1. Иеговага иштеерге биске качан кӱч болот?

СЛЕРДИҤ кӧрӱмеерле, Иеговага иштеерге биске кандый айалгада кӱч болот? Јӱрӱмисте кӱчтер кӧп болуп турза ба эмезе ончо јакшы болзо бо? Уур-кӱчтер болзо, бис капшай ла Иеговага баштанадыс. Је ӱзе јакшы болзо, Иеговага иштеери экинчи јерге тура берердеҥ айабас. Бу керегинде Иегова ӧткӧн ӧйлӧрдӧ бойыныҥ албатызына озолондыра айткан (Јаҥ. т. 6:10—12).

2. Аса каан биске кандый тем кӧргӱскен?

² Аса каанныҥ темин кӧрӱп ийектер. Ол јаантайын Иеговага иженген, оныҥ учун ойгор болгон. Ол Иеговага кӱч те, јакшы да ӧйлӧрдӧ иштеген. Агару Бичикте: «Асаныҥ јӱреги оныҥ бастыра јӱрӱмине Иеговала кожо болгон» — деп айдылат (1 Каан. 15:14). Темдектезе, Аса Иуданы тӧгӱн кудайларга бажырарынаҥ арутаган: «ол ӧскӧ албатылардыҥ кудайларыныҥ тагылдарын ла бийик јерлерин бускан, агару таштарын оодып, агару тӧҥӧштӧрин кезип салган» (2 Лет. 14:3, 5). Аса «керек дезе бойыныҥ јааназыныҥ, Мааханыҥ, каан ӱй кижи деп адалып турган јаҥын айрып салган», нениҥ учун дезе ол албатыны чалуларга бажырзын деп јӱткӱткен (1 Каан. 15:11—13).

3. Бу јӧрмӧлдӧ бис нени шӱӱжерис?

³ Је Аса јӱк ле чалуларга бажырарын токтоткон эмес, ол Иуданыҥ албатызына Иеговага кайра јанып келерге болушкан. Кудай Асага ла оныҥ албатызына алкыжын јетирген: олордыҥ јеринде «он јыл амыр * болгон» (2 Лет. 14:1, 4, 6).  Бу јӧрмӧлдӧ бис Аса амыр ӧйлӧ канайып тузаланганын кӧрӧрис. Оноҥ бис амыр ӧйлӧ ойгор тузаланган баштапкы чактыҥ христиандарыныҥ темин кӧрӱп ийерис. Анайда ок мындый сурактыҥ каруузын билип аларыс: Бис токтоду јок ороондо јадып турган болзоос, амыр ӧйлӧ канайып ойгор тузаланарыс?

4. 2 Летопись 14:2, 6, 7-ле болзо, Аса амыр ӧйлӧ канайып тузаланган?

⁴ 2 Летопись 14:2, 6, 7 кычырыгар *. Аса албатыга мындый сӧстӧрлӧ баштанган: «[Иегова] биске бастыра јанынаҥ амыр берген». Је эмди амыр, јайым јӱретен ӧй деп каан сананбаган. Оныҥ ордына ол бек стенелерлӱ калалар тудуп баштаган. Аса каан Иуданыҥ албатызына: «Эм тура јер бистиҥ» — деп айткан. Ол бу сӧстӧрлӧ нени айдарга сананган? Бу дезе, Иуданыҥ улузы ӧштӱлериниҥ табарузынаҥ коркыбай, бойыныҥ јеринде јӱрӱп, калалар тудар аргалу болгонын кӧргӱскен. Аса албатыны амыр ӧйлӧ чын тузаланзын деп кӱӱнзеткен.

5. Аса бойыныҥ черӱзин нениҥ учун тыҥыткан?

⁵ Анайда ок бу ӧйдӧ Аса бойыныҥ черӱзин тыҥыткан (2 Лет. 14:8). Мынаҥ Аса Иеговага иженбеген деп кӧрӱнет пе? Јок эмей. Каанныҥ молјуларыныҥ бирӱзи — албатыны болотон кӱчтерге белетеери — деп, Аса билген. Ол Иудадагы амыр јӱрӱм качан бирде токтоп калар деп оҥдогон. Асаныҥ сананганы чын болуп калган.

