38 ӰРЕНЕТЕН ЈӦРМӦЛ
«Меге келигер, слерди токынадып салайын»
«Јобоп-чучурап калгандар ла уур-кӱчке бастыргандар, ончогор Меге келигер, слерди токынадып салайын» (МАТФ. 11:28).
17 КОЖОҤ Кӱӱнзейдим!
БУ ЈӦРМӦЛДӦ *
1. Матфей 11:28—30-ла болзо, Иисус кандый ижемји берген?
ИИСУС јуулган улуска: «Меге келигер, слерди токынадып салайын» — деп, сӱрекей јакшы ижемји берген. (Матфей 11:28—30 кычырыгар.) Бу куру сӧс болбогон деп, Иисустыҥ ооруп шыралап турган ӱй кижини јасканынаҥ кӧрӱнип јат.
2. Иисус ооруп турган ӱй кижиге нени эткен?
2 Бу ӱй кижи ӱзе неменеҥ чӧкӧп бараткан болгон. Оорузынаҥ јазыларга, ол коркышту кӧп эмчилерге јӱрген. Је 12 јыл ӧдӱп калган да болордо, ол оорузынаҥ анайып ла јазылып болбогон. Јасакла болзо, бу ӱй кижи ару эмес болгон (Лев. 15:25). Је ол Иисустыҥ оору улусты јазып турганын угуп ийеле, ого барып јат. Иисусты табып алала, оныҥ кийиминиҥ эдегине тийип ле ийерде, јазыла берет! Је Иисус оны јӱк ле оорузынаҥ јазып салган эмес, је: «Кызым» — деп јалакай ла тоомјылу айтканыла, бойын јабыс кӧрбӧзин деп бӱдӱмјилеп салган. Оныҥ сӧстӧринеҥ бу ӱй кижи оноҥ ары јӱретен ийде-кӱч алган (Лука 8:43—48).
3. Бу јӧрмӧлдӧҥ кандый сурактардыҥ карууларын табып аларыс?
3 Бу ӱй кижи Иисуска бойы јууктаган деп ајардаар ба? Иисуска јууктаарга, ого бойы јанынаҥ керектӱ алтамдар эдер керек болгон. Анайып ла бӱгӱнги кӱнде, Иисуска јууктаарга, биске бойыстыҥ јаныстаҥ керектӱ алтамдар эдер керек. Бистиҥ ӧйдӧ Иисус кайкал эдип, улусты оорулардаҥ јаспай турган да болзо, бисти: «Меге келигер, слерди токынадып салайын» — деп кычырып јат. Бу јӧрмӧлдӧҥ беш сурактыҥ каруузын табып аларыс: Иисуска канайып јууктаар?
«Мен берер комутты бойыгарга кийип» алыгар деп, Иисустыҥ айтканын канайып оҥдоор? Иисустаҥ неге ӱренерге јараар? Иисустыҥ берген јакарузы биске нениҥ учун токынал берип јат? Анайда ок биске Христостыҥ комудын кийип, иштенип турганыстаҥ оноҥ ло ары токынал алып турарга не болужар?«МЕГЕ КЕЛИГЕР»
4, 5. Иисуска јууктаарга нени эдер керек?
4 Иисуска јууктаарга нени эдер керек? Иисуска јууктайтан аргалардыҥ бирӱзине, оныҥ јӱрӱмин ле неге ӱреткенин лаптап шиҥдеери кирет (Лука 1:1—4). Мыны бис учун кем де эдип болбос, оныҥ учун мыны бис бойыс эдер учурлу. Анайда ок сууга чӧҥӱрилип, оныҥ ӱренчиги болуп калганысла Иисуска база јууктайдыс.
