1, 2. а) Нениҥ учун Армагеддон — сӱӱнчилӱ јетирӱ болот? б) Бу јӧрмӧлдӧ кандый сурактар шӱӱжилер?

КЕЗИК улус «Армагеддон» ол ядерный јуу-согуш эмезе ар-бӱткенниҥ тӱбеги деп сананат. Је Агару Бичикте айдылганыла Армагеддон — сӱӱнчилӱ јетирӱ (Ачыл. 1:3). Бу јуу-согуш кижиликти јоголтпос, карын оны јоголтыштаҥ аргадап алар!

² Агару Бичикле болзо, Армагеддон деп јуу-согуш кижиликтиҥ башкарузын јоголтып, улусты аргадап алар. Анайып, телекей калју, јаман улустаҥ јайымдала берзе, јерде јӱк ак-чек улус артар. Анайда ок Армагеддон бистиҥ јерди кырыларынаҥ аргадаар (Ачыл. 11:18). Мыны јакшы оҥдоп аларга, тӧрт сурак кӧрӱп ийектер: Армагеддон ол не? Оныҥ алдында не болор? Оны ӧдӱп чыгарга, нени эдер керек? Бу телекейдиҥ калганчы кӱндеринде Кудайга чындык артарга нени эдер керек?

3. а) «Армагеддон» деген сӧс нени темдектейт? б) Армагеддон — сӱрлеп айдылган јер деп, Ачылта 16:14, 16 канайып кӧргӱзет?

³ Ачылта 16:14, 16 кычырыгар. «Армагеддон» деген сӧс Агару Бичикте јаҥыс ла катап туштап јат. Бу сӧс «Мегиддо кыр» деген еврей сӧсколбунаҥ бӱткен. Мегиддо јебрен Израильдиҥ калазы болгон (Иис. Н. 17:11). Је јердиҥ ӱстинде Армагеддон деген јер јок. Чынынча болзо, бу «бастыра телекейдиҥ каандарыныҥ» Иеговага удура јуулыжар ӧйин кӧргӱзет (Ачыл. 16:14). Је бу јӧрмӧлдӧ «Армагеддон» деп сӧс, бу ӧйдиҥ кийнинеҥ ле башталатан јуу-согушты база темдектейт. Армагеддон — сӱрлеп айдылган јер деп, бис кайдаҥ билерис? Баштапкызында, јердиҥ ӱстинде Мегиддо деген кыр јок. Экинчизинде, «бастыра телекейдиҥ каандары» бойыныҥ черӱлериле,  военный техниказыла Мегиддо каланы айландыра турган јерге батпас эди. Ӱчинчизинде, бу јӧрмӧлдӧ айдылганыла Армагеддон јердиҥ каандары Кудайдыҥ ишчилерине табару эткен тушта башталар. Је Кудайдыҥ ишчилери дезе, башка-башка јерлерде јадат.

4. Иегова калганчы улу јуу-согужыныҥ адын нениҥ учун Мегиддо кырла колбогон?

⁴ Иегова калганчы улу јуу-согужыныҥ адын нениҥ учун Мегиддо кырла колбогон? Библиялык ӧйлӧрдӧ Мегиддодо ло јанында турган Изреельдиҥ јалаҥдарында кӧп јуу-согуштар болуп туратан. Иегова бу јуу-согуштардыҥ кезигинде бойыныҥ улузына јеҥӱ аларга болушкан. Темдектезе, «Мегиддоныҥ сууларыныҥ јанында» Кудай Израильдиҥ Варак деп јаргычызына Сисара башкарган Ханаанныҥ черӱзин јеҥип аларга болушкан. Варак ла Девора деп судурчы болгон ӱй кижи, Иегованыҥ кайкал эдип, јеҥӱ бергенине быйанын айткан. Олор мынайып кожоҥдогон: «Јылдыстар теҥеринеҥ, бойыныҥ турган јерлеринеҥ, Сисарага удура јуулашкан. Киссон суу олорды агызып ийген» (Јарг. 5:19—21).

5. Армагеддон деп јуу-согуш, Варактыҥ турушкан јуу-согужынаҥ незиле башка болор?

⁵ Варак ла Девора кожоҥын мындый сӧстӧрлӧ тӱгезет: «О-о Иегова, сениҥ ончо ӧштӱлериҥ јоголып калзын. Је сени сӱӱп тургандар дезе, кӱн чылап јаркындалзын!» (Јарг. 5:31). Армагеддондо Иегованыҥ ӧштӱлери база јоголып калар. Је Кудайды сӱӱп турган улус тирӱ артар. Је бу эки јуу-согуштыҥ ортозында бир јаан башказы бар. Армагеддондо Кудайдыҥ ишчилери бир де јуулашпас. Олордо керек дезе јуулажатан јепсел де болбос! Олор «токыналу артып, Иеговага [ла оныҥ теҥеридеги черӱзине] ижензе, ийде-кӱчтӱ болор» (Иса. 30:15; Ачыл. 19:11—15).