6. Баштапкы чактыҥ христиандары амыр ӧйлӧ канайып тузаланган?

⁶ Баштапкы чактыҥ христиандары јаантайын истежӱлерге табартып туратан. Је олордыҥ јӱрӱминде амыр ӧй база болгон. Ака-эјелер бу ӧйлӧ канайып тузаланган? Олор сӱӱнчилӱ јарды оноҥ эрчимдӱ јарлаган. Апостолдордыҥ ижинде јуун «Кайраканныҥ алдында айап», тоозыла кӧптӧгӧн деп айдылат. Бу дезе, ака-эјелердиҥ эрчимдӱ јарлаганыныҥ једими болгон. Амыр ӧйдӧ олордыҥ эрчимдӱ јарлаганына Иегова алкыжын јетирген (Ап. ижи 9:26—31).

7, 8. Павел ле ӧскӧ христиандар сӱӱнчилӱ јарды јарлаарга кандый ла арганы канайып тузаланганын куучындап беригер.

⁷ Баштапкы чактыҥ христиандары јарлаарга, кандый ла арганы тузаланган. Темдектезе, апостол Павел Эфесте «јаан иштер эдетен аргалар ачыл[ат]» деп оҥдоп ийеле, ол бу калада јарлаарга ла ӱренчиктер белетеерге артып калган (1 Кор. 16:8, 9).

⁸ Павел ле ӧскӧ дӧ христиандар б. э. 49-чы да јылында кӧп улуска јарлаган. Бу јылда Иерусалимдеги апостолдор ло аксагалдар кестирӱ јанынаҥ сурактыҥ аайына чыккандар (Ап. ижи 15:23—29). Бу чыгарган јӧпти јуундарга јетирген кийнинде, ака-эјелер Кайраканныҥ сӧзин эрчимдӱ јарлап баштаган (Ап. ижи 15:30—35). Бу кандый једим экелген? Агару Бичикте айдылат: «Серкпелер бӱдетениле тыҥып, тоозыла кӱнӱҥ сайын арбындап турган» (Ап. ижи 16:4, 5).

9. Бастыра ороондордо Иегованыҥ Керечилеринде кандый арга бар? Бойыска кандый сурак берер керек?

⁹ Бӱгӱнги кӱнде кӧп ороондордо удурлажу јогынаҥ јарлаарга јараар. Слер бу ороондордыҥ бирӱзинде јадып турган болзогор, бойоордоҥ сурагар: «Иеговага јайым иштеер аргала мен канайып тузаланадым?» Бис бу телекейдиҥ калганчы кӱндеринде јадып јадыс. Бистерге бу кайкамчылу ӧй болуп јат. Нениҥ учун дезе бис бастыра телекейде болуп турган јарлайтан ла ӱренчиктер белетейтен иште туружып јадыс (Марк 13:10). Бистиҥ алдыста кӧп аргалар ачылып јат.

10. 2 Тимофейге 4:2-деги сӧстӧр бисти неге кӱӱнзедет?

¹⁰ Јайым ӧйлӧ канайып чын тузаланар? (2 Тимофейге 4:2, ЈТ кычырыгар.) Слер бойоор эмезе билегердиҥ та кемизи де кӧп јарлаарга јӱрӱмеерде та нени де солып болороор бо деп сананып кӧрӱгер (керек дезе пионердиҥ ижин баштаарга)? Эмди акча-јӧӧжӧ јууйтан ӧй эмес. Не дезе, олор улу-тӱбектиҥ ӧйинде чек керек јок болор (Укаа 11:4; Матф. 6:31—33; 1 Иоанн 2:15—17).

11. Кезик ака-эјелер улуска Иегова керегинде билип алзын деп болужарга, нени эдет?