5 Иисуска јууктайтан база бир арга — јуунныҥ аксагалдарына баштанары. Иисус бойыныҥ койлорына болужарга, «сый эдип берилген улусты» (ЈТ) тузаланат (Еф. 4:7, 8, 11; Иоанн 21:16; 1 Петр 5:1—3). Биске аксагалдардаҥ болушты бойыс сураар керек, нениҥ учун дезе олор бистиҥ санаабысты кычырып болбой јат ла кандый болуш керектӱзин билбей јат. Джулиан ака мынайып куучындайт: «Су-кадыгымнаҥ улам Бэт-Элде иштеерин артыргызарга келижерде, бир најым меге аксагалдарга баштанзын деп айткан. Је мен озо баштап: «Аксагалдар меге неле болужар?» — деп санангам. Андый да болзо, соондо, аксагалдардаҥ болуш сурагам. Эмди мен олорло куучындашканымды эҥ јакшы сыйлардыҥ бирӱзи деп кӧрӧдим». Кудайга чындык аксагалдар, темдектезе Джулианга болушкан аксагалдар, Христос чылап сананарга болужат, ӧскӧртӧ айтса Иисустыҥ кӧрӱм-санаазын оҥдоорго болужат (1 Кор. 2:16; 1 Петр 2:21). Кӱдӱчиниҥ болужы (пастырское посещение) — аксагалдардыҥ биске сыйлап турган эҥ јакшы сыйларыныҥ бирӱзи.
«МЕН БЕРЕР КОМУТТЫ БОЙЫГАРГА КИЙИП» АЛЫГАР
6. «Мен берер комутты бойыгарга кийип» алыгар дегени нени темдектейт?
6 «Мен берер комутты бойыгарга кийип» алыгар деген сӧстӧр «Меге багыныгар» эмезе «Мениҥ комудымды кийип алзагар, Иегованыҥ ижин кожо эдерис» дегенин темдектеп турган болор. Је бу сӧстӧрдиҥ учуры кандый да болзо, комут деген сӧс албаданып иштеерин кӧргӱзет.
7. Матфей 28:18—20-ле болзо, биске кандый иш берилген ле бис неде алаҥзыбай јадыс?
7 Бис јӱрӱмисти Иеговага учурлап, чӧҥӱрилзеес, Иисустыҥ кычырузын алып јадыс. Бу кычыру ӱзе улуска айдылат, нениҥ учун дезе Иисус Кудайга акту јӱректеҥ иштеерге турган кижини качан да јектебей јат (Иоанн 6:37, 38). Кажы ла христианга Иегованыҥ Иисуска берген ижине туружатан кӱндӱ эдилген. Оныҥ учун бу ишти бӱдӱрерге, Иисус јаантайын бисле кожо болор деп алаҥзыбай јадыс. (Матфей 28:18—20 кычырыгар.)
«МЕНЕҤ ӰРЕНИГЕР»
Иисус чылап улусты токынадып туругар (8—11 абзацтарды кӧрӱгер.) *
8, 9. Иисуска нениҥ учун јобош улус тартылган? Бойыска кандый сурактар берер керек?
8 Иисуска јобош улус тартылып туратан (Матф. 19:13, 14; Лука 7:37, 38). Нениҥ учун? Нениҥ учун дезе Иисус бийиркек ле соок фарисейлердеҥ, ол эмезе кудай јаҥныҥ башчыларынаҥ, чек башка болгон (Матф. 12:9—14). Иисус јымжак ла јобош болордо, је фарисейлер улуркак ла бойыныҥ јамызыла оморкоор улус болгон. Иисус улуркаарын бир де јаратпайтан. Ол ӱренчиктерин јобош болуп, улуска болужып јӱрзин деп ӱреткен (Матф. 23:2, 6—11). Фарисейлер улусты коркыдып, бир иске бастырып туратан (Иоанн 9:13, 22). Је Иисус дезе, улусты јалакай сӧстӧриле, јакшы керектериле токынадып туратан.
9 Слер Иисустыҥ теминеҥ ӱренедигер бе? Бойыгардаҥ сурагар: «Улус мени јымжак ла јобош кижи деп кӧрӧт пӧ? Улуска болужарга ла кӧскӧ кӧрӱнбес јабыс иш бӱдӱрерге кӱчсинбейдим бе? Мен улуска јалакай баштанадым ба?»
10. Иисус улуска канайып баштанган?
