥ учун јебрен ӧйдӧ Кудайга чындык арткан эр улус јерде јадар, је јаан эрчимдӱ иштенбеген христиандар теҥеридӧӧн барар?» Андый санаалар эки јастыра оҥдомолдоҥ улам болгон: 1) кара-бајырт албаты теҥериде јадар, 2) кара-бајырт албаты јаан эрчимдӱ иштенбей турган христиандардаҥ турар.

12, 13. Майлаткандар да, кара-бајырт та алатан кайралы керегинде нени оҥдоп јат?

¹² Је 1935 јылда Иегованыҥ Керечилери Армагеддонды ӧдӱп чыгатан улус, ол Иоанныҥ кӧрӱлтезиндеги кара-бајырт улус болор деп јарт оҥдоп алган. Олор улу тӱбекти  ӧдӱп, тыҥ ӱнденип: «Улусты ширееде отурган Кудайыс ла Кураан аргадайт!» — деп айдар (Ачыл. 7:10, 14). Бу неме јерде болор. Анайда ок Агару Бичикле болзо, теҥериде јӱрерге тиргизилген улус, јебрен ӧйдӧ јаткан чындык ишчилерге кӧрӧ «артык болгонды» алар (Евр. 11:40). Акалар мыны оҥдоп аларда, јердеги ӱргӱлји јӱрӱм керегинде ижемјини сӱӱнип куучындаган ла улусты Иеговага иштеерине кычырган.

¹³ Кара-бајырт албатыга кирип турган христиандар мындый ижемји барына сӱӱнип јат. Олор кем јерде, кем теҥериде јӱрерин Иегова бойы кӧрӧт деп оҥдоп јадылар. Майлаткандар да, кара-бајырт та, Иегова мындый кайралды, бойыныҥ јалакайынаҥ улам Иисус Христостыҥ толынты тайылгазы ажыра бергенин оҥдоп јат (Рим. 3:24).

14. Нениҥ учун 1935 јылдаҥ ала, кӧп улус кара-бајырт албаты керегинде судур канайып бӱдерин билерге кӱӱнзеген?

¹⁴ 1935 јылда Иегованыҥ Керечилери Иоанныҥ кӧрӱлтезин оноҥ јарт оҥдоп алган. Мынаҥ улам кӧп улус јердеги ижемјилӱ кара-бајырт албаты канайып јууларын билерге кӱӱнзеген. Ол ӧйдӧ 12 јашту болгон Рональд Паркин ака мынайып айдат: «Ол ӧйлӧрдӧ бастыра јердиҥ ӱстинде јарчылардыҥ тоозы 56 000 кире болгон. Олордыҥ кӧбизи майлаткандар болордо, кара-бајырт албаты андый ла кӧп эмес деп билдирген».

15. Кара-бајырт албаты канайып јуулат?

¹⁵ Је канча јылдардыҥ туркунына, кӧп ороондорго аткарылган миссионерлердиҥ ижинеҥ улам, Иегованыҥ Керечилериниҥ тоозы там ла кӧптӧгӧн. Оноҥ 1968 јылда Агару Бичикти «Истина, ведущая к вечной жизни» деген бичикле ӱренетен программа башталган. Бу бичикте библиялык чындык сӱрекей јеҥил јарталганынаҥ улам, Иегова керегинде билип алган јобош улустыҥ тоозы оноҥ тыҥ кӧптӧгӧн. Тӧрт јылдыҥ туркунына јарым миллионноҥ кӧп јаҥы ӱренчиктер чӧҥӱрилген. Латинский Америкада ла ӧскӧ дӧ ороондордо католический серкпелердиҥ улузыныҥ тоозы астап турарда, Кӱнчыгыш Европада ла Африкада бистиҥ ижис токтодунаҥ јайымдалып туратан. Анайып, база да канча миллиондор улус чӧҥӱрилген (Иса. 60:22). Калганчы јылдарда Иегованыҥ организациязы, Агару Бичик неге ӱредип турганын билерге болужатан ӧскӧ дӧ тузалу јепселдер чыгарган. Эмди Иегова кара-бајырт албатыны јууп турганында бир де алаҥзыбай јадыс. Олордыҥ тоозы 8 миллионноҥ ажа берди.

16. Кара-бајырт албаты кемдердеҥ турар?