¹¹ Кӧп ака-эјелер улуска Иегова керегинде билип алзын деп болужарга, јаҥы тил ӱренип алган. Кудайдыҥ организациязы мындый јарчыларга болужарга, сӱреен кӧп тилдерге библиялык бичиктер ле материалдар чыгарат. Анайып 2010 јылда бистиҥ бичиктер 500 кире тилге бар болгон. А эмди дезе, 1 000 тилдеҥ ажыра.

12. Улус чындыкты тӧрӧл тилине канайып угат? Тем куучындап беригер.

¹² Улус чындыкты тӧрӧл тилине канайып угат? Мемфисте (Теннесси штат, США) регион курултайда болгон эјениҥ темин кӧрӱп ийектер. Бу конгресс эјениҥ киньяруанда деп тӧрӧл тилине ӧткӧн. Руандада, Демократический Республика Конгодо ло Угандада киньяруанда тилге кӧп саба улус куучындап јат. Эје мынайып куучындаган: «Мен 17 јыл кайра Америкага кӧчӧ бергем,  је эмди курултайда айдылган ончо немени баштапкы ла катап јакшы оҥдодым». Тӧрӧл тилине ӧткӧн программа бу эјениҥ јӱрегине тыҥ тийген. Слердиҥ јууныгардыҥ јеринде јадып турган улуска јарлаарга, слер ӧскӧ тил ӱренер аргалу ба? Кижиге сӱӱнчилӱ јарды тӧрӧл тилине куучындазаар, ол сӱӱнип, слерди јакшы угар болор. Слердиҥ албаданганаар кыйалта јогынаҥ кайралдалар!

13. Россияда акалар амыр ӧйлӧ канайып тузаланган?

¹³ Јаҥдар јарлаар ишке токтодулар тургузып турганынаҥ улам, кезик ака-эјелер јайым јарлап болбойдылар. Темдектезе, Россияда мындый айалга болгон. Мында кӧп јылдардыҥ туркунына Иегованыҥ Керечилери истеткен, је 1991 јылда тулаан айда олордыҥ ижине јасак аайынча јараду берилген. Бу ӧйдӧ Россияда Каандыктыҥ јарчыларыныҥ тоозы 16 000 кире болгон. Је 20 јыл ӧткӧн кийнинде олордыҥ тоозы 160 000-наҥ ажа берген! Бу тоолордоҥ сӱӱнчилӱ јарды јайым јарлаарга ачылган аргала акалар ойгор тузаланган деп кӧрӱнет. Амыр ӧй ӧдӱп те калган болзо, бу ака-эјелер эрчимдӱ јарлайдылар. Олор Иеговага, бойыныҥ айалгазында канча кире аргазы бар, оноҥ ло ары иштегилеп јат.

14, 15. Иегова Асага болужарга, бойыныҥ ийде-кӱчин канайып тузаланган?

¹⁴ Асаныҥ кӱндериндеги амыр ӧй Иудада эфиоптордыҥ миллиондор тоолу черӱзи табару эдерде токтоп калган. Бу черӱни Зара башкарган. Зара бу јуу-согушта јеҥип алар деп алаҥзыбаган. Је Аса ӧштӱниҥ јаан черӱзинеҥ коркыбаган, а Иегова Кудайына иженген. Аса мынайып мӱргӱген: «Иегова Кудайыс биске болушсаҥ, нениҥ учун дезе бис сеге иженип јадыс. Бу јаан  черӱге удура сениҥ адыҥнаҥ туруп чыктыс» (2 Лет. 14:11).

¹⁵ Эфиоптордыҥ черӱзи иудейлердиҥ черӱзинеҥ эки катапка кире кӧп тӧ болгон болзо, Кӱчтӱдеҥ Кӱчтӱ Иегова Кудай бойыныҥ албатызына болужар деп, Аса билген. Иегова Асаныҥ мӱргӱӱлин уккан: эфиоптордыҥ черӱзи одо соктырткан (2 Лет. 14:8—13).

16. Амыр ӧй удабас токтоор деп, бис кайдаҥ билерис?