10 Иисус ӱренчиктерин ӱредип тура, олорго јымжак ла јалакай баштанган. Оныҥ учун ӱренчиктерге Иисусла кожо иштеерге јеҥил болгон (Лука 10:1, 19—21). Ол ӱренчиктериниҥ нени сананып турганын билерге, олорго сурактар берип туратан (Матф. 16:13—16). Мынаҥ улам ӱренчиктер теплицада ӧскӧн ӧзӱмдер чилеп, чечектеп туратан. Олор Иисустыҥ ончо ӱредӱзин алынып, кӧп тӱжӱм экелген, ол эмезе јакшы керектер эткен.
Улуска слерле куучындажарга јеҥил болзын, ачык–јарык болугар
Јарлаар ишке эрчимдӱ туружыгар
Јобош ло иштеҥкей болугар *
11. Бойыска кандый сурактар берер керек?
11 Слерге улусты башкаратан кандый бир јаҥ берилген болзо, бойыгардаҥ сурагар: «Мен ижимде эмезе айылымда улуска канайып баштанып јадым? Улусла амыр-энчӱ јӱрерге албаданадым ба? Улуска меге кандый бир суракту баштанарга јеҥил бе? Улустыҥ кӧрӱмин чаптыксынбай угадым ба?» Айдарда, улустыҥ сурактарына кыртыштанып, ӧскӧ кӧрӱм-санаалу кижини базынып турган фарисейлердий болбой турактар (Марк 3:1—6; Иоанн 9:29—34).
«АМЫР ТАБАРЫГАР»
12—14. Иисустыҥ берген јакарузы биске нениҥ учун токынал берип јат?
12 Иисустыҥ берген јакарузы биске нениҥ учун токынал берип јат? Мында бир канча шылтак бар, је бис оныҥ јӱк кезигин кӧрӱп ийерис.
13 Бисте эҥ ле јакшы кӧрӧӧчилер. Иегова эҥ бийик јаҥду да болзо, ол биске качан да кату ла соок баштанбай јат. Ол бистиҥ ижисти баалап јат (Евр. 6:10). Анайда ок биске молјуларысты бӱдӱрерге ийде-кӱч берет (2 Кор. 4:7; Гал. 6:5). Иисус Кааныбыс — улуска канайып баштанарыныҥ сӱрекей јакшы теми (Иоанн 13:15). Аксагалдар дезе, Иисустаҥ, ол эмезе «улу Кӱдӱчинеҥ», тем алат (Евр. 13:20; 1 Петр 5:2). Олор бисти корулап, кӧгӱс курсакла азырап јат, анайда ок кӱӱнисти кӧдӱрет, јалтанбас болорго болужат ла јалакай баштанып јат.
14 Бисте эҥ ле јакшы најылар. Андый јуук карындаштык колбуларлу ла бир амадулу бириктирилген албаты јердиҥ ӱстинде база бар эмеш пе? Сананып ийзеер де: бис, бийик нормаларла јӱрӱп турган да болзо, бийиркенбей турган улусла теҥ-тай иштеп јадыбыс. Олор јайалталарлу да болзо, улуркабас, јобош улус болот. Олор бистерди јӱк ле кожо иштеп турган улус деп эмес, је чыннаҥ ла најылар деп кӧрӧт. Бистиҥ најылыгыс сӱрекей бек, керек дезе олор бис учун јӱрӱмин де берерге белен!
15. Кудайдыҥ ижин бӱдӱрип, бис нени сезедис?
15 Бисте эҥ ле јакшы иш. Бис улусты Кудай керегинде чындыкка ӱредедис, анайда ок Дьяволдыҥ таркадып турган тӧгӱнин илезине чыгарадыс (Иоан. 8:44). Сатана улуска кӧдӱрип болбос јӱктер илип берет. Темдектезе, Иегова бисти качан да сӱӱбес ле јаманысты таштабас деп бӱдӱмјилеп саларга албаданат. Бу коркышту уур јӱк ле јескинчилӱ тӧгӱн! Нениҥ учун дезе, чынынча болзо, бис Иисуска јууктазаас, бистиҥ кинчектерис ташталып јат. Анайда ок Иегова бистиҥ кажыбысты ла тыҥ сӱӱп јат (Рим. 8:32, 38, 39). Улусты Иеговага иженерине ӱредерге ле олордыҥ јӱрӱми јакшы јанындӧӧн солынып турганын кӧрӧргӧ кандый сӱӱнчилӱ!