6. Иегова Армагеддондо бойыныҥ ӧштӱлерин канайып јоголтор?

⁶ Кудай Армагеддондо бойыныҥ ӧштӱлерин канайып јоголтор? Ондо башка-башка аргалар бар. Темдектезе, ол јерсилкиништи, мӧндӱрди ле јалкынды тузаланар аргалу (Иов 38:22, 23; Иез. 38:19—22). Анайда ок ӧштӱлерди бой-бойын ӧлтӱрип баштазын деп, эдип ийер аргалу (2 Лет. 20:17, 22, 23). Эмезе калју улусты јоголторго, ангелдерди тузаланар аргалу (Иса. 37:36). Је Иегова кандый да арга тузаланза, тӱҥей ле јеҥип алар. Оныҥ ончо ӧштӱлери јоголып калар. Је ончо чындык улус тирӱ артар (Укаа 3:25, 26).

7, 8. а) 1 Фессалоникадагыларга 5:1—6-ла болзо, телекейдиҥ башкараачылары кандый јар айдар? б) Бу тӧгӱн јар нениҥ учун эҥ јаан тӱбекке экелер?

⁷ «Кайраканныҥ [«Иегованыҥ», ЈТ] кӱни» башталардаҥ озо, «амыр, кайдаҥ да јеткер јок» деп јар айдылар. (1 Фессалоникадагыларга 5:1—6 кычырыгар.) 1 Фессалоникадагыларга 5:2-де айдылган «Кайраканныҥ кӱни» — «улу тӱбек» (ЈТ) болот (Ачыл. 7:14). Бис улу тӱбектиҥ башталарга јатканын канайып билип ийерис? Агару Бичикле болзо, шак ла мыныҥ алдында кайкамчылу јар угулар. Бу, улу тӱбектиҥ башталып јатканыныҥ темдеги болор.

⁸ Бу, Агару Бичикте «амыр, кайдаҥ да јеткер јок» деп айдылатан јар болор. Телекейдиҥ башкараачылары нениҥ учун мынайып айдып баштаар? Чике каруузын бис билбезис. Олорго кудай јаҥныҥ башчылары биригер бе? Биригердеҥ де айабас. Је кандый да болотон болзо, «амыр, кайдаҥ да јеткер јок» деп јар, кӧрмӧстӧрдиҥ база бир тӧгӱни болор. Бу јар кижиликтиҥ тӱӱкизинде эҥ јаан тӱбекке экелер, нениҥ учун дезе бу јардаҥ улам шак ла тӱбектиҥ алдында јаткан улус «кайдаҥ да јеткер јок» деп тӧгӱнге бӱде берер. Агару Бичикте айдылганыла «олорго сакыбаган јанынаҥ јайраду табарар. Ол барлу ӱй кижини толголткон оорудый болор». Је Кудайдыҥ чындык ишчилериле не болор? Олор  Иегованыҥ кӱнине белен де болзо, је бу кӱн олорго тӱҥей ле кенетийин башталган деп билдирердеҥ айабас.

9. Сатананыҥ телекейи канайып јоголтылар?

⁹ Иегова Сатананыҥ телекейин, Нойдыҥ кӱндеринде чилеп, бир уунда јоголтпос. Ол мыны эки бӧлӱктеп эдер. Озо баштап, Улу Вавилонды, тӧгӱн кудай јаҥныҥ телекейлик империязын, јоголтор. Оноҥ, Армагеддонныҥ ӧйинде, Сатананыҥ телекейиниҥ арткан-калганын — политический, военный ла коммерческий системазын, јоголтор. Бу эки бӧлӱкти тереҥжиде кӧрӱп ийектер.

10. Ачылта 17:1, 6 ла 18:24-лӧ болзо, Иегова Улу Вавилонды нениҥ учун јоголтор?

¹⁰ «Улу балыр ӱй кижини јаргылаганы». (Ачылта 17:1, 6; 18:24 кычырыгар.) Улу Вавилон Кудайдыҥ адын јабарлап јат. Бу балыр ӱй кижи Кудай керегинде тӧгӱн ӱредӱлер таркадып, јердеги башчыларла јӧптӧжӱлер тургузып, кӧгӱс јанынаҥ балыр јӱрӱм јӱрет. Бу ӱй кижи бойыныҥ јаан јамызын тузаланып, бойыныҥ ла улузын тӧгӱндеп, олордыҥ акчазыла байып јат. Анайда ок ол коркышту кӧп улустыҥ, ол тоодо Кудайдыҥ ишчилериниҥ, канын тӧккӧнинде бурулу болот (Ачыл. 19:2). Иегова Улу Вавилонды канайып јоголтор?