¹⁶ Келер ӧйдӧ бистиҥ кажыбысла не болорын бис јакшы билбезис. Је Иеговага јайым иштейтен амыр ӧй качан бирде токтоп калар деп билерис. Нениҥ учун дезе Иисус калганчы кӱндерде оныҥ ӱренчиктерин «ончо калыктар јаман кӧрӧр» деп айдып салган (Матф. 24:9). Анайда ок апостол Павел: «Кудайга беринип, Христос Иисустыҥ бойында јӱрер кӱӱндӱ ончо улус истедер» — деп айткан (2 Тим. 3:12). Бис Агару Бичиктеҥ Сатана эмди «тыҥ атыйланып калган» деп билерис (Ачыл. 12:12). Оныҥ чугулы биске тийбес деп сананып турган болзоос, бис бойысты бойыс тӧгӱндеп јадыс.

17. Слердиҥ бӱдӱмјигер канайып ченелер болор?

¹⁷ Удабас ла бистиҥ кажыбыстыҥ ла бӱдӱмјибис ченелер. Телекейге «јер бӱдердеҥ бери эмдиге јетире болбогон... улу ачу-корон келер» (Матф. 24:21). Ол ӧйдӧ јуук улузыс биске удура болордоҥ айабас. А агару ижис дезе токтодуда болуп калардаҥ айабас (Матф. 10:35, 36). Слер Аса чылап, Иегова слерге болужар ла слерди корулаар деп, бӱдереер бе?

18. Еврейлерге 10:38, 39-ла болзо, болотон кӱчтерге белетенип аларга биске не болужар?

¹⁸ Иегова бисти келер ӧйдӧ болотон кӱчтерге белетеп, бӱдӱмјибисти тыҥыдып јат. Ол бисти кӧгӱс јанынаҥ бек болзын деп, кӧгӱс курсакты «бӱдӱмјилӱ ле керсӱ кул» ажыра ӧйи-ӧйинде берет (Матф. 24:45). Је бис бойыстыҥ јаныстаҥ Иеговага бӱдӱмјибисти база тыҥыдар учурлу. (Еврейлерге 10:38, 39 кычырыгар.)

19, 20. 1 Летопись 28:9-тагы сӧстӧрди ајаруга алып, бойыска кандый сурактар берер керек ле нениҥ учун?

¹⁹ Биске Аса ла чылап «Иегованы бедиреер» керек (2 Лет. 14:4; 15:1, 2). Бис Иегова керегинде билгирлер алып, сууга чӧҥӱрилзеес,  оны бедиреп баштайдыс. Мыныҥ кийнинде Иеговага сӱӱжис тыҥызын деп, оноҥ ло ары канча кире аргабыс бар, ончоны эдедис. Бойыстаҥ сураарга јараар: «Мен јуунныҥ туштажуларын божотпойдым ба?» Бис бу туштажулардаҥ кӧгӱс ийде-кӱч ле ака-эјелердеҥ оморкоду аладыс (Матф. 11:28). Анайда ок мындый сурактарды шӱӱп сананыгар: «Мен Агару Бичикти јаантайын шиҥдейдим бе?» Слер билелӱ болзоор, кажы ла неделеде билелик бажырыш ӧткӱредеер бе? А јаҥыскан јадып турган болзоор, билелӱ улус чылап, кажы ла неделеде Агару Бичикти тереҥжиде шиҥдеерге, ӧй табадыгар ба? Бойоордыҥ айалгалараарда јарлаарга ла ӱренчиктер белетеерге, ончо аргаларды тузаланадаар ба?

²⁰ Бойыска бу сурактарды нениҥ учун берер керек? Агару Бичикте Иегова бистиҥ јӱрегисти ле кандый ла санааны шиҥдеп јат деп айдылат. (1 Летопись 28:9 кычырыгар *.) Бистиҥ бойыска мыны база эдер керек. Слерге амадулараарды ла кӧрӱм-санаагарды солыыр керек деп кӧрӱп турган болзоор, Иегованаҥ болуш сурап, мӱргӱгер. Болотон ченелтелерге эмди ле белетенетен ӧй болуп јат. Айдарда, амыр ӧйлӧ ойгор тузаланарга слерге не де чаптыгын јетирбезин!