БИСКЕ ОНОҤ ЛО АРЫ ТОКЫНАЛУ БОЛОРГО НЕ БОЛУЖАР?
16. Иисустыҥ биске берген јӱги, ӧскӧ јӱктердеҥ незиле башка?
16 Иисустыҥ биске берген јӱги кандый ла јӱктердеҥ чек башка. Темдектезе, иштиҥ кийнинеҥ кӧп улус јаҥыс та физический јанынаҥ эмес, је эмоциональный да јанынаҥ арып-чучурап калат. Је Иеговага ла Иисуска иштенгенистеҥ, јаан сӱӱнчи аладыс. Эмезе кезикте эҥирде иштиҥ кийнинеҥ јуунныҥ туштажузына да барарга кӱчсинип јадыс. Је туштажуныҥ кийнинеҥ јанып келзеес, јаҥы ийде-кӱч кожулганын сезедис. Анайып ла јарлаар ишке туружарга ла Агару Бичикти таҥынаҥ ӱренерге албаданганыстаҥ алган кайралыс, берген ӧйистеҥ ле ийде-кӱчистеҥ канча киреге артык болот.
17. Биске нени оҥдоп турар керек ле нени кӧрӱп турар керек?
17 Биске бойыстаҥ ӧткӱре кӧпти сакыбас керек, нениҥ учун дезе бис ӱзени эдип болбозыс. Оныҥ учун ийде-кӱчис неге барып турганын кӧрӱп турар керек. Темдектезе, ийде-кӱчисти акча-јӧӧжӧ јуурына калас јылыйтардаҥ айабазыс. Иисустыҥ бай эр кижиле куучындашканын сананып ийектер. Бу эр кижи Јасакты бӱдӱрип турган јакшы кижи болгон болор, нениҥ учун дезе Марктыҥ Сӱӱнчилӱ јарында Иисус ого карузый берген деп бичилет. Ол: «Ӱргӱлји јӱрӱмди энчиленерге, нени эдейин?» — деп, Иисустаҥ сураарда, Иисус ого — «Барып, не барыҥды садала... Оноҥ келип... Мениле кожо бар» — деп айткан. Је бу јиит кижи Христостыҥ ӱренчиги болорго кӱӱнзеген де болзо, бойыныҥ акча-јӧӧжӧзин карамдай берген (Марк 10:17—22). Анайып ол Иисустыҥ берген јӱгин албай, акча-јӧӧжӧниҥ кулы болуп артып калган (Матф. 6:24). Мындый учуралда слер нени талдаар эдер?
18. Биске кезикте нени кӧрӱп турар керек, нениҥ учун?
18 Биске јӱрӱмисте баштапкы јерге нени тургузып турганысты кезикте кӧрӱп турар керек. Анайып ийде-кӱчисти калас јылыйтпай турганыска бӱдӱмјилӱ болорыс. Марк деп јиит карындаш мынайып куучындайт: «Канча јылдардыҥ туркунына мен бойымды чӱм јок јӱрӱм јӱредим деп бодогом. Пионер болуп иштегем, је јаантайын ла акчаны канайып кӧптӧдӧ иштеп, эмеш јакшы јадарын сананар болгом. Меге нениҥ учун сӱӱнчи јетпей турганын чек аайлабай туратам. Је оноҥ, кӧп саба ийде-кӱчимди бойымга берип, Иеговага јӱк арткан-калганын берип турганымды оҥдоп ийгем». Анайып, Марк бойыныҥ кӧрӱм-санаазын ла јӱрӱмин солып, Иеговага кӧптӧдӧ иштеп баштаган. «Је кезикте мен акча једер бе деп санааркай да берзем, Иегова ла Иисус меге јарлаар ишти баштапкы јерге тургузарга болужып јат» — деп, Марк айдат.
19. Јарлаар ишке нениҥ учун чын кӧрӱмдӱ болор керек?