11. «Кызыл аҥ» кемди темдектейт? Бу аҥ Иегованыҥ Улу Вавилонго чыгарып салган јаргызын бӱдӱрерге нени эдер?

¹¹ Иегова «улу балыр ӱй кижини» јоголторго, «он мӱӱстӱ» «кызыл аҥды» тузаланар. Бу аҥ — Организация Объединенных Наций, он мӱӱс дезе — бу организацияга јӧмӧжип турган политикалык башкарулар. Бу башкарулар «улу балыр ӱй кижиге», сӱрлеп айдылган Вавилонго, Кудайдыҥ тургузып салган ӧйинде удура чыгар. Олор оныҥ акча-јӧӧжӧзин тоноп, калју умзаныштарын илезине чыгарып, «тӱредер, јылаҥаштаар» (Ачыл. 17:3, 16). Бу јоголтыш «бир кӱн» чилеп коркышту тӱрген ӧдӧр, мындый јоголтыш бу ӱй кижиге јӧмӧжип турган улуска јаан тӱбек болор. Нениҥ учун дезе бу ӱй кижи: «Абакай-каан чылап отурып јадым. Мен тул эмезим, ачу-корон кӧрбӧзим» — деп, узак ӧйдиҥ туркунына мактанган (Ачыл. 18:7, 8).

12. Иегова нени эдерге бербес, нениҥ учун?

 ¹² Кудай бойыныҥ албатызын бу телекейдиҥ албатыларына јоголторго бербес. Иегованыҥ ишчилери Улу Вавилонноҥ чыгыгар деген јакаруны угуп, Кудайдыҥ адын аданып јӱргениле оморкоп јат (Ап. ижи 15:16, 17; Ачыл. 18:4). Анайда ок олор улуска тӧгӱн кудай јаҥдардаҥ чыгарга кӱчин кысканбай болужат. Оныҥ учун Иегованыҥ ишчилери Улу Вавилонныҥ кату-јоболын албас. Је олордыҥ бӱдӱмјизи тӱҥей ле ченелер.

13. а) Гог ол кем андый? б) Иезекииль 38:2, 8, 9-ла болзо, Армагеддон качан башталар?

¹³ Гогтыҥ табарузы. (Иезекииль 38:2, 8, 9 кычырыгар *.) Тӧгӱн кудай јаҥдардыҥ ончозы јоголтылган кийнинеҥ, Кудайдыҥ албатызы коркышту јотконноҥ арткан јаҥыс агаштый билдирер. Мыны кӧрӧлӧ, Сатана коркышту тыҥ атыйланып чыгар. Ол албатылардыҥ коалициязын (коалиция наций) Иегованыҥ ишчилерине удура барзын деп, чугулын «калју тындардыҥ айткан сӧстӧри» (ЈТ) ӧскӧртӧ айтса, кӧрмӧстӧрдиҥ ӱредӱзи, ажыра тӧгӱп ийер (Ачыл. 16:13, 14). Бу коалиция Агару Бичикте «Магог јериниҥ Гогы» деп адалып јат. Албатылар Кудайдыҥ албатызына табару баштаза, олор сӱрлеп айдылган Армагеддон деп јерде јуулыжар (Ачыл. 16:16).

14. Гог нени оҥдоп ийер?

¹⁴ Гог «кижиниҥ кӱчине», ол эмезе бойыныҥ мылтык-јепселине иженер (2 Лет. 32:8). Бис дезе, Иегова Кудайыска иженерис. Је албатылар бисти тенек улус деп кӧрӧр. Нениҥ учун дезе олор Улу Вавилонныҥ кудайлары оны «аҥнаҥ» ла «он мӱӱстеҥ» аргадап болбогонын кӧргӧн болор (Ачыл. 17:16). Оныҥ учун Гог бисти јоголторго јеҥил болор деп сананар. Анайып ол Кудайдыҥ албатызына  «јерди бӱркеп ийген булут чылап» табару эдер (Иез. 38:16). Је јаан удабай ла Гог бойын бойы туйуктап салганын билип ийер. Ого, Кызыл талайдыҥ јанында фараонго чылап, Иеговага удура јуулажып турганын оҥдоп ийерге келижер (Чыг. 14:1—4; Иез. 38:3, 4, 18, 21—23).

15. Иисус Армагеддонныҥ ӧйинде нени эдер?

¹⁵ Христос ло оныҥ теҥеридеги черӱлери, Гогтыҥ черӱзин оодо согуп, Иегованыҥ албатызын аргадап алар (Ачыл. 19:11, 14, 15). Је, Армагеддонныҥ ӧйинде албатыларды Кудайдыҥ улузына табару эдер керек деп тӧгӱндеп турган Кудайдыҥ эҥ јаан ӧштӱзиле, Сатанала, не болор? Иисус Сатананы ла кӧрмӧстӧрди бир муҥ јылга тӱби јок јерге (бездна) таштап ийер (Ачыл. 20:1—3).