¹⁶ Иоанн кӧрӱлтезин јартап тура, кара-бајырт албаты «ончо уктардаҥ, ӱйелердеҥ, калыктардаҥ ла тилдердеҥ» болор деп айткан. Иоаннаҥ озо Захария судурчы бого тӱҥей сӧстӧр бичиген: «Ол кӱндерде ончо албатылардаҥ болгон ло башка-башка тилдерге куучындап турган он кижи иудейдиҥ эдегинеҥ тудунып, ого мынайып айдар: „Бис слерле кожо барарыс, нениҥ учун дезе Кудай слерле кожо деп укканыс“» (Зах. 8:23).

17. Иегованыҥ организациязы башка-башка тилдерлӱ албатыларга канайып болужат?

¹⁷ Иегованыҥ Керечилери, улусты ончо тилдердеҥ јууп аларга, сӱӱнчилӱ јарды олордыҥ тилине јарлаар керек деп оҥдоп јат. Оныҥ учун Агару Бичикти ӱренетен бичиктерди бис 130 јылдаҥ кӧп ӧйгӧ кӧчӱрип јадыс. Бӱгӱнги кӱнде канча јӱс тилдерге кӧчӱрилип турган ишти, кижиниҥ тӱӱкизин кӧрзӧ, кем де, качан да этпеген. Иегова кара-бајырт албатыны ончо албатылардаҥ јууп турганын бойыстыҥ кӧзисле кӧрӧдис. Анайып бу улус, башка-башка албатылардаҥ да болзо, кӧгӱс курсактыҥ ӧскӧ тилдерге  кӧптӧп турганынаҥ улам, Иеговага бирлик бажырып јат. Олор бойыныҥ јарлаар ижиле, анайда ок бой-бойына сӱӱштӱ баштанып турганыла текши јарлу болот. Бу ончо неме бистиҥ бӱдӱмјибисти тыҥыдып јат! (Матф. 24:14; Иоанн 13:35).

18. а) Исаия 46:10, 11-ле болзо, Иегованыҥ кара-бајырт керегинде судурды бӱдӱрип турганы бисти нениҥ учун кайкатпай јат? б) Јерде јадатан ижемјилӱ улус теҥеридӧӧн барбайтанына нениҥ учун ачынбай јат?

¹⁸ Бис кара-бајырт керегинде судурдыҥ бӱдӱп турганын кӧрӱп, тыҥ сӱӱнип јадыс! Иегованыҥ бу судурды мынайып бӱдӱрип турганында кайкамчылу неме јок. (Исаия 46:10, 11 кычырыгар *.) Кара-бајырт улус Иисусла кожо теҥериде башкарар эдип майлатпаганына ачынбайдылар, карын Иегованыҥ сыйлаган ижемјизин баалап јадылар. Агару Бичикте, Кудайдыҥ агару тынына башкарткан да болзо, је 144 000-га кирбей турган чындык эр ле ӱй улустыҥ ас эмес темдери бар. Олордыҥ бирӱзи Крестеечи Иоанн (Матф. 11:11). База бирӱзи Давид каан (Ап. ижи 2:34). Олор, анайда ок ӧскӧ дӧ улус, јердеги райга тиргизилер. Ончо тирилген ишчилерде, кара-бајырт улуста чылап, Иеговага чындык болгонын ла оныҥ бийленер јаҥына јӧмӧжип турганын кӧргӱзетен арга болор.

19. Иоанныҥ кара-бајырт керегинде кӧрӱлтезиниҥ канайып бӱдӱп турганын оҥдоп турганыс бисти неге кӱӱнзедет?

¹⁹ Кудай ончо албатылардаҥ миллиондор тоолу улусты мынайып баштапкы катап бириктирип салган. Бистиҥ ижемјибис кандый да болзо, теҥериде ол эмезе јерде јадатан да болзо, бис канча ла кире кӧп улуска кара-бајырт «ӧскӧ койлордыҥ» (ЈТ) тоозына кирерге болужар учурлу (Иоанн 10:16). Удабас, судур аайынча, Иегова јерде улу тӱбекти баштап, кижиликти шыраладып турган башкаруларды ла кудай јаҥдарды јоголтып салар. Ол тушта кара-бајырт улуска Иеговага ӱргӱлјиге јерде иштейтен сӱрекей јакшы арга ачылар! (Ачыл. 7:14).