19 Иисустыҥ комудын кийип, оноҥ ло ары токынал аларга, ӱч јӧпти бӱдӱрер керек. Баштапкы јӧп, јарлаар ишке чын кӧрӱмдӱ болугар. Бис Иегованыҥ ижин эдедис, оныҥ учун бу ишти оныҥ табы аайынча бӱдӱрер керек. Бис — ишчилер, а Иегова бистиҥ Бийис (Лука 17:10). Оныҥ учун Кудайдыҥ ижин бойыстыҥ кӧрӱмисле этсеес, јӱрӱмисти уурладып саларыс. Анайып бис, бойыныҥ ээзине багынбай, ӧскӧ јанындӧӧн барарга турган букага тӱҥей болорыс. Андый бука кандый да кӱчтӱ болзо, ийде-кӱчин капшай јылыйтып, шыркаланып та калардаҥ айабас. Је бис Иегованыҥ сӧзин угуп турзаас, эдип болбос немени эдип ийерис ле кандый ла кӱчтерди ӧдӱп чыгарыс. Ундыбагар: Кудай бойыныҥ табын бӱдӱрип салар, ого кем де буудак эдип болбос! (Рим. 8:31; 1 Иоанн 4:4).
20. Христостыҥ комудын кийип аларга, бисти не кӱӱнзедер учурлу?
Иоанн 6:25—27, 51, 60, 66; Флп. 3:18, 19). Је Кудайды ла улусты акту јӱрегинеҥ сӱӱп турган улус, јердеги де јӱрӱминде Иисустыҥ комудын кийип, сӱӱнчилӱ иштенген. Олор бу ижин теҥериге де барза, улалтарга белен болгон. Анайып бис те чын кӱӱн-санаалу болзоос, Христостыҥ комудын кийип, сӱӱнчилӱ иштенип јӱрерис.
20 Экинчи јӧп, чын кӱӱн-санаалу болугар. Бис сӱӱштӱ Иегова Адабысты мактаарга амадайдыс. Баштапкы чакта, Иисустаҥ јӱк ле нени-нени аларга болуп келген улус, капшай чӧкӧп, Христостыҥ комудын аларынаҥ мойноп ийген (21. Матфей 6:31—33-ле болзо, бис неге иженер аргалу?
21 Ӱчинчи јӧп, Иегованыҥ болужына иженигер. Бис Иеговага акту кӱӱнистеҥ иштеерин баштапкы јерге тургузарыс деп шӱӱп алганыс. Је Иисус биске истежӱлер болор деп озодоҥ айдып салган да болзо, бис, Иегова кандый ла ченелтелерди ӧдӧтӧн ийде-кӱчти берер деп, иженер аргалу. Канча ла кире турумкай болуп артсаас, ончо ло кире бӱдӱмјибис тыҥып јат. (Иак. 1:2—4). Анайда ок Иегова биске ӱзе керектӱ немени берер, Иисус бистиҥ кӱдӱчи болор, ака-эјелер бисти кӱчтердиҥ ӧйинде артыргыспас деп, иженер аргалу. (Матфей 6:31—33 кычырыгар; Иоанн 10:14; 1 Фес. 5:11.) Айдарда, турумкай артарга, бисте ончо неме бар!
22. Бис неге быйанду болодыс?
22 Иисус ӱй кижини јазып ийерде, ого ол ло тушта јеҥил боло берген, је узак ӧйгӧ токыналу јӱрерге, ого Христостыҥ ӱренчиги болор керек болгон. Сананып ийзеер де: бу ӱй кижи Христостыҥ комудын кийип алган болзо, эмди ол теҥериде јӱрет! Ол чыннаҥ ла Христостыҥ чындык ӱренчиги болуп калган болзо, оныҥ алган кайралы эткен тайылгаларынаҥ канча катапка артык. Бистиҥ ижемјибис кандый да болзо, јерде јадатан эмезе теҥериге баратан да болзо, Иисустыҥ «Меге келигер» деген кычырту эткенине јаан быйанду болодыс.
13 КОЖОҤ Христос биске тем
^ 5 абз. Иисус бисти бойына кычырып јат. Оныҥ кычырузын аларга, биске нени эдер керек? Каруузын бу јӧрмӧлдӧҥ билип аларыс. Анайда ок Христосло кожо иштенип турзаас, биске канайып токынал берилет деп билип аларыс.