16. а) Кудайды билеристи канайып кӧргӱзерис? б) Армагеддонныҥ ӧйинде Иегованы билер улусла не болор?

¹⁶ Чындыкта канча да јыл болгон болзоос, Армагеддонды ӧдӧргӧ, биске Иегованы билеристи ле «Иисус Христос Кайраканыстыҥ Сӱӱнчилӱ Јарына» багынып турганысты керектерисле кӧргӱзер керек (2 Фес. 1:7—9). Кудайды билери дегени, Кудайдыҥ нени сӱӱп турганын, нени сӱӱбей турганын ла бистеҥ нени некеп турганын билерин темдектейт. Анайда ок Кудайды сӱӱрин, ого сӧсуккур болорын ла јӱк ого бажырарын темдектейт (1 Иоанн 2:3—5; 5:3). Бис Кудайды чыннаҥ ла билер болзоос, ол до бисти билер ле јарадузын берет деп бӱдӱмјилӱ болодыс (1 Кор. 8:3, ЈТ). Бу дезе биске јаан кӱндӱ болот ло Армагеддондо аргадалатан тӧзӧлгӧ берет.

17. «Христос Кайраканыстыҥ Сӱӱнчилӱ Јарына» багынып турганысты канайып кӧргӱзедис?

¹⁷ «Христос Кайраканыстыҥ Сӱӱнчилӱ Јарына» Иисустыҥ ӱреткен ончо ӱредӱлери кирет (олор Кудайдыҥ Сӧзинде бичилип калган). Бис бу ӱредӱлер аайынча јӱрӱп турган болзоос, сӱӱнчилӱ јарга багынып турганысты кӧргӱзедис. Сӱӱнчилӱ јарга багынарга, Иеговага иштеерин баштапкы јерге тургузар керек, оныҥ чындык нормаларыла јӱрер  керек ле Каандык керегинде јарлаар керек (Матф. 6:33; 24:14). Анайда ок Христостыҥ майлаткан карындаштарына берилген јаан учурлу ижинде јӧмӧжӧр керек (Матф. 25:31—40).

18. Христостыҥ майлаткан карындаштары «ӧскӧ койлорды», болужы учун, канайып кайралдаар?

¹⁸ Удабас Кудайдыҥ майлаткан ишчилеринде «ӧскӧ койлорды» (ЈТ), болужы учун, кайралдайтан арга болор (Иоанн 10:16). Канайып кайралдаар? Армагеддонныҥ алдында 144 000 майлаткандардыҥ арткан-калганы кӧскӧ кӧрӱнбес тындар эдип теҥеридӧӧн алылар. Анайып ончо майлаткандар теҥеридеги черӱлерге кожулып, Гогты одо соголо, Кудайдыҥ «кара-бајырт» ишчилерин аргадап алар (Ачыл. 2:26, 27; 7:9, 10). Бу чындык ака-эјелер, теҥериге баргалак Иегованыҥ майлаткандарына јӧмӧшкӧнинеҥ, јаан сӱӱнчи алар!

19, 20. Армагеддонныҥ алдында болуп турган ченелтелерде Кудайга чындык артарга, биске нени эдер керек?

¹⁹ Бу калганчы кӱч ӧйлӧрдӧ Иегованыҥ кӧп ишчилеринде ченелтелер болуп јат. Је бу ченелтелерди бис ончобыс ӧдӱп, сӱӱнчилӱ артар аргалу (Иак. 1:2—4). Биске не болужар? Акту јӱректеҥ мӱргӱгени (Лука 21:36). Агару Бичикти кажы ла кӱн кычырып, шӱӱп сананганы, анайда ок удабас ла бӱдетен јилбилӱ судурларды шӱӱп сананганы (Сар. 77:12). Бу ончо неме, анайда ок јарлаар иште эрчимдӱ турушканы, биске бек бӱдӱмјилӱ артарга ла ижемјибисти ундыбай турарга болужар!

²⁰ Улу Вавилон јоголып, Армагеддон ӧдӧ берзе, кандый јаан сӱӱнчи болорын сананып ийзегер де! Анайда ок Кудайдыҥ ады ла оныҥ бийленер јаҥы бӱткӱлинче акталып калза, кандый јаан сӱӱнчи болор! (Иез. 38:23). Айдарда, Армагеддон — Кудайды билер ле оныҥ Уулына багынып турган ла учына јетире турумкай артатан улуска сӱӱнчилӱ јетирӱ болот (Матф. 24:13).